Filipenses 2 - Xochapa Mixteco

Nda̱sa ni̱nu̱ Cristo mií ra, sundi Ndioxi ta chi̱nuu sukun ni ñaꞌa ra

¹ Na taꞌan yo, xa ta̱xi Cristo ndee ndaꞌa yo ya xaꞌa yo tindee ini xiꞌin taꞌan yo, saa ta̱xi ra ndee ndaꞌa yo sindiko yo ini taꞌan yo, ta íyo Tachi Ndioxi xiꞌin yo táku ya ini yo, saa kúꞌvi ni ini yo xíni taꞌan yo xaꞌa ra, ta xaꞌa ra kua kúndaꞌvi ini yo xíni taꞌan yo.

² Yakan vitin ta xíkan ni i ya mani nuu ndo xaa ndúvi ni ndo ya kúni i saa kua xaa sii ni ndo ini i: vívií koo ndo xiꞌin taꞌan ndo, kuꞌvi ni ini ndo kuni taꞌan ndo, ta iin yuꞌu koo ndiꞌi ndo xiꞌin taꞌan ndo, iin kachi ndikani ini ndiꞌi ndo.

³ Ndiꞌi ya íkan ndo, ta nda iin ya chïnuu vaꞌa ndo tuꞌun ndo xiꞌin, kütai ni ini ndo xaꞌa ya íkan ndo. Ni̱nu̱ xaa ndo mií ndo. Chinuu vaꞌa ni ndo tuꞌun na taꞌan ndo, tá íin naꞌa, na ndee ni ka ndáa yaꞌvi nuu ndo, saa ikan ndo xiꞌin na.

⁴ Nda iin ndo ta ndüku ndo ya vaꞌa ndisaa xaꞌa mií ndo, nduku ndo ya vaꞌa xaꞌa inka naꞌa.

⁵ Tá kuꞌva ndi̱xiyo ni̱nu̱ ni ini mií Tata yo Jesucristo kivi ki̱xi ra ñuu ivi yóꞌó, kuꞌva saa xíniñuꞌu ndo koo ndo,

⁶ chi mií ra, vani Ndioxi ku ra, tá kuꞌva íyo Iva ra Ndioxi saa káa ra, ta köo iin tuun ndíndasa ra mií ra ya kúu ra Ndioxi,

⁷ ndi̱xiyo ndúvi ra si̱ndoo ra ya toꞌo ku̱u mií ra nuu ndivi, ta ndu̱u ra tá káa iin moso, ra xáa chiñu ndaꞌvi, saa ka̱ku ra tá kuꞌva káku mií yo ivi yóꞌó.

⁸ Xaꞌa ya nda̱sa ra mií ra taꞌan yo ivi yóꞌó, nda̱sa ni̱nu̱ ra mií ra. Xi̱ni soꞌo ndiꞌi ra ya ndi̱kaꞌan Ndioxi xiꞌin ra, vani ndi̱kaꞌan Ndioxi xiꞌin ra kuvi ra ndaꞌa cruzin, ta xa̱a súvi ndiꞌi ra ya.

⁹ Xaꞌa ya yóꞌó kua chi̱nuu sukun ni Ndioxi ra, saa ta̱xi ra iin kivi ra ndaꞌa ra, ta iindaa kivi ra ikán kua ndee ni ka chee nuu ndiꞌi ndá ka kivi ya íyo.

¹⁰ Yakan kua ndiꞌi ni kúu naꞌa, tá ná kuni soꞌo na kivi ra, ta sikusiti ndiꞌi na nuu ra. Ta saa sikusiti ndiꞌi ni kúu na ndóo nuu ñuꞌú xiꞌin ya íyo nuu ndivi tin ndiꞌi ya íyo tixin ñuꞌú ni̱nu̱ nuu ra.

¹¹ Ta ndiꞌi ni kúu naꞌa ndikuni ra ta kaꞌan na xaꞌa ra, kachi na saa: “Jesucristo ku ra Chee ni xáꞌnda chiñu nuu ndiꞌi yo”, kachi na. Ta saa kua ndikunuu sukun ni ya toꞌo Iva yo Ndioxi nduu chee ni ya.

Tá íin ñu̱ꞌu̱ yéꞌe̱ saa íin na ndíkun Jesucristo

¹² Na taꞌan yo, na kúꞌvi ni ini i xíni i, yachi tá ndi̱xiyo i xiꞌin ndo ta ndiꞌi saa ichí xa̱a súvi ni ndo tuꞌun Ndioxi ya ndi̱kaꞌan i xiꞌin ndo. Ta saa tu vitin va, vani köo íyo i xiꞌin ndo ta ndee ni ka xíniñuꞌu ndo xaa nduxa ndo ya ikan ndo ya vaꞌa taꞌan ya íkan naꞌa, na síkaku Ndioxi. Ikan ndo saa xaꞌa ya xáa toꞌo ndo Ndioxi, saa tu xaꞌa ya íꞌvi ndo xíni ndo ra.

¹³ Saa chi Ndioxi ku ra chíkaa ya vaꞌa ini ndo ya kuni ndo ikan ndo ya vaꞌa, ta suvi ra chíndee ndóꞌo̱ ya xaa súvi ndo ya kúni mií ra.

¹⁴ Ndá ka mií chiñu íkan ndo ta vívií ikan ndo ya, käꞌan kuachi ndo, ta ni käni taꞌan ndo xiꞌin taꞌan ndo xaꞌa ya íkan ndo.

¹⁵ Ta saa ni naꞌa, ta nïꞌi na kuachi ndo ya kaꞌan na xaꞌa ndo, chi seꞌe Ndioxi ku ndo. Vani tañu naꞌa, na kini, na iku ini ndóo ndo, ta tá kuꞌva ndíyeꞌe kiti kimi nuu naá, saa ndiyeꞌe ndo ñuu ivi yóꞌó, chi yóꞌó ta tá káa nuu naá ni, saa káa ya.

¹⁶ Chi tuun ni ndíkun ndo tuꞌun ra ya táxi táku ndo xiꞌin Ndioxi. Tá íkan ndo ya yóꞌó, ni yeꞌe, ta vaꞌa ni kúni i xiꞌin ndo. Chi kivi tá ná ndiko koo Cristo ñuu ivi yóꞌó ta kuni ra ya ndixa kua xa̱a chiñu i xiꞌin ndo, ta köo ndi̱xaa chiñu uun i xiꞌin ndo.

¹⁷ Tá tu xíniñuꞌu kuvi i xaꞌa Cristo, ta xa íyo ndúvi va i ikan i saa, ta kúsini ni i chi kuvi i nuu Ndioxi ya soko i mií i nuu ra, ta nduu i tá kuꞌva káa nduta, rá sóko na nuu ra, nuu chindee taꞌan i xiꞌin ndo sixinu i ya sóko ndo nuu ra xaꞌa ya ndee ni kándixa ndo ra. Xaꞌa ya ñaa kua kúsini ni i ikan i ndá ka ñaꞌa xaꞌa ndo.

¹⁸ Ta saa tu ndóꞌo̱ va kusini ndo xiꞌin i tá kuꞌva kúsini i.

Káꞌan ra Pablo xaꞌa ra Timoteo xiꞌin ra Epafrodito

¹⁹ Mií Ndioxi ná kaꞌan ta kama ni tiꞌvi i ra Timoteo ñani yo xaa ra koto ra ndóꞌo̱, ta saa kusini ni i chi ndiko koo ra xiꞌin tuꞌun kundaa ini i xaꞌa ndo.

²⁰ Köo ka inka naꞌa, na ndee ni ndíꞌi ini xaꞌa ndo tá kuꞌva ndíꞌi ni ini ra Timoteo ñani yo xiꞌin yeꞌe, ndee ni ndíꞌi ini ra xaꞌa ndo.

²¹ Chi ndiꞌi ka na ta ndisaa xaꞌa ya kúni mií va na kua ndíꞌi ni ini na, köo ndíꞌi ini na xaꞌa ya kúni Jesucristo.

²² Sundi ra Timoteo, ta xa xíni ndo ini ra, xáa chiñu ni ra xiꞌin i káꞌan ndoso nde tuꞌun vaꞌa xaꞌa Tata yo Jesucristo, nda tá káa seꞌe mií i saa káa ra, chíndee ni ra yeꞌe.

²³ Ta ná kundaa ini i ndá kuꞌva kindoo tindoꞌo ya ndóꞌo i, saa kama ni tiꞌvi i ra xaa ra nuu ndo.

²⁴ Ni mií i ta ndáa ni ini i xíni i Ndioxi, ya kama ni taxi ra ichí ndaꞌa i xaa i nuu ndo koto i ndóꞌo̱.

²⁵ Ta xíka tu ini i ya xíniñuꞌu i sindiko koo i ra ñani yo, ra Epafrodito xaa ra nuu ndo. Ndee ni xa̱a chiñu ra xiꞌin i, nda tá kuꞌva íkan nda lapa ndee ni xáa chiñu nda, kuꞌva saa xa̱a chiñu ra xiꞌin i. Ta ndi̱xaꞌvi ni ndo ya ti̱ꞌvi ndo ra ki̱xi ra nuu i chi̱ndee taꞌan ra xiꞌin i, ta̱xi ra ñaꞌa ya xíniñuꞌu i ndaꞌa i.

²⁶ Tíꞌvi i ra xaa ra nuu ndo, chi kúni ni ra kuni ra ndóꞌo̱, saa ndíꞌi ni ini ra xaꞌa ndo chi ku̱ndaa ini ndo xaꞌa ra ya ndee ni ndo̱ꞌo ra ku̱ꞌvi ra.

²⁷ Ta ya ndaa kua ku̱ꞌvi ra, ndee ni ndee ndo̱ꞌo ra siloꞌo yuꞌu kuvi ra, ta mií Ndioxi ku ra ku̱ndaꞌvi ini xi̱ni ra yakan ndu̱vaꞌa ra, ta süvi iindaa ra yóꞌó ku ra ndi̱kundaꞌvi ini ra kuni ra xaꞌa ya si̱nduvaꞌa ñaꞌa ra, nda yeꞌe ku̱ndaꞌvi ni ini ra xi̱ni ra ya ná küsuchi ni ka ini i, chi xa íyo ni ya suchi ini i.

²⁸ Xaꞌa ya ñaa kua kama ni tíꞌvi i ra xaa ra nuu ndo ya kuni ndo ra ta saa kusini ni ndo. Saa tu yeꞌe va kündiꞌi ni ka ini i xaꞌa ndo ya ndíꞌi ni ini ndo xaꞌa ra.

²⁹ Tá ná xaa ra nuu ndo, ta ndikiꞌin vaꞌa ndo ra, kusini ni ndo xiꞌin ra. Chi ra yóꞌó ta ndee ni xáa chiñu ra nuu Tata yo Jesucristo. Ta ndiꞌi na íkan tá kuꞌva íkan ra yóꞌó ta xaa toꞌo ni ndo na.

³⁰ Xaꞌa ya xáa chiñu ra nuu Tata yo ta siloꞌo kuvi ra, ta ni köo ndi̱kiꞌin ra kuenta xaꞌa ya. Chi̱ndee ni ra yeꞌe nuu ndo, chi ndóꞌo̱, ta köo ndi̱kuvi kixi xaꞌa ndo chindee ndo yeꞌe.