Filipenses 1 - Xochapa Mixteco

Tuꞌun mani kuaꞌan nuu na veꞌe ñuꞌu na ndóo ñuu Filipos

¹ Yeꞌe Pablo xiꞌin ra Timoteo, nde xáa chiñu nuu Tata yo Jesucristo ku nde táa tutu yóꞌó xaa ya nuu ndiꞌi ndóꞌo̱, na ñani yo, na i̱í, na ndíkun Jesucristo, ndóo ñuu Filipos. Tíꞌvi ni nde tuꞌun mani xaa ya nuu ndiꞌi ndo, saa tu tá kúu ndiꞌi ndóꞌo̱ na kúnaꞌnu xáꞌnda chiñu veꞌe ñuꞌu, xiꞌin ndiꞌi na chíndee taꞌan xiꞌin ndo.

² Ta mií Iva yo Ndioxi xiꞌin Tata yo Jesucristo ná chikaa ni ya vaꞌa ndóꞌo̱ saa ná taxi ra koo vaꞌa ni ini ndo.

Ndá kuꞌva káꞌan ra Pablo xiꞌin Ndioxi xaꞌa na ñuu Filipos

³ Ndiꞌi saa ichí tá ndíkaꞌán ini i xaꞌa ndo ta táxi i ndixaꞌvi xaꞌa ndo ndaꞌa Ndioxi yo, ra káñuꞌu i.

⁴ Ta kúsini ni i tá káꞌan i xaꞌa ndo xiꞌin ra ndiꞌi saa ichí.

⁵ Saa chi ndóꞌo̱, ta nda kivi núnu̱ú iin saa nda kivi vitin köo ndíko koo ini ndo ya chíndee taꞌan ndo xiꞌin nde ya káꞌan ndoso nde tuꞌun vaꞌa xaꞌa Tata yo Jesucristo.

⁶ Ta yeꞌe, ta xa kúndaa teꞌe ini i xaꞌa ndo, chi Ndioxi ku ra xa̱á xáa chiñu xiꞌin nima ndo, ta saa xaa chiñu ka ra xiꞌin ndo ndakua ná xinu ndo nduu ndo tá kuꞌva kúni mií ra, nda kivi tá ná ndiko koo Tata yo Jesucristo ñuu ivi yóꞌó.

⁷ Ya vaꞌa ni kua káꞌan i saa xaꞌa ndiꞌi ndo chi kúꞌvi ni ini i xíni i ndóꞌo̱, chi ndóꞌo̱, ta ndiꞌi saa ichí íyo ndo xiꞌin i ya chíndee taꞌan ndo xiꞌin i, ta süvi ndisaa tá ndíkaa i veꞌe kàà kua íkan ndo saa xiꞌin i, ni nuu na chiñu kuaꞌan i ndíkuiin i xaꞌa tuꞌun vaꞌa xaꞌa Tata yo Jesucristo ndá kuꞌva kua sikaku ra na, ta iin káchi íyo ndo xiꞌin i xíto ndo ya íkan Ndioxi ya vaꞌa xiꞌin i.

⁸ Ta mií Ndioxi ku ra ndíkuiin xaꞌa ya káꞌan i saa xiꞌin ndo ya kúꞌvi ni ini i xíni i ndóꞌo̱, chi mií Jesucristo ku ra ta̱xi ya kuꞌvi ini i kuni i ndóꞌo̱, tá kuꞌva kúꞌvi ni ini mií ra xíni ra ndóꞌo̱.

⁹ Káꞌan ni i xaꞌa ndo xiꞌin Ndioxi ya ná kuꞌvi ni ka ini ndo kuni ndo Ndioxi iin iin kivi. Ta saa ná kuꞌvi ni tu ini ndo kuni ndo inka naꞌa va. Ta saa ná niꞌi ni ka ndo ya ndíchi nuu ra ya kuchiñu ndo kundaa ni ka ini ndo.

¹⁰ Ta saa kuchiñu ndo ndikaxin ndo ikan ndo nina ya vaꞌa, ya ndee ni ndáa yaꞌvi nuu Ndioxi, ta kivi ná ndiko koo Jesucristo ta nditaꞌan ra ndóꞌo̱ ya íyo vií ni ndo nuu ra, ta köo kuachi kúu mií ndo.

¹¹ Saa kua ikan ni ndo ya vaꞌa, ya ndaa nuu ra, ta tixin mií Tata yo Jesucristo kua ikan ndo saa, ta saa kua kaꞌan vaꞌa ni naꞌa xaꞌa Ndioxi, ta ndikunuu vaꞌa ni ya toꞌo ra.

Ndisaa xaꞌa Cristo kua táku i

¹² Na taꞌan yo, kúni i ná kundaa ini ndo xaꞌa ya ndíkaa i veꞌe kàà yóꞌó. Chi xaꞌa ya chíndee taꞌan ya xiꞌin i xíta niꞌnu ka tuꞌun vaꞌa xaꞌa Tata yo Jesucristo va kua ndíkaa i yóꞌó.

¹³ Chi ndiꞌi nda lapa, nda ndáa veꞌe kàà yóꞌó xiꞌin ndiꞌi ka naꞌa, kúndaa ini na xaꞌa i ya núꞌni i xiꞌin cadena yóꞌó xaꞌa ya xáa chiñu i nuu Jesucristo.

¹⁴ Ta xaꞌa ya ndóꞌo i saa ndíkaa i veꞌe kàà yóꞌó kua chíndee taꞌan ya xiꞌin kuaꞌa ni na ñani yo ndúndee ka ini na, köo íꞌvi na kaꞌan ndoso na tuꞌun vaꞌa xaꞌa Tata yo Jesucristo.

¹⁵ Sundi sava na ta káꞌan ndoso na xaꞌa ra xiꞌin ya uní ini, chi kúni na keꞌe taꞌan na xiꞌin i ya sikáku na kuachi xiꞌin i. Sundi sava na ta ndinuꞌu ni va ini na káꞌan ndoso na xaꞌa tuꞌun ra.

¹⁶ Chi xaꞌa ya kúni mií va na kua káꞌan ndoso na xaꞌa tuꞌun ra, süvi ndinuꞌu ini na íkan na saa, na síkaku kuachi xiꞌin i ndíkaa i veꞌe kàà yóꞌó va ku na.

¹⁷ Ta naꞌa, na káꞌan ndoso xaꞌa ra xiꞌin ndinuꞌu ini na, ta xaꞌa ya kúꞌvi ni ini na xíni na yeꞌe kua íkan na saa, chi xíni na Ndioxi ku ra táxi ndíkaa i veꞌe kàà yóꞌó ya ndikuiin i xaꞌa tuꞌun vaꞌa xaꞌa ra.

¹⁸ Ta vaꞌa va ná kundaa ini ndo án ndinuꞌu ni ini sava na íkan na ya, án süvi ndinuꞌu ini na íkan na saa, sundi ndiꞌi na káꞌan xaꞌa ra, ta ya ñaa kua xáa sii ni ini i, ta saa kusini ni ka i.

¹⁹ Saa chi xíni i xaꞌa ya káꞌan ndo xiꞌin Ndioxi xaꞌa i ya chíndee Tachi Jesucristo yeꞌe, ta kama keta i veꞌe kàà yóꞌó kuꞌun ndíka i.

²⁰ Chi yeꞌe ta ya ndee ni kúni i kua xaa kaꞌnu ni i Tata yo Jesucristo xiꞌin ikin kuñu i ndiꞌi saa ichí tá táku i án tá ndi̱xiꞌi i, saa chi kúndaa teꞌe ini i ya täxi Tata yo kukaꞌan nuu i, ta siín mií ra ná chindee yeꞌe ya kuchiñu i xaa kaꞌnu ni i ra vitin xiꞌin ndiꞌi saa kivi ya vaxi.

²¹ Chi tá tu táku i, ta xaꞌa ya xaa súvi i chiñu nuu mií Cristo kua táku i, án tá yeꞌe ndi̱xiꞌi ku i, ta vaꞌa ni ka kée va i.

²² Ya ndíkani ini i kua, tá tu táku ka i ñuu ivi yóꞌó ta kuchiñu xaa chiñu ka i nuu Tata yo Jesucristo, túvi i. Sundi yeꞌe ta ni köo xíni i unkua kúni i ikan i.

²³ Ni köo xíni i unkua vaꞌa ikan i, ¿án vaꞌa ka ya kuvi i, án vaꞌa ka ya kutaku i? Sundi ya ndíkani ini i kua: vaꞌa ni ka kua ná kuvi i, túvi i, chi koo i xiꞌin Cristo.

²⁴ Ta inka ñaꞌñu ku tu ya kúni i kutaku i, chi xíniñuꞌu i chindee taꞌan i xiꞌin ndo.

²⁵ Ta ya túvi yeꞌe kua taxi ka Ndioxi ichí ndaꞌa i ya koo i xiꞌin ndo ñuu ivi yóꞌó, ya kuchiñu chindee taꞌan i xiꞌin ndo, ta saa kusini ni ka ndo ya ndáa ni ini ndo xíni ndo Tata yo Jesucristo.

²⁶ Tá ná xaa tuku i koto i ndóꞌo̱, ta kusini ni ndo, chi kuni soꞌo ndo ya vaꞌa i̱kan Tata yo Jesucristo xiꞌin i, ta saa xaa kaꞌnu ni ndo ra.

²⁷ Ta kuenta ni koo ndo xaa súvi ndo ndisaa ya káꞌan tuꞌun ra xiꞌin ndo. Án xaa i koto i ndóꞌo̱ án xäa i nuu ndo, sundi kúni i kuni soꞌo i tuꞌun vaꞌa xaꞌa ndo ya ndaku ni íyo ndo xiꞌin tuꞌun Tata yo, ta iin yuꞌu ni ku ndo, iin ítaꞌan ndiꞌi ndo xáa chiñu ndo xaꞌa ra.

²⁸ Ta yeꞌe kúni i kuni soꞌo i xaꞌa ndo ya köo íꞌvi ndo xíni ndo naꞌa, na kúndasi nuu xíni ndóꞌo̱. Chi tá ná kuni na ya íkan ndo saa, ta saa kua kundaa teꞌe ni ini na ya kuaꞌan na ichí nuu ndiꞌi xaꞌa na, ta ndóꞌo̱, ta kaku ndo, saa chi Ndioxi ku ra chindee taꞌan xiꞌin ndo.

²⁹ Ta mií Ndioxi ku ra chi̱kaa ya vaꞌa ndóꞌo̱ ya kandixa ndo Cristo xiꞌin ya ndoꞌo ni ndo xaꞌa ra.

³⁰ Chi iin káchi tíxuꞌvi ni yo xaꞌa ra vitin. Xa xíni mií ndo ndá kuꞌva ndo̱ꞌo i yachi, ta saa tu xíni soꞌo ndo xaꞌa i ndá kuꞌva ndóꞌo i vitin va.