FILEMÓN 1 - Xochapa Mixteco

Káꞌan ndioxi ra Pablo xiꞌin ra Filemón

¹ Yeꞌe ku ra Pablo, ra ndíkaa veꞌe kàà yóꞌó, ta xaꞌa ya káꞌan ndoso i tuꞌun vaꞌa xaꞌa Tata yo Jesucristo kua ndíkaa i yóꞌó. Ta xiꞌin ra Timoteo ñani yo kua táa i tutu yóꞌó xaa ya ndaꞌa un ñani yo Filemón, chi yóꞌo̱, ta xáa chiñu un nuu Tata yo Jesucristo tá kuꞌva xáa chiñu ndeꞌe nuu ra, ta ndee ni kúꞌvi ini nde xíni nde yóꞌo̱.

² Saa káꞌan ndioxi tu nde xiꞌin yá kuꞌva yo, yá Apia, yá kúꞌvi ni ini nde xíni nde, xiꞌin ra Arquipo ñani yo. Iin káchi ndee ni xáa chiñu ra tá kuꞌva xáa chiñu ndeꞌe nuu Tata yo Jesucristo. Saa káꞌan ndioxi tu nde xiꞌin na veꞌe ñuꞌu, na ndíkitaꞌan xiꞌin un veꞌe un.

³ Ta mií Iva yo Ndioxi xiꞌin Tata yo Jesucristo ná ikan ni ya vaꞌa xiꞌin un, ná taxi ra ya vaꞌa koo ya ini un.

Kándixa ni ra Filemón Ndioxi saa kúꞌvi ni ini ra xíni ñaꞌa ra

⁴ Ndiꞌi saa ichí tá káꞌan i xiꞌin Ndioxi ra káñuꞌu ni i ta ndíkaꞌán ni ini i xaꞌa un, saa táxi ni i tixaꞌvi ndaꞌa ra ta káꞌan ni i xaꞌa un xiꞌin ra.

⁵ Saa chi ku̱ndaa ini i xaꞌa un ya ndee ni kúꞌvi ini un xíni un Tata yo Jesucristo, saa ndáa ni ini un xíni un ra, ta saa kúꞌvi ni tu ini un xíni un na ñuu Ndioxi, na i̱í va.

⁶ Ta káꞌan ni i xiꞌin Ndioxi xaꞌa un ya ná chindee ni ra yóꞌo̱ xaꞌa ya ndee ni ndáa ini un xíni un ra, saa kua kuchiñu kundaa ini un ikan un ya vaꞌa xaꞌa ya kúꞌvi ni ini un xíni un Tata yo Jesucristo.

⁷ Ta yeꞌe, kúsini ka vi i xiꞌin un ñani yo, Filemón. Vaꞌa ka vi kúni i xiꞌin un chi xaꞌa ya kúꞌvi ni ini un xíni un na veꞌe ñuꞌu, na i̱í kua chíkaa ni un ndee xiꞌin na, vaꞌa ni kúni na.

Ndúku ra Pablo ya mani nuu ra Filemón xaꞌa ra Onésimo

⁸ Ñani yo, yeꞌe, ta íyo ni va ichí i ya kaꞌnda i chiñu nuu un ya xaa súvi un ya kúni i, xaꞌa ya kúu i ra xíka káꞌan ndoso tuꞌun vaꞌa xaꞌa Tata yo Jesucristo,

⁹ sundi yeꞌe, ta köo kúni i ikan i saa xiꞌin un, xáku ndaꞌvi va i nuu un xaꞌa ya íyo ni ya kúꞌvi ini Ndioxi nima i. Ta xa xíni mií un, yeꞌe, ta xa ku̱chee va i vitin, ta síin tu ndíkaa i veꞌe kàà yóꞌó va xaꞌa ya ndíkun i Tata yo Jesucristo.

¹⁰ Xaꞌa ya ñaa kua xíkan ni i ya mani nuu un ñani yo Filemón, xaꞌa ra Onésimo ñani yo, chi ra ñaa ta tá íyo seꞌe mií i saa íyo ra, xaꞌa ya ndi̱kundikun ra ichí Tata yo Jesucristo ini veꞌe kàà nuu ndíkaa i yóꞌó.

¹¹ Chi yachi ta ni köo vií ndi̱xa súvi ra chiñu nuu un, sundi vitin ta ndee ni vaꞌa vií xaa súvi ra ya nuu un, tá kuꞌva vaꞌa ni vií xáa súvi tu ra ya nuu yeꞌe va.

¹² Ta tíꞌvi i ra ndiko koo ra xaa ra nuu un, ta ikan ni un ya mani ndikiꞌin loꞌo un ra, tá kuꞌva ndikiꞌin vií ni un yeꞌe, kuꞌva saa ndikiꞌin vií un ra.

¹³ Chi yeꞌe, ta vani kúni ni va i ndoo ra koo ra xiꞌin i yóꞌó, ya chindee taꞌan ra xiꞌin i nuu yóꞌo̱ xaꞌa ya ndíkaa i veꞌe kàà yóꞌó xaꞌa tuꞌun vaꞌa xaꞌa Tata yo Jesucristo,

¹⁴ sundi nda iin ñaꞌa köo kúni i ikan mií i, chi täꞌan ndituꞌun taꞌan yo xaꞌa ya mani ndúku i nuu un, ya kundaa ini un án vaꞌa túvi un, chi köo kúni i xaa ndúxa i xiꞌin un ikan un ya káꞌan i xiꞌin un, nima mií un ná kana ya ikan un xiꞌin i.

¹⁵ Ta soꞌva ndíkani ini yeꞌe xaꞌa ra Onésimo, ñani yo, chi án sa̱na xi̱nu ra nuu un ndi̱xaꞌan ra uvi ndaa kivi, ta Ndioxi ta̱xi ra ndo̱ꞌo ndo saa xiꞌin taꞌan ndo, ta vitin ndiko koo ra xaa ra nuu un koo ra xiꞌin un ndiꞌi saa kúu kivi.

¹⁶ Chi ra xáa chiñu xiꞌin ya nduxa nuu un ku ra, sundi vitin ta yáꞌa ni ka va vaꞌa ndee xaa chiñu ra nuu un, süvi tá xa̱a chiñu ra yachi saa ikan ra, chi ra ñaa, ta ñani yo ndu̱u ra vitin, ta kúꞌvi ni ini yeꞌe xíni i ra, ta ndisaa ka vi mií un, tá káa ra veꞌe mií un saa ndu̱u ra ndee ni ka ndaa yaꞌvi ra nuu un tixin Tata yo Jesucristo.

¹⁷ Ta xaꞌa ya ndíkun yo Iva yo Ndioxi, yakan vaꞌa vií ni ndikiꞌin un ra ñani yo Onésimo ñaa, tá kuꞌva vií ni ndikiꞌin un yeꞌe, kuꞌva saa vií ndikiꞌin un ra.

¹⁸ Tá ndá ya väꞌa i̱kan ra xiꞌin un án ndá tu ñaꞌa un si̱kuiꞌna va ra, ta yeꞌe chaꞌvi ndiꞌi ya níka ra nuu un.

¹⁹ Mií yeꞌe Pablo ku ra chi̱kaa ndaꞌa nuu tutu yóꞌó ya ndíkuiin i chaꞌvi i nuu un xaꞌa ya níka ra Onesimo ñani yo nuu un, ta ndïndoso ini un chi saa tu mií va un níka un nuu i xaꞌa ya ndi̱kaku un, táku un vitin.

²⁰ Saa ñani yo, ikan ni un ya mani xiꞌin i xaꞌa ya ndúku i nuu un, chi tá íkan un saa xiꞌin i ta vaꞌa ni kuni i xiꞌin un, ta xaꞌa ni un ndee xiꞌin i xaꞌa ya ndíkun yo Tata yo Jesucristo.

²¹ Táa i tutu yóꞌó xaa ya ndaꞌa un ñani yo, chi yeꞌe ta ndáa ni ini i xíni i yóꞌo̱ ya xaa súvi un chiñu ya ndúku i nuu un, ta nda kuaꞌa ka ya ikan un xiꞌin i.

²² Saa xa káꞌan kuée tu i xiꞌin un, ya xaa súvi loꞌo un veꞌe un nuu ndoo loꞌo i koo i, chi xa káꞌan ni ndo xiꞌin Ndioxi xaꞌa i, ta mií ra ná kachi ta kama ni xaa i koto i ndóꞌo̱.

Tuꞌun sindiꞌi káꞌan ra Pablo xiꞌin ra Filemón

²³ Tíꞌvi ni ra Epafras ñani yo tuꞌun mani xaa nuu un. Ta iin káchi ndíkaa ra xiꞌin i veꞌe kàà yóꞌó xaꞌa ya ndíkun ra Tata yo Jesucristo.

²⁴ Ta káꞌan ndioxi tu ra Marcos ñani yo xiꞌin ra Aristarco tin ra Demas xiꞌin ra Lucas ñani yo, nda xáa chiñu xiꞌin i yóꞌó. Káꞌan ndioxi ni nda xiꞌin ndo.

²⁵ Mií Tata yo Jesucristo ná chikaa ni ya vaꞌa ini ndo. Saa ná koo.