El Apocalipsis 9 - Xochapa Mixteco

¹ Tá ti̱vi tatun Ndioxi ya uꞌun itun trompeta ya, ta saa xi̱ni i iin kiti kimi ke̱ta ri nuu ndivi, ta ndi̱kava ri nuu ñuꞌú. Saa ta̱xi Ndioxi llave ndaꞌa ri ya kuna ri yavi nǎꞌa, ya kúnu ni ini.

² Tá xu̱na ri yuꞌu yavi nǎꞌa ikán ta ka̱na koo kuaꞌa ni iꞌma, tá íin ya kána koo ini iin xitun ya chee ni saa íin ya. Ta saa nda̱sa naá ya nuu ñu̱ꞌù tin nuu ndivi.

³ Ta tañu iꞌma ikán ka̱na koo kiti tika ndee ni naꞌnu, ñaa ndi̱xita yava ndiꞌi ri kuaꞌan ri nuu ñuꞌú. Saa ta̱xi Ndioxi ichí ndaꞌa ri, ya ndee ni kue̱ꞌe̱ rí, tá kuꞌva kue̱ꞌe̱ ni kiti tisoꞌma, saa kue̱ꞌe̱ ri.

⁴ Ñaa ndi̱kaꞌan Ndioxi xiꞌin ri ya ná käxi ri iku kuii, ni nda iin ñaꞌa kuii ni itun kuii ná käxi ri, ndisaa naꞌa, na köo tuni Ndioxi íyo taan, ndisaa na ikán ku na ná tiin ri, káchi Ndioxi xiꞌin ri.

⁵ Saa ta̱xi Ndioxi ichí ndaꞌa ri ya ná tiin ni ri naꞌa tixin ya uꞌun yo̱ó ná ndoꞌo ni na ikán ta ná käꞌni ri na. Ta yáꞌa ni úꞌvi tíin ri, tá kuꞌva tíin kiti tisoꞌma saa uꞌvi ni tíin ri.

⁶ Ta tixin uꞌun yo̱ó ya ndee ni ndóꞌo na, ñaa xa̱á na kúni na kuvi na ta köo kúchiñu na kuvi na. Ndinuꞌu ni ini na kútoo na kuvi na ta köo kúvi kuvi na.

⁷ Ta kiti tika naꞌnu ni ikán tá íin kiti kuai, kiti xa íyo tuꞌva kuꞌun nuu kuachi, saa íin ri. Tá íin corona ya oro, saa íin ya ñúꞌu xi̱ní ri, ta nuu ri, tá íin nuu na ñuu ivi yóꞌó, saa íin nuu ri.

⁸ Ta ixi xi̱ní kiti tika ikán, tá íin ixi xi̱ní ná ñaꞌa, saa íin ya. Ta nuꞌu ri, tá íin nuꞌu kiti lion, saa íin nuꞌu ri.

⁹ Ta tixin ri xiꞌin ndiꞌi leke kandika ri, ndási ndiꞌi ya xiꞌin kàà ya ná tïkueꞌe ri. Ta ndixin ri, ndee ni níꞌi ya, tá kuꞌva níꞌi kàà ya ñúꞌu xaꞌa itun carreta, itun ndíxita kuaꞌa ni kiti kuai tá kuaꞌan ri nuu kuachi nuu kánitaꞌan naꞌa, saa kúu níꞌi ni, tá kánda ndixin ri.

¹⁰ Ta ndoꞌma ri, tá íin ndoꞌma kiti tisoꞌma saa íin ya, ta yáꞌa ni xatu kue̱ꞌe̱ íyo nuu ya. Ndee ni sítixuꞌvi ya naꞌa tixin uꞌun yo̱ó.

¹¹ Ta ya chee ni xáꞌnda chiñu nuu tika ikán ku iin tachi nduvaꞌa ya ndíso chiñu xiꞌin yavi nǎꞌa ya kunu ni ikán. Ta kivi tachi nduvaꞌa ikán kua náni Abadón tuꞌun hebreo, ta tuꞌun griego náni ya Apolión. Ta iin nuu káꞌan uvi saa tuꞌun, káchi ya saa: “Ya síndiꞌi xaꞌa ndiꞌi ñaꞌa”, káchi ya.

¹² Ta ya núnu̱ú nuu tíxuꞌvi ni naꞌa ku ya yóꞌó, ta ndi̱yaꞌa ya. Saa kúmani ka inka uvi ya vaxi tixuꞌvi ni na.

¹³ Saa ti̱vi tatun Ndioxi, ya iñu, itun trompeta ya. Ñaa xi̱ni soꞌo i ke̱ta tachi naꞌa káꞌan na tañu kumi ndikin kiti, ya íyo nuu íin nama i̱í, ya ndi̱kuaꞌa xiꞌin oro, ya íin yati nuu íyo Ndioxi.

¹⁴ Tachi na ya ndi̱kaꞌan xiꞌin tatun Ndioxi, ya iñu ikán kua, káchi saa: ―Ndaxin kumi saa tatun Ndioxi, ya núꞌni yuꞌu i̱tà kaꞌnu ni, nduta náni Éufrates ―káchi tachi na ikán.

¹⁵ Saa nda̱xin tatun Ndioxi ikán kumi saa tatun ya núꞌni. Saa chi xa saa chi̱tuni Ndioxi ya koo tuꞌva tatun ra mií hora ikán, ta mi kivi ikán xiꞌin mií yo̱ó ikán tin mií kuiya ikán. Chi̱tuni Ndioxi i̱kan ra saa xiꞌin tatun ra nuu ndi̱saña ya xa̱ꞌni ya uni taꞌvi na ñuu ivi.

¹⁶ Ta nda lapa nda yóso kuai kuaꞌan nuu íyo kuachi ku nda, kúu uvi ciento millón. Saa ku nda ikán káchi na xi̱ni soꞌo i.

¹⁷ Saa xi̱ni i nda yóso kiti kuai ikán, ndási kandika nda, ta saa ndási tu kándika mií va ri. Ndási kándika nda xiꞌin kàà ya ndi̱kaꞌi xiꞌin uni nuu color, ya kúaꞌa ñu̱ꞌu̱, nda tá káa ñu̱ꞌu̱ xíxi saa káa ya. Inka ya kúu color ya ndíꞌí tuún. Inka ya kuáa̱n, ndakua tá kuꞌva kuáa̱n ñuꞌú káꞌndi ya náni azufre saa kuáa̱n ya. Ta xi̱ní kiti kuai yóso nda lapa ikán tá íin xi̱ní kiti lión saa íin xi̱ní ri. Saa kána koo iꞌma yuꞌu ri, ta kána koo tu ñu̱ꞌu̱ va xiꞌin ñuꞌú káꞌndi ya náni azufre yuꞌu ri.

¹⁸ Ta uni taꞌvi na ñuu ivi yóꞌó ndi̱xiꞌi xiꞌin kue̱ꞌe̱ ya kúu mií ñu̱ꞌu̱ ya xíxi ni, tin iꞌma ikán xiꞌin ñuꞌú káꞌndi ya kána koo yuꞌu kiti kuai ikán.

¹⁹ Ta kiti kuai ikán kúu mií ri ndee xiꞌin yuꞌu ri tin ndoꞌma ri. Tá íin kiti ko̱ó kue̱ꞌe̱ saa íin ndoꞌma ri, ta íyo xi̱ní ri, xiꞌin ya ikán sítikueꞌe ri naꞌa.

²⁰ Naꞌa, na ndi̱ndoo, na köo ndi̱xiꞌi xiꞌin ndiꞌi kue̱ꞌe̱, ya uꞌvi ni ikán, ta ni köo ndi̱xiin na ndiko koo ini na xaꞌa ya väꞌa íkan na, ni ya xáa kaꞌnu na tachi nduvaꞌa, köo ndi̱xiin na sindoo na ichí ikán. Ni ya kándixa na ndioxi ndíi án ya kándixa na naꞌna ndioxi ndíi köo ndi̱xiin na sindoo na ya. Ta ndee ni ka kándixa na kàà ya oro xiꞌin ya plata tin kàà yáꞌa ya bronce tin yu̱ú xiꞌin itun. Köo ndi̱xiin na sindoo na ya kándixa na ndioxi siki, ya küvi koto, ni köo xíni soꞌo ya, ta ni küvi kaka ya.

²¹ Na ndi̱ndoo ikán ta ni köo ndi̱xikuiin na xáꞌni na ndìì, ni ya xáa tási na xiꞌin taꞌan na köo ndi̱xiin na sindoo na, ni ya kuiꞌna, ni ya kuakiꞌvi na xiꞌin inka ñaꞌa án inka taa köo ndïxiin na sindoo na ya.