El Apocalipsis 8 - Xochapa Mixteco

Tuꞌun ya káꞌan xaꞌa sello ya uxa xáꞌnda kiti Levo loꞌo

¹ Tá xa̱ꞌnda kiti Levo loꞌo ikán sello ya kixin ya uxa, ta iin táxiin ku̱u nuu ndivi iin kuꞌva sava hora.

² Saa xi̱ni i uxa nda tatun Ndioxi ndíta nda yati nuu Ndioxi, saa ta̱xi ra iin itun trompeta ndaꞌa iin iin nda ikán.

³ Sindiꞌi xi̱ni i inka tatun Ndioxi ndi̱xaa ya ndi̱kundichi ya yati nuu íin nama i̱í nuu sóko na ñaꞌa nuu Ndioxi. Ta níꞌi tatun ikán koꞌo choꞌma, ya oro. Saa ndi̱niꞌi kuaꞌa ka ya xuxa vaꞌa choꞌma ya nuu Ndioxi ya ná ndaa xiko ikán kuꞌun ya nuu Ndioxi xiꞌin ndiꞌi tuꞌun ya káꞌan na i̱í, na kúu ñuu Ndioxi xiꞌin ra.

⁴ Ta xíxi mií xuxa vaꞌa ya ñúꞌu ini koꞌo choꞌma ínúú nuu ndaꞌa mií tatun ikán kuandaa iꞌma ya kuaꞌan ya, iin káchi ítaꞌan ya kuaꞌan ya nuu Ndioxi xiꞌin tuꞌun ya káꞌan naꞌa, na i̱í xiꞌin ra.

⁵ Saa ti̱in tatun ikán koꞌo choꞌma ta si̱kutu ndaa ya koꞌo ikán xiꞌin ñu̱ꞌu̱ yêꞌé ya íyo nuu íin nama i̱í ikán. Ñaa ki̱ꞌin ya ñu̱ꞌu̱ yêꞌé ikán xa̱ta ya nuu ñuꞌú ñuu ivi yóꞌó. Saa ndikun xa̱á nde ni ndee ndáꞌi savi, iin ndá níꞌi kúu, káni ka vi taxan, ñaa xa̱á ndee ni táan.

Xaa íyo tuꞌva uxa saa tatun Ndioxi ya tivi ya itun trompeta ya

⁶ Saa níꞌi uxa saa tatun Ndioxi ikán itun trompeta ya, ta xa íyo tuꞌva iin iin ya tivi ya nu.

⁷ Saa xa̱á tatun ya núnu̱ú tívi ya itun trompeta ya, ñaa xa̱á kóyo íꞌín xiꞌin ñu̱ꞌu̱, sáka nií xiꞌin ya, ndi̱koyo ya kuaꞌan ya nuu ñuꞌú ñuu ivi yóꞌó. Saa ndi̱xixi uni taꞌvi itun kuií xiꞌin iku kuií.

⁸ Saa ti̱vi tatun Ndioxi, ya uvi, itun trompeta ya. Ñaa xi̱ni i ke̱ta iin ñaꞌa tá káa iin xiki chee ni saa káa ya xi̱ni i, ndi̱kava ya ini nduta ñûꞌu, ta ndee ni xíxi ya, ta uni taꞌvi nduta ñûꞌu ikán ndu̱u rá nií.

⁹ Ñaa ndi̱ꞌi xaꞌa uni taꞌvi nuu ndiꞌi kúu kiti ñúꞌu ini nduta ñûꞌu. Ta saa ndi̱ꞌi xaꞌa tu uni taꞌvi itun barco va.

¹⁰ Saa ti̱vi tatun Ndioxi, ya uni, itun trompeta ya, ñaa ke̱ta iin kimi chee ni nuu ndivi ndi̱kava ri ini nduta i̱tà, ta nina mií ñu̱ꞌu̱ mií ku ri. Ta ndi̱kava tu ri ini uni taꞌvi nuu kána tikuii va.

¹¹ Ta kiti kimi ikán náni ri Ajenjo, ta ajenjo kúni kachi ya “Ya uva”. Ñaa si̱tivi ri uni taꞌvi i̱tà, ta kuaꞌa ni naꞌa ndi̱xiꞌi xaꞌa ya xi̱ꞌi na tikuii uva ikán.

¹² Saa ti̱vi tatun Ndioxi, ya kumi, itun trompeta ya, ta si̱tivi ya uni taꞌvi ñu̱ꞌù, köo ndi̱yeꞌe uni taꞌvi ya nduvi, iin ku̱naa. Ta ndi̱tivi tu uni taꞌvi kiti yo̱ó va, ku̱naa uni taꞌvi ri, köo ndíyeꞌe vaꞌa ri ñǔu, saa ku̱naa. Ta saa ndi̱tivi tu uni taꞌvi kiti kimi köo vaꞌa ndíyeꞌe ri, ku̱naa nuu ri. Ta saa ku̱naa iin taꞌvi nduvi, ta ku̱naa tu iin taꞌvi ñǔu va.

¹³ Ta saa ndi̱koto i, ta xi̱ni soꞌo i ndáchi iin tatun Ndioxi maꞌñu ndivi, ta ndee ni káꞌan ya, káchi ya saa: ―¡Vai! ¡Vai! ¡Vai! Ndaꞌvi ni na ndóo ñuu ivi, chi kúmani ka soo uni tatun tivi itun trompeta ya. Ta xa íyo tuꞌva ya tivi ya nu, tá ná tivi ya ikán ta ndee ni ndoꞌo na ―káchi tatun Ndioxi ndáchi ikán.