El Apocalipsis 7 - Xochapa Mixteco

Naꞌa na kúu seꞌe Ndioxi, kúu mií na sello Ndioxi taan na

¹ Sindiꞌi tá ndi̱yaꞌa ndiꞌi ya ikán, saa xi̱ni i kumi na tatun Ndioxi, ndíta na kumi tutun ñuu ivi yóꞌó: Iin tatun ndíchi chí nuu kétá ñu̱ꞌù, inka ya ndíchi chi nuu kêta ñu̱ꞌù, ta inka ya ndíchi chi sur inka ya ndíchi chí norte. Ta sási na tatun ikán tachi ya ná käka ka ya nuu ñuꞌú, ni nuu nduta ñûꞌu, ni ndaꞌa itun ná käni ka ya.

² Saa xi̱ni i inka tatun Ndioxi ke̱ta ya chí nuu kétá ñu̱ꞌù, ta kúu mií ya sello Ndioxi ra táku. Saa ndi̱ndaꞌi koꞌo ya, ndee ka vi ndi̱kaꞌan ya xiꞌin kumi saa na tatun ikán, na xa íyo ichí ndaꞌa ya sitivi na ñuu ivi yóꞌó xiꞌin nduta ñûꞌu,

³ ndikaꞌan ya káchi ya saa: ―¡Kundatun naꞌa ndo! Sïtivi yachi ndo ñuu ivi yóꞌó, ni nduta ñûꞌu, ni itun sïtivi yachi ndo. Nda ná sindiꞌi xaꞌa yo chinuu yo sello taan iin iin naꞌa, na xáa chiñu nuu Ndioxi, nda saa sitivi ndo ya ―káchi tatun ikán xiꞌin kumi saa na tatun ikán.

⁴ Saa xi̱ni soꞌo i ndi̱kaꞌan ya ndi̱saa ku naꞌa, na kúu mií sello Ndioxi, ta na ikán kúu na iin ciento uvi xiko kumi mil naꞌa, ka̱na koo na ikán tixin uxi uvi tiꞌvi seꞌe ñani sikua ra Israel.

⁵ Uxi uvi mil na ikán, na kúu mií sello Ndioxi ku na kúu seꞌe ñani sikua ra Judá. Uxi uvi mil na ikán, na kúu mií sello Ndioxi ku na kúu seꞌe ñani sikua ra Rubén. Inka uxi uvi mil na kúu mií sello Ndioxi ku na kúu seꞌe ñani sikua ra Gad.

⁶ Inka uxi uvi mil na kúu mií sello Ndioxi ku na kúu seꞌe ñani sikua ra Aser. Inka uxi uvi mil na kúu mií sello Ndioxi ku na kúu seꞌe ñani sikua ra Neftalí. Inka uxi uvi mil na kúu mií sello Ndioxi ku na kúu seꞌe ñani sikua ra Manasés.

⁷ Inka uxi uvi mil na kúu mií sello Ndioxi ku na kúu seꞌe ñani sikua ra Simeón. Inka uxi uvi mil na kúu mií sello Ndioxi ku na kúu seꞌe ñani sikua ra Leví. Inka uxi uvi mil na kúu mií sello Ndioxi ku na kúu seꞌe ñani sikua ra Isacar.

⁸ Inka uxi uvi mil na kúu mií sello Ndioxi ku na kúu seꞌe ñani sikua ra Zabulón. Inka uxi uvi mil na kúu mií sello Ndioxi ku na kúu seꞌe ñani sikua ra José. Inka uxi uvi mil na kúu mií sello Ndioxi ku na kúu seꞌe ñani sikua ra Benjamín.

Yaa ni toto ndíxi ndiꞌi na ikán

⁹ Sindiꞌi ikán saa ndi̱koto i, ta xi̱ni i íyo kuaꞌa ni naꞌa, yáꞌa ni kuaꞌa ku na, nda iin naꞌa küchiñu kaꞌvi na ikán. Na ikán ta ndiꞌi ni kúu xaꞌa ñuu ivi yóꞌó ka̱na koo na, na ke̱e ñuu naꞌnu tin ñuu vali, kuaꞌa ni nuu tuꞌun káꞌan ndiꞌi na. Ndíta ndiꞌi na ikán yati nuu ndíchi tai toꞌo nuu índuꞌu ra kaꞌnu xiꞌin Levo loꞌo. Yaa ka vi tikoto ndíxi ndiꞌi na, saa ndíso na ñu̱ú síkuiko na ya nuu ra xiꞌin kiti Levo loꞌo.

¹⁰ Ta ndee ni ndi̱kaꞌan ndiꞌi na ikán, káchi na saa: Ndisaa Iva yo Ndioxi ra índuꞌu nuu tai toꞌo, xiꞌin kiti Levo loꞌo índuꞌu xiꞌin ra ku ri kuchiñu sikaku yoo, köo ka inka naꞌa kuchiñu sikaku yoo ―káchi ndiꞌi na káꞌan na.

¹¹ Ta ndíta na tatun Ndioxi, ndi̱kava nduu ndiꞌi na sata tai toꞌo ikán nuu índuꞌu ra kaꞌnu, saa tu oko kumi saa nda xikuaꞌa xiꞌin kumi saa ya táku ikán. Ñaa si̱kusiti ndiꞌi na nda nuu ñuꞌú, yati nuu ndíchi tai toꞌo, ta xáa kaꞌnu na Ndioxi.

¹² Ta ndi̱kaꞌan na xiꞌin Ndioxi, káchi na saa: ―¡Saa ná koo ya! ¡Ndikiꞌin ndiꞌi un ya xáa kaꞌnu nde yóꞌo̱ Iva yo Ndioxi! Ná kaꞌan vaꞌa ni naꞌa xaꞌa un ¡Chi mií un ku ra ndixa ni ndíchi! ¡Ta ndixaꞌvi ni un, Iva yo Ndioxi! ¡Ná kunuu sukun ni ya toꞌo un! ¡Chi ndee ni ndee kúu mií un! ¡Ta ndakú ni un! ¡Saa ná koo ya ndiꞌi saa kúu kivi! ―káchi na tatun Ndioxi.

¹³ Saa ndi̱ndakan tuꞌun iin ra taꞌan na xikuaꞌa ikán yeꞌe, káchi ra saa xiꞌin i: ―¿Unku na ndíxi tikoto yaa ni ndíta yóꞌó? ¿Ta míi chí ke̱e na? ―káchi ra xiꞌin i.

¹⁴ Saa ndi̱kuiin i ndi̱kaꞌan i xiꞌin ra, káchi i saa: ―Köo xíni i, Tata. Mií un xíni unku na, káchi i xiꞌin ra. Saa ndi̱kuiin ra, káchi ra saa: ―Ndiꞌi na yóꞌó ku na ka̱na koo nuu yáꞌa ni vi ndi̱xuꞌvi na, ndo̱ꞌo ka vi na, ta ndi̱kata na tikoto na xiꞌin nií kiti Levo loꞌo, yakan ndu̱u yaa ni ya.

¹⁵ Xaꞌa ya ikán kua kúu mií na ichí ndíta na yati nuu íyo tai toꞌo nuu índuꞌu ra kaꞌnu. Nduvi niuun xáa kaꞌnu na ra ini veꞌe ñuꞌu ra. Ndioxi ra índuꞌu nuu tai toꞌo, ta koo ra xiꞌin na, vií ni kundaa ra na xiꞌin ndee ra.

¹⁶ Küvi ka na soko, ni tikuii ïchi ka na. Ni käꞌmi ka ñu̱ꞌù sata na, ni ndöꞌo ka ini na xiꞌin ya iꞌni ni ñu̱ꞌù.

¹⁷ Saa chi Levo loꞌo kiti índuꞌu maꞌñu nuu ndíchi tai toꞌo ku ri kundaa na tá kuꞌva ndáa iin ra taa levo sana ra saa kundaa ri na. Ta kundaka ri na kuꞌun na koꞌo na tikuii, chi tikuii ikán taxi rá kutaku na. Ta Ndioxi ndiyakun ra ndiꞌi tikuii nuu na xaꞌa ya xáku ni na, chi sindiꞌi ra ya kúsuchi ni ini na.