El Apocalipsis 6 - Xochapa Mixteco

Tuꞌun ya káꞌan xaꞌa kumi sello ya xáꞌnda kiti Levo loꞌo

¹ Saa xi̱ni i xa̱ꞌnda Levo loꞌo ikán iin sello ya núnu̱ú, ya ndási tutu ikán. Saa ndi̱kaꞌan iin taꞌan kumi ya táku ikán xiꞌin i, ta ndee ni ndi̱kaꞌan ya xiꞌin i tá kúu ndáꞌi savi saa kúu ndi̱kaꞌan ya xiꞌin i, káchi ya saa: ―¡Naꞌa yóꞌó, koto un! ―káchi ya xiꞌin i.

² Saa ndi̱xaa i xíto i, ta xi̱ni i ke̱ta iin kuai yaa, yóso iin ra taa ri, ta níꞌi ra ikán iin itun kuxin itun xa íyo tuꞌva. Saa ndi̱kiꞌin ra iin corona kunuu xiní ra. Ta ndee ni ra, ku̱chiñu ra nuu na sáa ini xíni ñaꞌa. Saa ke̱ta ra kuaꞌan ra kani taꞌan ra xiꞌin naꞌa, ta xíni ra kuchiñu ra nuu na ikán.

³ Tá xa̱ꞌnda Levo loꞌo ikán sello ya uvi, saa ndi̱kaꞌan ya uvi taꞌan ya kumi ya táku ikán xiꞌin i, káchi ya saa: ―¡Naꞌa yóꞌó, koto un! ―káchi ya xiꞌin i.

⁴ Saa ndi̱xaa i xíto i, ta xi̱ni i ke̱ta inka kuai kiti kuáꞌa̱. Ta ra yóso ri ndi̱kiꞌin ra iin i̱chi chee ni, ta ndi̱niꞌi ra ichí ya sindiꞌi xaꞌa ra ya ndóo vaꞌa na ñuu ivi yóꞌó xiꞌin taꞌan na. Xaꞌa ya ikán kua xa̱á xáꞌni taꞌan mií na.

⁵ Saa xa̱ꞌnda tuku Levo loꞌo ikán sello ya uni, ta ndi̱kaꞌan ya uni taꞌan ya kumi táku ikán xiꞌin i, káchi ya saa: ―¡Naꞌa yóꞌó, koto un! ―káchi ya xiꞌin i. Saa ndi̱xaa i ndi̱koto i, ta xi̱ni i iin kuai ndáá, ta ra yóso ri níꞌi ra iin kàà nuu káta na ñaꞌa.

⁶ Saa xi̱ni soꞌo i tachi iin na, ke̱ta ya maꞌñu kumi saa ya táku ikán, káꞌan ya káchi ya saa: ―Xa nda̱a ni yaꞌvi trigo xiꞌin cebada. Tá kuꞌva cháꞌvi naꞌa iin na xáa chiñu xiꞌin na iin nduvi ndaa, saa yaꞌvi iin kilo trigo xiꞌin uni kilo cebada. Ta koto vaꞌa ndo sïtivi ndo nduta ceite ni nduta vino ―káchi tachi na ndi̱kaꞌan xi̱ni soꞌo i.

⁷ Saa xa̱ꞌnda tuku Levo inka sello ya kumi, ñaa xi̱ni soꞌo i ndi̱kaꞌan inka ya kumi taꞌan ya kumi ikán, káchi ya saa: ―¡Naꞌa yóꞌó, koto un! ―káchi ya xiꞌin i.

⁸ Saa ndi̱xaa i ndi̱koto i, ta xi̱ni i ke̱ta inka kuai kiti yáꞌa vaxi ri. Ta ya yóso ri náni ya “Ndee ya xáꞌni naꞌa”. Ta satá ya ikán ke̱ta inka ya náni “Hades” ya káꞌan xaꞌa nuu xáꞌnda chiñu ndee ya xáꞌni naꞌa. Saa ndi̱kiꞌvi ichí ndaꞌa ya ikán ya sindiꞌi xaꞌa ya iin kumi taꞌvi ñaꞌñu ñuu ivi nuu ndóo na ñuu ivi, yáꞌa ni kuaꞌa ku na. Uvi saa ya kúu mií ichí ya kaꞌni ya naꞌa xiꞌin i̱chi nuu kuachi, án xiꞌin soko, án xiꞌin ndiꞌi nuu kueꞌe, án ya kuvi na kaꞌni kiti iku na.

⁹ Saa tá xa̱ꞌnda tuku Levo loꞌo ikán inka sello ya uꞌun. Ta xi̱ni i ndíchi nama i̱í nuu ndivi nuu ndóso ñaꞌa ya sóko na nuu Ndioxi, ta tixin nama i̱í ikán xi̱ni i ndóo ya vaꞌa naꞌa, na ndi̱xiꞌi xaꞌa ya ndi̱kaꞌan ndoso na tuꞌun Ndioxi, ta köo ndi̱sindikoo na ichí ra, ndee ni tuun xi̱ndikun na ya.

¹⁰ Ta ndee ka vi ndi̱kaꞌan ya vaꞌa na ndi̱xiꞌi ikán, káchi ya saa: ―Tata Iva yo Ndioxi, ra i̱í, ra ndaa ni, ra xáꞌnda chiñu nuu ndiꞌi ñaꞌa, ¿nda maa vi xinu koo tiempo ya xaa nani un kuachi nde nuu sindoꞌo ni un naꞌa, na xa̱ꞌni ndeꞌe? ―káchi na xiꞌin Ndioxi.

¹¹ Saa ta̱xi Ndioxi toto yaa ni ndaꞌa na kundixi na, ta ndi̱kaꞌan ra xiꞌin na ya ndikundee ka na siloꞌo tiempo. Saa chi íyo ka na taꞌan na, na kúmani ka kuvi tá kuꞌva ndi̱xiꞌi mií na xaꞌa ya ndíkun na ichí ra.

¹² Saa xa̱ꞌnda Levo loꞌo ikán sello ya i̱ñu. Ta xi̱ni i ndee ka vi táan, ta xi̱ni i ku̱naa nuu ñu̱ꞌù köo ndíyeꞌe ka ya, tá kuꞌva ndáa toto ndíxi naꞌa, na kuaꞌan xáku nuu ndi̱xiꞌi ndìì, saa ndáa ndu̱u nuu ñu̱ꞌù ikán. Ta kiti yoo ndu̱u ri tá káa nduta nií.

¹³ Ta xa̱á kóyo ni kiti kimi íyo nuu ndivi nda nuu ñuꞌú, tá kúu kóyo ni kuiꞌi ndaꞌa itun higo tá xíka ni tachi saa kúu.

¹⁴ Ta nuu ndivi ta xa̱á ya sûví ya, tá kuꞌva súví naꞌa iin tutu, saa xa̱á kúu ya. Ta ndiꞌi xiki naꞌnu xiꞌin ñuꞌú íchi ya ñúꞌu maꞌñu nduta ñûꞌu, iin ndi̱nama ndiꞌi ya nuu ndi̱xiyo ya.

¹⁵ Saa ndiꞌi ni kúu naꞌa, na ndóo ñuu ivi yóꞌó xínu na kuaꞌan na kava íyo iku án tixin yu̱ú naꞌnu ni ya kuchiñu tiseꞌe na. Ta na kuaꞌan ikán ku na kúu nda rey, nda naꞌnu nda kúu mií ichí nuu na ñuu ivi xiꞌin ndiꞌi ka nda naꞌnu xiꞌin nda ndóso nuu nda lapa. Ta saa kuaꞌan tu na kuika va xiꞌin na moso na, na sa̱ta xitoꞌo na xáa chiñu nuu na, ta saa kuaꞌan tu naꞌa, na xíka ndíka va.

¹⁶ Kuaꞌan ndiꞌi na ikán nduku na nuu tiseꞌe na, ta káꞌan na xiꞌin iku sukun tin yu̱ú naꞌnu ni, káchi na saa: ―Koyo ndo sata nde ya tiseꞌe ndo ndeꞌe ya ná küni ra índuꞌu nuu tai toꞌo ndeꞌe, saa tiseꞌe ndo ndeꞌe nuu kiti Levo, chi sáa ni ini ri xíni ri ndeꞌe.

¹⁷ Saa chi vitin ndi̱xinu kivi nuu ndee ni kuu chi sáa ni Ndioxi xíni ra ndeꞌe, saa tu kiti Levo, sindiꞌi xaꞌa ri ndeꞌe xaꞌa kuachi nde. Ta nda iin na küchiñu kundee ini xiꞌin ya uꞌvi ni vaxi ―káchi na ikán.