El Apocalipsis 5 - Xochapa Mixteco

Xi̱ni ra Juan iin tutu ya ndi̱suvi xiꞌin iin kiti levo loꞌo

¹ Saa xi̱ni i iin tutu ya ndi̱suvi, íyo ya ndaꞌa kuáꞌá ra índuꞌu nuu tai toꞌo ikán. Ta ndiꞌi nuu tutu ikán xiꞌin sata ya, íyo tuꞌun ya ta̱a na. Ta ndási tuun ya xiꞌin ya kixín ya kúu sello ya.

² Saa xi̱ni i iin tatun Ndioxi ya ndee ni ndaku, ta ndee ka vi ndi̱kaꞌan ya, káchi ya saa: ―¿Unku vi ra kúu mií ichí ya ndaxin ra ya kixin núꞌni toko tutu yóꞌó ta ndikani ra ya? ―káchi tatun Ndioxi ikán.

³ Ta nda iin naꞌa köo kúchiñu ndikani tutu ikán, ni ñuu ivi yóꞌó, ni tixin ñuꞌú, ni nuu ndivi köo naꞌa ndíkuchiñu ndikani ya kaꞌvi na ya.

⁴ Saa xa̱á i xáku ka vi i, chi nda iin naꞌa köo kúu mií ichí ya kaꞌnda na sello kúu mií ya, ta koto na nuu ya kaꞌvi na ya.

⁵ Saa ndi̱kaꞌan iin ra xikuaꞌa taꞌan na oko kumi ikán xiꞌin i, káchi ra saa: ―Küaku ni un, saa chi xa íyo iin ra náni “Kiti Lión ta xáꞌnda chiñu ra nuu na ñuu Judá”, ta náni tu ra “Seꞌe sikua ra rey David”. Ra ikán ku ra xa ku̱chiñu nuu kiti nǎꞌa, yakan kúu mií ra ichí kaꞌnda ra uxa saa sello kixin kúu mií ya ta ndikani ra ya ―káchi ra xikuaꞌa ikán xiꞌin i.

⁶ Saa xi̱ni i iin Levo loꞌo ndíchi ri yati nuu íin tai toꞌo ikán. Ta ndíchi tai toꞌo ikán maꞌñu kumi saa ya táku xiꞌin oko kumi saa na xikuaꞌa. Ta Levo loꞌo ikán tá náꞌa kiti ndi̱xiꞌi ndi̱soko naꞌa nuu Ndioxi, saa náꞌa ri. Ta íyo uxa ndikin ri tin íyo uxa nduchi nuu ri. Ta uxa nduchi nuu ri tin uxa ndikin ri ku ya káꞌan xaꞌa uxa tachi Ndioxi, ya ti̱ꞌvi ra kuaꞌan ndiꞌi ni kúu xaꞌa ñuu ivi yóꞌó.

⁷ Saa ndi̱xaa levo ikán nuu índuꞌu ra chee, ra índuꞌu nuu tai toꞌo ikán, ta ndi̱kiꞌin ri tutu ya íyo ndaꞌa kuáꞌá ra.

⁸ Tá ti̱in soꞌva ri tutu ikán, ta ndikun si̱kusiti kumi saa ya táku ikán xiꞌin oko kumi saa na xikuaꞌa, si̱kusiti na nuu kiti Levo loꞌo ikán. Ta níꞌi iin iin na xikuaꞌa ikán itun arpa xiꞌin iin koꞌo chôꞌma ya oro nuu xíxi xuxa vaꞌa ya támi ni xáꞌan, ta iꞌma kána koo ini ya ikán kua káꞌan xaꞌa tuꞌun ya káꞌan naꞌa, na i̱í xiꞌin Ndioxi.

⁹ Saa xa̱á kumi saa ya táku ikán xiꞌin oko kumi saa na xikuaꞌa, xíta na iin yaa xa̱á nuu kiti Levo loꞌo ikán, káchi na saa: Yóꞌo̱ ku un kúu mií ichí tiin un tutu ñaa. Ta kúu mií un ichí kaꞌnda un uxa saa sello kixin kúu mií ya. Saa chi yóꞌo̱ ku un ndi̱soko xiꞌin mií nuu Ndioxi, si̱tikueꞌe ni na yóꞌo̱, ta xa̱ꞌni na yóꞌo̱, ndi̱xiꞌi un. Ta xiꞌin nií un nduta ndi̱xita, cha̱ꞌvi un xaꞌa kuachi na ñuu ivi, ya kuchiñu na nduu na seꞌe Ndioxi. Cha̱ꞌvi un xaꞌa ndiꞌi ni kúu nuu naꞌa, xiꞌin ndiꞌi ni kúu na káꞌan ndá ka inka nuu tuꞌun. Saa i̱kan un xaꞌa ndiꞌi ni kúu na ndóo ndiꞌi saa ñuu vali tin ñuu naꞌnu ya ñúꞌu ndiꞌi ni kúu ñuu ivi.

¹⁰ Ta̱xi un ichí ndaꞌa na ya ndu̱u na rey. Saa nda̱sa un na sutu, na i̱í, ya xaa chiñu na nuu Iva yo Ndioxi. Ta na ikán ku na kaꞌnda chiñu nuu ndiꞌi naꞌa xiꞌin ndiꞌi ñaꞌa ya íyo ñuu ivi yóꞌó, káchi na xíta na nuu kiti Levo loꞌo ikán.

¹¹ Tá ndi̱ꞌi saa ndi̱koto i, ta xi̱ni soꞌo i káꞌan kuaꞌa ni na tatun Ndioxi, na ikán ta yaꞌa ni kuaꞌa millón ku na. Saa chu̱tu ndaa na nuu índuꞌu ra kaꞌnu, ra índuꞌu nuu tai toꞌo, xiꞌin kumi saa ya táku tin oko kumi saa na xikuaꞌa ikán.

¹² Saa káꞌan ni na tatun Ndioxi ikán, káchi na saa: Levo loꞌo kiti ndi̱soko xiꞌin mií nuu Ndioxi, kiti ti̱kueꞌe ni, ri ikán ku ri ndee ni ndee kúu mií, saa kúu mií ri ndiꞌi ya kuika xiꞌin ya ndichi ni. Ta ndee ni ri, ná ndikunuu vaꞌa ni ya toꞌo ri. Ná kaꞌan vaꞌa ni yo xaꞌa ri chi ya ndixa kua ndi̱kiꞌin ndiꞌi ri ya vaꞌa, káchi na tatun Ndioxi ikán ya xáa kaꞌnu na kiti Levo loꞌo ikán.

¹³ Ta saa xi̱ni soꞌo i ndiꞌi ya si̱kuaꞌa Ndioxi, ya íyo nuu ndivi tin ya íyo ñuu ivi yóꞌó xiꞌin ya íyo tixin ñuꞌú tin ya íyo ini nduta ñûꞌu, xa̱á ndiꞌi ya xáa kaꞌnu ya ra chee ra índuꞌu nuu tai toꞌo xiꞌin kiti Levo loꞌo ikán, káchi ya saa: Ná kunuu vaꞌa ni ya toꞌo ra, ta ná kaꞌan vaꞌa ni yo xaꞌa ra, chi ndee ni ndee kúu mií ra ta nda iin ichí ndïꞌi xaꞌa chiñu kúu mií ra índuꞌu nuu tai toꞌo, ta saa tu kiti levo loꞌo va, káchi ya si̱kuaꞌa Ndioxi.

¹⁴ Saa ndi̱kuiin kumi saa ya táku káchi ya saa: ―Saa ná koo ―káchi ya. Saa si̱kusiti ndiꞌi na xikuaꞌa nuu ra ndi̱kuita ndee ndiꞌi na nuu ra nda nuu ñuꞌú xáa kaꞌnu na ra táku ndiꞌi saa kúu kivi.