El Apocalipsis 4 - Xochapa Mixteco

Ndá kuꞌva xáa kaꞌnu na Ndioxi nuu ndivi

¹ Tá ndi̱ꞌi ikán saa ndi̱koto i ta xi̱ni i iin yéꞌe núna ya nuu ndivi, ñaa xi̱ni soꞌo tuku i tachi na tá kuꞌva káa ya xi̱ni soꞌo i núnu̱ú, saa káa tachi itun trompeta tívi na, saa ke̱ta tachi na ndi̱kaꞌan ya xiꞌin i, káchi ya saa: ―Naꞌa ndaa un ni̱nù yóꞌó, saa sinaꞌa i yóꞌo̱ ya kuu kivi vaxi ―káchi ya xiꞌin i.

² Ta iin ku̱u soꞌva ndi̱kava nduu ndiꞌi Tachi I̱í Ndioxi yeꞌe, ñaa si̱tuvi ya nuu i xi̱ni i iin tai toꞌo chee ni nuu ndivi, saa xi̱ni i índuꞌu iin naꞌa nuu tai ikán.

³ Ta ra índuꞌu nuu tai ikán yéꞌe̱ kavi ra, ndakua tá kuꞌva ndíyeꞌe yu̱ú luvi ni ya náni jaspe án cornalina saa yéꞌe̱ ra. Ta iin ndikava nduu ndiꞌi kiti tilanchi sata tai toꞌo nuu índuꞌu ra. Yéꞌe̱ ka vi kiti tilanchi ikán, ndakua tá kuꞌva yéꞌe̱ taxan yu̱ú luvi ni ya náni esmeralda saa yéꞌe̱ ri.

⁴ Ta nuu ndíchi tai toꞌo chee ikán ndíta ka oko kumi tai toꞌo, ndi̱kava nduu ndiꞌi nu sata itun tai toꞌo chee ikán, ta ndóo oko kumi na xikuaꞌa nuu nu, yaa ka vi toto ndíxi iin iin na xikuaꞌa ikán, saa ínuu iin corona ya oro xiní iin iin na.

⁵ Ta iin ndíyeꞌe taxan maꞌñu nuu ndíchi tai toꞌo chee ikán, ndee ka vi níꞌi ta ndáꞌi ka vi savi. Ta suvi mií nuu ndíchi tai ikán ndíta uxa ñu̱ꞌu̱ xíxi ya, ta uxa ñu̱ꞌu̱ ikán ku uxa Tachi Ndioxi.

⁶ Ta suvi maꞌñu nuu ndíchi tai toꞌo ikán, xi̱ni i ndíkaa nduta ñûꞌu kuíi̱ ka vi rá, tá káa iin yuyu yéꞌe̱ nda inka ñaꞌñu ya, saa kuíi rá. Ta suvi maꞌñu nuu ndíchi mií tai toꞌo ikán ndi̱kava nduu kumi ya táku, ta kumi saa ya kúu mií ya nina nduchi nuu kándika ya tin sata ya.

⁷ Ta síin ni íin iin iin kumi saa ya táku ikán, ya núnu̱ú tá káa kiti lion saa káa ya. Ya uvi tá káa iin sindiki che̱e loꞌo saa káa ya. Ya uni tá káa nuu iin ra taa ivi yóꞌó saa káa ya. Ya kumi tá káa tasun ri ndáchi, saa káa ya.

⁸ Ta iin iin mií ya táku ikán íyo iñu ndixin iin iin ya. Ta ndiꞌi ni kúu ñaꞌñu ya íyo nina nduchi nuu, sata ya tin ini ya kúu mií ya nduchi nuu. Ta köo xíkuiin ya káꞌan ya, nduvi niuun káꞌan ya, káchi ya saa: ―¡Ra i̱í, ra i̱í, ra i̱í ni ku Ndioxi! ¡Taa ra ndixa ni ndee ku Ndioxi! Ndioxi ku ra táku nda kivi núnu̱ú, ta saa táku ra nda kivi vitin, saa kutaku ra ndiꞌi kivi ya vaxi, ―káchi kumi saa ya táku ikán, káꞌan ya xaꞌa Ndioxi.

⁹ Ni köo xíkuiin kumi saa ya táku ikán táxi ni ya tixaꞌvi ndaꞌa Ndioxi, saa xáa kaꞌnu ni ya ra, ta xáa toꞌo ni ñaꞌa ya ra índuꞌu nuu mií tai toꞌo ikán, chi ra ikán ku ra táku, ta kutaku ka ra ndiꞌi saa kúu kivi ya vaxi ―káchi kumi saa ya táku ikán.

¹⁰ Ta iin káchi káꞌan kumi saa ya táku ikán xáa kaꞌnu ya Ndioxi, ta saa tu oko kumi saa na xikuaꞌa, na ndi̱kava nduu ndóo sata tai ra, síkusiti na nuu ra xáa kaꞌnu ñaꞌa na, ta ki̱ndaa na corona ya oro ínuu xiní na, ki̱ꞌin na ya chi̱ndoo na nuu ra, ya xáa kaꞌnu ñaꞌa na, saa káꞌan na xiꞌin ra káchi na saa:

¹¹ ―Iva yo Ndioxi, iin mií un ku un kaꞌnu ni nuu nde, yakan iindaa yóꞌo̱ ku ra kúu mií ichí ndikiꞌin ni un tuꞌun vaꞌa ya káꞌan nde xiꞌin un, saa ná ndikunuu sukun ni ya toꞌo un, chi yóꞌo̱ ku ra ndee ni ndee kúu mií, ta iindaa yóꞌo̱ ku un si̱kuaꞌa ndiꞌi ni kúu ñaꞌa ya íyo ñuu ivi yóꞌó. Tá íyo ya chi̱tuni mií un, saa íyo ndiꞌi ya si̱kuaꞌa un, ―káchi na xikuaꞌa ikán xiꞌin Ndioxi.