El Apocalipsis 3 - Xochapa Mixteco

Ndítuꞌun Tata yo Jesucristo tuꞌun yóꞌó xiꞌin na kándixa ñaꞌa, na ndóo ñuu Sardis

¹ Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun ya ndáa naꞌa, na kándixa yeꞌe nuu ndíkitaꞌan na xáa kaꞌnu na Ndioxi ñuu Sardis. Yeꞌe ku ra kúu mií uxa tachi Ndioxi, ta ndíso i uxa kiti kimi. Xíni ndiꞌi i ya íkan ndo, xíni i ya káꞌan naꞌa xaꞌa ndo ya vaꞌa ni íkan ndo, ni ínuu vaꞌa ni tuꞌun ndo ya kándixa ni ndo yeꞌe, ta süvi ya ndaa ku ya. Chi ndóꞌo̱, ta tá íin na ndíi va saa íin ndo nuu i.

² ¡Ndikaxin vaꞌa ini ndo, ta kuenta ni koo ndo, saa chi ya vaꞌa ni ndíkani ini ndo ikan ndo ta xa kuaꞌan ndíꞌi xaꞌa ya! Chikaa ni ndo ndee xiꞌin chiñu ya kúmani ka ikan ndo, chi ndóꞌo̱, ta täꞌan vi sindiꞌi ndo xaa súvi ndo chiñu ya ta̱xi Ndioxi ndaꞌa ndo xaa súvi ndo.

³ Yakan ndikaꞌán ini ndo xaꞌa ya si̱kuaꞌá ndo tá sikan xa̱á ndo kándixa ndo yeꞌe. Ndiko koo ini ndo kuꞌun ndo ichí Ndioxi. Tá tu köo xíin ndo kuni soꞌo ndo ya káꞌan i xiꞌin ndo, ta iin kuu soꞌva ndiko koo i xaa i nuu ndo, tá íkan ra kuiꞌna, ni köo xíni naꞌa ndá kivi kua kuakiꞌvi ra síkuiꞌna ra veꞌe na, ta kuꞌva saa ikan i xiꞌin ndo, iin ku̱u soꞌva ndiko koo i, ta sitixuꞌvi ni i ndóꞌo̱.

⁴ Vani saa íkan ndo, ta saa ni íyo sava ndo ñuu Sardis kándixa ni yeꞌe, ta ndóꞌo̱ ku ndo íin tá íin naꞌa, na yaa ni toto ndíxi, na köo xáa yakua toto, yakan ndóꞌo̱ ta kúu mií ndo ichí kaka ndo xiꞌin i nuu ndivi, xaꞌa ya xáa súvi ni ndo ya kúni Ndioxi.

⁵ Ndiꞌi naꞌa, na kúndee nuu ya väꞌa, ta ndinuꞌu ni ini na ndíkun na yeꞌe, ta taxi i toto yaa kundixi na, ta ndïkata i kivi na nuu tutu i, nuu xa ndi̱kaꞌi kivi na ya koo na xiꞌin Ndioxi ndiꞌi saa kivi. Ta kaꞌan ndoso i nuu Ndioxi tin nuu na tatun ra xaꞌa na yóꞌó, kachi i saa: “Na yóꞌó ku na kutaku xiꞌin i”, kachi i xaꞌa na.

⁶ Yakan ndiꞌi ndóꞌo̱ kándixa yeꞌe ta kuni soꞌo ni ndo tuꞌun ya káꞌan Tachi I̱í Ndioxi xiꞌin ndiꞌi ndo ―káchi Tata yo Jesucristo.

Ndítuꞌun Tata yo Jesucristo tuꞌun yóꞌó xiꞌin na kándixa ñaꞌa, na ndóo ñuu Filadelfia

⁷ Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun Ndioxi, ya ndáa naꞌa, na kándixa yeꞌe, ta ndíkitaꞌan na ñuu Filadelfia xáa kaꞌnu na Ndioxi. Yeꞌe káꞌan xiꞌin ndo ku ra i̱í, ra ndixa ni ndaa. Yeꞌe ku ra níꞌi llave ya ku̱u mií ra rey David. Tá xúna i yéꞌe, ta nda iin na küchiñu ndikasi ya. Tá ndíkasi i ya ta nda iin na küchiñu kuna ya.

⁸ Xíni ndiꞌi i ya vaꞌa íkan ndo, xíni i ya loꞌo ni ndee kúu mií ndo, ta saa xáa súvi ni ndo ya káꞌan tuꞌun i, ta ni köo ndi̱kuaa ndo yeꞌe nuu naꞌa. Xa xu̱na i yéꞌe nuu ndo, ta nda iin naꞌa küchiñu ndikasi ya.

⁹ Kúni i kundaa ini ndo unkua ikan i xiꞌin naꞌa, na vata na xáa súvi ya sínaꞌa kiti nǎꞌa, ti Satanás. Na vata ku na chi káꞌan na kúu na judío na ndíkun ichí Ndioxi, ta süvi ya ndaa kua káꞌan na. Ta vaxi kivi kuꞌun na sikusiti na nuu ndo, ta saa kundaa ini na ya kúꞌvi ni ini i xíni i ndóꞌo̱.

¹⁰ Xaꞌa ya ndee ni vaꞌa ndi̱xaꞌa ndee ini ndo xa̱a súvi ndo tuꞌun i, ta saa tu yeꞌe va, kundaa ni i ndóꞌo̱ tá kivi ná kixi tindoꞌo ya ndee ni ndee koto ndoso ya ndiꞌi na ndóo ñuu ivi yóꞌó.

¹¹ Kama ni ndiko koo i, yakan ni ndóꞌo̱ ta sïndikoo ndo ya ndíkun ndo ichí i, ya ná kïxi inka naꞌa kindaa na ñaꞌa ya taxi Ndioxi ndaꞌa ndo.

¹² Ndiꞌi naꞌa, na kúchiñu nuu ya väꞌa, xaꞌa ya köo síndoo na ichí i, ta taxi i ichí ndaꞌa na, nduu na naꞌa, na ndee ni, na xíniñuꞌu ni ini veꞌe ñuꞌu Ndioxi nuu ndivi. Tá kuꞌva ndíso ni itun ndíso xiní veꞌe, kuꞌva saa koo na ikán. Ta veꞌe ñuꞌu Ndioxi ikán koo na ndiꞌi saa kúu kivi. Ta chinuu i kivi Ndioxi, ra xáa kaꞌnu i sata iin iin na. Saa chinuu i kivi ñuu Ndioxi, ñuu Jerusalen ya xa̱á, sata iin iin na. Ta chinuu tu i kivi mií va i ya xa̱á, chinuu i ya sata iin iin na.

¹³ Ndiꞌi ndóꞌo̱ kándixa yeꞌe ta kuni soꞌo ni ndo ya káꞌan Tachi I̱í Ndioxi xiꞌin ndiꞌi ndo ndíkitaꞌan xáa kaꞌnu yeꞌe ―káchi Tata yo Jesucristo.

Ndítuꞌun Tata yo Jesucristo tuꞌun yóꞌó xiꞌin na kándixa ñaꞌa, na ndóo ñuu Laodicea

¹⁴ Saa ndi̱kaꞌan tuku ra xiꞌin i, káchi ra saa: ―Taa un tutu yóꞌó kuꞌun ya ndaꞌa tatun Ndioxi ya ndáa naꞌa, na kándixa yeꞌe nuu ndíkitaꞌan na xáa kaꞌnu na yeꞌe ñuu Laodicea: “Ya yóꞌó kua káꞌan yeꞌe, ra kúu Amén. Ndee ni ndíkuiin i xaꞌa ya i̱kan Ndioxi, ra ndaa ni. Ta yeꞌe ku ra ndi̱xiyo núnu̱ú tá sikan xa̱á xi̱koo xaꞌa ñuu ivi ya si̱kuaꞌa Ndioxi.

¹⁵ Ta xíni ndiꞌi va i chiñu ya íkan ndo, köo íyo ndo tá íyo tikuii niꞌni án rá vixin ni. Vaꞌa ni ka ku tu ya tá ndi̱xiyo ndo tá íyo rá iꞌni ni án rá vixin ni va.

¹⁶ Sundi ndóꞌo̱ ta tá káa tikuii vi̱xi̱n, rá köo yasin xíꞌi va saa íin ndo. Chi ni köo íin ndo tá íyo rá iꞌni án tá íyo rá vixin ni, xaꞌa ya íyo ndo tá íyo rá vi̱xi̱n ta nduxan va i ndóꞌo̱.

¹⁷ Káꞌan ndo kuika ni ndo, ta nda iin ñaꞌa köo kúmani nuu ndo káchi ndo. Sundi ndóꞌo̱, ta köo kíꞌin ndo kuenta ya ndixa ni ndaꞌvi ndo, nda loꞌo ñaꞌa köo nuu ndo, nda ya kuxi ndo köo, iin kúndaꞌvi chála ndo, tá íin na kuáa̱ küvi koto saa íin ndo, ta köo kíꞌin ndo kuenta.

¹⁸ Yakan yeꞌe, ta káꞌan i xiꞌin ndo, vaꞌa sata ndo oro ya ndinuꞌu nuu i, oro ya xáꞌmi na xiꞌin ñu̱ꞌu̱ xíxi, ya ndúu ya oro nina. Taꞌan ya ikán kua íyo nuu i. Sata ndo ya nuu i, saa nduu ndo naꞌa, na ndixa ni kuika. Tá tu köo kúni ndo kukaꞌan ni nuu ndo xaꞌa ya chála ndo, ta sata ndo toto yaa ni nuu i kundixi ndo. Saa sata tu ndo tatan nuu i, kee nduchi nuu ndo ya ná ndikoto vaꞌa ndo.

¹⁹ Káꞌan i tuꞌun uꞌvi ni yóꞌó xiꞌin ndo, chi saa káꞌan uꞌvi i xiꞌin naꞌa, na kúꞌvi ini i xíni i. Saa táxi i tíxuꞌvi ni na ya ná ndiko koo ini na kuꞌun na ichí vaꞌa. Saa ndóꞌo̱, xíniñuꞌu ndo ndiko koo ini ndo xaꞌa ya väꞌa íkan ndo, ta ndinuꞌu ni ini ndo ndiko koo ini ndo kundikun ndo Ndioxi.

²⁰ ¡Koto ndo! Yeꞌe ku ra ndíchi yeꞌe ndo, ta kána i ndóꞌo̱. Tá ndá ndóꞌo̱ xíni soꞌo tachi i, ta xúna ndo yeꞌe ndo nuu i, saa káꞌan ndo xiꞌin i kiꞌvi i veꞌe ndo kuxíni i xiꞌin ndo, ta kuxíni ndo xiꞌin i.

²¹ Ndiꞌi naꞌa, na kúchiñu nuu ya väꞌa, xaꞌa ya köo síndoo na ichí i, ta yeꞌe taxi i koo na xiꞌin i nuu ndivi ya kaꞌnda chiñu na xiꞌin i. Saa chi yeꞌe ta xa ku̱chiñu i nuu ya väꞌa, yakan ta̱xi Iva i Ndioxi ichí ndaꞌa i ndi̱kunduꞌu i xiꞌin ra ñaꞌñu kuáꞌá ra, íyo i xáꞌnda chiñu i xiꞌin ra.

²² Ndiꞌi ndóꞌo̱ kándixa yeꞌe ta kuni soꞌo ni ndo ya káꞌan Tachi I̱í Ndioxi xiꞌin ndiꞌi ndo ndíkitaꞌan xáa kaꞌnu ndo yeꞌe” ―káchi Tata yo Jesucristo.