El Apocalipsis 22 - Xochapa Mixteco

¹ Saa si̱naꞌa tatun ikán iin i̱tà nuu i, ta ndee ni yaa rá, ta rá ikán ku rá táxi ichí ya kutaku naꞌa ndiꞌi saa kivi xiꞌin Ndioxi. Ta kána koo rá nuu ndíchi tai toꞌo nuu índuꞌu Ndioxi xiꞌin Levo loꞌo. Tá kuꞌva yéꞌe̱ taxan vidrio, saa yéꞌe̱ rá.

² Ta yáꞌa sava rá maꞌñu ichí kaꞌnu ñuu i̱í ikán, ta uvi saa ñaꞌñu yuꞌu mií i̱tà ikán ndíta itun kuiꞌi, ta kúun kuiꞌi ndaꞌa nu tá yoó, uxi uvi ichí kúun kuiꞌi ndaꞌa nu nuu kuiya. Ta kuiꞌi ndaꞌa nu ikán kua táxi kutaku naꞌa xiꞌin Ndioxi ndiꞌi saa ichí, ta iku ndaꞌa nu kua síndaꞌa na ke̱e ndiꞌi saa xaꞌa ñuu ivi.

³ Ta köo ka nda iin ya väꞌa, ya íyo chiꞌña ñuu i̱í ikán. Saa chi mií Ndioxi ku ra kaꞌnda chiñu xiꞌin Levo loꞌo xiꞌin ndiꞌi na xáa chiñu nuu ra ku na koo ya xaa toꞌo na ra.

⁴ Saa kuni xiꞌin nuu ndiꞌi na Ndioxi, ta saa ndikunuu kivi ra taan na.

⁵ Ta nda iin ichí ndüu ñǔu ka ñuu i̱í ikán, ni küniñuꞌu ka na ñu̱ꞌu̱ ya sindiyeꞌe ya nuu na, ni ñu̱ꞌù sïndiyeꞌe ka ya nuu na, saa chi mií Ndioxi ku ra sindiyeꞌe nuu na, saa kaꞌnda chiñu na xiꞌin ra ndiꞌi saa ichí.

Kama ni ndiko koo tuku Jesús

⁶ Saa ndi̱kaꞌan tatun Ndioxi xiꞌin i, káchi ya saa: ―Tuꞌun yóꞌó ku ya ndaa ni, ya ndixa ni. Mií Iva yo Ndioxi ku ra ta̱xi ya xínituni ndaꞌa nda ndi̱kaꞌan ndoso tuꞌun yuꞌu ra xinaꞌa, ta vitin xa ti̱ꞌvi ra tatun ra ya kuꞌun ya ndituꞌun ya xiꞌin na xáa chiñu nuu ra ya ná kundaa ini na xaꞌa ñaꞌa ya xa numí ni kuu.

⁷ Ta ndi̱kaꞌan Tata yo Jesucristo tuꞌun yóꞌó, káchi ra saa: ―¡Koo tuꞌva ndo, chi kama ni ndiko koo i! Ta vaꞌa ni kée na xáa súvi tuꞌun ya íyo nuu tutu yóꞌo̱ ya ndi̱kaꞌan nda ndi̱kaꞌan ndoso tuꞌun yuꞌu Ndioxi xinaꞌa ―káchi Jesús.

⁸ Yeꞌe Juan ku yeꞌe xi̱ni ndiꞌi ya yóꞌó tin xi̱ni soꞌo i ya. Tá ndi̱ꞌi xi̱ni soꞌo i tin xi̱ni i ndiꞌi ya si̱naꞌa Ndioxi nuu i, saa si̱kusiti i nda nuu ñuꞌú nuu ndíchi tatun Ndioxi ya si̱naꞌa ndiꞌi ñaꞌa nuu i xiꞌin ya xi̱ni soꞌo i, si̱kusiti i ya xaa kaꞌnu i ya.

⁹ Saa ndi̱kaꞌan tatun ikán xiꞌin i, káchi ya saa: ―Ïkan un saa, küsiti un nuu i. Saa chi tá káa mií un xiꞌin nda ñani un nda káꞌan ndoso tuꞌun yuꞌu Ndioxi tin ndiꞌi na xáa súvi ya káꞌan tuꞌun ya íyo nuu tutu yóꞌó, tá íin ndóꞌo̱, saa káa tu yeꞌe va. Yakan xäa kaꞌnu un yeꞌe, chi ndisaa mií Ndioxi ku ra xíniñuꞌu yo xaa kaꞌnu yo ―káchi tatun Ndioxi xiꞌin i.

¹⁰ Saa ndi̱kaꞌan tuku tatun xiꞌin i káchi ya saa: ―Tïseꞌe un tuꞌun Ndioxi ya íyo nuu tutu yóꞌó, chi ya káꞌan ya kuu, ta xinu ndiꞌi ya, saa chi xa ku̱yati ni tindaa kivi ya kuu saa.

¹¹ Naꞌa na íkan ya väꞌa, ta vaꞌa ná ikan ka na ya väꞌa. Na íkan ya kini, ta ná ikan ka na ya kini. Na íkan ya vaꞌa ta ná ikan ka na ya vaꞌa. Na i̱í, na xáa súvi ya kúni Ndioxi, ta ná xaa súvi ka na ya kúni Ndioxi ―káchi tatun Ndioxi ikán xiꞌin i.

¹² Ta saa ndi̱kaꞌan Tata yo Jesucristo, káchi ra saa: ―¡Koo tuꞌva ndo, chi kama ni ndiko koo tuku i! Ta saa kuniꞌi i ya chaꞌvi i iin iin naꞌa, tá íyo chiñu i̱kan na saa koo ya chaꞌvi i na.

¹³ Yeꞌe náni i “Alfa xiꞌin Omega”, chi yeꞌe ku ra núnu̱ú ta yeꞌe ku ra sindiꞌi. Yeꞌe ku i núnu̱ú íyo tá xi̱koo xaꞌa ñuu ivi yóꞌó, ta yeꞌe ku ra íyo nda kivi tá ná ndiꞌi xaꞌa ñuu ivi ―káchi Jesucristo.

¹⁴ Vaꞌa ni kée na ndíkata toto na ya ndúyaa ni ya, chi na ikán ta kuu mií na ichí kaxi na kuiꞌi ndaꞌa itun táxi kutaku na xiꞌin Ndioxi ndiꞌi saa ichí. Saa kuchiñu na kiꞌvi na yeꞌe ñuu i̱í ikán.

¹⁵ Ta na väꞌa ndoo na kundoo na chí keꞌe, chi na ikán ku na i̱kan ya väꞌa, ya kini ni. Saa tu na tuꞌva, na tási, saa tu nda taa nda ndi̱xika xiꞌin ná síꞌi, ta saa tu ná síꞌi ná ndi̱kiꞌvi xiꞌin taa, ta saa tu na xa̱ꞌni ndìì, saa tu na xa̱a kaꞌnu inka ndioxi án inka naꞌna ndioxi ra köo kúu Ndioxi ndaa, saa tu na kútoo ni kaka xiꞌin ya síki, ta síndaꞌvi na naꞌa. Ndiꞌi na ikán küchiñu na koo na ñuu i̱í xiꞌin Ndioxi.

¹⁶ Saa ndi̱kaꞌan tuku Tata yo Jesucristo, káchi ra saa: ―Yeꞌe ku Jesús, ta xa ti̱ꞌvi i tatun i ya xáa chiñu nuu i xa̱a ya kaꞌan ya ndiꞌi tuꞌun yóꞌó xiꞌin un. Saa chi kúni i ndituꞌun un xiꞌin ndiꞌi na veꞌe ñuꞌu, xaꞌa ya káa yeꞌe tá káa “Tioꞌo itun”, chi kúu i seꞌe ñani sikua ra rey David, ta káa tu i tá káa “Kimi kiti ndíyeꞌe ni tá xa túvi naꞌa” ―káchi Tata yo Jesucristo.

¹⁷ Tachi I̱í Ndioxi xiꞌin na veꞌe ñuꞌu na íin tá káá ñaꞌa yá tindaꞌa xiꞌin Levo loꞌo ikán kána na ra, káchi na saa xiꞌin ra: “Naꞌa Tata yo Jesús”, káchi na. Ta ndóꞌo̱ xíni soꞌo tuꞌun yóꞌó, kaꞌan tu ndóꞌo̱ saa va xiꞌin naꞌa: “Naꞌa ndo”, kachi ndo. Ta ndóꞌo̱ íchi tikuii ta kúni ndo koꞌo ndo rá, ta vaꞌa kixi ndo koo ndo rá, chi táxi rá kutaku ndo ndiꞌi saa kivi. Ta síniꞌi uun Ndioxi rá koꞌo ndo.

¹⁸ Yeꞌe Juan, káꞌan i xiꞌin ndiꞌi ndo xíni soꞌo tuꞌun ya ndi̱kaꞌan nda ndi̱kaꞌan ndoso tuꞌun yuꞌu Ndioxi íyo nuu tutu yóꞌó, káchi i saa: Tá íyo na chínuu ka tuꞌun ya sáma na ya káꞌan tuꞌun Ndioxi ta, kuꞌva saa chinuu ka Ndioxi tindoꞌo ya xa íyo nuu tutu yóꞌó, ndee ni uꞌvi tixuꞌvi na íkan saa.

¹⁹ Saa tu na kíndaa tuꞌun Ndioxi ya íyo nuu tutu yóꞌó ya ta̱a nda ndi̱kaꞌan tuꞌun yuꞌu Ndioxi, ta kindaa Ndioxi ichí ndaꞌa na künuu ka kivi na nuu tutu ra ya táxi koo na xiꞌin ra ndiꞌi saa kivi ya vaxi, täxi ra koo na xiꞌin ra ñuu i̱í, ni ya vaꞌa káꞌan tutu yóꞌó xaꞌa, ta nïꞌi na ya nuu ra.

²⁰ Jesús ra ndíkani xaꞌa tuꞌun yóꞌó ya kúu ya ndaa, ra ikán ku ra káꞌan xiꞌin ndo, káchi ra saa: “Ndixa kama ni ndiko koo i”, káchi ra. Ta ndiꞌi na kándixa ya káꞌan ra, káchi na: Saa ná koo. ¡Naꞌa Tata Jesús, ra chee nuu nde! káchi na.

²¹ Ta Jesucristo ra chee nuu yo ná ikan ra ya vaꞌa xiꞌin ndo. Saa ná koo.