El Apocalipsis 21 - Xochapa Mixteco

Nduu xa̱á nuu ndivi tin ñuu ivi yóꞌó

¹ Saa xi̱ni i ndu̱u xa̱á ndivi ni̱nù tin ñuu ivi yóꞌó. Ta köo ka ndivi núnu̱ú ndi̱xiyo ni ñuu ivi yóꞌó köo ka ya ndi̱xiyo, ni nduta ñûꞌu köo ka rá ndi̱xiyo.

² Yeꞌe Juan, xi̱ni i ñuu i̱í, ñuu Jerusalén ya xa̱á, xi̱ni i ya vaxi nuu ya nuu ndivi nuu íyo Ndioxi. Luvi ni ya, tá kuꞌva luvi ni toto ndíxi ñaꞌa ya tindaꞌa yá xiꞌin i̱í yá, saa káa ñuu ya xi̱ni i.

³ Saa xi̱ni soꞌo i tuꞌun ya ke̱e nuu íin tai toꞌo itun i̱í, ta ndee ka vi ndi̱kaꞌan tachi na, káchi ya saa: ―Na ñuu yóꞌó ku na ku ñuu Ndioxi, saa koo ra xiꞌin na, ta na ñuu ra kuu na. Saa koo ra xiꞌin na, nda iin kivi sindikoo ra na.

⁴ Ta mií ra ku ra ndiyakun ndiꞌi tikuii nuu na xaꞌa ya xáku na. Nda iin ichí küvi ka na, ni köo ka na kuaku, ni köo ka na kusuchi ini, ni na kúꞌvi köo ka na koo, chi ya ndo̱ꞌo na yachi ta xa ndi̱ꞌi xaꞌa ndiꞌi ya.

⁵ Saa ndi̱kaꞌan ra índuꞌu nuu tai toꞌo, káchi ra saa: ―Ndasa xa̱á ndiꞌi i ñaꞌa ya si̱kuaꞌa i yachi. Saa ndi̱kaꞌan tuku ra xiꞌin i, káchi ra saa: ―Taa tuꞌun ya káꞌan i xiꞌin un, chi ya ndaa ni ndixa ku ya káꞌan i xiꞌin un ―káchi ra xiꞌin i.

⁶ Saa ndi̱kaꞌan tuku ra xiꞌin i, káchi ra saa: ―Vitin xa ndi̱xinu ndiꞌi chiñu ya chi̱tuni i kunduvi ñuu ivi yóꞌó. Ta yeꞌe náni i “Alfa xiꞌin Omega” Chi yeꞌe ku taa ra núnu̱ú ta yeꞌe ku ra si̱ndiꞌi. Ta ndiꞌi naꞌa na íchi tikuii, siniꞌi i rá koꞌo na. Ta tikuii rá taxi i koꞌo na, ta ndee ni ndee kúu mií rá chi taxi rá kutaku na ndiꞌi saa kivi vaxi.

⁷ Ta ndiꞌi naꞌa na kúchiñu nuu ya väꞌa, na köo síndikoo yeꞌe, na yóꞌó ku na ndikuiso ndiꞌi ya vaꞌa taxi i ndaꞌa na. Ta ndiꞌi saa kivi ya vaxi koo i Ndioxi na, ta na ikán nduu na seꞌe mií i.

⁸ Ta na síndikoo ichí i xaꞌa ya íꞌvi na tixuꞌvi na xaꞌa i, ta kuꞌun na yavi nuu xíxi ni ñu̱ꞌu̱ xiꞌin ñuꞌú káꞌndi ya náni azufre, saa kundoꞌo na köo xíin kandixa yeꞌe, na íkan ndiꞌi saa nuu ya väꞌa, ya kini, xiꞌin na xáꞌni ndìì, xiꞌin nda taa nda kuakiꞌvi xiꞌin inka ñaꞌa, án ndiꞌi ná ñaꞌa ná kuakiꞌvi xiꞌin inka taa, saa tu na tási xiꞌin na káñuꞌu yu̱ú savi án na káñuꞌu inka naꞌna ya köo kúu ndioxi ra ndaa, xiꞌin ndiꞌi na ndítuꞌun vata. Ta ya ndoꞌo ni na yóꞌó ku nuu “kuvi na ichí uvi” ―káchi Ndioxi ndi̱kaꞌan ra xiꞌin i.

⁹ Saa ki̱xi iin taꞌan tatun Ndioxi nuu i, taꞌan ya uxa ya xi̱niꞌi uxa copa nuu xi̱ñuꞌu uxa nuu tindoꞌo ya si̱ndiꞌi, ya ndee ni tixuꞌvi naꞌa. Saa ndi̱kaꞌan ya xiꞌin i káchi ya saa: ―Vaꞌa kuyati un nuu i, saa sinaꞌa i yá ñaꞌa yá tindaꞌa, yá koo xiꞌin ra Levo loꞌo ―káchi tatun ikán xiꞌin i.

¹⁰ Saa ndi̱kiꞌin tatun Ndioxi yeꞌe tixin Tachi I̱í Ndioxi, ndi̱xaꞌan i xiꞌin ya iin iku chee ni ta sukun ni ya. Ta ikán si̱naꞌa ya yeꞌe ñuu ya i̱í ya kúu ñuu Jerusalén ya xa̱á, vaxi nu̱u ya nuu ndivi nuu íyo Ndioxi.

¹¹ Ta ndee ni luvi yéꞌe̱ táxan mií ñuu i̱í chee ikán, mií ndee Ndioxi ku ya síndiyeꞌe ni ya. Tá kuꞌva yéꞌe̱ taxan yu̱ú ya yaꞌvi ni ya náni jaspe saa yéꞌe̱ ya. Tá yéꞌe̱ tuku ya tá yéꞌe̱ vidrio ya vaꞌa xíto yo inka ñaꞌñu sata, saa yéꞌe̱ ya, yáꞌa ni luvi yéꞌe̱ ñuu ikán.

¹² Ta íyo nama chee ni nuu ñuu ikán ta sukun ni ya, iin ndikava nduu ndiꞌi nama sata ya. Iyo uxi uvi yeꞌe ya, ta iin iin yeꞌe ikán íyo iin tatun Ndioxi, saa iin iin mií yeꞌe ikán ndi̱kaꞌi kivi iin iin tiꞌvi uxi uvi saa nda seꞌe ra Israel, nda ndi̱xiyo xinaꞌa.

¹³ Uni yéꞌe ikán xíto ndaa ya chi nuu kéta ñu̱ꞌù, inka uni ya xíto ndaa chí norte, inka uni ya xíto ndaa chí sur, inka uni ya xíto ndaa chí nuu kuaketa ñu̱ꞌù.

¹⁴ Xaꞌa mií nama chee ni ya xinuu nduu sata mií ñuu ikán ñúꞌu uxi uvi yu̱ú ya naꞌnu ni, ta sata iin mií yu̱ú ikán ndi̱kaꞌi kivi iin iin uxi uvi saa nda apóstol nda xa̱a chiñu nuu mií ra kúu Levo ikán.

¹⁵ Ta tatun ya ndi̱kaꞌan xiꞌin i níꞌi ya iin itun, tá káa itun ndoó ndaku ni saa káa nu níꞌi ya, ta nina mií oro ku nu. Ta xiꞌin itun ikán kiꞌin kuꞌva ya mií ñuu i̱í kaꞌnu ni ikán, saa kiꞌin kuꞌva tu ya mií yéꞌe ikán xiꞌin mií nama ya xinuu nduu sata mií ñuu ikán.

¹⁶ Kumi ku xiín mií ñuu ikán, ta iin káchi ku kuꞌva kumi saa xiín ya. Iin kuꞌva ku ya ndíka ya xiꞌin ya kani ya tin ya sukun ya. Kúu mií ya uvi mil uvi ciento kilómetro.

¹⁷ Saa ki̱ꞌin kuꞌva tatun ikán ya kúkun mií nama ya xi̱nuu nduu nuu ñuu, ta kúu ya uvi xiko uꞌun metro. Chi tá kuꞌva kíꞌin kuꞌva na ivi yóꞌó kua xi̱niñuꞌu tatun ikán ki̱ꞌin kuꞌva ya.

¹⁸ Nama sukun ikán ndi̱kuaꞌa ya xiꞌin nina yu̱ú luvi ni ya yéꞌe̱ taxan, ya náni jaspe. Ta mií ñuu i̱í chee ikán ndi̱kuaꞌa ya xiꞌin nina mií oro. Tá káa vidrio ya yéꞌe̱ ta xíto yo inka ñaꞌñu sata ya, saa káa oro ikán.

¹⁹ Ta uxi uvi saa yu̱ú naꞌnu ni, ya ñúꞌu xaꞌa nama ya xi̱nuu nduu nuu mií ñuu ikán, luvi ni ndi̱kutu ya xiꞌin nina mií yu̱ú vaꞌa ni ya luvi ni náni jaspe. Inka yu̱ú ya chee ni náni ya zafiro. Inka yu̱ú kaꞌnu ya uni ku ya luvi ni náni ya ágata. Inka yu̱ú kaꞌnu ya kumi ku yu̱ú luvi ni náni esmeralda.

²⁰ Inka yu̱ú chee ni ya uꞌun ku ya náni ónice. Inka yu̱ú ya iñu ku ya nani cornalina án rubí. Inka yu̱ú ya uxa ku ya náni crisólito. Inka yu̱ú kaꞌnu ya una ku ya náni berilo. Inka yu̱ú kaꞌnu ya i̱i̱n ku ya nani topacio. Inka yu̱ú kaꞌnu ya uxi ku ya náni crisoprasa. Inka y kaꞌnu ya uxi iin ku ya náni jacinto. Inka yu̱ú ya uxi uvi ku ya náni amatista.

²¹ Ta uxi uvi saa yéꞌe mií nama ya ndi̱kava nduu sata mií ñuu i̱í ikán, ndi̱kuaꞌa ya xiꞌin iin iin yu̱ú vaꞌa ni ya luvi ni yéꞌe̱, ya náni perla. Ta mií ichí kaꞌnu mi ñuu i̱í ikán ndi̱kuaꞌa ya xiꞌin oro nina. Ta luvi ka vi yéꞌe̱ nuu mií ichí ikán, tá káa iin vidrio ya vaꞌa xíto yo inka ñaꞌñu sata saa káa ya.

²² Ta nda iin veꞌe ñuꞌu köo ndi̱xini i mi ñuu i̱í chee ikán, saa chi mií Iva yo Ndioxi ra ndee ni ndee ku ra ku veꞌe ñuꞌu xiꞌin Tata yo Jesucristo ra kúu Levo ku ra íyo xiꞌin ra.

²³ Ta mií ñuu ikán ta köo xíniñuꞌu ya ñu̱ꞌù án yoó ya sindiyeꞌe ya ñuu, saa chi xa mií Ndioxi xiꞌin mií kiti Levo ikán ku ya luvi ni síndiyeꞌe mií ñuu i̱í ikán.

²⁴ Ta ndiꞌi na ndóo ñuu naꞌnu tin ñuu vali ñuu ivi yóꞌó kaka na nuu yéꞌe̱ mi ñuu ikán, saa xaa ndiꞌi nda rey ndi̱xiyo ñuu ivi yóꞌó nditaxi ndiꞌi nda ya kuika ku̱u mií na ndaꞌa na.

²⁵ Ta ndiꞌi saa kivi kununa yéꞌe nama ya xi̱nuu nduu sata ñuu i̱í ikán, nda iin ichí ndäsi ya, ta nda iin ichí köo ka ñǔu koo.

²⁶ Ta xa̱a na ke̱e ndiꞌi ñuu vali tin ñuu naꞌnu ñuu ivi yóꞌó, na ku̱u mií ya kuika xiꞌin ya luvi ni. Xaa na ndi̱taxi na ya ku̱u mií na ndaꞌa Ndioxi.

²⁷ Ta nda iin ya kini, ni ya yakua küchiñu ya kiꞌvi ya ñuu i̱í ikán. Ni na ka̱ndixa ñaꞌa ya köo kúu Ndioxi ra ndaa ta kïꞌvi na, nda iin ñaꞌa ya väꞌa kïꞌvi ya ñuu ikán. Ndisaa naꞌa na ndóso kivi nuu tutu mií Levo ikán ku na kuchiñu kiꞌvi, saa chi nuu tutu ikán ndóso ndiꞌi kivi ndiꞌi na kutaku xiꞌin Ndioxi ndiꞌi saa kivi ya vaxi.