El Apocalipsis 20 - Xochapa Mixteco

Mil kuiya kaꞌnda chiñu Jesucristo

¹ Saa xi̱ni i iin tatun vaxi nuu ya nu̱ú ndivi. Ta níꞌi ya llave kuna ya yavi kunu ni, saa níꞌi ya iin cadena chee ni.

² Saa ti̱in tatun ikán kiti ko̱ó nǎꞌa, ri kúu ko̱ó yata. Ri ikán ku kiti nǎꞌa ri ínuu nuu ndiꞌi tachi nduvaꞌa, ta Satanás ku kivi ri ikán. Saa ka̱tun tatun ri xiꞌin cadena níꞌi ya, ya kunuꞌni ri iin mil kuiya.

³ Tá ndi̱ꞌi ka̱tun ñaꞌa ya kiti nǎꞌa ikán saa ki̱ꞌin ñaꞌa ya si̱kana táku ya ini yavi kunu ni ikán, saa ndi̱kasi tuun vaꞌa ya yuꞌu yavi ikán ta ki̱ꞌin ya sello chi̱nuu ya yuꞌu mií yavi ikán. Ya ná küchiñu ri keta ri sindaꞌvi ri na ñuu ivi, nda ná xinu mil kuiya ndikaa ri saa keta ndíka ri kaka ri uvi ndaa kivi.

⁴ Saa xi̱ni i kuaꞌa ni tai toꞌo, ta nuu nu ikán ndóo ndiꞌi na kúu mií ichí ya xaa nani na kuachi. Ta xi̱ni tu i ya vaꞌa na ndee ni tuun xi̱ndikun Jesús, saa ndi̱xiꞌi na ndi̱taꞌnda sukun na chi ndi̱xika na ndi̱kaꞌan ndoso na tuꞌun vaꞌa xaꞌa Jesús yakan ndo̱ꞌo na saa. Ta köo ndi̱kañuꞌu na ikán kiti ìyo ni káa, ni naꞌna ri köo ndi̱kañuꞌu na, ta köo ndi̱taxi na ndikunuu sello ri taan na án ndaꞌa na. Saa ndi̱taku na ta xa̱á na xáꞌnda chiñu na xiꞌin Tata yo Jesucristo iin mil kuiya.

⁵ Ta na nditaku ikán ku na núnu̱ú nditaku. Sundi na ndíi, na köo ndi̱kandixa Ndioxi ta täꞌan nditaku na nda ná xinu iin mil kuiya saa ndi̱taku na.

⁶ Vaꞌa ni kée na nditaku núnu̱ú ikan Ndioxi, nduu i̱í na nuu ra. Ta küvi ka na ichí uvi, chi ya xáꞌni ndìì ta köo ka ndee ya kaꞌni uvi tuku ya na. Kutaku na xiꞌin Ndioxi ndiꞌi saa kivi ya vaxi, nduu na sutu nuu ra ya xaa chiñu na nuu ra xiꞌin nuu Tata yo Jesucristo, saa koo na kaꞌnda chiñu na xiꞌin ra iin mil kuiya.

⁷ Tá ndi̱ꞌi ndi̱yaꞌa mil kuiya ikán, saa tiꞌvi Ndioxi tatun ra ya tava ya kiti nǎꞌa, keta ri ini veꞌe kàà nuu ndíkaa ri.

⁸ Ta kiti nǎꞌa ikán keta ri kuꞌun ndíka ri, kuꞌun ri sindaꞌvi ri na ndóo ndiꞌi saa ñuu ivi, tá kúu na ñuu Gog xiꞌin na ñuu Magog. Kiti nǎꞌa Satanás ikán ndikaya ri ndiꞌi naꞌa ya kuꞌun na kani taꞌan na nuu koo kuachi ta yáꞌa ni kuaꞌa koo na ndikitaꞌan, tá kuꞌva íin yoti yuꞌu nduta ñûꞌu saa kuaꞌa koo na kuꞌun ri ndikaya ri.

⁹ Ta kee na ndiꞌi ni kúu saa xaꞌa ñuu ivi, ñaa kava nduu ndiꞌi na sata ñuu nuu ndóo na ií ñuu ya kúꞌvi ni ini Ndioxi xíni ra. Saa taxi Ndioxi koyo ñu̱ꞌu̱ xíxi nuu ndivi, ta kaꞌmi ndiꞌi ya na sáa ini xíni ra, sindiꞌi xaꞌa ra na.

¹⁰ Saa tiin na tatun Ndioxi kiti nǎꞌa, kiti si̱ndaꞌvi ni naꞌa, ta kiꞌin na ri sikana táku na nuu xitun nuu ndee ni xíxi ñu̱ꞌu̱ xiꞌin ñu̱ꞌú káꞌndi ya náni azufre. Ta nuu xíxi ni ñu̱ꞌu̱ ikán xa si̱kana tu na kiti ìyo ni káa xiꞌin ra profeta vata ra xa̱a chiñu nuu ri. Ikán ku nuu tíxuꞌvi ni na nduvi niuun saa tixuꞌvi na ndiꞌi saa kivi ya vaxi.

Xaa nani Ndioxi kuachi xiꞌin ndiꞌi naꞌa

¹¹ Saa xi̱ni i tai i̱í itun toꞌo, itun yaa ku nu, ta índuꞌu Ndioxi nuu itun tai ikán. Saa xi̱nu ñuu ivi yóꞌó xiꞌin ndivi, xi̱nu ya kuaꞌan xika ya nuu Ndioxi, nda iin ka naꞌa köo ndi̱xini ka ya, ni köo ka náꞌa nuu ndi̱xiyo ya.

¹² Saa xi̱ni i ndiꞌi na ndi̱xiꞌi, na kúu mií chiñu naꞌnu tin na kúu mií chiñu vali. Ta ndíta ndiꞌi na ikán yati nuu ndíchi tai i̱í itun toꞌo chee. Saa ndi̱xuna kuaꞌa ni tutu nuu ndóso ya i̱kan ndiꞌi naꞌa tá xi̱taku na ñuu ivi, ñaa ndi̱xuna inka tutu nuu ndóso kivi ndiꞌi na koo xiꞌin Ndioxi ndiꞌi saa kivi ya vaxi. Saa xa̱a nani Ndioxi xaꞌa kuachi ndiꞌi na xa ndi̱xiꞌi. Tá kuꞌva íyo ya i̱kan na ndóso nuu tutu ikán, saa íyo kuachi na ya xa̱a nani Ndioxi xiꞌin na, na i̱kan ya vaꞌa ta koo na xiꞌin ra, na i̱kan ya väꞌa ta kuꞌun na ndaya.

¹³ Saa xi̱ni i nduta ñûꞌu ya ndi̱taxi rá ndiꞌi na ndi̱xiꞌi ini rá, kuaꞌan na nuu Ndioxi. Ñaa xi̱ni ka i ndiꞌi na xa ndi̱xiꞌi ndóo na iin ñaꞌñu nuu náni Hades, ke̱e na kuaꞌan na nuu Ndioxi xaa nani ra kuachi na xiꞌin na. Tá íyo kuachi i̱kan iin iin na, kuꞌva saa íyo ya xa̱a nani Ndioxi xiꞌin na.

¹⁴ Saa ti̱in tatun Ndioxi ndee ya xáꞌni naꞌa ta ti̱in ya inka ya náni Hades ki̱ꞌin ñaꞌa ya ta̱an ya ini yavi nuu ndee ni xíxi ñu̱ꞌu̱. Chi ikán ku nuu xíꞌi na ichí uvi.

¹⁵ Ta ndiꞌi na köo ndóso kivi nuu tutu Ndioxi ya koo na xiꞌin ra, ta ki̱ꞌin tatun Ndioxi na ta̱an ya ini xitun nuu ndee ni xíxi ñu̱ꞌu̱.