El Apocalipsis 2 - Xochapa Mixteco

Ndítuꞌun Jesucristo tuꞌun yóꞌó xiꞌin na kándixa ñaꞌa, na ndóo ñuu Éfeso

¹ Saa ndi̱kaꞌan ka ra xiꞌin i, káchi ra saa: ―Vaꞌa taa un tuꞌun yóꞌó ná kuꞌun ya ndaꞌa tatun Ndioxi ya ndáa na kándixa yeꞌe, nuu ndíkitaꞌan na xáa kaꞌnu na Ndioxi ñuu Éfeso. Yeꞌe ku taa ra ndóso uxa kimi nuu ndaꞌa kuáꞌá, ta yeꞌe ku ra xíka maꞌñu candelero ya oro nuu ndóso ñu̱ꞌu̱ xíxi ya, ta káꞌan i xiꞌin ndóꞌo̱ ndóo ñuu Efeso, ndo kándixa yeꞌe, ta soꞌva káchi i xiꞌin ndo:

² Xa xíni i xaꞌa ndiꞌi ya vaꞌa íkan ndo, saa xíni i ndee ni ndee xáa chiñu ndo nuu i, saa xíni i ya xáꞌa ndee ni ini ndo xiꞌin ya tíxuꞌvi ndo. Ta xíni i ya kúndasi ni nuu ndo xíni ndo naꞌa, na íkan ya väꞌa. Saa xíni i ya xi̱to ndoso ndo nda káꞌan xáa chiñu nda nuu Iva yo Ndioxi, ta süvi ya ndaa ku ya xáa chiñu nda nuu ra.

³ Ta xáꞌa ndee ndiꞌi ini ndo xaꞌa ndiꞌi ya ndóꞌo ndo, ta ndee ni ndee xáa chiñu ndo nuu i xaꞌa ya kúꞌvi ni ini ndo xíni ndo yeꞌe. Vani ndóꞌo ni ndo, ta köo ndíko koo ini ndo xaꞌa ya ndíkun ndo yeꞌe.

⁴ Vani vaꞌa ni íkan ndo, ta saa ni íyo iin kuachi ndo nuu i. Saa chi ndóꞌo̱, ta siloꞌo ni va kúꞌvi ini ndo xíni ndo yeꞌe, köo kúꞌvi ka ini ndo xíni ndo yeꞌe tá kuꞌva ku̱ꞌvi ini ndo xi̱ni ndo yeꞌe tá sikan xa̱á ndo kándixa ndo yeꞌe.

⁵ Yakan xíniñuꞌu ndo ndikaꞌán ini ndo ndá kuꞌva ndi̱xiyo ndo tá yachi, tá sikan xa̱á ndo kándixa ndo yeꞌe. Ta nduku ndo kuꞌva ya kuchiñu ndo kuꞌvi tuku ini ndo kuni ndo yeꞌe, tá kuꞌva ku̱ꞌvi ni ini ndo xi̱ni ndo yeꞌe tá núnu̱ú. Chi tá tu ná ïkan ndo saa, ta xaa i nditaꞌan i ndóꞌo̱, saa sikutaꞌa i kàà ndo nuu ndíchi ya xíxi ñu̱ꞌu̱ ini ya.

⁶ Ni saa va, sundi íyo iin ya vaꞌa íkan ndo, ya kúsini i xiꞌin ndo, chi ndóꞌo̱ ta kúndasi nuu ndo xíni ndo ya íkan naꞌa, na ndíkun sata ra Nicolás, tá kuꞌva kúndasi nuu yeꞌe ya, saa kúndasi ndo ya.

⁷ Ndiꞌi ndóꞌo̱ kándixa yeꞌe, ta kuni soꞌo ni ndo tuꞌun ya káꞌan Tachi I̱í Ndioxi xiꞌin ndo. Ndiꞌi ndóꞌo̱ na kúchiñu nuu ndee ya väꞌa, ndóꞌo̱ köo síndikoo ichí i, ta ndaꞌa ndóꞌo̱ kua taxi i kuiꞌi kaxi ndo, kiti kúun ndaꞌa itun ndíchi maꞌñu corra Ndioxi nuu luvi ni káa. Ta kuiꞌi ikán ku ri táxi ichí ndaꞌa ndo ya koo ndo ndiꞌi saa kivi ya vaxi xiꞌin Ndioxi ―káchi Jesucristo xiꞌin i.

Ndítuꞌun Jesucristo tuꞌun yóꞌó xiꞌin na kándixa ñaꞌa, na ndóo ñuu Esmirna

⁸ Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó ya ná kuꞌun ya ndaꞌa tatun Ndioxi ya ndáa naꞌa, na kándixa yeꞌe, nuu ndíkitaꞌan na xáa kaꞌnu na Ndioxi ñuu Esmirna. Ta yeꞌe káꞌan i xiꞌin na ikán, káchi i saa: Yeꞌe, ta táku i nda kivi núnu̱ú iin saa kutaku i nda kivi sindiꞌi. Yeꞌe kúu ra ndi̱xiꞌi ta ndi̱taku i, táku i vitin.

⁹ Xíni ndiꞌi i ya ndee ni ndóꞌo ini ndo, ta saa xíni i ya kúndaꞌvi ni ndo. Vani saa va, sundi ndóꞌo̱ ta tá íin ndo kuika ni va saa íin ndo. Saa ni xíni i ya káꞌan kini ni naꞌa xaꞌa ndo. Na ikán káꞌan na kúu na judío, ta süvi ya ndaa ku ya káꞌan na, chi na ikán ta na xáa kaꞌnu kiti nǎꞌa, kiti náni Satanás va ku na.

¹⁰ Ta ndóꞌo̱ ku ïꞌvi ndo nuu tindoꞌo ya uꞌvi ni vaxi nuu ndo. Saa chi íyo naꞌa, na kúni xaa súvi ya kúni kiti nǎꞌa án kiti Timiaꞌa, kiti Satanás. Tiin na sava ndóꞌo̱ taan na veꞌe kàà, nuu koto ndoso na ndóꞌo̱ án ya ndixa kua kándixa ndo yeꞌe. Ta ndoꞌo ni ndo uxi kivi. Ta káꞌan ni i xiꞌin ndo ya ná síndikoo ndo ichí i, ndinuꞌu ni ini ndo kandixa ndo yeꞌe, nda kivi tá ná kuvi ndo. Saa ndikiꞌin ndo ya vaꞌa taxi i ndaꞌa ndo nuu kutaku ndo xiꞌin i ndiꞌi saa kivi ya vaxi.

¹¹ Ndiꞌi ndóꞌo̱ kándixa yeꞌe, ta kuni soꞌo ni ndo ya káꞌan Tachi I̱í Ndioxi xiꞌin ndo. Ndiꞌi ndóꞌo̱, na kúchiñu nuu ya väꞌa, xaꞌa ya köo síndikoo ndo ichí i. Ndóꞌo̱ ta küvi ndo nuu Ndioxi, vani kuvi ndo ñuu ivi yóꞌó ndiꞌi xaꞌa ikin kuñu ndo, sundi küvi ndo ichí uvi, kutaku ya vaꞌa ndo koo ya xiꞌin Ndioxi ―káchi Tata yo Jesucristo.

Ndítuꞌun Tata yo Jesucristo tuꞌun yóꞌó xiꞌin na kándixa ñaꞌa, na ndóo ñuu Pérgamo

¹² Saa ndi̱kaꞌan ka ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun, ya ndáa naꞌa, na kándixa yeꞌe, na ndíkitaꞌan ñuu Pérgamo ya xáa kaꞌnu na Ndioxi. Ta káꞌan i xiꞌin na, káchi i soꞌva: Yeꞌe ku taa ra níꞌi i̱chi̱ ya xíin uvi saa ñaꞌñu yuꞌu.

¹³ Ta xíni ndiꞌi i ya íkan ndo, saa xíni i ya ndóo ndo ñuu nuu xáꞌnda chiñu kiti nǎꞌa náni Satanás. Ni saa va, sundi ndóꞌo̱, ta nda iin kivi köo síndoo ndo ichí i. Kándixa ni ndo yeꞌe. Ni tá xa̱ꞌni na ra Antipas taꞌan ndo, ra ndee ni xi̱ndikun yeꞌe, xaꞌa ya ikán kua xa̱ꞌni na ra. Chi ñuu nuu ndóo ndo ñaa, ta kiti nǎꞌa, kiti Satanás va ku ri xáꞌnda chiñu nuu ya.

¹⁴ Vani kuaꞌa ni va ya vaꞌa íkan ndo, ta saa ni íyo uvi ndaa kuachi ndo nuu i. Saa chi íyo naꞌa, na ndíkitaꞌan xiꞌin ndo nuu ndíkitaꞌan ndo xáa kaꞌnu ndo Ndioxi, ta na ñaa ta xáa súvi ka va na ya si̱naꞌa ra Balaam xinaꞌa. Chi ra íkan ku ra ndi̱kaꞌan xiꞌin ra Balac ndá kuꞌva kuchiñu sikoyo ra na ñuu Israel. Ta si̱ndikava ra na nuu kuachi, chi xi̱xi na ñaꞌa ya síniꞌi naꞌa nuu kuaꞌa ni ndioxi ndíi án naꞌna ya káꞌan na kúu ndioxi na. Ta ta̱a sií ra nda taa ya koo tani nda. Ta saa i̱kan tu ra xiꞌin ná síꞌi va.

¹⁵ Saa ni xíto i íyo ka ya väꞌa íkan sava ndo, chi xïin ndo sindikoo ndo ichí ya väꞌa ya sínaꞌa naꞌa, na ndíkun ichí ya sínaꞌa ra Nicolás, ta kúndasi ni va nuu yeꞌe xíni̱ i ya ñaa.

¹⁶ Xaꞌa ya ñaa kua vaꞌa ka ná ndiko koo ini ndo xaꞌa ya íkan ndo, ta sindikoo ndo ichí ñaa. Süvi ka vi ya kama ni ndiko koo i kani taꞌan i xiꞌin na ñaa xiꞌin i̱chi̱ ya xíin ni kéta yuꞌu i.

¹⁷ Ndiꞌi ndóꞌo̱ íyo soꞌo ta kuni soꞌo ni ndo ya káꞌan Tachi I̱í Ndioxi xiꞌin ndo. Ndiꞌi ndóꞌo̱, na kúchiñu nuu ñaꞌa ya väꞌa, xaꞌa ya köo síndikoo na ichí i, ta taxi i xita vaꞌa ya íyo sêꞌe kuxi na, xita vaꞌa yóꞌó náni ya maná ya ke̱e nuu ndivi. Saa taxi i iin yu̱ú yaa ndaꞌa iin iin na ikán, ta nuu yu̱ú ikán kunuu kivi na ya xa̱á. Ta nda iin naꞌa kündaa ini unkua ku kivi xa̱á iin iin na, iindaa mií na kundaa ini unkua ku kivi na ya xa̱á ―káchi Tata yo Jesucristo.

Ndítuꞌun Tata yo Jesucristo xiꞌin naꞌa na kándixa ñaꞌa, na ndóo ñuu Tiatira

¹⁸ Saa ndi̱kaꞌan tuku ra xiꞌin i, káchi ra saa: ―Taa un tuꞌun yóꞌó nuu tutu ya kuꞌun ndaꞌa tatun, ya ndáa naꞌa, na kándixa yeꞌe, na ndóo ñuu Tiatira, na xáa kaꞌnu Ndioxi. Yeꞌe ku taa ra káꞌan xiꞌin ndo, yeꞌe ku Seꞌe Ndioxi, ta yéꞌe̱ ni nduchi nuu i nda tá kuva yéꞌe̱ ñu̱ꞌu̱ ya xíxi, saa yéꞌe̱ ya. Ta xaꞌa i yéꞌe̱ ya tá kuꞌva yéꞌe̱ kàà ya yáꞌa tá sikan ndíyakun na ya, ndúyeꞌe ni ya, saa yéꞌe̱ xaꞌa i. Ta káꞌan i xiꞌin ndo tuꞌun yóꞌó:

¹⁹ Xíni ndiꞌi va i ya vaꞌa íkan ndo, ta xíni i ya kúꞌvi ni ini ndo xíni ndo yeꞌe, saa xíni i ya kándixa ni ndo yeꞌe, ta vaꞌa ni xáa chiñu ndo nuu i, saa xíni i ya kúndee ni ini ndo xiꞌin ya tíxuꞌvi ndo, ta köo síndikoo ndo ichí i. Ta kuaꞌa ni ka ya vaꞌa íkan ndo vitin, nuu ya i̱kan ndo tá núnu̱ú.

²⁰ Ta saa ni íyo kuachi ndo nuu i, chi xíto ndo ya väꞌa íkan iin ñaꞌa yá vata ítaꞌan xiꞌin ndo, ta köo káꞌan ndo xiꞌin yá. Chi káꞌan yá kúu yá, yá káꞌan ndoso tuꞌun yuꞌu Ndioxi, saa sínaꞌa yá tuꞌun ra, káchi yá, ta süvi ya ndaa ku ya káꞌan yá. Yá síndaꞌvi naꞌa va ku yá. Tá kuꞌva si̱ndaꞌvi yá Jezabel naꞌa, na xa̱a chiñu nuu i xinaꞌa, kuꞌva saa síndaꞌvi yá ñaa naꞌa, na xáa chiñu nuu i vitin. Saa chi táa si̱í yá nda taa ya koo tani nda, ta saa íkan tu yá xiꞌin ná síꞌi va. Ta saa táa si̱í yá na ndíkun yeꞌe ya kuxi na ñaꞌa ya síniꞌi naꞌa nuu ndioxi na ya ndíi án naꞌna ya káꞌan na xiꞌin kúu ndioxi na.

²¹ Ta xa kuaꞌa ni kivi ta̱xi i ndaꞌa yá nuu ndátun i ya ndiko koo ini yá xaꞌa kuachi yá, ta köo xíin yá sindikoo yá ya väꞌa íkan yá.

²² Xaꞌa ya ikán kua taxi i iin kueꞌe ndee ni ndaꞌa yá. Ta xaꞌa ya ndee ni kueꞌe ikán ta nda nuu xito ndikunduꞌu yá xiꞌin ya. Saa tu ndiꞌi naꞌa, na íkan tá íkan yá ñaa, ndee ni sitixuꞌvi i na, tá tu köo ndíko koo ini na xaꞌa ya väꞌa íkan na.

²³ Ta naꞌa, na kúu seꞌe yá, ta taxi i kueꞌe kuvi ndiꞌi na. Saa kundaa ini ndiꞌi naꞌa, na kándixa yeꞌe ya xíni ndiꞌi i ya íyo nima na xiꞌin ya ndíkani ini na. Ta saa chaꞌvi i iin iin na, tá kuꞌva íyo ya i̱kan na, saa koo yaꞌvi na.

²⁴ Saa íyo inka tuꞌun káꞌan i xiꞌin sava ndóꞌo̱ ndóo ñuu Tiatira, ndóꞌo̱ köo kándixa ya vata sínaꞌa yá ñaa, ta ni köo xíin ndo sikuaꞌa ndo ñaꞌa káꞌan na xaꞌa ya ndee ni ndíchi íyo sěꞌe síkuaꞌa na, káchi na. Chi ya ñaa ta ya káku nima kiti nǎꞌa, kiti Satanás va ku ya. Ta köo ka ñaꞌa nduku i nuu ndo.

²⁵ Ndisaa ya yóꞌó kua xíniñuꞌu ni ndo ikan ndo: Ndee ni kundikun ndo yeꞌe, ta sïndikoo ndo ya ndíkun ndo ichí i, nda kivi ná ndiko koo i.

²⁶ Ndiꞌi naꞌa, na kúndee nuu ya väꞌa, xaꞌa ya ndíkun na yeꞌe, ta xáa súvi na ya kúni i ndiꞌi saa kivi. Na ñaa ku na taxi i ichí ndaꞌa ya kaꞌnda chiñu na nuu ndiꞌi naꞌa, na ndóo ndiꞌi ni kúu xaꞌa ñuu ivi yóꞌó.

²⁷ Saa kaꞌnda chiñu na xiꞌin iin kàà ya káa tá káa iin itun kâni ni, ta ndee ni kaꞌnda chiñu na nuu ndiꞌi ñuu ivi yóꞌó xiꞌin ya. Chi kúu mií ya ndee ya sikuachi vali ya na, tá kuꞌva cháchi vali kisi ñuꞌú, saa ikan ya. Chi kàà ikán kua ta̱xi Iva i ndaꞌa i ya kaꞌnda chiñu i, ta saa koo ya taxi i ndaꞌa na.

²⁸ Saa taxi i kiti kimi túvi ndaꞌa na.

²⁹ Ndiꞌi ndóꞌo̱ na veꞌe ñuꞌu, ndóꞌo̱ xíni soꞌo ya káꞌan i, ta kuni soꞌo ni ndo ya káꞌan Tachi I̱í Ndioxi xiꞌin ndo ―káchi Tata yo Jesucristo.