El Apocalipsis 19 - Xochapa Mixteco

Xáa kaꞌnu na Ndioxi nuu ndivi

¹ Tá ndi̱ꞌi ndi̱yaꞌa ya ikán saa xi̱ni soꞌo i tachi kuaꞌa ni naꞌa nuu ndivi, ndee ni káꞌan na, káchi na saa: ―¡Ná xaa kaꞌnu yo Ndioxi! ¡Chi Ndioxi ku ra ndee ni ndee, si̱kaku ra mií yo! Ndiꞌi ya vaꞌa ya ndee ni ndee xiꞌin ya toꞌo tin ya luvi ni yéꞌe̱ íyo ya xiꞌin Ndioxi.

² Chi Ndioxi ta xáa nani ra kuachi na xiꞌin ya ndaa tin ya ndixa. Chi xa si̱tixuꞌvi ni ra na ñuu chee ni ikán xaꞌa ya väꞌa i̱kan na. Chi na ñuu ikán tá íyo iin yá ñaꞌa xíko ikin kuñu saa íin na, ta xaꞌa ya íkan na saa kua xáa kini ni na xiꞌin ndiꞌi ni kúu na ñuu ivi. Saa xa̱ꞌni na kuaꞌa ni naꞌa na kándixa Ndioxi. Ta xaꞌa ya väꞌa i̱kan na kua sítixuꞌvi ni Ndioxi na ―káchi tachi na kuaꞌa ni xi̱ni soꞌo i.

³ Saa xi̱ni soꞌo tuku i tuꞌun ya ndi̱kaꞌan na kuaꞌa ni ndóo nuu ndivi, káchi na saa: ¡Ná xaa kaꞌnu ni yo Ndioxi! Saa chi iꞌma ya kána koo nuu xíxi ñuu chee ni ikán, ta ndïꞌi xaꞌa ya, ndiꞌi saa kivi ndaa ya nuu ndivi, nda iin kivi ndäꞌva ya ―káchi kuaꞌa ni tachi na ya xi̱ni soꞌo i.

⁴ Saa si̱kusiti ndiꞌi oko kumi na xikuaꞌa xiꞌin kumi ya táku, ndi̱kuita ndee na si̱kusiti na nda nuu ñuꞌú ya xáa kaꞌnu na Ndioxi, ra íyo nuu tai toꞌo chee ni. Saa ndi̱kaꞌan na, káchi na saa: “Saa ná koo. Ná xaa kaꞌnu ni yo Ndioxi”, káchi na.

⁵ Saa xi̱ni soꞌo i tachi na ya ke̱e nuu íin tai toꞌo, ta ndi̱kaꞌan ya, káchi ya saa: ¡Ná xaa kaꞌnu ni yo Ndioxi, ra chee ni nuu yo! Ndiꞌi ndóꞌo̱ xáa chiñu nuu ra, saa ndiꞌi ndóꞌo̱ xáa toꞌo ni ra án ndóꞌo̱ vali ku ndo án ndóꞌo̱ naꞌnu ku ndo, káchi tuꞌun ya xi̱ni soꞌo i.

⁶ Saa xi̱ni soꞌo i síso ni káꞌan kuaꞌa ni naꞌa, tá kuꞌva kái kóyo kuaꞌa ni tikuii nami saa kúu, ta saa kúu tu tá ndee ni ndáꞌi savi, saa kúu xi̱ni soꞌo i, ta káꞌan na, káchi na saa: ¡Ná xaa kaꞌnu ndiꞌi yo Ndioxi ra ndee ni ndee kúu mií nuu yo! Chi vitin xa̱á ra xáꞌnda chiñu ra.

⁷ ¡Ná kusini ni yo, ta saa ná koo vaꞌa ni ini yo! ¡Ná chinuu sukun ni yo ya toꞌo Ndioxi! Saa chi xa ti̱ndaa kivi ya tíndaꞌa ra kúu Levo loꞌo. Xa íyo tuꞌva ñaꞌa yá tindaꞌa xiꞌin ra, saa xa íyo ndúvi yá koo yá xiꞌin ra.

⁸ Ta ñaꞌa yá tíndaꞌa ikán ta xa kúu mií yá ichí kundixi yá toto yaa ni, ya kúu ya lino, ya yéꞌe̱ táxan ni, chi ya lino yaa ni ikán ku ya vaꞌa ni, ya i̱í íkan na ndíkun Tata yo Jesucristo káchi tuꞌun ya xi̱ni soꞌo i.

Xíxi xíní na viko tíndaꞌa ra kúu Levo loꞌo

⁹ Saa ndi̱kaꞌan iin tatun xiꞌin i, káchi ya saa: ―Vaꞌa taa un tuꞌun yóꞌó, kachi un saa: “Vaꞌa ni kée naꞌa, na ka̱na Ndioxi kuꞌun na kuxini na nuu íyo viko tíndaꞌa ra kúu Levo loꞌo kachi un”, ―káchi ya xiꞌin i. Saa ndi̱kaꞌan ka ya xiꞌin i, káchi ya saa: ―Ndiꞌi tuꞌun ya ndi̱kaꞌan i xiꞌin un ku tuꞌun ya ndaa ni, ya ke̱e nuu Ndioxi ―káchi ya xiꞌin i.

¹⁰ Saa si̱kusiti i nuu tatun ikán ya xaa toꞌo ñaꞌa i, ta ndi̱kaꞌan ya xiꞌin i, káchi ya saa: ―Ïkan un saa, küsiti un nuu i, chi tá kuꞌva íyo mií un xáa chiñu un xiꞌin na ñani un na ndíkun Tata yo Jesucristo saa íyo tu yeꞌe va. Chi yo xáa chiñu nuu Ndioxi ku ndiꞌi yo, saa kándixa yo tuꞌun ya ndaa ya ndi̱kaꞌan Tata yo Jesucristo, ta ná sïndoo yo ya kándixa yo tuꞌun ra. Yakan küsiti un nuu i, iin mií Ndioxi ná xaa kaꞌnu ni yo. Chi tuꞌun ya si̱naꞌa Tata yo Jesucristo, ta iin káchi ku ya xiꞌin tuꞌun ya ndi̱kaꞌan nda ndi̱kaꞌan ndoso tuꞌun yuꞌu Ndioxi xinaꞌa, chi mií Tachi I̱í Ndioxi ta̱xi ya ndaꞌa nda ikán ndi̱kaꞌan nda ―káchi tatun ikán xiꞌin i.

Ra yóso kiti kuai yaa

¹¹ Saa xi̱ni i núna nuu ndivi, ta xi̱ni i iin kuai kiti yaa ku ri. Ta ra yóso ri náni ra Ra ndaa ni, Ra ndinuꞌu ni ndíkun ichí Ndioxi. Xáꞌnda chiñu ra xiꞌin nina ya ndaa, ta suvi xiꞌin ya ndaa káni taꞌan ra xiꞌin ya väꞌa.

¹² Yéꞌe̱ ni nduchi nuu ra, tá kuꞌva yéꞌe̱ ñu̱ꞌu̱ xíxi saa yéꞌe̱ ya. Saa ndóso kuaꞌa ni corona xiní ra. Saa ndi̱kaꞌi kivi ra taan ra, ta nda iin naꞌa köo kúndaa ini unkua káꞌan ya, ndisaa mií ra xíni unkua káꞌan ya.

¹³ Ta toto ndíxi ra ta iin chi̱chi ndiꞌi nií ya. Saa íyo inka kivi ra nani ra: “Tuꞌun Ndioxi”.

¹⁴ Ta nda lapa kuaꞌan xiꞌin ra, nda ke̱e nuu ndivi, yóso iin iin nda kuai yaa kuaꞌan nda, saa ndíxi nda toto vaꞌa ni ya lino ta ndakua yaa sami ya, nda ni loꞌo paꞌa köo yakua ya.

¹⁵ Saa ke̱ta iin i̱chi yáꞌa ni xiín yuꞌu ra. Ta xiꞌin ya ikán si̱tikueꞌe ni ra naꞌa, na ndóo ndiꞌi ni kúu saa ñuu ivi. Ta ndee ni ndee kaꞌnda chiñu ra nuu ndiꞌi na ikán xiꞌin kàà ya káa tá káa iin itun káni ni. Tá íkan naꞌa tá kóꞌni na kiti uva, xáñu ndoso na ri saa kána nduta ri, ta xiꞌin rá ikán síkuaꞌa na nduta vinu. Kuꞌva saa ikan ra xiꞌin na väꞌa ikán, chi ndee ni ndee kúu mií Ndioxi.

¹⁶ Ta ra yóso kuai yaa ikán, ndíxi ra iin toto nuu ndi̱kaꞌi kivi ra saa tu nuu siꞌin va ra, ta ya ndi̱kaꞌi ikán káchi ya saa: “Ra rey chee ni nuu ndiꞌi nda rey ku ra yóꞌó. Ta saa ndixa ni ka chee ra yóꞌó nuu ndiꞌi ni kúu na naꞌnu”, káchi kivi ra ya ndi̱kaꞌi nuu toto ndíxi ra xiꞌin nuu siꞌin ra.

¹⁷ Saa xi̱ni i iin tatun ndíchi ya xáñu ndoso ya nuu ñu̱ꞌù ya yéꞌe nduvi, saa ndee ni ndi̱ndaꞌi koꞌo ya, kána ya ndiꞌi kiti ri ndáchi nuu ndivi, káchi ya saa: ―Naꞌa ndo, ndikitaꞌan ndo nuu kuxini ndo nuu táva Ndioxi viko xaꞌa ndo.

¹⁸ Kixi ndo kaxi ndo kuñu nda rey, kaxi ndo kuñu nda naꞌnu nuu nda lapa xiꞌin nda taa nda ndee ni, nda xa̱ꞌni kuaꞌa ni naꞌa nuu ndi̱xiyo kuachi. Saa kaxi ndo kuñu kuai xiꞌin kuñu nda taa nda xi̱yoso ri, kaxi ndo kuñu ndiꞌi saa nuu naꞌa, na naꞌnu tin na vali, na íyo ndíka tin na xáa chiñu xiꞌin ya nduxa nuu patron na. Naꞌa ndo kaxi ndo kuñu ndiꞌi na yóꞌó ―káchi tatun ikán xiꞌin ndiꞌi kiti ndáchi.

¹⁹ Saa xi̱ni tuku i kiti ri ìyo ni káa xiꞌin nda rey nda xáꞌnda chiñu nuu na ñuu ivi, xiꞌin nda lapa nda ítaꞌan xiꞌin nda. Ndi̱kitaꞌan ndiꞌi nda ya chitaꞌan tuꞌun nda kani taꞌan nda xiꞌin Taa ra chee ra yóso kuai yaa, saa kani taꞌan na xiꞌin nda lapa nda ítaꞌan xiꞌin ra.

²⁰ Ta Taa ra chee ni ra yóso kuai yaa xiꞌin nda lapa ítaꞌan xiꞌin ra, tíin nda kiti ìyo ni káa ikán saa tíin tu nda ra profeta vata. Ta ra ikán ku ra si̱ndaꞌvi naꞌa xaꞌa ya i̱kan ra kuaꞌa ni yatúꞌun nuu na, ta ta̱xi na ndi̱kunuu sello ra taan na, saa xa̱a kaꞌnu na naꞌna mií kiti ìyo ni káa ikán. Ta saa xi̱ni i tíin ra nda kíꞌin ra nda síkana táku ra ini xitun chee ni nuu ndee ni xíxi ñu̱ꞌu̱ xiꞌin ñu̱ꞌu̱ káꞌndi ya náni azufre.

²¹ Ta ndiꞌi na xi̱ndikun sata ra profeta vata ikán xiꞌin kiti ìyo ni káa ikán, ndi̱xiꞌi ndiꞌi na xiꞌin i̱chi xi̱ín ni yuꞌu ndíso Taa ra yóso kuai yaa, saa ndi̱xaa ndiꞌi kiti ndáchi ya̱xi ka vi ri kuñu na ndakua ndi̱xaa ini ri ya̱xi ri ya.