El Apocalipsis 18 - Xochapa Mixteco

Ndi̱ꞌi xaꞌa ñuu Babilonia ya chee ni

¹ Tá ndi̱ꞌi ndi̱yaꞌa ndiꞌi ya ikán saa xi̱ni i inka tatun Ndioxi vaxi nuu ya nuu ndivi. Ta ndixa ni chee ndee kúu mií ya. Xaꞌa ya ndee ni ndee kúu mií ya, ta iin ndi̱yeꞌe ndiꞌi ni kúu nuu ñuꞌú.

² Ta ndixa loꞌo ndee ndi̱kaꞌan ya, káchi ya saa: ―¡Xa ndi̱kava ñuu chee ni ya Babilonia, ta ndi̱ꞌi xaꞌa ya! Vitin ndu̱u ya iin ñuu nuu íyo kiti nǎꞌa saa ndu̱u ya veꞌe nuu ndíkitaꞌan ndiꞌi tachi nduvaꞌa, ta ndu̱u ya chiꞌyo ndiꞌi nuu kiti ri ndáchi, ta kiti ndáchi ikán ku kiti kini ni, chi yáxi ri ndisaa ñaꞌa ya kini án ya táꞌi.

³ Ta ndiꞌi na inka ñuu, si̱kuaꞌa na ya kini ni tá kuꞌva íkan na ñuu Babilonia. Tá íin naꞌa na xíꞌi ni vinu ta síxini rá na, saa íin na ñuu ikán. Chi nduta vino rá xíꞌi ni na ku ya káꞌan xaꞌa ndiꞌi nuu ya väꞌa, ya kini ni íkan na ta kúsini ni na xiꞌin ya íkan na. Chi na ñuu Babilonia ta táa sii na inka naꞌa ya ikan na ya väꞌa íkan na. Saa ndiꞌi nda rey ñuu ivi, iin ndi̱kitaꞌan yuꞌu nda xiꞌin na íkan taꞌan ya väꞌa íkan na ñuu ivi. Saa na xíko ñaꞌa nuu na ñuu Babilonia ndu̱kuika ni na xaꞌa ya ndee ni kuaꞌa ya savi kúu mií na ñuu Babilonia, káchi tatun ikán xiꞌin i.

⁴ Saa xi̱ni soꞌo i tachi inka na nuu ndivi, káchi ya saa: ―Ndóꞌo̱ ñuu mií i, xíniñuꞌu ndo kana koo ndo ñuu väꞌa yóꞌó, ya ná ïkan ndo taꞌan ya väꞌa íkan na. Xíniñuꞌu ndo kana koo ndo ya ná ndöꞌo ndo ya ndee ni kundoꞌo mií na xaꞌa kuachi na.

⁵ Saa chi nda̱a ni kuachi na, ya väꞌa íkan na ndi̱xinu koo ya nda nuu ndivi. Ta Ndioxi köo ndi̱ndoso ini ra xaꞌa nda iin ya väꞌa íkan na.

⁶ Vaꞌa ná ndoꞌo ni na ñuu yóꞌó ikan Ndioxi, saa chi saa si̱tixuꞌvi ni mií na kuaꞌa ni naꞌa. Tá kuꞌva i̱kan na ya väꞌa xiꞌin inka naꞌa saa ná kundoꞌo ni na, nda uvi ichí taxi un ya ndee ni ná kundoꞌo na saa xaꞌa ya si̱ndoꞌo ni na naꞌa. Xa kuaꞌa ni naꞌa ndóꞌo xaꞌa ya väꞌa i̱kan na yóꞌó.

⁷ Ta na väꞌa ikan ta ndi̱xiyo tái ni ini na, saa kuika ni ndi̱xiyo na, ta ku̱u mií na ndiꞌi ñaꞌa ya káchi ini mií na. Ta vaꞌa ná taxi Ndioxi ndoꞌo ni na vitin. Saa chi na väꞌa ikán, ta kútai ni ini na, chínuu vaꞌa ni na tuꞌun na, yakan ndíkani ini na káchi na saa: “Naꞌnu ni mií nde chi ndeꞌe ku nde xáꞌnda chiñu nuu ndiꞌi naꞌa. Ta köo íyo nde tá káa iin ñaꞌa yá ndaꞌvi, yá ndi̱xiꞌi ndaa, chi nda iin kivi ndöꞌo nde, ni nda loꞌo küsuchi ini nde”, káchi na ndíkani ini na.

⁸ Saa ni iin kivi ya vaxi ta iin ndikitaꞌan yuꞌu ndiꞌi ya xiꞌin na nuu ndee ni tixuꞌvi na ñuu ikán: Kuaꞌa ni na kuvi ta kuaku ni na, saa koo ni tamá, saa koko na xiꞌin ñu̱ꞌu̱ ya xíxi. Ta saa kundoꞌo na saa chi Ndioxi ku ra ndee ni ndee, yakan sítixuꞌvi ni ra na káchi tuꞌun ki̱xi nuu ndivi xi̱ni soꞌo i.

⁹ Ta kuaku ni mií nda rey ikán tá ná kuni nda ndee ni kána iꞌma xíxi ni ya. Chi i̱kan ni nda taꞌan ya väꞌa i̱kan na, saa ku̱sini ni nda xiꞌin ya savi ni ndi̱xiyo mi ñuu ikán.

¹⁰ Ta nda rey ikán kundita xíka nda nuu na ñuu ikán, saa chi ku íꞌvi nda tixuꞌvi nda kuꞌva tíxuꞌvi na ñuu ikán, kaꞌan nda, kachi nda saa: ¡Vai! ¡Vai! ¡Ndaꞌvi ni ñuu chee ni Babilonia! ¡Ndee ni ñuu ndi̱xiyo ya, ta kaꞌnu ni ndi̱xiyo ya! ¡Ta iin ku̱u soꞌva ti̱ndaa tindoꞌo nuu ya, tíxuꞌvi ni ya! kachi nda rey ikán vaxi kivi.

¹¹ Saa ndiꞌi ni kúu na ñuu ivi na ndi̱xiko ñaꞌa, kusuchi ni ini na ta kuaku ni na, saa chi ndiꞌi xaꞌa ñuu ikán. Ta köo ka naꞌa sata nuu na.

¹² Köo ka na sata kàà ya oro, ni ya plata, ni yu̱ú ya luvi ni, ya yaꞌvi ni, ni toto ya yaꞌvi ni ya kúu lino án seda, köo ka na sata ya. Ni toto ndíꞌi tuun án ya kuaꞌa ñu̱ꞌu, ni vitun itun vaꞌa ni támi xáꞌan, ni vitun itun luvi ni, ni kàà ya yáꞌa án kàà ya kúu hierro xiꞌin kàà ya bronce saa tu ya kúu mármol köo ka na sata ya.

¹³ Ni köo ka na sata kuaꞌa canela, ni iku ya yaꞌvi ni ya támi xáꞌan, ni na sata xuxa vaꞌa síchoꞌma na, án xuxa itun, án nduta támi ni xáꞌan án nduta vino, án ceite, án ita harina, xiꞌin trigo, ni sindiki, ni levo, ni kuai, ni itun carreta, ni na xáa chiñu nuu na, köo ka naꞌa sata ñaꞌa.

¹⁴ Xaꞌa ya ikán kua kaꞌan na xíko xiꞌin na ñuu Babilonia, kachi na saa: Ndóꞌo̱ ndóo ñuu Babilonia, köo ka ya kuika ya ka̱chi ni ini ndo xiꞌin. Ndiꞌi ñaꞌa ya luvi ni ya kúsini ni ndo xiꞌin, nda iin ichí köo ka ñaꞌa kuu mií ndo.

¹⁵ Ta na xíko ikán ta ndu̱u kuika ni na, chi kuaꞌa ni ñaꞌa ndi̱xiko na nuu na ñuu Babilonia, ta na ikán ta ku íꞌvi ni na tá ná kuni na ya ndóꞌo ni na ñuu Babilonia, saa kundita xíka na xaꞌa ya íꞌvi na tixuꞌvi na xiꞌin na ñuu ikán, ñaa kuaku ni na ta kusuchi ni ini na.

¹⁶ kachi na saa xaꞌa ñuu Babilonia: “¡Vai! ¡Vai! ¡Ndaꞌvi ni na ndóo ñuu chee ni ya Babilonia! Vaꞌa ni xi̱ndixi na toto yaꞌvi ni, ya kúu toto lino, toto ya kuaꞌa ñu̱ꞌu án ya ndíꞌi tuun. Saa vaꞌa ni xi̱niñuꞌu na oro xiꞌin kuaꞌa ni yu̱ú ya luvi ni, xiꞌin ya yaꞌvi ni xi̱ndoso ndaa sata toto na.

¹⁷ ¡Ta iin ku̱u soꞌva ndi̱ꞌi xaꞌa ya kuika kúu mií ndo!” Soꞌva kaꞌan na xíkó xaꞌa na ñuu Babilonia kivi vaxi. Ta saa ndiꞌi na naꞌnu na xáꞌnda chiñu nuu na káva itun barco xiꞌin ndiꞌi na ñúꞌu ini itun barco kuaꞌan na, xiꞌin ndiꞌi na xáa chiñu ini nu, xiꞌin na xíkó, ndiꞌi na ikán ta kundita xika na nuu íyo ñuu Babilonia.

¹⁸ Kivi tá ná kuni na kuandaa iꞌma kuaꞌan ya, xaꞌa ya xíxi ñuu ikán, saa ndee ni ndee kaꞌan na kachi na saa: ―Ni köo ñuu ndi̱xiyo tá kuꞌva ndi̱xiyo ñuu chee ni ya Babilonia káa ―kachi na.

¹⁹ Saa tiso na yaá xiní na xaꞌa ya kúsuchi ni ini na, ta kuaku ni na, saa kaꞌan suchi ni ini na, kachi na saa: ―¡Vai! ¡Vai! ¡Ndaꞌvi ni na ñuu Babilonia, chee ni ndi̱xiyo ñuu na xiꞌin ndiꞌi ya kuika ku̱u mií na! Chi xa̱a kuika na naꞌa na kúu mií itun barco, itun xíka nuu nduta ñûꞌu. ¡Ta iin ku̱u soꞌva ndi̱ꞌi xaꞌa na! ―kachi na ikán.

²⁰ Saa xi̱ni soꞌo i tuꞌun ya ndi̱kaꞌan iin na, káchi ya saa: Ndóꞌo̱ ndóo nuu ndivi nuu íyo Ndioxi, ¡ta kusini ni ndo! Saa kusini ni ndóꞌo̱ ndi̱kaxin Ndioxi xáa chiñu nuu ra. Saa ndóꞌo̱ káꞌan tuꞌun yuꞌu Ndioxi, ndo ndi̱kaꞌan ndoso tuꞌun ra, xiꞌin ndiꞌi ndóꞌo̱ na i̱í xaꞌa ya ndíkun ndo Ndioxi. ¡Vaꞌa kusini ni ndiꞌi ndo! Chi xa̱a súvi Ndioxi ya ndaa xaꞌa ndo.

²¹ Saa ti̱in iin tatun Ndioxi ya ndee ni ndee kúu mií, ti̱in ya iin yu̱ú chee ni taꞌan ya xíniñuꞌu na ndíko na trigo. Kiꞌin ya yu̱ú ikán si̱kana ya ini nduta ñûꞌu, saa ndi̱kaꞌan ya, káchi ya saa: Tá kuꞌva si̱kana i yu̱ú chee ni ini nduta ñûꞌu, kuꞌva saa sikana Ndioxi yóꞌo̱ ñuu Babilonia, ta nda iin ka naꞌa küni yóꞌo̱.

²² Ta nda iin kivi köo ka naꞌa sikaꞌa itun arpa, ni na síkaꞌa ndá ka itun káꞌa, köo ka na koo, ni na tívi itun tilali, ni na tívi itun trompeta köo ka na koo. Ta nda iin ka na íkan ndá ka chiñu köo ka na koo, ni ya níꞌi ni yu̱ú ndíko na trigo köo ka ya niꞌi ni.

²³ Ni ñu̱ꞌu̱ yéꞌe̱ ta tüun ka ya ñuu na, Ni viko tindaꞌa nuu kúsini naꞌa köo ka ya koo. Ni naꞌa na ndi̱xiyo ni ndi̱xiko ta köo ka na koo, na ndasa ndee yóꞌo̱ nuu ku̱tai ni ini un ta köo ka na koo. Chi yóꞌo̱ ñuu chee ni ya Babilonia xa̱a tasi un xiꞌin ndiꞌi na ñuu ivi, ta si̱ndaꞌvi un na.

²⁴ Ta yóꞌo̱ ñuu chee ni, ta ndíso un kuachi, chi xa̱ꞌni un nda káꞌan tuꞌun yuꞌu Ndioxi, xa̱ta un nií nda. Ta kuaꞌa ni na i̱í i̱kan un saa xiꞌin xaꞌa ya ndíkun na Ndioxi. Ta yóꞌo̱ ku un i̱kan saa xiꞌin ndiꞌi na ndi̱xiꞌi ñuu ivi káchi tatun ikán xiꞌin ñuu Babilonia.