El Apocalipsis 17 - Xochapa Mixteco

Tíxuꞌvi ni na ñuu Babilonia

¹ Ta saa xa̱a iin na taꞌan na tatun ya xi̱niꞌi copa ya uxa xa̱a ya nuu i, ndi̱kaꞌan ya xiꞌin i, káchi ya saa: ―Naꞌa yóꞌó, ná sinaꞌa i yóꞌo̱ ndá kuꞌva tixuꞌvi ni na ñuu Babilonia, chi ñuu yóꞌó tá íyo iin yá ndee ni xíko ikin kuñu saa káa ya. Ta índuꞌu koo yá nuu nduta tikuii nduta kuaꞌa ni.

² Nda rey nda xáꞌnda chiñu nuu kuaꞌa ni ñuu naꞌnu ñuu ivi yóꞌó, ta tá íin nda ndi̱kixi xiꞌin ñaꞌa saa íin nda, ta nda tá káa nduta vino nduta síxini naꞌa, saa káa ya väꞌa íkan nda xaꞌa ya kuakiꞌvi nda xiꞌin ná síꞌi íkan na kuachi ivi yóꞌó.

³ Saa xa̱a Tachi I̱í Ndioxi sata i, ta ndi̱kiꞌin iin tatun yeꞌe ndi̱xaꞌan i xiꞌin ya iku yuyu. Saa xi̱ni i iin yá ñaꞌa, yóso yá iin kiti ìyo ni káa, kiti kuáꞌa ku ri. Ta ri ikán inii kúu sata ri íyo tuꞌun väꞌa ya káꞌan kini ni xaꞌa Ndioxi, saa kúu mií ri uxa xiní ri tin uxi ndikin ri.

⁴ Ta ndíxi yá ñaꞌa ikán tikoto ndíꞌi tuun xiꞌin ya kuáꞌa. Ta kuaꞌa ni oro tin kuaꞌa ni yu̱ú yéꞌe̱ ya yaꞌvi ni ndóso ndaa ya sata toto ndíxi yá. Saa níꞌi yá iin copa ya oro ndaꞌa kuáꞌá yá, chútu copa ikán xiꞌin ndiꞌi nuu ñaꞌa ya väꞌa tin ya ndi̱kiꞌvi yá xiꞌin kuaꞌa ni taa, ndiꞌi ya ikán ñúꞌu ini copa ikán.

⁵ Ndi̱kaꞌi taan yá xiꞌin iin kivi ya ndíchi ni kundaa ini yo xiꞌin, káchi ya saa: Ta yá ñaꞌa chee ni ikán ku ñuu Babilonia ya chee ni, ya kúu siꞌí ndiꞌi ná ñaꞌa ná xíko ikin kuñu xiꞌin ndiꞌi ná íkan ndiꞌi nuu ya väꞌa, ya kini ni, sova káchi tuꞌun ya ndi̱kaꞌi taan yá ikán.

⁶ Saa xi̱ni i yá ku̱ndaa ini i xiꞌin yá ya ndi̱xini ni yá, xíꞌi yá, chi xa xi̱ꞌi ni yá nií na i̱í, na xi̱ndikun tuꞌun Ndioxi, ta nií ikán ku rá ndi̱xita tá ndi̱xiꞌi na xaꞌa ya kándixa na Tata yo Jesucristo.

⁷ Saa ndi̱kanda ni ini i xaꞌa ya xi̱ni i yá ñaꞌa ikán. Ñaa ndi̱kaꞌan tatun xiꞌin i, káchi ya saa: ―¿Ndachu ndíkanda ni ini un? Vitin ndituꞌun i xiꞌin un unkua kúni kachi yá ñaꞌa yóꞌó, ta unkua kúni kachi kiti ìyo ni káa, kiti yóso yá, rí íyo uxa xiní ta uxi ku ndikin ri.

⁸ Kiti ìyo ni káa xi̱ni un vitin, ta ri táku ku ri, ta vitin köo ka ri. Ta vaxi kivi keta ri tixin yavi nuu kúnu ni ndíkaa ri, ta sindiꞌi ikán kuꞌun ri nuu ndiꞌi xaꞌa ri. Ta ndi̱kanda ni ini na köo íyo kivi nda tá xa̱á ndi̱kuaꞌa ñuu ivi yóꞌó, xi̱ni na kiti ìyo ni káa ikán, xi̱taku ri ta köo ka ri, saa ndiko koo tuku ri ñuu ivi yóꞌó ―káchi tatun ikán xiꞌin i.

⁹ Saa ndi̱kaꞌan ka tatun ikán xiꞌin i, káchi ya saa: Ta na ndíchi xiní ku na ndixa xíniñuꞌu kundaa ini unkua kúni kachi ya xi̱ni un. Saa kundaa ini na chi uxa xiní kiti ìyo ni káa ikán ku ya káꞌan xaꞌa uxa xiki sukun íyo ñuu Babilonia nuu xínduꞌu yá ñaꞌa ikán.

¹⁰ Ta uxa xi̱ni ikán kua káꞌan xaꞌa uxa nda rey ta xa ndi̱ꞌi xaꞌa uꞌun nda ikán, ta inka ra xáꞌnda chiñu vitin, ta inka ra ta täꞌan tindaa kivi ya xáa ra kaꞌnda chiñu ra. Tá ná xáa ra kaꞌnda chiñu ra, ta loꞌo ni kivi kaꞌnda chiñu ra.

¹¹ Ta kiti ìyo ni káa ikán, ri xi̱taku ta köo ka ri vitin, kiti yóꞌó ku ri káꞌan xaꞌa ra rey ra una. Ta ra rey yóꞌó ku ra ndi̱xiyo taꞌan nda rey nda uxa ikán, ta siloꞌo kivi kaꞌnda chiñu ra saa kuꞌun ra nuu ndiꞌi xaꞌa ra.

¹² Ta ndikin uxi kiti ìyo ni káa xi̱ni un ikán kua káꞌan xaꞌa uxi nda rey nda täꞌan ndikiꞌin chiñu ya kaꞌnda chiñu nda. Ta kivi ná xáa nda kaꞌnda chiñu nda ta loꞌo ni kivi kaꞌnda chiñu nda xiꞌin kiti ìyo ni káa ikán.

¹³ Ta iin yuꞌu kuu uxi saa nda rey ikán xiꞌin taꞌan nda, yakan taxi nda ichí kúu mií nda ndaꞌa kiti ìyo ni káa ikán.

¹⁴ Ndiꞌi nda rey ikán kani taꞌan nda xiꞌin Levo loꞌo, sundi kiti Levo loꞌo ta kuchiñu ri nuu nda, chi Levo loꞌo ikán kúu Tata yo Jesucristo, ra kaꞌnu ni nuu ndiꞌi na naꞌnu, ta chee ni ka ra ikán, saa chi kúu mií ra rey ra chee ni xáꞌnda chiñu nuu ndiꞌi nda rey ñuu ivi yóꞌó. Ta na ítaꞌan xiꞌin ra ku na ka̱na ra, na ndi̱kaxin ra ndinuu ni ndíkun ñaꞌa na ―káchi tatun Ndioxi xiꞌin i.

¹⁵ Saa ndi̱kaꞌan ka tatun Ndioxi xiꞌin i, káchi ya saa: ―Tikuii nduta ndíkaa nuu índuꞌu yá ñaꞌa väꞌa ikán ku rá káꞌan xaꞌa na ñuu naꞌnu tin ñuu vali xiꞌin ndiꞌi na ñuu ivi tin na káꞌan ndiꞌi ni kúu nuu tuꞌun.

¹⁶ Ta uxi ndikin xi̱ni un ikán ku ya káꞌan xaꞌa uxi nda rey, ta vaxi kivi ta saá ni ini nda kuni nda yá ñaꞌa väꞌa yá ndi̱xiko ikin kuñu. Iin kuꞌva saa saá ni tu ini kiti ìyo ni káa ikán va kuni ri yá, ñaa kindaa ndiꞌi ri ñaꞌa ndaꞌa yá, ta iin sindoo chala ri yá, saa kaxi ri kuñu yá, ta ya ndoo ndoso sata leke ta kaꞌmi ri ya xiꞌin ñu̱ꞌu̱ xíxi.

¹⁷ Ta mií Ndioxi ku ra chi̱tuni ya koo yuꞌu uxi saa nda rey ikán xiꞌin taꞌan nda, ya taxi nda ichí ndaꞌa ri ìyo ni káa ikán ya kaꞌnda chiñu ri. Ta saa kaꞌnda chiñu ri nuu nda rey ya sixinu nda ya káꞌan tuꞌun Ndioxi.

¹⁸ Ta yá ñaꞌa yá väꞌa yá xíko ikin kuñu xi̱ni un ku yá káꞌan xaꞌa ñuu chee ni ya xáꞌnda chiñu nuu ndiꞌi nda rey ñuu ivi yóꞌó ―káchi tatun ikán xiꞌin i.