El Apocalipsis 16 - Xochapa Mixteco

Uxa copa nuu ñúꞌu ya sáa ini Ndioxi

¹ Saa xi̱ni soꞌo i ndee ni ndi̱kaꞌan tachi iin na. Tachi na ikán ke̱ta ya ini veꞌe ñuꞌu kaꞌnu íyo nuu ndivi, ta ndi̱kaꞌan ya xiꞌin uxa saa tatun ikán, káchi ya saa: ―Kuáꞌan ndo ñuu ivi, ta ndi̱koyo ndee ndiꞌi ndo uxa saa copa ya sáa ni ini Ndioxi.

² Saa ke̱e tatun núnu̱ú ndi̱xaꞌan ya ndi̱so ndee ya copa ya nuu ñuꞌú. Ta ndiꞌi na ikán kúu mií sello kiti ìyo ni káa ikán, ta xa̱a kaꞌnu na naꞌna ri ya ndíchi. Ta ka̱na ni ndi̱ꞌì nǎꞌa ikin kuñu na ta ndee ni kúꞌvi ya saa kini ni káa ya.

³ Saa ndi̱so ndee tatun ya uvi copa níꞌi ya nuu nduta ñûꞌu, ta nduta ñûꞌu ndu̱u rá nií, nda tá kuꞌva xíta ni nií iin naꞌa na xáꞌni na, saa ndu̱u kuáꞌa rá. Ñaa ndi̱xiꞌi ndiꞌi kiti táku ñúꞌu ini nduta ñûꞌu.

⁴ Saa tatun ya uni ndi̱so ndee ya copa ya nuu tikuii i̱tà xiꞌin ndiꞌi ñaꞌñu nuu kána tikuii, ta iin ndu̱u kuáꞌa ndiꞌi tikuii ikán, ndu̱u rá tá káa nií.

⁵ Saa xi̱ni soꞌo i ndi̱kaꞌan tatun ya ndíso chiñu xiꞌin tikuii, káchi ya saa xiꞌin Ndioxi: Yóꞌo̱ ku Ndioxi ra ndaa ni, ta yóꞌo̱ ku ra xa táku nda kivi núnu̱ú, ta kutaku un ndiꞌi saa kúu kivi, ta i̱í ni un chi xa xa̱ꞌnda un chiñu ya tíxuꞌvi ni na.

⁶ Saa chi na väꞌa ikán, ta xa̱ta na nií na i̱í na kándixa yóꞌo̱, saa xa̱ꞌni ñaꞌa na. ta saa i̱kan tu na xiꞌin nda ndi̱kaꞌan ndoso tuꞌun yuꞌu va un, xa̱ꞌni na nda ikán. Ta vitin táxi un ya tíxuꞌvi ni na, chi kuꞌva saa xíniñuꞌu na koo na ―káchi tatun ikán xiꞌin Ndioxi.

⁷ Saa xi̱ni soꞌo i inka tuꞌun ya ke̱e nuu ndíchi nama i̱í ya íyo ini veꞌe ñuꞌu Ndioxi nuu ndivi. Ta ndi̱kaꞌan ya káchi ya saa: ―Tata Iva yo Ndioxi, yóꞌo̱ ku ra ndee ni chee ta ndee ni ndee kúu mií un, ta vaꞌa ni xáa nani un kuachi naꞌa xiꞌin ya ndaa tin ya ndixa ―káchi na xi̱ni soꞌo i.

⁸ Saa inka tatun ya kumi ndi̱so ndee ya copa ya sata ñu̱ꞌù. Ta̱xi Ndioxi ndee ndaꞌa ya kaꞌmi ya naꞌa xiꞌin ñu̱ꞌu̱.

⁹ Kini ni ndi̱xixi na xiꞌin ya ndee ni iꞌni ya. Saa káꞌan kini ni na xaꞌa kivi Ndioxi, ra kúu mií ichí xaꞌa ya ndee ni tíxuꞌvi na. Ta na ikán ni köo ndi̱xiin na ndiko koo ini na xaꞌa ya väꞌa íkan na, ni köo ndi̱xiin na xaa toꞌo na Ndioxi.

¹⁰ Saa tu tatun ya uꞌun, ndi̱so ndee ya copa níꞌi ya nuu tai chee nuu xáꞌnda chiñu kiti ìyo ni káa ikán. Ta ndiꞌi ñaꞌñu nuu xáꞌnda chiñu ri xa̱á kúnaa, nda loꞌo köo túvi. Ta na íyo nuu xáꞌnda chiñu ri ndee ni ndóꞌo na nda yaá na xa̱á na ndíkaxi nuꞌu na.

¹¹ Saa ndi̱kaꞌan kini ka na xaꞌa Ndioxi xaꞌa ya ndee ni ndóꞌo na táꞌi ni ikin kuñu na tíxuꞌvi ni na. Ta saa ni köo ndi̱xiin na ndiko koo ini na, ni köo ndi̱sindikoo na ya väꞌa íkan na.

¹² Ta tatun ya iñu ndi̱so ndee ya copa níꞌi ya nuu nduta i̱tà chee náni Éufrates, saa ndi̱kun ndi̱ndichi ndiꞌi tikuii i̱tà ikán. Saa ndi̱ndoo ndíka iin ichí nuu yáꞌa nda rey nda ki̱xi chi nuu kétá ñu̱ꞌù.

¹³ Saa xi̱ni i ke̱ta iin kiti yuꞌu kiti ko̱ó nǎꞌa ikán, saa ke̱ta tu iin ri yuꞌu kiti ìyo ni káa ikán va, ta ke̱ta tu iin ri yuꞌu ra profeta vata ikán va. Tá íin kiti saꞌva, saa íin uni saa ri ikán. Ta kiti ikán ku uni nuu tachi nduvaꞌa.

¹⁴ Ta uni saa tachi nduvaꞌa ikán kúu mií ya ndee íkan ya kuaꞌa ni yatuꞌun, saa kuaꞌan ya nuu ndiꞌi ni kúu nda rey ñuu ivi ikán ya saa, síkitaꞌan ya nda koo tuꞌva nda kani taꞌan nda nuu koo kuachi chee ni. Saa chi xa vaxi kivi nuu ndee ni koo ya chi̱tuni Ndioxi nuu kuchiñu ra nuu ndiꞌi ya väꞌa. Saa chi yáꞌa ni ndee kúu mií ra.

¹⁵ Xaꞌa ya ikán kua xíniñuꞌu ndi̱kaꞌán ini ndo xaꞌa tuꞌun ya ndi̱kaꞌan Tata yo Jesucristo xiꞌin na ndíkun sata ra, káchi ra saa: ―¡Koto ndo vii! Tá íkan iin ra kuiꞌna, kivi köo ndátun ndo ra. Saa koo kivi ndiko koo i ñuu ivi. Ta naꞌa na ndíto koo tuꞌva na ndikiꞌin na yeꞌe, ta taxi Ndioxi ya ndixa kusini na ikán. Ta naꞌa na ndíto, xíniñuꞌu koo tuꞌva tikoto na ya kundixi na, ya ná kükaꞌan nuu na íyo chála na kivi ndiko koo i ―káchi Tata yo Jesucristo ndi̱kaꞌan ra.

¹⁶ Ta uni saa tachi nduvaꞌa ikán si̱kitaꞌan ya ndiꞌi nda rey ya kani taꞌan nda iin ñaꞌñu ya náni Armagedón, tuꞌun hebreo.

¹⁷ Saa ndi̱so ndee tatun ya uxa copa níꞌi ya nuu ndáchi tachi kuaꞌan ya. Ta ini veꞌe ñuꞌu kaꞌnu nuu ndivi nuu ndíchi tai toꞌo chee ikán, ke̱ta tuꞌun ya ndee ni káꞌan na, káchi ya saa: ¡Xa ndi̱xinu ndiꞌi chiñu vitin! ―káchi ya.

¹⁸ Saa ndikun xa̱á ndíyeꞌe taxan ni, ta níꞌi ka vi, ta ndee ni ndáꞌi savi. Saa ndee ni kini ìyo táan ñuu ivi, ta nda kivi xi̱koo xaꞌa ñuu ivi yóꞌó täꞌan taan tá kúꞌva táan kivi ikán.

¹⁹ Ta ñuu Babilonia ya chi̱nuu naꞌa kivi náni ya “Ñuu Kaꞌnu” ndi̱taꞌvi ya uni taꞌvi, saa ndi̱nduva nuu ñuꞌú xaꞌa ya ndee ni ndi̱taan. Ta ndiꞌi ñuu naꞌnu ya íyo ñuu ivi ndi̱ꞌi xaꞌa ndiꞌi ya. Ta köo ndi̱ndoso ini Ndioxi ya íyo kuaꞌa ni ya väꞌa íkan na ñuu kaꞌnu Babilonia ikán, ta sáa ni ini ra xíni ra ya väꞌa íkan na. Ta saa ta̱xi Ndioxi ya ndee ni ndoꞌo na xaꞌa ya väꞌa íkan na.

²⁰ Ta saa ndi̱ꞌi xaꞌa ndiꞌi ñuꞌú íchi ya ñúꞌu maꞌñu nduta ñûꞌu. Ta ndi̱ꞌi xaꞌa ndiꞌi iku naꞌnu xiꞌin iku vali ndi̱koyo ndiꞌi ya.

²¹ Saa ndi̱koyo ñíꞌi nuu ndivi, naꞌnu ni ya, ta vee ni ya, ta iin iin ya ikán vee ya iin kuꞌva uvi xiko kilo án yáꞌa ka. Saa ndi̱koyo ya sata naꞌa, ta naꞌa na ndi̱kaku nuu ya ikán xa̱á na távi chiꞌña na Ndioxi chi ndee ni tíxuꞌvi na xiꞌin tindoꞌo ikán.