El Apocalipsis 15 - Xochapa Mixteco

Uxa tatun Ndioxi xiꞌin uxa tindoꞌo

¹ Saa xi̱ni i iin seña chee ni nuu ndivi, ta ndi̱kanda ka vi ini i xaꞌa ya xi̱ni i. Ñaa xi̱ni i uxa tatun Ndioxi kúu mií ichí taxi ya uxa nuu tindoꞌo ya ndee ni tixuꞌvi naꞌa, tá xa yati ni tindaa kivi ya ndiꞌi xaꞌa ñuu ivi. Ta ndakua xinu uxa ya ndee ni ndoꞌo na ikán, nda saa yaa ya sáa ni ini Ndioxi xíni ra ya väꞌa íkan na ñuu ivi yóꞌó.

² Saa xi̱ni i inka ñaꞌa tá káa yuyu yéꞌe̱ ni saa káa nduta ñûꞌu xi̱ni i, ta sáka ñu̱ꞌu̱ xiꞌin rá. Ta yuꞌu nduta ñûꞌu ikán ndíta kuaꞌa ni naꞌa na xa ku̱chiñu nuu kiti ìyo ni káa ikán, ta ni köo ndi̱xaa kaꞌnu na naꞌna ri ya ndíchi, saa ni köo ndi̱taxi na ndikunuu sello ri taan na án ndaꞌa na ya kúu mií número ya ndítuꞌun xaꞌa unkua náni ri. Saa ndíta na nuu nduta ñûꞌu yéꞌe̱ ni tá káa yuyu ya yeꞌe ni ikán, ñaa ta̱xi Ndioxi itun arpa ndaꞌa iin iin na.

³ Saa xíta na yaa i̱í nuu Ndioxi, yaa ya náni: yaa kiti Levo, ya xi̱ta ra Moisés, ra xa̱a chiñu nuu Ndioxi xinaꞌa, káchi na saa: Tata Iva yo Ndioxi, ra ndee ni ndee kúu mií un. Saa vaꞌa ni chiñu íkan un, chee ni ya íkan un. Ndaa ni ichí un ta ndaku ni ya. Iin yóꞌó ku rey ra i̱í ni xáꞌnda chiñu nuu ndiꞌi na ñuu ivi.

⁴ Ndiꞌi ni kúu naꞌa xíniñuꞌu na xaa toꞌo na yóꞌo̱ Tata Iva yo Ndioxi, Saa xíniñuꞌu na xaa kaꞌnu na yóꞌo̱, saa chi iin yóꞌo̱ ku ra i̱í ni. Ndiꞌi naꞌa na ki̱xi ndiꞌi ni kúu ñuu xa̱a na nuu un, ta xáa kaꞌnu na yóꞌo̱, chi ku̱ndaa ini na ya iin yóꞌo̱ ku ra ndaa ni, saa xáa nani un kuachi na xiꞌin nina ya ndaa Soꞌva káchi na xíta na nuu ndivi xi̱ni soꞌo i.

⁵ Saa ndi̱koto i nuu ndivi ta xi̱ni i ndi̱xuna yeꞌe veꞌe ñuꞌu manta. Ta ini veꞌe ñuꞌu ikán ndíchi itun xatun nuu ndíkáꞌán ini naꞌa ya ndixa kua xaa súvi Ndioxi tuꞌun ra ya ndi̱ka̱ꞌa̱n ra xiꞌin na xinaꞌa.

⁶ Ta ini veꞌe ñuꞌu i̱í ni ikán ka̱na koo uxa tatun Ndioxi. Saa kúu mií ya ichí ya taxi ya uxa nuu ya uꞌvi ni tixuꞌvi naꞌa kivi vaxi. Ta tatun Ndioxi ikán ndíxi ya toto ya lino yaa ni ta yéꞌe̱ taxan mií toto ya. Saa núꞌni kandika iin iin ya xiꞌin ñii ya oro ndinuꞌu ni.

⁷ Ta iin taꞌan ya kumi ya táku ikán, ta̱xi ya iin copa ya oro ndaꞌa iin iin tatun ikán. Ta chútu ndaa ya sáa ni ini Ndioxi ini iin iin copa ya oro ikán chi mií ra ku ra táku ndiꞌi saa kúu kivi.

⁸ Ta iin chútu iꞌma ya vaxi nuu íyo Ndioxi ini mií veꞌe ñuꞌu ikán. Iꞌma ikán káꞌan ya xaꞌa ndee chee ni kúu mií Ndioxi, saa káꞌan ya xaꞌa ya vaꞌa, ya luvi ni kúu mií ra. Ta nda iin naꞌa ni nda iin tatun Ndioxi köo kúu mií ichí kiꞌvi na ini veꞌe ñuꞌu ikán, ndakua ná yaꞌa ndiꞌi uxa tindoꞌo ya ndee ni tixuꞌvi naꞌa nda saa kua kiꞌvi na.