El Apocalipsis 14 - Xochapa Mixteco

Xíta na yaa luvi ni nuu Ndioxi

¹ Saa ndi̱koto i ta xi̱ni i ndíchi Levo loꞌo ikán xiki ya náni Sión. Ta kuaꞌa ni naꞌa ndíta xiꞌin ri, saa ndi̱kaꞌi taan ndiꞌi na ikán xiꞌin sello Ndioxi, íyo kivi ra taan na xiꞌin kivi kiti Levo loꞌo ikán. Ta kúu na ikán iin ciento uvi xiko kumi mil.

² Sindiꞌi saa xi̱ni soꞌo i ya ndee ni níꞌi, tá kuꞌva ndee ni níꞌi kóyo kuaꞌa ni tikuii nuu sukun ni, saa kúu. Án tá kuꞌva ndáꞌi savi saa kúu. Saa síso ni, tá kuꞌva síso kuaꞌa ni naꞌa, na síkaꞌa itun arpa saa kúu.

³ Naꞌa, na kuaꞌa ni ikán ku nda taa nda ndíta nuu íyo tai toꞌo nuu íyo Ndioxi, xíta nda iin yaa i̱í xa̱á. Saa íyo kumi saa ya táku ikán xiꞌin oko kumi saa na xikuaꞌa nuu íyo tai toꞌo ikán, ta xíni soꞌo na yaa ya xíta nda ikán. Ta nda iin ka naꞌa köo xíni kata yaa i̱í xíta nda ikán. Ndisaa nda kúu iin ciento uvi xiko kumi mil ikán ku nda xíni kata ya. Ndioxi si̱kaku ra nda ikán tañu naꞌa, na väꞌa íyo ñuu ivi yóꞌó.

⁴ Vaꞌa ni xi̱ndaa nda ikán mií nda, chi köo ndi̱kiꞌvi nda xiꞌin nda iin ná ñaꞌa, nda tá íyo iin taa ra köo ndi̱tindaa iin ñaꞌa, saa ndi̱xiyo nda ikán. Ta ndinuꞌu ni ini nda ndíkun nda sata Levo loꞌo ikán, nda mií nuu kuaꞌan ri ta ndíkun nda kuaꞌan nda sata ri. Chi ndee ni yaꞌvi cha̱ꞌvi Ndioxi xaꞌa nda. Tá káa ya vaꞌa, ya núnu̱ú sóko naꞌa nuu Ndioxi xiꞌin nuu kiti levo loꞌo, saa íyo nda ikán nuu ra.

⁵ Saa chi nda iin tuꞌun vata köo ndi̱kana yuꞌu nda ikán kaꞌan nda, ta ni köo nda iin kuachi nda nuu Ndioxi.

Tuꞌun ya káꞌan xaꞌa uni tatun Ndioxi

⁶ Saa xi̱ni i inka tatun Ndioxi ndáchi ya xíka ya nuu ndivi. Ta káꞌan ndoso tatun ikán tuꞌun vaꞌa xiꞌin na ndóo ndiꞌi saa kúu xaꞌa ñuu ivi tin na ndóo ñuu vali xiꞌin na ndóo ñuu naꞌnu xiꞌin na káꞌan ndiꞌi ni kúu nuu tuꞌun.

⁷ Ta ndee ka vi káꞌan tatun ikán, káchi ya saa: ―Ku iꞌvi ndo nuu Ndioxi ta xaa toꞌo ni ndo ra, ta saa xaa kaꞌnu ndo ra, chi xa ti̱ndaa kivi ya xaa nani ra kuachi xiꞌin ndiꞌi naꞌa. Xaa kaꞌnu ndo ra chi mií ra si̱kuaꞌa ñuu ivi yóꞌó, xiꞌin ndivi tin ñuꞌú xiꞌin nduta ñûꞌu xiꞌin ndiꞌi ka ñaꞌñu nuu kána tikuii.

⁸ Saa inka tatun, ya uvi, ya ndíkun sata tatun ikán, káꞌan ya, káchi ya saa: ―Xa ndi̱kava ñuu chee ni, ndi̱ꞌi va xaꞌa ñuu Babilonia, ndi̱kava ya. Ya yóꞌó ku yaꞌvi ya xaꞌa ya si̱ndaꞌvi ni ya na ñuu ivi. Chi ta̱a sií ni ya na, ta si̱ndaꞌvi ya na xa̱a kaꞌnu na ndioxi ndíi, ya síki. Chi ya i̱kan na ñuu ikán, ta tá káa iin ñaꞌá yá táa sii inka yá ñaꞌá ya koꞌo yá nduta vino, ta saa kusini ni yá kiꞌvi yá kaka yá xiꞌin kuaꞌa ni taa, kuꞌva saa íyo ya väꞌa i̱kan na nuu Ndioxi, xaꞌa ya ta̱a sii ni na, naꞌa ya i̱kan na ya väꞌa.

⁹ Saa ndíkun inka tatun ya uni sata tatun ya uvi ikán, ta ndee ni ndee ndi̱kaꞌan ya, káchi ya saa: ―Ndiꞌi naꞌa, na xáa kaꞌnu kiti ìyo ni káa ta saa xáa kaꞌnu na naꞌna ri ya ndíchi, ta táxi na káꞌi sello ri ndaꞌa na án taan na,

¹⁰ ta yáꞌa ni uꞌvi tixuꞌvi na ikán, chi Ndioxi ta yáꞌa ni kini sáa ini ra xíni ra na íkan ya väꞌa, xaꞌa ya ikán kua sitixuꞌvi ni ra na. Ta ndee ni uꞌvi tixuꞌvi na xiꞌin ñu̱ꞌu̱ xíxi, inka ñu̱ꞌu̱ káꞌndi ya náni azufre. Ta kuni tatun, ya i̱í, xiꞌin kiti Levo loꞌo ikán ya ndee ni tixuꞌvi na ikán.

¹¹ Ta ndiꞌi saa kivi koko na ikán, ndaa iꞌma ñu̱ꞌu̱ nuu xíxi ni na kuꞌun ya. Ta ni köo ndíkundee na yáꞌa ni ndóꞌo na án nduvi kua án ñûu kua ta ndóꞌo ni na chi ya yóꞌó ku yaꞌvi na ya xáa kaꞌnu na kiti ìyo ni káa ikán, saa xáa toꞌo tu na naꞌna va ri, saa ndóꞌo ndiꞌi na ndíkunuu sello ri ndaꞌa án taan na ―káchi tatun ya uni, xi̱ni soꞌo i.

¹² Ta nani ndátun yo kuu saa kua xíniñuꞌu na ñuu Ndioxi, na i̱í, na xáa súvi ni ya xáꞌnda chiñu ra. Xíniñuꞌu na xaꞌa ndee ni ini na, ta tuun ni ná kundaa ini na kuni na Tata yo Jesús ―káchi ya xi̱ni soꞌo i.

¹³ Saa xi̱ni soꞌo i tuꞌun ya ke̱ta nuu ndivi, ndi̱kaꞌan ya xiꞌin i káchi ya saa: ―Taa tuꞌun káꞌan i xiꞌin un: “Kivi vitin xiꞌin ndiꞌi saa kivi ya vaxi, ndiꞌi naꞌa na ndíkun Tata yo Jesucristo, tá ná kuvi na xaꞌa ya kándixa na ra, ta taxi Ndioxi koo vaꞌa ni na xiꞌin ra, nuu kusini ni na” ―káchi tuꞌun ya xi̱ni soꞌo i. Saa ndi̱kaꞌan Tachi i̱í Ndioxi, káchi ya saa: ―Saa ndi̱xa íyo ya, tá ná xaa na nuu ndivi, ta ndixa kua ndikundee na, chi xa si̱xinu na chiñu i̱kan na ñuu ivi yóꞌó. Ni Ndioxi ta ndi̱kaꞌán ini ra xaꞌa ya vaꞌa i̱kan na, ta nuu ndivi ikán ndichaꞌvi ra na xaꞌa chiñu ya i̱kan na ñuu ivi yóꞌó ―Soꞌva káchi Tachi Ndioxi xi̱ni soꞌo i.

Xaa ti̱ndaa kivi ya ndikuiso Ndioxi ñaꞌa ya íyo nuu ñuꞌú

¹⁴ Saa ndi̱koto i ta xi̱ni i iin viko yaa, ta nuu viko ikán índuꞌu iin taa, tá káa ra ke̱e nuu Ndioxi saa káa ra. Ta ínuu iin corona ya oro xiní ra ikán, saa níꞌi ra iin i̱chi káni ni ta xiín ni yuꞌu ya.

¹⁵ Saa ke̱ta inka tatun Ndioxi nuu íyo Ndioxi nuu ndivi, ta ndee ni ndee ndi̱kaꞌan ya xiꞌin ra índuꞌu nuu viko ikán, káchi ya saa: ―Xa vaꞌa xáa un kaꞌnda un ñaꞌa ya xíniñuꞌu un kaꞌnda un xiꞌin i̱chi ñaa, saa chi vitin ndi̱xinu kivi ya xáa un kaꞌnda un ndiꞌi ñaꞌa ya xa íyo tuꞌva ndikaya un, chi xa ti̱ndaa kivi ya xáa un ndikaya un ya ―káchi tatun ikán xiꞌin ra.

¹⁶ Saa chi̱kaa ra índuꞌu tañu viko ikán i̱chi xiín ni níꞌi ra nuu ñuꞌú, ta xa̱á ra xáꞌnda ra ya xa íyo tuꞌva ndikuiso ra.

¹⁷ Ñaa ke̱ta inka tatun Ndioxi veꞌe ñuꞌu nuu íyo Ndioxi nuu ndivi, saa níꞌi tu ya ikán va inka i̱chi xiín ni yuꞌu.

¹⁸ Saa ke̱ta inka tatun Ndioxi nuu íyo nama i̱í ya ndíchi nuu Ndioxi nuu ndivi. Ta tatun ikán kua kúu mií ichí ya kaꞌnda chiñu ya nuu ñu̱ꞌu̱ xíxi. Saa ndee ka vi ndi̱kaꞌan ya xiꞌin tatun ya níꞌi i̱chi xiín ni ikán, káchi ya saa: ―Xiꞌin i̱chi xiín ni níꞌi un ñaa xáa un kaꞌnda ndiꞌi un kiti uva, chi xa ndi̱xinu ni ri ―káchi ya.

¹⁹ Saa nu̱u tatun ikán nuu ñuꞌú ta xa̱á ya xáꞌnda ndiꞌi ya kiti uva ikán. Saa ki̱ꞌin ya ri ta̱an ya ini iin ñaꞌa ya chee ni xa ndi̱kuaꞌa nuu kuñuꞌu ri koꞌni na ri. Saa chi yáꞌa ni sáa ini Ndioxi xíni ra na ñuu ivi yóꞌó xaꞌa ya väꞌa íkan na.

²⁰ Ta nuu ndi̱koꞌni kiti uva ikán ku nuu mií ñuu kaꞌnu chí sata nama keꞌe ya ndási nuu ñuu ku̱u saa. Ta ndiꞌi nduta rá ke̱e nuu ndi̱koꞌni kiti uva ikán, ndu̱u rá nií. Tá kuꞌva kuaꞌa ni nduta ita tá kúnu ni rá saa kuaꞌa ni ku nií ikán, ta ndi̱xinu koo rá nda nuu ñúꞌu kàà yuꞌu kiti kuai, saa ndi̱xita rá kuaꞌan rá nda uni ciento kilómetro ya ndíka.