El Apocalipsis 12 - Xochapa Mixteco

Tuꞌun yóꞌó káꞌan xaꞌa iin yá ñaꞌa xiꞌin iin kiti koó nǎꞌa

¹ Saa xi̱ni i iin seña chee ni nuu ndivi, chi xi̱ni i iin yá ñaꞌa ndíxi níí yá ñu̱ꞌù, saa ndíkaa kiti yo̱ó tixin xaꞌa yá, ta ínuu corona xiní yá, ta kúu mií corona ikán uxi uvi kiti kimi.

² Ta ñúꞌu seꞌe yá, ndee ni ndee ndáꞌi yá xaꞌa ya uꞌvi ni xáꞌnda seꞌe yá chi xa kúni kaku ya.

³ Saa xi̱ni i inka seña chee ni nuu ndivi: Xi̱ni i kiti náni dragón. Tá káa kiti ko̱ó, saa káa ri. Kiti kuǎꞌa̱ ku ri ta ìyo ni káa ri, íyo uxa xiní ri, ta íyo uxi ndikin ri, saa íyo tu uxa corona iin iin ya ñúꞌu xiní iin iin ri.

⁴ Ta xiꞌin ndoꞌma ri si̱koyo ri uni taꞌvi kiti kimi, kiti íyo nuu ndivi, si̱koyo ñaꞌa ri nuu ñuꞌú. Ta kiti ko̱ó kini ni káa ikán, ndi̱xaa ri ndi̱kundichi ri nuu mií yá ñaꞌa ikán, ya kúni ri kaxi ri seꞌe yá tá sikan ka̱ku soꞌva ya.

⁵ Saa ka̱ku seꞌe yá taa loꞌo ku ya ka̱ku, ta ra ikán ku ra kaꞌnda chiñu xiꞌin ndiꞌi ndee Ndioxi, saa kuniꞌi ra iin kàà ya kâní ni, ya kuchiñu sindiꞌi xaꞌa ra na sáa ini xíni ñaꞌa. Tá ka̱ku seꞌe yá ta ndi̱kiꞌin tatun Ndioxi ra ínuu ra nuu ndaꞌa ya kuaꞌan ra xiꞌin ya nuu Ndioxi, ra índuꞌu nuu tai toꞌo nuu ndivi.

Ka̱ni taꞌan tatun Ndioxi ya náni Miguel xiꞌin ko̱ó kiti nǎꞌa

⁶ Ta xi̱nu yá ñaꞌa ikán kuaꞌan yá iku yuyu, ndi̱xaa yá nuu xa xa̱a vií Ndioxi koo yá. Ta iin mil uvi ciento uni xiko kivi chi̱ndee Ndioxi yá ta̱xi ra ñaꞌa kuxi yá.

⁷ Saa xa̱á kuachi ndee ni ndee kúu nuu ndivi. Tatun ya chee ni, ya náni Miguel xiꞌin ndiꞌi tatun ya ítaꞌan xiꞌin ya, xa̱á káni taꞌan ya xiꞌin kiti ko̱ó nǎꞌa xiꞌin ndiꞌi tachi nduvaꞌa ya ítaꞌan xiꞌin ri.

⁸ Ta ku̱chiñu tatun Miguel xiꞌin tatun ya ítaꞌan xiꞌin ya, ku̱chiñu ya nuu kiti ko̱ó nǎꞌa saa tu nuu ndiꞌi tachi nduvaꞌa ítaꞌan xiꞌin ri. Ta saa köo ndi̱kuchiñu ka kiti ko̱ó nǎꞌa ikán koo ri nuu ndivi, ni tachi nduvaꞌa ítaꞌan xiꞌin ri.

⁹ Ta tatun ya íyo xiꞌin Ndioxi ta̱va ya kiti koó nǎꞌa xiꞌin ndiꞌi tachi nduvaꞌa ya íyo xiꞌin ri. Ta̱va ya ri ki̱ꞌin ñaꞌa ya si̱koyo ya nda nuu ñuꞌú. Ta kiti ko̱ó nǎꞌa ikán ku ko̱ó yata ni, ta inka kivi ri kua Satanás án kiti Timiaꞌan. Ta suvi mií ri ku ri síndaꞌvi ndiꞌi ni kúu na ñuu ivi.

¹⁰ Saa xi̱ni soꞌo i tachi na nuu ndivi, ndee ka vi ndi̱kaꞌan ya káchi ya saa: Vitin ti̱ndaa kivi ya sikaku Ndioxi naꞌa, na ndíkun sata ra. Saa ti̱ndaa tu kivi ya sinaꞌa ra, ya iin mituꞌun mií ra kúu mií ndee ya chee ni. Ta vitin xáa ra kaꞌnda chiñu ra nuu ndiꞌi ni kúu na ñuu ivi. Saa tu Jesucristo, ra ti̱ꞌvi Ndioxi sikaku naꞌa, ndi̱kiꞌin ra ichí, íyo ya ndaꞌa ra, ya kaꞌnda chiñu ra nuu ndiꞌi ni kúu na ñuu ivi. Saa chi kiti nǎꞌa, ta xa ta̱va na ri nuu ndivi. Chi ri ikán ku ri táxi ni kuachi xaꞌa nda ñani yo xiꞌin kuꞌva yo, na ndíkun Tata yo Jesucristo. Nduvi niuun táxi ri kuachi xaꞌa na nuu Ndioxi.

¹¹ Sundi vitin ta xa ku̱chiñu na nuu ri. Saa chi kiti Levo loꞌo ikán ndi̱taxi ri mií ri xaꞌa na ta nií ri ikán ku rá ta̱xi ndee ndaꞌa na. Ta saa tu tuꞌun ya ndaa, ya ndíkuiin na xaꞌa Tata yo Jesucristo, ta̱xi ya ndee ndaꞌa na. Xaꞌa uvi ndee yóꞌó kua ku̱chiñu na ku̱ndee na nuu kiti nǎꞌa. Ta nda loꞌo köo ndi̱ndiꞌvi na kuvi na, ta̱xi ndiꞌi na mií na ya kuvi na xaꞌa ya kándixa na Ndioxi.

¹² Yakan ¡ná kusini ni ndivi xiꞌin ndóꞌo̱ ndóo nuu ya! ¡Ta ndaꞌvi ni ndóꞌo̱ ndóo ñuu ivi! ¡xiꞌin ndiꞌi kiti táku ini nduta ñûꞌu! Ndaꞌvi ni naꞌa, chi nu̱u kiti nǎꞌa nuu ñuꞌú ta ndixa ni sáa ini ri xíni ñaꞌa ri, chi xa xíni ri siloꞌo ni kivi kúu mií ri ichí ya kaꞌnda chiñu ri, sixinu ri chiñu ya väꞌa. Soꞌva káchi tachi na xi̱ni soꞌo i nuu ndivi.

¹³ Saa tá xi̱ni kiti ko̱ó nǎꞌa ikán, ya si̱kana na ri nuu ñuꞌú, ta xa̱á ri ndi̱kundikun ri xíka ri sata yá ñaꞌa si̱kaku ra taa loꞌo ikán ya kúni ri xaa nduvaꞌa ri xiꞌin yá.

¹⁴ Ta ta̱xi Ndioxi uvi ndixin kiti tasun chee ni ndaꞌa yá, ta saa nda̱chi yá kuaꞌan yá nda iku yuyu. Ta ndi̱xaa yá nuu kâní ni, nuu köo íyo yati kiti ko̱ó nǎꞌa ikán. Ta ikán ta̱xi Ndioxi ñaꞌa xi̱xi yá, uni kuiya sava ta̱xi ra ya xi̱xi yá.

¹⁵ Saa xa̱á kiti ko̱ó nǎꞌa ikán táva ri tikuii yuꞌu ri, tá káa nduta tañuꞌu saa káa rá xáta ri sata yá. Íkan ri saa xiꞌin yá ya kúni ri tani yá xiꞌin nduta tañuꞌu ikán.

¹⁶ Ta chi̱ndee ñuꞌú yá köo ndi̱tani yá xiꞌin nduta tañuꞌu ikán, chi iin ndi̱xuna kóꞌó ñuꞌú ta xi̱ꞌi ndiꞌi ya rá xáta ri sata yá.

¹⁷ Saa ndi̱saa ni ini kiti ko̱ó nǎꞌa ikán xiꞌin yá, ta ndi̱kiꞌin ri kuaꞌan ri kani taꞌan ri xiꞌin tá kúu ndiꞌi seꞌe yá. Ta na seꞌe yá ikán ku na xáa súvi ya xáꞌnda chiñu Ndioxi, ta ndee ni ndíkuiin na, köo síndoo na ya ndítuꞌun na tuꞌun ya ndaa xaꞌa Tata yo Jesucristo, kándixa ni na ra.