El Apocalipsis 11 - Xochapa Mixteco

Uvi nda taa nda ndíkuiin xaꞌa ya ndaa

¹ Saa ta̱xi na iin itun ndâku ndaꞌa i, tá káa itun táva na kuꞌva, saa káa nu. Saa ndi̱kaꞌan na xiꞌin i, káchi na saa: ―Kundichi kuáꞌan kiꞌin kuꞌva un veꞌe ñuꞌu kaꞌnu, saa kiꞌin kuꞌva tu un nama i̱í ya ndíchi ini veꞌe ñuꞌu, saa kaꞌvi un naꞌa ndisaa ku na ñúꞌu xáa kaꞌnu yeꞌe.

² Ta kïꞌin kuꞌva un keꞌe veꞌe ñuꞌu kaꞌnu, saa chi xa ta̱xi i ya ndaꞌa naꞌa, na köo kúu judío, na köo kándixa yeꞌe. Ta na ikán xaa yakua na ñuu i̱í, nuu ndíkaa veꞌe ñuꞌu kaꞌnu tixin uvi xiko uvi yoó ikan na saa.

³ Ta tiꞌvi i uvi nda taa, nda ndíkuíin xaꞌa chiñu i ya kaꞌan ndoso nda tuꞌun i tixin mil uvi ciento uni xiko kivi, ta kundixi nda toto ndai ni nuu xaꞌa ya kúni i ya ndiko koo ini naꞌa xaꞌa kuachi na ―káchi Ndioxi.

⁴ Ta uvi saa nda káꞌan ndoso tuꞌun Ndioxi xiꞌin naꞌa ikán, tá íin uvi itun olivo án uvi kàà ya candelero, saa íin nda. Chi itun olivo ikán xiꞌin candelero ikán ta ndíta ya nuu Ndioxi, ra kúu xitoꞌo ñuu ivi yóꞌó.

⁵ Tá ndá naꞌa kúni xaa ndikuu xiꞌin nda ikán, ta ndee ni kána koo ñu̱ꞌu̱ yuꞌu nda ya kaꞌmi ndiꞌi nda na. Kuꞌva saa ikan nda xiꞌin ndiꞌi naꞌa, na kúni xaa ndikuu xiꞌin nda, sindiꞌi xaꞌa nda na.

⁶ Ta ndee ni ndee kúu mií nda, chi vaꞌa kaꞌan nda küun savi, ta küun rá tá kivi xíka nda káꞌan ndoso nda tuꞌun i. Saa kúu mií nda ndee ya ndasa nda tikuii nduu rá nií, ta kúu tu mií nda ndee ya taxi nda tindoꞌo ndee ni tixuꞌvi naꞌa xiꞌin ndiꞌi saa nuu ya uꞌvi ni ñuu ivi yóꞌó. Ta kúu mií nda ndee ikan nda saa, ndisaa ka ichí kúni míi nda ikan nda saa.

⁷ Tá sindiꞌi uvi saa nda taa ikán ndi̱kaꞌan ndoso nda tuꞌun Ndioxi, saa keta kiti kaꞌnu ni, kiti ìyo ni káa, keta ri ini yavi nǎꞌa, ya chee ni, ya kunu ni. Ndaa ri nuu ñuꞌú, kani taꞌan ni ri xiꞌin uvi saa nda ikán. Saa kuchiñu ri nuu nda, kaꞌni ri uvi saa nda.

⁸ Ta kundoo ikin kuñu uvi saa nda ikán maꞌñu ichí ñuu Jerusalén ya kaꞌnu ni, ñuu chee ni ikán kua xa̱ꞌni na Tata yo Jesucristo, ka̱tikaa na ra ndaꞌa cruzin. Ta naꞌa, na väꞌa, na ndóo ñuu ikán, iin kachi íkan na, tá kuꞌva i̱kan na xi̱ndoo ñuu Sodoma án ñuu Egipto xinaꞌa saa íkan na.

⁹ Ta tixin uni kivi sava, kuni ndiꞌi ni kúu nuu naꞌa, na ndóo ndiꞌi ni kúu xaꞌa ñuu ivi, xiꞌin na ndóo ñuu naꞌnu tin ñuu vali, na káꞌan ndiꞌi ni kúu nuu tuꞌun. Kuni na ya ndóo ikin kuñu uvi saa nda ikán nuu ñuꞌú, ta täxi na sinduxin ñaꞌa naꞌa.

¹⁰ Ndiꞌi saa na ñuu ivi kusini ni xaꞌa ya ndi̱xiꞌi nda ikán, ñaa xáa na ikan na viko ta siniꞌi na ñaꞌa nuu taꞌan na, xaꞌa ya kúsini ni na ndi̱xiꞌi nda. Saa chi na ikán ta ndíkani ini na xaꞌa kuachi uvi saa nda ikán kua tíxuꞌvi ni ndiꞌi na ndóo ñuu ivi yóꞌó, káꞌán na.

¹¹ Saa ndi̱yaꞌa uni kivi sava ikán, ta si̱taku tuku Ndioxi nda, ndi̱taku nda, ndi̱koo nda xíka nda. Ta ndiꞌi naꞌa, na xi̱ni ya ndo̱ꞌo nda ikán, ndee ni ndi̱ndiꞌvi na.

¹² Ta xi̱ni soꞌo uvi saa nda ikán tachi ki̱xi chí nuu ndivi, ta ndee ni ndi̱kaꞌan ya xiꞌin nda, káchi ya saa: ―Naꞌa ndo, ndaa ndo yóꞌó ―káchi ya xiꞌin nda. Saa nuu iin viko, ta ndi̱kava nduu ndiꞌi ya nda, saa nda̱a nda xiꞌin ya kuaꞌan nda nuu ndivi. Ta xi̱ni ndiꞌi naꞌa, na sáa ini xíni ñaꞌa, ya nda̱a nda kuaꞌan nda nuu ndivi.

¹³ Tá nda̱a soꞌva nda kuaꞌan nda, ta xa̱á ndixa ni ndee táan. Ñaa ndi̱ꞌi xaꞌa ñuu ikán, uxi taꞌvi kua ndi̱ꞌi xaꞌa. Saa ndi̱xiꞌi uxa mil na ñuu kaꞌnu ikán, ta na ndi̱kaku ikán ta ndi̱ndiꞌvi ni na, ñaa xa̱á na xáa kaꞌnu na Ndioxi, ra íyo nuu ndivi.

¹⁴ Ya yóꞌó ku tindoꞌo ya uvi nuu ndee ni ndee ti̱xuꞌvi ni naꞌa, ta xa kama ni vaxi tuku ya uni nuu tixuꞌvi ni na.

Tívi tatun Ndioxi ya uxa itun trompeta ya

¹⁵ Saa ti̱vi tatun Ndioxi, ya uxa itun trompeta ya, ta xi̱ni soꞌo i tachi kuaꞌa ni na káꞌan nuu ndivi, ndee ka vi ndi̱kaꞌan na, káchi na saa: ―Iva yo Ndioxi ku ra xáꞌnda chiñu xiꞌin Tata yo Jesucristo. Ra yóꞌó ku ra ti̱ꞌvi Ndioxi vaxi sikaku na ñuu ivi yóꞌó. Ta ndiꞌi saa tiempo kaꞌnda chiñu ra ―káchi tachi na káꞌan ni na.

¹⁶ Ta oko kumi saa nda xikuaꞌa, nda ndóo nuu tai toꞌo nuu Ndioxi, si̱kusiti nda, nda nuu ñuꞌú ya xáa toꞌo nda Ndioxi,

¹⁷ káchi nda saa: Iva yo Ndioxi, táxi ni nde tixaꞌvi ndaꞌa un, chi yóꞌo̱ ku taa ra ndixa ni ndee ku mií, ta kúu un taa ra táku vitin, ra xa íyo nda tá yachi ku un, ta kutaku un ndiꞌi saa ka kivi ya vaxi Xa ndi̱kiꞌin un chiñu ndee ni xáꞌnda chiñu un nuu ndiꞌi naꞌa xiꞌin ndiꞌi ñaꞌa ya si̱kuaꞌa un.

¹⁸ Ndiꞌi ni kúu na ñuu ivi yóꞌó, sáa ni ini xíni yóꞌo̱, Iva yo Ndioxi, ta vitin kua ti̱ndaa kivi nuu ndee ni sitixuꞌvi un na xaꞌa ya väꞌa íkan na. Vitin kua ti̱ndaa kivi ya xaa nani un kuachi xiꞌin ndiꞌi na xa ndíi. Saa taxi un ya vaꞌa ndaꞌa nda ndi̱kaꞌan ndoso tuꞌun yuꞌu un, nda xa̱a chiñu nuu un xinaꞌa, xiꞌin na ñuu un, na i̱í, saa chi kándixa ni na yóꞌo̱, ta xáa kaꞌnu na yóꞌo̱, án na vali ku na, án na naꞌnu ku na, ta ndiꞌi na niꞌi ya vaꞌa nuu un. Saa sindiꞌi xaꞌa un ndiꞌi naꞌa, na si̱ndiꞌi xaꞌa ndiꞌi ñaꞌa ya si̱kuaꞌa un ñuu ivi yóꞌó ―káchi nda xikuaꞌa ikán xiꞌin Ndioxi.

¹⁹ Saa ndi̱xuna yeꞌe veꞌe ñuꞌu ya íyo nuu ndivi, ta ini veꞌe ñuꞌu ikán túvi ndíchi itun xatun i̱í nuu ñúꞌu tutu ya i̱í, ya kúu ley Ndioxi nuu ki̱ndoo ra ya xaa súvi ra ya ndi̱kaꞌan ra xiꞌin na. Saa xa̱á ndee ni ndíyeꞌe taxan, ta iin ndá síso kúu káꞌan na, ndáꞌi ka vi savi, ñaa xa̱á ndee ni táan, ta kóyo ka vi íꞌín, naꞌnu ka vi ya kóyo.