Efesios 6 - Xochapa Mixteco

Ndá kuꞌva xíniñuꞌu na iva siꞌí kutaꞌan na xiꞌin seꞌe na

¹ Ndóꞌo̱ na vali, xaa súvi ndo chiñu ya xáꞌnda chiñu iva siꞌí ndo nuu ndo. Ikan ndo saa chi ya ñaa kua vaꞌa ni nuu mií Tata yo Jesucristo.

² Saa chi saa káꞌan ley Ndioxi ya ta̱a ra Moisés, káchi ya saa: “Xaa toꞌo ndo iva ndo xiꞌin siꞌí ndo”, chi ya yóꞌó ku ley ya núnu̱ú, ya káꞌan tá íkan ndo saa ta saa kua kee vaꞌa ni ndo, niꞌi ndo ya vaꞌa ndi̱kaꞌan Ndioxi taxi ra ndaꞌa ndo.

³ Chi saa káꞌan tuꞌun ra, káchi ya saa: “Tá íkan ndo saa, ta kee vaꞌa ni ndo xaꞌa ndiꞌi ñaꞌa ya íkan ndo, ta niꞌi ni ndo kuiya koo ndo ñuꞌu ivi yóꞌó”, káchi tuꞌun ra.

⁴ Ta ndóꞌo̱, iva siꞌí, sïsaa ndo seꞌe ndo, käꞌan ndo ndá ka ñaꞌa xiꞌin na ya sisaa ndo na. Vívií kaꞌan ndo xiꞌin na, vívií sikuaꞌnu ndo na, saa sinaꞌa ndo na ya kandixa na Tata yo Jesucristo.

Ndá kuꞌva xíniñuꞌu naꞌa xaa chiñu na nuu na xáa chiñu na xiꞌin

⁵ Ndóꞌo̱, xáa chiñu nuu naꞌa xiꞌin ya nduxa ñuu ivi yóꞌó, ta xaa súvi ndo ya xáꞌnda chiñu na nuu ndo. Toꞌo ni koo ndo xiꞌin na, saa ndinuꞌu ni nima ndo xaa súvi ndo chiñu nuu na, chi tá íkan ndo saa ta tá íkan ndo xiꞌin mií Cristo, saa íkan ndo xiꞌin na.

⁶ Tá xáa súvi ndo chiñu nuu na, ta vaꞌa ikan ndo ya xiꞌin ndinuꞌu nima ndo, ta ïkan ndo ya ndisaa tá xíto na nuu ndo xáa chiñu ndo. Chi ndóꞌo̱ ta tá íyo ndo xáa chiñu xiꞌin ya nduxa nuu Cristo, saa íin ndo. Tá xáa súvi ndo chiñu nuu na xiꞌin ndinuꞌu nima ndo, ta saa kua xáa súvi ndo ya kúni mií Ndioxi.

⁷ Vívií ikan ndo chiñu, ndinuꞌu nima ndo ikan ndo ya nuu na, ta ndïkani ini ndo ya xáa chiñu ndo takua nuu na ivi yóꞌó, chi nuu mií Tata yo Jesucristo va kua xáa chiñu ndo.

⁸ Ta vaꞌa ná kundaa ini ndo chi vaxi kivi ta chaꞌvi mií Tata yo Jesucristo iin iin yo xaꞌa chiñu vaꞌa i̱kan yo, án yo xáa chiñu xiꞌin ya nduxa ku yo, án yo íyo ndíka ku yo, ta iin káchi chaꞌvi ra ndiꞌi yo.

⁹ Saa ndóꞌo̱ xáa chiñu naꞌa nuu, koto vií ndo xiꞌin na xáa chiñu xiꞌin ya nduxa nuu ndo, ta käꞌan ndo xiꞌin na ya ndee ni sitixuꞌvi ndo na tá väꞌa íkan na chiñu nuu ndo, chi Ndioxi ra íyo nuu ndivi ku ra kíꞌin kuenta xiꞌin na ñaa. Ta suvi tu ra kíꞌin kuenta xiꞌin mií va ndo, chi iin káchi ndáa yaꞌvi ndiꞌi ndo nuu ra.

Ná kundixi yo xiꞌin ndiꞌi ndee ya táxi Ndioxi ndaꞌa yo

¹⁰ Ta ya si̱ndiꞌi i káꞌan i xiꞌin ndo kua, kundaa ni ini ndo kuni ndo ndee ya chee ni kúu mií Tata yo Jesucristo. Saa kuchiñu ndo ndundee ni ini ndo xiꞌin ndee ra.

¹¹ Ta kuenta ni koo ndo iin kundixi níí ndo ndee táxi Ndioxi ndaꞌa ndo ya vaꞌa kuchiñu ndo nuu ndee kiti nǎꞌa, kiti kúni sindaꞌvi ndóꞌo̱.

¹² Ta süvi xiꞌin na taꞌan mií yo kua kánitaꞌan yo, chi xiꞌin tachi nduvaꞌa ya ndee ni naꞌnu tin ndiꞌi ni kúu ya kúu mií chiñu xáꞌnda chiñu ndiꞌi ñaꞌñu xiꞌin ka inka nuu ndiꞌi ndee kiti nǎꞌa ya íyo nuu naá ñuu ivi yóꞌó tin xiꞌin ya íyo nìnu nuu sukun ni ñuu ivi yóꞌó kua kánitaꞌan yo.

¹³ Xaꞌa ya ñaa kua xíniñuꞌu ndo ndikundixi níí ndo xiꞌin ndiꞌi ndee ya táxi Ndioxi ndaꞌa ndo kundixi ndo, tá kuꞌva ndíxi nda lapa nda kánitaꞌan, saa koo ndo. Chi tá íkan ndo saa, tá ti̱ndaa ndá ka tindoꞌo ya kánitaꞌan kiti nǎꞌa xiꞌin ndo, ta kuchiñu ndo xaꞌa ndee ini ndo xiꞌin ya. Chi saa kua kuchiñu ndo kundita tuun ndo tá vaxi kiti nǎꞌa kanitaꞌan ri xiꞌin ndo, ta küchiñu ri sindiꞌi xaꞌa ri ndóꞌo̱.

¹⁴ Yakan tuun ni kundikun ndo ichí Ndioxi, ikan ndo tá kuꞌva íkan nda lapa ndíkaa tuun ñií toko nda nuu ndíkaa i̱chi nda, ta kuꞌva saa xíniñuꞌu ndo koo ndúvi ndo xiꞌin ya ndaa. Saa tu tá kuꞌva ndáa nda lapa kándika nda xiꞌin kàà ya ndási kándika nda, ta kuꞌva saa xíniñuꞌu ndo koo ndo xiꞌin ya vaꞌa, ya ndaa, ya ná sïtikueꞌe kiti nǎꞌa ndóꞌo̱.

¹⁵ Saa tu tá kuꞌva íkan nda lapa xa íyo ndúvi nda, xa ndíkaa tuꞌva nduxan xaꞌa nda ya kuꞌun nda nuu kuachi, kuꞌva saa xíniñuꞌu ndo koo ndúvi ndo, kaꞌan ndoso ndo xiꞌin naꞌa xaꞌa tuꞌun vaꞌa, ya táxi koo vaꞌa ini na.

¹⁶ Ta saa tu tá kuꞌva íyo nda lapa ndíso nda kàà xiꞌin ndaꞌa nda ya kuchiñu nda ndasi nda mií nda nuu ñaꞌa ya kúni sitikueꞌe nda, ta kuꞌva saa ikan ndo kundaa ni ini ndo kuni ndo Tata yo Jesucristo. Chi tá íkan ndo saa ta ndasi ndaꞌa ra ndóꞌo̱ nuu itun kuxin, itun xíxi ñu̱ꞌu̱ nuu, itun tíꞌvi kiti nǎꞌa vaxi nuu ndo ya sitikueꞌe ri ndóꞌo̱.

¹⁷ Saa tu tá kuꞌva íkan nda lapa ñúꞌu ñaꞌa xi̱ní nda ya ndási ya xi̱ní nda, kuꞌva saa xíniñuꞌu ndo kundaa ni ini ndo ya íyo ndee Jesucristo xiꞌin ndo ya sikaku ya ndóꞌo̱ nuu ya väꞌa. Saa tu tá kuꞌva íkan nda lapa xa íyo ndúvi nda xiꞌin i̱chi nda, kuꞌva saa xíniñuꞌu ndo koo ndúvi ndo xiꞌin tuꞌun Ndioxi ya táxi Tachi I̱í ra ndaꞌa ndo.

¹⁸ Ta xïkuiin ndo, kaꞌan ni ndo xiꞌin Ndioxi ndiꞌi saa ichí ya ná chindee taꞌan Tachi I̱í ra xiꞌin ndo. Koo ndúvi ni ndo, ta ndïkava ini ndo, kaꞌan ni ndo xiꞌin Ndioxi xaꞌa ndiꞌi na ñuu Ndioxi, na i̱í.

¹⁹ Saa kaꞌan ni ndo xaꞌa i xiꞌin Ndioxi ya ná taxi ra ndee ndaꞌa i tá káꞌan ndoso i tuꞌun vaꞌa xaꞌa ra xiꞌin naꞌa, ya ná kuchiñu na kundaa ini na xaꞌa ñaꞌa ya chi̱tuni Ndioxi ndi̱xiyo sěꞌe, ya kúu tuꞌun vaꞌa xaꞌa ra.

²⁰ Ta mií Iva yo Ndioxi ku ra ta̱xi chiñu ndaꞌa i ya kaꞌan ndoso i tuꞌun ra, ta xaꞌa ya ñaa kua ndíkaa i veꞌe kàà yóꞌó. Ta kaꞌan ni ndo xaꞌa i xiꞌin Ndioxi ya ná taxi ra ndee ndaꞌa i kaꞌan i xiꞌin naꞌa, ta ná ku ïꞌvi i kaꞌan i xiꞌin na.

Ndái ra Pablo na veꞌe ñuꞌu ñuu Éfeso

²¹ Ta ra ñani yo Tíquico ku ra vaꞌa ni ítaꞌan xiꞌin i xáa chiñu nde nuu Tata yo Jesucristo, ta ra ñaa ku ra ndituꞌun xiꞌin ndo xaꞌa i xiꞌin ndiꞌi ya ndóꞌo i.

²² Tíꞌvi i ra ñani yo ñaa xaa ra nuu ndo, chi kúni i ndituꞌun ra xiꞌin ndo ya kundaa ini ndo ndá kuꞌva íyo i, ta saa xaꞌa ni ra ndee xiꞌin ndo.

²³ Ñani yo, mií Ndioxi ná taxi ni ya koo vaꞌa ini ndo, ta ná kundaa ni ini ndo kuni ndo ra xiꞌin ya kúꞌvi ni ini ra xíni ra ndóꞌo̱, ta saa ná koo Tata yo Jesucristo xiꞌin ndo ndiꞌi saa ichí.

²⁴ Ta mií Ndioxi ná chikaa ni ya vaꞌa ndiꞌi ndóꞌo̱ yáꞌa ni kúꞌvi ini xíni Tata yo Jesucristo. Saa ná koo.