Efesios 5 - Xochapa Mixteco

¹ Ta vitin xíniñuꞌu ndo xaa nduxa ndo ya ikan ndo ya vaꞌa, koo ndo tá kuꞌva íyo mií Ndioxi, chi ndu̱u ndo seꞌe ra, na kúꞌvi ni ini ra xíni ra.

² Tá kuꞌva íkan Cristo xiꞌin yo, kúꞌvi ni ini ra xíni ra yoo, ta saa xíniñuꞌu ndóꞌo̱ kuꞌvi ni ini ndo kuni taꞌan ndo. Chi xaꞌa ya kúꞌvi ni ini ra xíni ra yoo kua ndi̱soko ra mií ra xaꞌa yo. Tá kuꞌva íkan naꞌa, sóko na kiti levo loꞌo nuu Ndioxi ya xíxi ri nuu ra, saa kuandaa xiko ya támi ni xáꞌan nuu ra. Ta saa i̱kan Cristo xiꞌin yo tá ndi̱xiꞌi ra, ta nda̱a xiko tami ni xaꞌan nuu Ndioxi.

³ Chi ndóꞌo̱, ta na ñuu Ndioxi na i̱í ku ndo, xaꞌa ya ñaa kua nda loꞌo ïkan ndo ñaꞌa ya kini ni káa, tá kúu nda taa, nda kuakiꞌvi xiꞌin ñaꞌa ta süvi yá síꞌi nda ku ná, án ñaꞌa ná kuakiꞌvi xiꞌin taa, ta süvi ií ná ku nda. Nda loꞌo ndïkani ini ndo xaꞌa nda iin taꞌan ñaꞌa ya kini ni káa yóꞌó, ni ya koo náꞌna ni ñaꞌa nuu ndo, ndïkani ini ndo xaꞌa.

⁴ Ni käꞌan kini ndo, ni ndá ka tuꞌun ya köo ndáa yaꞌvi käꞌan ndo, ni käꞌan siki ndo xaꞌa ndá ka ñaꞌa ya kini ni káa, ni käꞌan ndo ndá ka tuꞌun ya kini. Ta ya vaꞌa ni ikan ndo kua kaꞌan ndo tuꞌun vaꞌa ya táxi ndo tixaꞌvi ndaꞌa Ndioxi.

⁵ Chi xa xíni mií ndo ndiꞌi naꞌa, na kuakiꞌvi xiꞌin taꞌan ta küchiñu na koo na xiꞌin Ndioxi nuu xáꞌnda chiñu Tata yo Cristo. Ni naꞌa, na íkan ndá ka ñaꞌa ya kini ni káa, ya yakua án na kútoo ni koo kuaꞌa ñaꞌa. Ndiꞌi na íkan saa ta tá íin na káñuꞌu ndioxi siki va saa íin na.

⁶ Täxi ndo sindaꞌvi nda iin naꞌa ndóꞌo̱ ya sixinu na ini ndo ikan ndo ndá ka ñaꞌa ya kini ni káa, ya väꞌa ya yakua ya xáa yakua ikin kuñu ndo. Saa chi Ndioxi ta xaa nduvaꞌa ni ra xiꞌin ndiꞌi naꞌa, na köo xíni soꞌo ya káꞌan ra.

⁷ Yakan köo yuꞌu ndo xiꞌin na ñaa xaꞌa ya káꞌan na xiꞌin ndo.

⁸ Saa chi yachi ta nuu naá va ndi̱xiyo ndo, sundi vitin ta xaꞌa ya ndíkun ndo Tata yo Cristo kua xíka ndo nuu yéꞌe̱. Xaꞌa ya ñaa kua xíniñuꞌu ndo koo ndo tá íin naꞌa, na xíka nuu ñu̱ꞌu̱ yéꞌe̱, nuu túvi.

⁹ Ta xaꞌa ya íyo Tachi I̱í Ndioxi xiꞌin ndo kua ndu̱u ndo naꞌa, na vaꞌa ni, na köo ka kuachi kúu mií nuu ra, na ndee ni íyo ya ndaa ini.

¹⁰ Ta ndiꞌi saa kivi kiꞌin xiní ndo ya ikan ndo ndisaa ya vaꞌa kúni mií Ndioxi.

¹¹ Ta ïkan ndo ñaꞌa väꞌa taꞌan ñaꞌa ya íkan na ñaa nuu naá. Ta vaꞌa ndituꞌun ndo xiꞌin na ya ná kundaa ini na xaꞌa ñaꞌa ya väꞌa íkan na.

¹² Chi nda kúkakaꞌan nuu yo kaꞌan yo xaꞌa ñaꞌa, ya väꞌa íkan sěꞌe na ñaa.

¹³ Ta köo íyo sěꞌe ya, chi tá ndíyeꞌe ñu̱ꞌu̱ ya kúu tuꞌun Ndioxi nuu naá ta iin ndítuvi ndiꞌi va ñaꞌa ya íkan sěꞌe naꞌa.

¹⁴ Chi ndiꞌi ñaꞌa ya kána koo nuu ñu̱ꞌu̱ yéꞌe̱, ta iin ndútuvi teꞌe ndiꞌi va ya, íyo túvi ya yakan kua íyo tuꞌun, ya káꞌan soꞌva, káchi ya saa: “Ndikáxin ini yóꞌo̱ índuꞌu kíxi ni, vaꞌa ndikoo un tañu na ndíi, ta si̱ndiyeꞌe Cristo nuu un”, káchi tuꞌun Ndioxi.

¹⁵ Yakan kiꞌin ni ndo kuenta ndá kuꞌva íyo ndo, ta köo ndo tá kuꞌva íyo naꞌa, na kíꞌvi, ta vaꞌa koo ndo tá kuꞌva íyo naꞌa, na ndíchi ni.

¹⁶ Yakan vaꞌa xaa nduxa ndo ya xaa súvi ndo ya kúni Ndioxi, chi kuaꞌa ni nuu ya väꞌa íyo ñuu ivi yóꞌó vitin.

¹⁷ Ta köo ndo naꞌa, na kíꞌvi, vaꞌa ka ndikani vaꞌa ini ndo ndá ñaꞌa kua kúni Ndioxi xaa súvi ndo nuu ra, ta saa kuchiñu ndo xaa súvi ndo ya kúni mií Tata yo Jesucristo.

¹⁸ Ta sïxini ndo mií ndo xiꞌin nduta vino án ndá ka nduta ndixi ya sixini rá ndóꞌo̱, chi ìyo ni sindiꞌi xaꞌa ndo mií ndo. Ta vaꞌa ka taxi ndo mií ndo ndaꞌa Tachi I̱í ra, ná sikutu yaa ya vaꞌa nima ndo.

¹⁹ Ta chikaa ni ndo ndee xiꞌin taꞌan ndo ya kata ndo ndiꞌi nuu yaa ya kúu salmo, án kata ndo yaa xiꞌin ndiꞌi nima ndo ya xáa kaꞌnu ndo Tata yo Jesucristo.

²⁰ Ndiꞌi saa ichí taxi ni ndo tixaꞌvi ndaꞌa Iva yo Ndioxi, xaꞌa ndiꞌi ni kúu ñaꞌa tixin Tata yo Jesucristo.

Naꞌa, na tíndaꞌa ta xíniñuꞌu na xaa toꞌo taꞌan na

²¹ Xíniñuꞌu ndo xaa ni̱nu̱ ndo mií ndo ya chindee taꞌan ndo xiꞌin taꞌan ndo xaꞌa ya xáa toꞌo ndo Jesucristo.

²² Saa ndóꞌo̱ ná síꞌi, ná íyo i̱í, xaa ni̱nu̱ ndo mií ndo ya kandixa ndo ya káꞌan i̱í ndo xiꞌin ndo tá kuꞌva íkan ndo xiꞌin Tata yo Jesucristo.

²³ Saa chi taa, ií ná síꞌi ku nda ku xi̱ní xiꞌin ná, tá kuꞌva íyo Cristo xiꞌin na veꞌe ñuꞌu. Mií ra ku xi̱ní xiꞌin na ta ndáa chiñu ra xiꞌin na, ta sikaku ra na, chi ikin kuñu mií ra ku na.

²⁴ Tá kuꞌva kándixa na veꞌe ñuꞌu ya káꞌan Tata yo Jesucristo xiꞌin na, kuꞌva saa xíniñuꞌu ná síꞌi kuni soꞌo ná ya káꞌan i̱í ná xiꞌin ná.

²⁵ Saa ndóꞌo̱ taa, nda íyo yá síꞌi, vaꞌa kuꞌvi ni ini ndo kuni ndo yá síꞌi ndo, tá kuꞌva kúꞌvi ni ini Cristo xíni ra yoo veꞌe ñuꞌu, ta nda ndi̱taxi ra mií ra ya ndi̱xiꞌi ra xaꞌa yo.

²⁶ I̱kan ra saa xiꞌin yo ya kuchiñu ra ndasa i̱í ra yoo. Ta xaꞌa ya xi̱ni soꞌo yo tuꞌun vaꞌa xaꞌa ra kua ndu̱u yo naꞌa, na i̱í nuu ra, saa chi̱chi yo xiꞌin tikuii xaꞌa ya kándixa yo ra.

²⁷ I̱kan ra saa xiꞌin yo ya kuchiñu yo kuu yo na veꞌe ñuꞌu, na ndee ni vaꞌa náꞌa, na luvi ni íin. Chi ndi̱xiꞌi Cristo xaꞌa yo ya kuchiñu yo nduu yo naꞌa, na köo nda loꞌo paꞌa kuachi kúu mií nuu ra, ni tá kúꞌva ndóꞌo toto ya nda loꞌo páꞌa ka yakua köo nuu ya ta ni köo kútii ya. Chi mií ra ta kúni ra ná kuu yo naꞌa, na ií nuu ra.

²⁸ Tá kúu nda taa, nda íyo yá síꞌi, ta xíniñuꞌu nda kuꞌvi ni ini nda kuni nda yá síꞌi nda tá kuꞌva kúꞌvi ini nda xíni xiꞌin mií nda. Chi ndiꞌi taa nda kúꞌvi ini xíni yá síꞌi nda, ta kúꞌvi ni ini nda xíni nda mií nda.

²⁹ Saa chi nda iin naꞌa, ta köo na kúndasi nuu xíni ikin kuñu na, ya kúꞌvi ka ini na xíni va na ku ya, xáa vií na xiꞌin ya, táxi na xíxi ya, saa ndáa na ya. Ta kuꞌva saa íkan mií Cristo xiꞌin yo na veꞌe ñuꞌu, ndáa ra yoo.

³⁰ Saa chi tá íin ñaꞌñu ikin kuñu ra, saa íin yo nuu ra.

³¹ Xaꞌa ya ñaa kua xíniñuꞌu taa si̱ndoo ra iva ra tin siꞌí ra, saa ndikitaꞌan ra xiꞌin yá síꞌi ra, ta iin nuu ikin kuñu nduu uvi saa na.

³² Ta ya káꞌan tuꞌun Ndioxi ya nduu na tíndaꞌa iin kuñu xiꞌin taꞌan na, ta ndee ni ndíchi kundaa ini yo xiꞌin ya yóꞌó, ta yeꞌe káchi saa, ya yóꞌó ta xaꞌa Cristo kua káꞌan ya xiꞌin yoo na kúu veꞌe ñuꞌu.

³³ Xaꞌa ya ñaa kua ndiꞌi ndóꞌo̱ taa, ta xíniñuꞌu ndo kuꞌvi ni ini ndo kuni ndo yá síꞌi ndo, tá kuꞌva kúꞌvi ini ndo xíni ndo mií ndo, ta saa yá síꞌi ndo, xíniñuꞌu yá xaa toꞌo yá ndóꞌo̱.