Efesios 4 - Xochapa Mixteco

Na kándixa Cristo ta xíniñuꞌu na koo na iin yuꞌu xiꞌin taꞌan na

¹ Yeꞌe, Pablo, ndíkaa i veꞌe kàà xaꞌa ya xáa chiñu i nuu Tata yo Jesucristo, ta xíkan ni i ya mani nuu ndo ya ná koo ndo tá kuꞌva kúni mií ra, xaꞌa ya ñaa kua ka̱na ra ndóꞌo̱.

² Ta ndiꞌi saa kivi koo ndo naꞌa, na ni̱nu̱ ini, na vaꞌa ini, na kaꞌnu ni ini, na xáꞌa ndee ini xiꞌin taꞌan xaꞌa ya kúꞌvi ni ini ndo xíni taꞌan ndo.

³ Ta saa nduku ndo kuꞌva ya ndikitaꞌan vií ndo kundoo vaꞌa ni ndo xiꞌin taꞌan ndo tá kuꞌva si̱kitaꞌan vií mií Tachi I̱í Ndioxi ndóꞌo̱, chi xaꞌa ya ikán kua si̱kitaꞌan ya ndóꞌo̱ xiꞌin taꞌan ndo ya ná koo vaꞌa ni ndo.

⁴ Chi tá kuꞌva káa ikin kuñu mií ra saa íin ndiꞌi yo. Ta iindaa ku Tachi I̱í Ndioxi ya íyo xiꞌin yo, saa ka̱na ra yoo ya kandixa yo iindaa mituꞌun mií seꞌe ra.

⁵ Ta iindaa va ku Tata yo Jesucristo, iindaa ku ya ndaa kándixa yo, iindaa ku tu ya chi̱chi va yo.

⁶ Ta iindaa ku Iva yo Ndioxi, ra xáꞌnda chiñu nuu ndiꞌi yo, ta táxi ra ndee ra ndaꞌa yo xáa chiñu yo nuu ra, saa íyo ra xiꞌin ndiꞌi yo.

⁷ Xaꞌa ya vaꞌa ni Tata yo Jesucristo kua si̱niꞌi ra ndee vaꞌa ni nuu iin iin yo.

⁸ Xaꞌa ya ikán kua káꞌan tuꞌun Ndioxi ya ta̱a na xinaꞌa, káchi ya saa: “Tá nda̱a ra kuaꞌan ra nuu ndivi, ta ndi̱kuiso ra na ñúꞌu veꞌe kàà kuaꞌan na xiꞌin ra, saa si̱niꞌi ra ndee ya vaꞌa nuu na”. soꞌva káchi tuꞌun Ndioxi.

⁹ Ta ya káꞌan tuꞌun Ndioxi ya “nda̱a ra nuu sukun ni”. Ta ya yóꞌó káꞌan ya xaꞌa Jesucristo ya xiꞌna ke̱e ra nuu ndivi ni̱nù, saa ki̱xi ra ñuu ivi yóꞌó, ta nu̱u ra nda ni̱nu̱ nuu núú ni káa.

¹⁰ Yakan ta nu̱u̱ ra ta saa nda̱a tuku ra nda ni̱nù nuu ndee ni sukun, ya kuchiñu sikutu ndiꞌi ra ndee kúu mií ra.

¹¹ Suvi mií tu ra ku ra ta̱xi ndee vaꞌa ndaꞌa naꞌa: Sava nda ndi̱niꞌi ndee vaꞌa ya kúu nda apóstol, ta sava na ndi̱niꞌi ndee vaꞌa ya kúu na, naꞌa na káꞌan tuꞌun yuꞌu Ndioxi, sava na ndi̱niꞌi ndee vaꞌa ya káꞌan ndoso na tuꞌun vaꞌa xaꞌa Tata yo Jesucristo, sava na ndi̱niꞌi ndee vaꞌa ya ndíso chiñu na xiꞌin na veꞌe ñuꞌu, ta sava na ndi̱niꞌi ndee vaꞌa ya kúu na maestro na sínaꞌa iví xaꞌa tuꞌun Ndioxi.

¹² Ta mií Cristo ku ra si̱niꞌi ndee vaꞌa yóꞌó nuu ndiꞌi yo kúu ñuu ra, yo i̱í, xa̱a ndúvi ra xiꞌin yo xaꞌa chiñu ra ya chindee taꞌan yo xiꞌin taꞌan yo, saa xaꞌa ni yo ndee xiꞌin na kúu ikin kuñu ra.

¹³ Saa xíniñuꞌu yo ikan yo nda ná xinu koo ndiꞌi yo nduu yo iin yuꞌu xaꞌa ya kándixa yo ra tin ya kúndaa ini yo xaꞌa Tata yo Jesucristo, ra kúu Seꞌe Ndioxi. Chi yoo ta kúni yo xinu koo yo nduu yo naꞌa, na xuxa ini xiꞌin tuꞌun ra, saa xinu yo nduu yo tá kuꞌva káa mií ra.

¹⁴ Chi saa kua ïkan ka yo tá kuꞌva íkan na vali, ta ni ndöꞌo yo tá kuꞌva ndóꞌo itun barco chi tá vaxi tachi saa kua kánda nu kuaꞌan nu, ta saa yoo, kändixa ndikuu yo ndiꞌi nuu ñaꞌa ya síin ni káa sínaꞌa ndá ka nda väꞌa sínaꞌa, chi nda ikán ta nda kúni sindaꞌvi yoo va ku nda.

¹⁵ Vaꞌa ka ná kuxuxa ini yo xaꞌa ndiꞌi ni kúu kuꞌva ya ndíkani ini yo, ta saa nduu yo tá káa mií Cristo, ná sinaꞌa taꞌan yo xiꞌin ya ndaa xaꞌa ya kúꞌvi ini yo xínitaꞌan yo. Chi mií Tata yo Cristo ku ra ku xi̱ní, ra xáꞌnda chiñu nuu yo veꞌe ñuꞌu.

¹⁶ Ta mií ra ku ra síkitaꞌan ndiꞌi yo na kúu ñuu ra. Tá kuꞌva íyo tuchi síkitaꞌan ya iin iin ikin kuñu yo, kuꞌva saa íyo ra xiꞌin yo iin káchi ítaꞌan yo xiꞌin taꞌan yo. Ta xa íyo chiñu vaꞌa íkan iin iin yo, ta kuꞌva saa kua xáꞌnu vaꞌa yo saa xáꞌa ni yo ndee xiꞌin taꞌan yo xaꞌa ya kúꞌvi ni ini yo xíni taꞌan yo.

Naꞌa na kándixa Jesucristo ta tá íin naꞌa, na xa̱á saa ndu̱u ini na

¹⁷ Ta ya yóꞌó kua káꞌan i xiꞌin ndo vitin xaꞌa ichí ya ta̱xi Cristo ndaꞌa i kua xáꞌnda chiñu i nuu ndo, káꞌan i xiꞌin ndo: ïkan ka ndo tá kuꞌva íyo naꞌa, na köo xíni Ndioxi. Saa chi na ikán ta íkan na ya väꞌa tá kuꞌva ndíkani ini mií na.

¹⁸ Chi na köo xíni Ndioxi ta íyo xíka ni va na nuu ra, nda ya xínituni na ta tá íin ya íyo nuu naá va saa íyo ya, tuun ni nima na, ta soꞌo ni na.

¹⁹ Ni köo xíni ka na ya kaꞌa̱n nuu, xa ndi̱taxi ndiꞌi na mií na ndaꞌa ñaꞌa ya väꞌa, ya kaꞌa̱n ni nuu. Ta ndiꞌi saa ka ichí ndítaxi ni na mií na ndaꞌa ñaꞌa ya kini ni káa.

²⁰ Sundi ndóꞌo̱, ta köo ndi̱sikuaꞌa ndo tá kuꞌva íkan na ikán, chi Tata yo Jesucristo, ta köo ndi̱sinaꞌa ra ndóꞌo̱ ikan ndo kuꞌva saa.

²¹ Saa chi ya ndixa kua xa xi̱ni soꞌo ndo tuꞌun vaꞌa xaꞌa ra, ta xa ku̱ndaa ini ndo xaꞌa ya ndaa ya kúu mií ra.

²² Xaꞌa ya ñaa kua köo ka ndo tá kuꞌva ndi̱xiyo ndo yachi. Vaꞌa sindoo ndaꞌa ndo kuꞌva yata ya ndi̱xiyo ndo, chi ya ikán ta kúni ya sindaꞌvi ya ndóꞌo̱ ya xaa súvi ndo ya kúni mií ya.

²³ Ta vitin xíniñuꞌu ndo taxi ndo ná nduxaa nima ndo, ná nduxaa ya ndíkani ini ndo.

²⁴ Ta xaꞌa ya ndu̱u ndo naꞌa, na xa ndu̱xaa ini tá kuꞌva kúni mií Ndioxi, ta saa kua ndu̱u ndo tá íin naꞌa, na köo ka kuachi kúu mií nuu ra, ta ndu̱u ndo naꞌa, na i̱í xaꞌa ya ku̱ndaa ini ndo ya ndaa xaꞌa ra.

²⁵ Xaꞌa ya ñaa kua ndïtuꞌun ka ndo tuꞌun vata. Vaꞌa ndi̱tuꞌun ndo nina ya ndaa xiꞌin taꞌan ndo, saa chi ndiꞌi yo kándixa ra, ta tá káa ikin kuñu mií ra saa íin ndiꞌi yo.

²⁶ Yakan tá xáa ndo sáa ini ndo xiꞌin taꞌan ndo, ta vaꞌa kama sindiko ndo ini ndo, ta säa ndo inii nduvi ndaa xiꞌin taꞌan ndo.

²⁷ Ta vaꞌa ka kama ná ndi̱ko̱ ini ndo xiꞌin taꞌan ndo, ta täxi ndo ichí ndaꞌa kiti nǎꞌa ya kuchiñu ri sindiꞌi xaꞌa ri ndóꞌo̱.

²⁸ Ndiꞌi naꞌa, na ku̱too sikuiꞌna, ta ná sïkuiꞌna ka na. Vaꞌa ná xaa chiñu na xiꞌin ndaꞌa na, ta saa koo ñaꞌa nuu na chindee taꞌan na xiꞌin na ndaꞌvi, na köo ñaꞌa nuu.

²⁹ Nda iin tuꞌun väꞌa ná käna koo ka yuꞌu ndo kaꞌan ndo, ndisaa tuꞌun vaꞌa ya chíndee taꞌan ndo xiꞌin inka naꞌa, ya táxi ndo ndee ndaꞌa na xíni soꞌo ya káꞌan ndo, ndisaa ya ikán vaꞌa kaꞌan ndo.

³⁰ Ta ïkan ndo ya väꞌa, ya táxi ndo kusuchi ini Tachi I̱í Ndioxi, chi Tachi I̱í ra kua xiꞌna ndi̱niꞌi ndo nuu ra, ya yóꞌó ta tá káa tuni mií ra saa káa ya nuu ki̱ndoo ra xiꞌin ndo ya sikaku ra ndóꞌo̱ kivi vaxi.

³¹ Ta vaꞌa ndindoso ini ndo xaꞌa ya väꞌa i̱kan naꞌa xiꞌin ndo. Ndiꞌi ya ndee ni kini sáa ini ndo, xiꞌin ya ndúkueꞌe ni ini ndo, xiꞌin ya ndee ni ndáꞌi ndo nuu taꞌan ndo, xiꞌin ya kánaꞌa ndo xaꞌa na taꞌan ndo tin ndiꞌi ka ya väꞌa ndíkani ini ndo.

³² Ta vitin xíniñuꞌu ndo koo ndo naꞌa, na vaꞌa ini. Kundaꞌvi ini ndo kuni taꞌan ndo. Xaa kaꞌnu ini ndo xaꞌa taꞌan ndo, tá kuꞌva xa̱a kaꞌnu ini Ndioxi xaꞌa ndo tixin Tata yo Jesucristo.