Efesios 3 - Xochapa Mixteco

Chiñu íkan ra Pablo xiꞌin naꞌa, na köo kúu judío

¹ Ta xaꞌa ya vaꞌa ndiꞌi ndóꞌo̱ köo kúu judío kua ndíkaa yeꞌe, Pablo veꞌe kàà yóꞌó ya ndíkun i ichí Jesucristo.

² Va xa xi̱ni soꞌo va ndo xaꞌa i ya ta̱xi Ndioxi chiñu ndaꞌa i, ya chindee taꞌan i xiꞌin ndo, ta xaꞌa ya vaꞌa ni ra yakan chi̱tuni ra sikaku uun ra ndóꞌo̱.

³ Vani xa kuaꞌa ni kuiya ndi̱xiyo sěꞌe ñaꞌa ya chi̱tuni mií ra nuu naꞌa, sundi nuu yeꞌe ta xa si̱tuvi va ra ya nuu i tá kuꞌva ndi̱kaꞌan i xiꞌin ndo nuu ta̱a i loꞌo nuu ndo tá yachi.

⁴ Tá ná kaꞌvi ndo tutu ya xa ta̱a i xaa ndaꞌa ndo, ta saa kua vaꞌa kuchiñu kundaa ini ndo xiꞌin ya káꞌan i xiꞌin ndo, ya kúndaa ini i xaꞌa ñaꞌa ya ndi̱xiyo sěꞌe xaꞌa Cristo.

⁵ Ta ya íyo sěꞌe taꞌan ya káꞌan i xaꞌa xiꞌin ndo yóꞌó yachi, ta nda iin naꞌa köo ndi̱kundaa ini xaꞌa ya, sundi vitin ta Ndioxi si̱naꞌa ra ya nuu nda i̱í, nda kúu apóstol xiꞌin nda profeta. Saa i̱kan ra si̱naꞌa ra ya nuu nda tixin Tachi I̱í ra.

⁶ Ta ya yóꞌó ku ya chi̱tuni Ndioxi ndi̱xiyo sěꞌe: Iin káchi niꞌi naꞌa, na köo kúu judío xiꞌin na judío. Niꞌi na ñaꞌa ya ki̱ndoo Ndioxi taxi ra ndaꞌa naꞌa, na ndixa kúu seꞌe ra. Nda na köo kúu judío niꞌi ya yóꞌó xaꞌa ya kándixa na Jesucristo ya sikaku ra na.

⁷ Ta yeꞌe, xaꞌa ya vaꞌa ni Ndioxi xiꞌin i, kúꞌvi ni ini ra xíni ra yeꞌe yakan i̱kan ra saa xiꞌin i, si̱niꞌi uun ra chiñu yóꞌó nuu i ya kaꞌan ndoso i tuꞌun vaꞌa xaꞌa ra xiꞌin naꞌa, ndá kuꞌva kua kaku na.

⁸ Vani köo ndáa yaꞌvi ni va i nuu ndiꞌi na ñani yo, na kúu ñuu Ndioxi, ta ta̱xi ra ichí ndaꞌa i ya kaꞌan ndoso i tuꞌun vaꞌa xaꞌa ra xiꞌin naꞌa, na köo kúu judío. Ta tuꞌun vaꞌa ni ikán, ta tá káa ya kuika ni saa káa ya, chi köo ndíꞌi xaꞌa ya.

⁹ Ta̱xi Ndioxi chiñu ndaꞌa i ya kuchiñu i ndituꞌun i xiꞌin naꞌa xaꞌa ñaꞌa ya chi̱tuni mií ra ndi̱xiyo sěꞌe yachi, chi mií ra ku ra si̱kuaꞌa ndiꞌi ni kúu ñaꞌa ya íyo, ta nda yachi vi ndi̱xiyo sěꞌe ñaꞌa ya chi̱tuni mií ra, nda tá si̱kuaꞌa ra ñuu ivi yoꞌo vi kua i̱kan ra saa.

¹⁰ Xaꞌa ya i̱kan Ndioxi soꞌva kua kúni ra ná kuni ndiꞌi na tatun ra, na naꞌnu xáa chiñu nuu ra xiꞌin ndiꞌi ndee tachi nduvaꞌa ya xáa chiñu maꞌñu ndivi ni̱nù. Ta xaꞌa ya i̱kan ra soꞌva xiꞌin na veꞌe ñuꞌu kua kúni ra ná kundaa ini ndiꞌi ndee yóꞌó, ya iindaa mituꞌun mií Ndioxi ku ra ndee ni ndixa ndíchi nuu ndiꞌi ni kúu ñaꞌa.

¹¹ Ta ya yóꞌó kua chi̱tuni Ndioxi nda kivi núnu̱ú ya xaa súvi ra ya tixin Tata yo Jesucristo.

¹² Xaꞌa ya ndáa ni ini yo xíni yo Tata yo Jesucristo kua vaꞌa ndi̱niꞌi yo ichí kuyati yo nuu Ndioxi kaꞌan yo xiꞌin ra xiꞌin ndinuꞌu nima yo.

¹³ Xaꞌa ya ñaa kua xíkan ni i ya mani nuu ndo ya ná ndïko koo ini ndo xaꞌa tindoꞌo ya ndóꞌo i. Nda vaꞌa ka ná kuni ndo xaꞌa ya ndóꞌo i saa, ta ná koo vaꞌa ni ini ndo xaꞌa ya tíxuꞌvi ni i, chi ndóꞌo̱, ta níꞌi ka ndo ya toꞌo xaꞌa ya ndóꞌo i kuꞌva saa.

Káꞌan ra Pablo xaꞌa na veꞌe ñuꞌu ñuu Éfeso

¹⁴ Xaꞌa ya ñaa kua síkusiti i nuu Iva yo Ndioxi, ra kúu Iva Tata yo Jesucristo, ta káꞌan i xiꞌin ra xaꞌa ndo,

¹⁵ chi tixin mií ra kua níꞌi ndiꞌi yo ndóo ñuu ivi yóꞌó kivi yo ya ndaa, ta saa tu na ndoo nuu ndivi va.

¹⁶ Xíkan ni i ya mani nuu ra ya ná taxi ra Tachi I̱í ra koo ya xiꞌin ndo, saa taxi ra ndee ndaꞌa ndo ya vaꞌa nduxuxa nima ndo xiꞌin tuꞌun ra, ta vaꞌa ikan Ndioxi saa xiꞌin ndo, chi ndee ya kúu mií ra ta chee ni ya ta ni köo ndíꞌi tu xaꞌa va ya.

¹⁷ Saa xíkan ni tu i ya vaꞌa nuu Iva yo Ndioxi ya ná kandixa ni ka ndo Cristo, saa ná kuꞌvi ni ini ndo kuni ñaꞌa ndo, ta nda tá káa iin tioꞌo itun kúnu ni ndíkaa, án veꞌe ya tuun ni ndi̱kuaꞌa xaꞌa, kuꞌva saa ná kuaꞌnu ni ka tuꞌun ra nima ndo.

¹⁸ Saa kua kuchiñu ndóꞌo̱ xiꞌin ndiꞌi na taꞌan ndo, na i̱í, kundaa ini ndo ndá kuꞌva kua ndee ni kúꞌvi ini Ndioxi xíni ra ndóꞌo̱, tá kuꞌva káa nuu ndee ni kâní án tá kuꞌva káa nuu ndee ni ndíka kuꞌva saa káa ya kúꞌvi ni ini ra xíni ra ndóꞌo̱, án tá kuꞌva káa ya súkun ni, án tá kuꞌva káa nuu yáꞌa ni kúnu kuꞌva saa káa ya kúꞌvi ni ini ra xíni ra ndóꞌo̱.

¹⁹ Saa káꞌan ni i xiꞌin Ndioxi ya ná taxi ra ya xínituni ndo ndaꞌa ndo ya ná kuchiñu ndo kundaa ini ndo chi ya kúꞌvi ni ini ra xíni ra ndóꞌo̱ ta yáꞌa ni ka ndee ya ikán nuu ndá ka ya xínituni ndo. Káꞌan ni i xiꞌin ra xaꞌa ndo ya ná xinu ndo kuni taꞌan ni ndo xiꞌin ra, saa ná sikutu ni ra ya vaꞌa ini ndo.

²⁰ Ta xiꞌin ndee mií Ndioxi ya íyo xiꞌin yo kua kuchiñu ikan ra ya chee ni xiꞌin yo, chi ndee ni ndee kúu mií ra ta yáꞌa ni ka va kuaꞌa ñaꞌa kuchiñu ra ikan ra nuu ya ndákan yo nuu ra án ya ndíkani ini yo xaꞌa.

²¹ Ta saa ná kunuu sukun ni ya vaꞌa Ndioxi nuu na veꞌe ñuꞌu tixin Jesucristo, saa ná koo ndiꞌi saa kúu ka kivi ya vaxi. Saa ná koo.