Efesios 2 - Xochapa Mixteco

Xaꞌa ya i̱kan Jesucristo kua si̱kaku Ndioxi yoo

¹ Ta ndóꞌo̱, tá yachi tá täꞌan kandixa ndo Jesucristo, ta tá íin naꞌa, na xa ndíi saa ndi̱xiyo ndo nuu Ndioxi xaꞌa kuachi ya väꞌa i̱kan ndo nuu ra.

² Saa ndi̱xiyo ndo yachi, i̱kan ni ndo ya väꞌa xaꞌa ya xi̱ndikun ndo ichí taꞌan ya ndíkun na ñuu ivi yóꞌó, ta xa̱a súvi ndo ya ndi̱kaꞌan kiti nǎꞌa, kiti xáꞌnda chiñu nuu ndiꞌi tachi nduvaꞌa xiꞌin ndo, ta nda vitin ta xáꞌnda chiñu yaa va ri nuu naꞌa, na köo xíin kuni soꞌo ya káꞌan Ndioxi.

³ Saa ndi̱xiyo ndiꞌi va yo yachi: I̱kan ni yo ndiꞌi nuu ñaꞌa ya väꞌa, ya ku̱too ni mií ikin kuñu yo ikan ya. I̱kan yo tá kuꞌva íkan ndiꞌi naꞌa, xa̱a súvi ni yo ndiꞌi ñaꞌa ya ndi̱kani ini yo vaꞌa ni nuu yo, túvi yo. Ta xaꞌa ya ikán kua xíniñuꞌu yo sitixuꞌvi ni Ndioxi yoo, chi sáa ni ini ra xíni ra ya väꞌa íkan yo.

⁴ Sundi xaꞌa ya vaꞌa ni ini Ndioxi xiꞌin yo, yakan ku̱ndaꞌvi ni ini ra xi̱ni ra yoo, ta saa ku̱ꞌvi ni ini ra xi̱ni ra yo.

⁵ Tá íin yo xa ndi̱xiꞌi va ndi̱xiyo yo nuu Ndioxi xaꞌa kuachi yo ya väꞌa i̱kan yo nuu ra. Vani tá íin na ndíi saa ndi̱xiyo yo ta si̱taku ra yoo kivi ndi̱kitaꞌan yo xiꞌin Jesucristo. Ndi̱xaꞌvi ni Ndioxi xaꞌa ya vaꞌa ni ra xiꞌin yo, chi ni köo ñaꞌa ndi̱kan yo ta si̱kaku uun ra yoo.

⁶ Ta si̱taku Ndioxi yoo xiꞌin Jesucristo tañu na ndíi, ñaa ta̱xi ra ichí ndaꞌa yo ya ndi̱kundoo yati yo xiꞌin ra nuu íyo ra ndivi.

⁷ I̱kan Ndioxi saa xiꞌin yo chi kúni ni ra ya kundaa ini yo xaꞌa ra kivi vaxi ya ndee ni vaꞌa ini ra xiꞌin yo, ta saa kúꞌvi ni ini ra xíni ra yoo tixin seꞌe ra Jesucristo.

⁸ Xaꞌa ya vaꞌa ni Ndioxi xiꞌin ndo kua ta̱xi ra ndi̱kaku ndo. Ta köo ndi̱kuchiñu ndo sikaku ndo mií ndo, xaꞌa ya vaꞌa ni ra xiꞌin ndo kua si̱niꞌi ra ya vaꞌa nuu ndo, si̱kaku ra ndóꞌo̱ chi ndáa ni ini ndo xíni ñaꞌa ndo.

⁹ Ya yóꞌó kúni kachi ya: süvi xaꞌa ndá ka ñaꞌa ya i̱kan ndo kua si̱kaku ra ndóꞌo̱, chi nda iin ndo ta küvi kaꞌan ndo ya si̱kaku ndo mií ndo.

¹⁰ Chi mií Ndioxi ku ra si̱kuaꞌa yoo. Tixin Jesucristo kua i̱kan ra saa xiꞌin yo ya ná ikan yo ya vaꞌa, ya xa chi̱tuni mií ra ikan ra xiꞌin yo. Ta saa kuchiñu yo xaa súvi yo ndiꞌi ya.

Ndiꞌi yo kándixa Jesucristo ta iin yuꞌu ku yo xiꞌin taꞌan yo

¹¹ Ta xa kúndaa va ini ndo ya káꞌan na judío, “Naꞌa, na köo tuni Ndioxi kúu mií”, káchi na xaꞌa ndo. Chi káꞌan na xaꞌa mií na ya íyo tuni Ndioxi na, sundi tuni ya káꞌan na xaꞌa ikán ta mií va na chínuu ya xiꞌin ndaꞌa na.

¹² Ndikaꞌán ini ndo kivi tá köo Jesucristo ndi̱xiyo xiꞌin ndo, ta ndi̱xiyo xíka ni va ndo nuu ra, ta xaꞌa ya köo kúu ndo na ñuu Israel yakan köo ndi̱xiyo ichí ndaꞌa ndo niꞌi ndo ya ki̱ndoo Ndioxi taxi ra ndaꞌa na Israel. Ndaꞌvi ni ndi̱xiyo ndo ñuu ivi yóꞌó, chi nda loꞌo köo ndi̱kundaa ini ndo xaꞌa Ndioxi ra ndaa. Yakan nda loꞌo köo ndi̱xika ini ndo niꞌi ndo ya vaꞌa nuu ra.

¹³ Ta vitin xaꞌa ya xa iin yuꞌu ndu̱u ndo xiꞌin Cristo yakan köo íyo xíka ka ndo nuu Ndioxi, chi Jesucristo ku ra ndi̱xiꞌi xaꞌa ndo yakan vaꞌa ku̱yati ndo nuu Ndioxi.

¹⁴ Saa ta̱xi ra ya koo vaꞌa ni ini yo xiꞌin taꞌan yo, ta si̱kitaꞌan ra ndeꞌe judío xiꞌin ndiꞌi ndóꞌo̱ köo kúu judío, iin ñuu nda̱sa ra uvi saa yo. Chi yachi ta ku̱ndasi ni nuu ndiꞌi yo xi̱ni taꞌan yo, ndee ni ndi̱taꞌvi taꞌan yo, nda tá káa iin nama chee ni saa ndi̱xiyo ya taꞌvi mií yo. Ta nda tuꞌva ki̱xi Cristo ndi̱xiꞌi ra xaꞌa yo, ta nda saa kua si̱kitaꞌan ra yoo nuu ñaꞌa ya ta̱ꞌvi taꞌan xiꞌin yo, xiꞌin ya ndee ni ku̱ndasi nuu yo xi̱ni taꞌan yo.

¹⁵ Ta xaꞌa ya ndi̱xiꞌi ra nuu cruzin kua si̱ndiꞌi xaꞌa ra ley ya si̱ndikoo ra Moisés. Ni uvi ñuu ndi̱xiyo yo xiꞌin taꞌan yo, ta nda saa ku nuu nda̱sa ra yoo ndu̱u yo iin ñuu xa̱á xiꞌin ra vitin. Ikán ku nuu si̱kitaꞌan mani ra yoo xiꞌin taꞌan yo.

¹⁶ Saa chi tá ndi̱xiꞌi Cristo nuu cruzin, saa kua si̱ndiꞌi xaꞌa ra ya ka̱nitaꞌan ni uvi saa yo ñuu xiꞌin taꞌan yo, ñaa ta̱xi ra ndi̱kundoo vaꞌa yo xiꞌin Ndioxi, saa nda̱sa ra uvi saa yo ñuu ikán ndu̱u yo iin nuu ikin kuñu xiꞌin mií ra.

¹⁷ Chi tá kivi ki̱xi ra ta ndi̱kaꞌan ndoso ra tuꞌun vaꞌa ya koo vaꞌa ni ini ndóꞌo̱ ndi̱xiyo xíka ni nuu ra, xiꞌin ndeꞌe ndi̱xiyo yati ni nuu ra.

¹⁸ Ta vitin xaꞌa ya i̱kan Jesucristo xaꞌa yo kua vaꞌa kuchiñu ndiꞌi ndaa yo kuyati yo nuu Iva yo Ndioxi tixin ndee Tachi I̱í ra.

¹⁹ Xaꞌa ya ñaa kua, ndóꞌo̱ ta köo kúu ka ndo na ke̱e inka ñaꞌñu ñuu xíka ni, ta ni köo kúu ka tu ndo naꞌa, na xíka tá ñuu tá ñuu, chi xa iin ndu̱u ndo xiꞌin na ñuu Ndioxi, na i̱í, ta iin veꞌe ndu̱u yo xiꞌin taꞌan yo xaꞌa ra.

²⁰ Ta ndóꞌo̱ kándixa Jesucristo tá káa iin veꞌe ya síkuaꞌa Ndioxi saa íin ndo. Chi tuꞌun ya sínaꞌa nda profeta ndóꞌo̱, án ya sínaꞌa nda apóstol ndóꞌo̱, ta tá iin xaꞌa veꞌe ya táva na saa íin tuꞌun ya sínaꞌa nda ndóꞌo̱. Ta tá káa iin yu̱ú ya ndíkunduꞌu tutun veꞌe ya ndee ni xíniñuꞌu, saa káa Cristo xiꞌin ndo.

²¹ Saa chi xaꞌa ya íkan mií ra xiꞌin yo kua vaꞌa ndúu yo tá káa veꞌe ya ndee ni tuun kuáꞌa, saa íin yo nuu Ndioxi chi yoo ku yo ndúu na veꞌe ñuꞌu Ndioxi ya i̱í, ta xaꞌa Tata yo Jesucristo kua ndúu yo saa.

²² Ta ndixaꞌvi ni mií ra chi ndóꞌo̱ xiꞌin na judío ta tá káa veꞌe ñuꞌu nuu íyo Ndioxi, saa íin ndo, chi íyo Tachi I̱í ra ini ndo.