Efesios 1 - Xochapa Mixteco

Káꞌan ndioxi ra Pablo xiꞌin na kándixa Jesús ndóo ñuu Éfeso

¹ Yeꞌe Pablo, ra ndi̱kaxin mií Ndioxi xáa chiñu i nuu ra ku i táa tutu yóꞌó xaa ya nuu ndiꞌi ndóꞌo̱, ndóo ñuu Éfeso, chi na i̱í, na kúu ñuu Ndioxi ku ndo ta ndinuꞌu ni ini ndo kándixa ndo Jesucristo.

² Ta mií Iva yo Ndioxi xiꞌin Tata yo Jesucristo ná ikan ni ya vaꞌa xiꞌin ndo, saa ná taxi ni ra ya vaꞌa koo ya ini ndo, ta saa ná koo vaꞌa ni ini ndo.

Ndixaꞌvi ni Ndioxi xaꞌa ya vaꞌa ta̱xi ra ndaꞌa yo

³ Ta saa ná xaa kaꞌnu ni yo Ndioxi ra kúu Iva Tata yo Jesucristo, chi ta̱xi ni ra ndiꞌi ya vaꞌa íyo nuu ndivi ndaꞌa yo tixin Jesucristo.

⁴ Nda yachi ka tá täꞌan xikoo xaꞌa ñuu ivi vi kua ndi̱kaxin ra yoo tixin Jesucristo ya ná nduu yo naꞌa, na i̱í, na köo nda iin kuachi ku mií nuu ra.

⁵ Xaꞌa ya kúꞌvi ni ini ra xíni ra yoo kua ndi̱kaxin ra yoo, saa ndi̱kuiso ndaꞌvi ra yoo ndu̱u yo seꞌe ra tixin Jesucristo. Chi saa chi̱tuni mií ra i̱kan ra xiꞌin yo, ta kúsini ni ra xaꞌa ya i̱kan ra saa xiꞌin yo.

⁶ Ta i̱kán ra saa xiꞌin yo, ya ná xaa kaꞌnu ni yo ra. Xaꞌa ya kúꞌvi ni ini ra xíni ra yoo kua ndi̱niꞌi uun yo nuu ra, ya i̱kan ra saa xiꞌin yo. Ndi̱kuiso ra yoo tixin Seꞌe ra, ra ndee ni kúꞌvi ini ra xíni ra.

⁷ Ta ya kuchiñu ra sikaku ra yoo kua cha̱ꞌvi Jesucristo xaꞌa kuachi yo xiꞌin nií ra nduta ndi̱xita nuu cruzin tá ndi̱xiꞌi ra. Saa ku̱u nuu ndi̱saña yo ki̱ndoo ndíka yo nuu ya väꞌa, ya xa̱ꞌnda chiñu nuu yo. Xaꞌa ya kaꞌnu ni ini Ndioxi kua i̱kan ra saa xiꞌin yo.

⁸ Xaꞌa ya vaꞌa ni ra xiꞌin yo kua ndi̱niꞌi ni yo ya vaꞌa yóꞌó nuu ra, xiꞌin ndiꞌi ya ndíchi tin ya xínituni yo ta̱xi ra ndaꞌa yo.

⁹ Ta si̱naꞌa ra ñaꞌa nuu yo ya chi̱tuni mií ra ndi̱xiyo sěꞌe nuu ra. Ta ndee ni kúsini ra si̱naꞌa ra ya yóꞌó nuu yo tixin seꞌe ra Jesucristo, chi saa chi̱kaa ini ra ikan ra xiꞌin yo.

¹⁰ Ta ya ndi̱xiyo sěꞌe ikán kua kuu tá ná tindaa kivi ya sikitaꞌan ndiꞌi Ndioxi ñaꞌa ya chi̱tuni ra xaa súvi ra, ta saa kua nditaxi ndiꞌi ra ndivi xiꞌin ñuu ivi yóꞌó ndaꞌa Cristo, ya kaꞌnda chiñu ra nuu ya.

¹¹ Chi xa yachi ka vi ndi̱kaxin Ndioxi yoo tixin Seꞌe ra Jesucristo ya nduu yo seꞌe ra, ta saa niꞌi yo ndiꞌi ñaꞌa nuu ra ya chi̱tuni ra taxi ra ndaꞌa yo, saa chi mií ra ta ndee ni vaꞌa kíꞌin ra kuenta xiꞌin ñaꞌa íkan ra, ya ná kana vaꞌa ndiꞌi ya tá kuꞌva kúni mií ra.

¹² Chi Ndioxi ta ku̱ni ra ya ná xaa kaꞌnu ni xiꞌna ndeꞌe ra, saa chi ndeꞌe ku nde xiꞌna ka̱na ra ya ndi̱kundikun nde Jesucristo chi xa yachi vi ndátun ñaꞌa nde.

¹³ Ta saa i̱kan tu Ndioxi xiꞌin ndóꞌo̱ va, tá xi̱ni soꞌo ndo tuꞌun vaꞌa ya ndaa, ya kúu tuꞌun vaꞌa xaꞌa Cristo nuu kuchiñu ndo kaku ndo, ta ka̱ndixa ndo ya. Saa chi̱nuu ra tuni ra ndóꞌo̱, ta ya ikán ku Tachi I̱í ra, ya xa ki̱ndoo ra taxi ra ndaꞌa ndo.

¹⁴ Ta Tachi I̱í ra ya íyo xiꞌin yo kua xiꞌna ta̱xi ra ndaꞌa yo ya káꞌan ra xiꞌin yo ya niꞌi yo ya ki̱ndoo ra xiꞌin yo taxi ra ndaꞌa yo. Chi tixin Tachi I̱í ra kua taxi ra saña ndíka mií yo kúu na ñuu ra. Xaꞌa ya i̱kan Ndioxi saa xiꞌin yo kua xíniñuꞌu yo xaa kaꞌnu ni yo ra chi ndee ni kaꞌnu ra.

Káꞌan ra Pablo xiꞌin Ndioxi xaꞌa na ñuu Éfeso.

¹⁵ Xaꞌa ya ikán kua tá ku̱ndaa ini i xaꞌa ndo ya ndee ni ndáa ini ndo xíni ndo Tata yo Jesús, ta saa kúꞌvi ni ini ndo xíni ndo na ñuu ra,

¹⁶ ta köo ndíndoso ini i xaꞌa ndo, ndiꞌi saa ichí káꞌan ni i xiꞌin Ndioxi, ta xáku ndaꞌvi ni i nuu ra xaꞌa ndo.

¹⁷ Xáku ndaꞌvi i nuu Ndioxi ra chee ni, ra kúu Iva Tata yo Jesucristo ya ná taxi ra ya xínituni ndaꞌa ndo, ta saa ná xinu ndo kundaa vaꞌa ini ndo xaꞌa ra ta nda kuni taꞌan vaꞌa ka ndo xiꞌin ra,

¹⁸ saa ná ndikuná ra ya xínituni ndo ya kuchiñu ndo kundaa ini ndo xaꞌa ñaꞌa ya vaꞌa luvi ni, ya xa xa̱a vií ra taxi ra ndaꞌa naꞌa, na ka̱na ra kundikun ñaꞌa. Ta saa kua vaꞌa niꞌi ni ndo ya vaꞌa, ya ki̱ndoo ra taxi ra ndaꞌa ndóꞌo̱, na ñuu ra, na i̱í.

¹⁹ Ta saa kua vaꞌa kundaa ini ndo xaꞌa ndee ya chee, ya kaꞌnu ni táxi Ndioxi ndaꞌa ndiꞌi yo kándixa ñaꞌa. Ta suvi xiꞌin mií ndee Ndioxi ya chee ni kua xi̱niñuꞌu ra

²⁰ si̱taku ra Cristo tañu na ndíi, saa ta̱xi ra ichí ndaꞌa ra ya koo ra xiꞌin ra ñaꞌñu kuáꞌá ra nuu ndivi.

²¹ Ta̱xi Ndioxi ichí ndaꞌa Cristo ya kaꞌnda ra chiñu nuu tá kúu ndiꞌi na chiñu naꞌnu xiꞌin na chee xáꞌnda chiñu ñuu ivi yóꞌó án chiñu naꞌnu ya chee xáꞌnda chiñu nuu ndivi tiempo vitin xiꞌin tiempo ya vaxi.

²² Soꞌva i̱kan Ndioxi xiꞌin Tata yo Jesucristo, ndi̱taxi ra ndiꞌi ni kúu nuu ñaꞌa ikán ndaꞌa ra, to̱so ndiꞌi Ndioxi ya tixin xaꞌa ra, saa chi̱nuu ñaꞌa ra ya kúu ra xi̱ní xiꞌin ndiꞌi ni kúu ñaꞌa, i̱kan Ndioxi saa xiꞌin ra ya chindee taꞌan ra xiꞌin na veꞌe ñuꞌu.

²³ Ta na veꞌe ñuꞌu tá káa mií ikin kuñu Cristo saa íin na. Ta mií ra ku ra táxi ndá ka ñaꞌa ya kúmani nuu na, saa síkutu ni ra ya vaꞌa íyo ya ini na xaꞌa ya íyo ra xiꞌin na.