Colosenses 4 - Xochapa Mixteco

¹ Saa ndóꞌo̱ xáa chiñu naꞌa nuu, ikan ndo ya vaꞌa, ya ndaa xiꞌin na xáa chiñu nuu ndo. Ta ndikaꞌán ini ndo chi saa tu ndóꞌo̱ va, nuu ndivi íyo ra xáꞌnda chiñu nuu ndo.

² Ñani yo xiꞌin kuꞌva yo, xïkuiin ndo kaꞌan ni ndo xiꞌin Ndioxi, saa koo ndúvi ni ndo ndiꞌi saa kivi ya taxi ni ndo tixaꞌvi ndaꞌa ra.

³ Ta kaꞌan ni ndo xiꞌin ra ya ná kuna ra yeꞌe nuu nde ya ndituꞌun ka nde tuꞌun vaꞌa xaꞌa ra xiꞌin naꞌa ya ná kuchiñu ndituꞌun nde xaꞌa ñaꞌa ya ndi̱xiyo sěꞌe yachi, chi vitin ta xa si̱tuvi ra ya tixin Tata yo Jesucristo nuu na, ta xaꞌa ya ndítuꞌun i xaꞌa ra kua ndíkaa i veꞌe kàà yóꞌó.

⁴ Saa kaꞌan ni ndo xiꞌin ra ya ná chindee ra yeꞌe kuchiñu i ndituꞌun teꞌe ni i ya ndaa xaꞌa ra xiꞌin naꞌa.

⁵ Ta ndóꞌo̱, vívií koo ndo nuu naꞌa, na köo kándixa Ndioxi. Ná niꞌi ndo tuꞌun vaꞌa táxi Ndioxi ndaꞌa ndo ndituꞌun ndo xiꞌin na, ta kuniñuꞌu vaꞌa ni ndo tiempo ya kaꞌan ndo xiꞌin na.

⁶ Tá káꞌan ndo xiꞌin na, ta vivií ndi̱tuꞌun ndo xiꞌin na, nda tá kuꞌva yasin ñaꞌa xíxi yo ya kuakee iín xiꞌin, kuꞌva saa yasin ndituꞌun ndo xiꞌin na. Saa kua vaꞌa kuchiñu ndo ndikuiin ndo yuꞌu na tá ndákan tuꞌun na ndóꞌo̱ ndá ka ñaꞌa.

Ndái ra Pablo na veꞌe ñuꞌu

⁷ Ta ra ñani yo, ra Tíquico, ra kúꞌvi ni ini yo xíni yo, ra ndee ni vaꞌa xáa chiñu nuu Ndioxi, ra ítaꞌan xiꞌin i xáa chiñu nde nuu Iva yo, ra yóꞌó ku ra ndituꞌun xiꞌin ndo xaꞌa ndiꞌi ya ndóꞌo i.

⁸ Tíꞌvi i ra xaa ra nuu ndo ya ndituꞌun ra xiꞌin ndo, kundaa ini ndo ndá kuꞌva íyo nde, saa xaꞌa ni ra ndee xiꞌin ndo.

⁹ Saa tíꞌvi i ra Tíquico ñani yo xaa ra xiꞌin ra Onésimo ñani yo, ra ñuu mií ndo, ra kúꞌvi ni ini i xíni i, ra ndee ni vaꞌa xáa chiñu xiꞌin i nuu Tata yo Jesucristo. Tíꞌvi i ra xaa ra xiꞌin ra, ta nda ñaa ku nda ndituꞌun xiꞌin ndo xaꞌa ndiꞌi ya ndóꞌo nde yóꞌó.

¹⁰ Saa ra Aristarco ñani yo, tíꞌvi ni ra tuꞌun mani xaa nuu ndo, ra ndíkaa xiꞌin i veꞌe kàà yóꞌó ku ra. Saa tu ra Marcos, ra kúu xaxin ra Bernabé ñani yo, tíꞌvi ra tuꞌun mani xaa nuu ndo. Tá ndá kivi xaa ra Marcos, ñani yo nuu ndo koto ra ndóꞌo̱, ta xa ndi̱tuꞌun i xaꞌa ra xiꞌin ndo ta vaꞌa ndikiꞌin mani ndo ra.

¹¹ Saa tu ra Jesús, ra káꞌan na xiꞌin Justo, tíꞌvi ra tuꞌun mani xaa nuu ndo. Ndisaa nda yóꞌó ku nda ku judío, nda kándixa Jesucristo chíndee taꞌan ni xiꞌin i xáa chiñu nde xaꞌa chiñu nuu xáꞌnda chiñu Ndioxi. Ta vaꞌa ni xáꞌa nda ndee xiꞌin i síndiko ni nda ini i.

¹² Saa tu ra Epafras, ra ñuu mií ndo, tíꞌvi ni ra tuꞌun mani xaa nuu ndo. Ta ndiꞌi saa ichí ndee ni káꞌan ra xaꞌa ndo xiꞌin Ndioxi ya ndee ni ná koo vaꞌa ndo, ta ná kuaꞌnu ni ka ndo xiꞌin tuꞌun Ndioxi ya kundaa vaꞌa ini ndo xiꞌin ya, saa xaa súvi ndo ya kúni mií Ndioxi.

¹³ Ta kúni i kaꞌan i xiꞌin ndo xaꞌa ra Epafras, ndee ni xáa chiñu ra xaꞌa ndo, ta saa tu xaꞌa na ñuu Laodisea xiꞌin na ñuu Hierápolis.

¹⁴ Saa tu ra ñani yo ra Lucas, ra kúꞌvi ni ini i xíni i, ra xáa tatan naꞌa, xiꞌin ra Demas ñani yo, tíꞌvi ni nda tuꞌun mani xaa nuu ndo.

¹⁵ Saa kaꞌan ndioxi ni ndo xiꞌin nda ñani yo tin ná kuꞌva yo, na ndóo ñuu Laodicea, ta kaꞌan ndioxi ni tu ndo xiꞌin yá kuꞌva yo yá Ninfas xiꞌin na kándixa Jesucristo, na ndíkitaꞌan veꞌe yá.

¹⁶ Tá si̱ndiꞌi ndo ka̱ꞌvi ndo tutu yóꞌó nuu na taꞌan yo, na ndóo ñuu Colosas, ta vaꞌa tiꞌvi ndo ya ná kuꞌun ya ndaꞌa na taꞌan yo, na veꞌe ñuꞌu ndóo ñuu Laodicea ya kaꞌvi na ya. Saa tu tá ndi̱ꞌi ka̱ꞌvi na tutu ya ti̱ꞌvi i kuaꞌan ndaꞌa mií na, ta vaꞌa ná taxi na ya ndaꞌa ndo ndikiꞌin ndo ya kaꞌvi ndo.

¹⁷ Ta vaꞌa kaꞌan ndo xiꞌin ra ñani yo, ra Arquipo, ya xíniñuꞌu ra xaa súvi ra chiñu ya ta̱xi Tata yo Jesucristo ndaꞌa ra.

¹⁸ Ta yeꞌe, Pablo, ku i káꞌan ndioxi xiꞌin ndo, xiꞌin ndaꞌa mií i táa i ya káꞌan i xiꞌin ndo. Ta ndikaꞌán ini ndo xaꞌa i ya ndíkaa i veꞌe kàà yóꞌó. Ta mií Tata yo Jesucristo ná chikaa ni ya vaꞌa ndóꞌo̱. Saa ná koo.