Colosenses 3 - Xochapa Mixteco

¹ Ta ndóꞌo̱, ta xa ndi̱taku ndo xiꞌin Jesucristo tá ndi̱xiꞌi ra, yakan vitin ta xíniñuꞌu ndo nduku ndo ya vaꞌa, ya ndáa yaꞌvi ni, ya íyo nuu ndivi nuu índuꞌu ra nuu tai toꞌo ñaꞌñu kuáꞌá Ndioxi.

² Ta ná ndikani ni ini ndo xaꞌa ñaꞌa ya íyo nuu ndivi, ta ndïkani ini ndo xaꞌa ya íyo ñuu ivi yóꞌó.

³ Chi ndóꞌo̱, ta xa ndi̱xiꞌi va ndo xaꞌa kuꞌva yata ya ndi̱xiyo ndo yachi, ta vitin chi̱vaꞌa Jesucristo ndóꞌo̱ íyo ndo ndaꞌa Iva yo Ndioxi ra ndáa ni ndóꞌo̱.

⁴ Tá ná ndiko koo Jesucristo, ra táxi táku ndo, ta iin káchi nduu ndo xiꞌin ra, saa ndikundixi níí ndo ya vaꞌa, ya luvi ni xiꞌin ra.

Köo ka ndo tá kuꞌva ndi̱xiyo ndo tá yachi

⁵ Ta vitin köo ka ndo tá kuꞌva ndi̱xiyo ndo yachi. Vaꞌa sindiꞌi xaꞌa ndo ya chíndaꞌa ndóꞌo̱ ikan ndo ya väꞌa, tá kúu nda taa ta küvi kiꞌvi nda xiꞌin inka ñaꞌa tá tu süvi yá síꞌi nda ku yá, ni ná síꞌi ta ná kïꞌvi ná xiꞌin inka taa tá tu süvi i̱í ná ku nda, ta saa küni ndo ikan ndo ndá ka ñaꞌa ya väꞌa, kütoo ni ndo ndikani ini ndo xaꞌa ya väꞌa, ta ni kütoo ni ndo koo kuaꞌa ni ñaꞌa ndo, chi tá íkan ndo saa, ta tá íin naꞌa, na xáa kaꞌnu ndioxi ndíi, saa íin ndo.

⁶ Ta ndiꞌi ya väꞌa íkan naꞌa, na soꞌo ni, ya ikán kua sísaa ni Ndioxi ta ndee ni sitixuꞌvi ra na xaꞌa ya íkan na saa.

⁷ Taꞌan ya ikán kua ndee ni i̱kan ndo tá yachi, tá ndi̱xika ndo suvi ichí väꞌa ikán.

⁸ Ta vitin sindoo ndo ndiꞌi ya sáa ni ini íyo nima ndo, xiꞌin ya ndee ni kueꞌe ndo, saa tu ya ndíkani väꞌa ini ndo xaꞌa naꞌa, án ya ndee ni kini ndáꞌi ndo, xiꞌin ndiꞌi tuꞌun kini ni kána koo yuꞌu ndo káꞌan ndo.

⁹ Ta sïndaꞌvi taꞌan ka ndo, saa chi xa si̱ndikoo ndo ichí ya ndi̱xika ndo yachi, nuu i̱kan ni ndo ndiꞌi ñaꞌa ya väꞌa.

¹⁰ Chi vitin ta xa ndu̱u ndo naꞌa, na xa̱á, na íin tá kuꞌva káa mií Ndioxi ra si̱kuaꞌa ndóꞌo̱ ku ra íkan saa xiꞌin ndo iin iin kivi nda ná xinu koo ndo kuni taꞌan vaꞌa ndo xiꞌin ra tá kuꞌva káa mií ra.

¹¹ Ta xaꞌa ya xa ndu̱u ndo na xa̱á vitin ta köo ndáa yaꞌvi ka ya án ndo judío ku ndo án süvi ndo judío ku ndo, án ndo kúu mií tuni Ndioxi ku ndo, án ndo köo tuni Ndioxi ku ndo, án ndo ka̱ꞌvi ni ku ndo án ndo köo ndi̱kaꞌvi ku ndo, án ndo ke̱e inka ñuu kani ni ku ndo, án ndo xáa chiñu xiꞌin ya nduxa ku ndo, án ndo íyo ndika ku ndo, nda iin ya yóꞌó köo ndáa yaꞌvi ni, ya ndee ni ndáa yaꞌvi kua íyo Cristo xiꞌin ndo vitin.

¹² Chi mií Ndioxi ku ra ndi̱kaxin ndóꞌo̱ xaꞌa ya kúꞌvi ni ini ra xíni ra ndóꞌo̱ ya nduu ndo na ñuu ra, na i̱í. Xaꞌa ya ñaa kua xíniñuꞌu ndo koo vií ndo xiꞌin taꞌan ndo, kundaꞌvi ini ndo kuni ndo naꞌa, saa ikan ndo ya vaꞌa xiꞌin na, xaa toꞌo taꞌan ndo, xaꞌa ndee ini ndo xiꞌin taꞌan ndo.

¹³ Ta säa ndo xiꞌin taꞌan ndo, kaꞌnu koo ini ndo xiꞌin taꞌan ndo. Tá ndá naꞌa íkan ya väꞌa xiꞌin ndo ta vaꞌa xaa kaꞌnu ini ndo xaꞌa na, tá kuꞌva i̱kan Tata yo xiꞌin ndo, xa̱a kaꞌnu ini ra xaꞌa ndo, saa ikan ndo.

¹⁴ Chi ya ndee ni xíniñuꞌu ndo ikan ndo xiꞌin taꞌan ndo kua yóꞌó: kuꞌvi ni ini ndo kuni taꞌan ndo, chi tá íkan ndo saa xiꞌin taꞌan ndo, ta saa kua ndíkundoo mani ndo xiꞌin taꞌan ndo.

¹⁵ Ta taxi ndo ná koo ya vaꞌa táxi Cristo ndaꞌa ndo ya kaꞌnda chiñu ya nima ndo, chi mií Cristo ku ra ka̱na ndóꞌo̱ ya nduu ndo iin ikin kuñu xiꞌin ra, ta taxi ni ndo tixaꞌvi ndaꞌa Ndioxi ndiꞌi saa ichí.

¹⁶ Ta taxi ndo ndee ni ná koo mií tuꞌun Tata yo Jesucristo nima ndo. Saa sinaꞌa taꞌan ndo ta ndikani ndo nuu taꞌan ndo sixinu ndo ini taꞌan ndo ya ná ikan ndo ya vaꞌa kúni Ndioxi. Saa ná kusini ndo ta kata ndo salmo xiꞌin yaa i̱í nuu Ndioxi ya táxi ndo tixaꞌvi ndaꞌa ra xaꞌa ya íyo vaꞌa ni ini ndo xiꞌin ra.

¹⁷ Ta ndiꞌi ñaꞌa íkan ndo án ya káꞌan ndo, ta vaꞌa ikan ndo ndiꞌi ya xaꞌa ya chinuu vaꞌa ndo tuꞌun mií Tata yo Jesús, saa taxi ni ndo tixaꞌvi ndaꞌa Iva yo Ndioxi.

Ndá kuꞌva xíniñuꞌu na kándixa Jesús koo na veꞌe na tin nuu xáa chiñu na.

¹⁸ Ndóꞌo̱, ná síꞌi, ná íyo ií, xaa ni̱nu̱ ndo mií ndo ya kandixa ndo ya káꞌan i̱í ndo, chi kuꞌva saa xíniñuꞌu ndo ikan ndo xaꞌa ya ndíkun ndo Tata yo Jesucristo.

¹⁹ Saa tu ndóꞌo̱ taa, ndo íyo yá síꞌi, kuꞌvi ni ini ndo kuni ndo yá síꞌi ndo, ta xäa nduvaꞌa ndo xiꞌin yá.

²⁰ Ta saa ndóꞌo̱, na vali, xaa súvi ni ndo ya káꞌan iva siꞌí ndo xiꞌin ndo, chi tá íkan ndo saa kua xáa sií ni ndo ini Tata yo Jesucristo.

²¹ Saa ndóꞌo̱, iva siꞌí, ndäꞌi kini ni ndo xiꞌin seꞌe ndo ya ná ndïkava ini na ikan ndo.

²² Saa ndóꞌo̱ xáa chiñu xiꞌin ya nduxa, kundiꞌi ni ini ndo xaa súvi ndo ndiꞌi chiñu ya xáꞌnda chiñu na xitoꞌo ndo nuu ndo. Kündiꞌi ini ndo án xíto na nuu ndo án köo xíto na nuu ndo, ya ndee ni kua xíniñuꞌu ndo kundiꞌi ini ndo xaa súvi ndo chiñu xiꞌin ya ndaa, xaꞌa ya xáa toꞌo ndo Iva yo Ndioxi.

²³ Tá xáa súvi ndo ndá ka chiñu, ta vaꞌa ikan ndo ya xiꞌin ndinuꞌu nima ndo, chi tá íkan ndo saa, ta nuu mií Tata yo Jesucristo kua xáa súvi ndo chiñu, ta süvi nuu na ivi yóꞌó kua íkan ndo saa.

²⁴ Ta ndikaꞌán ini ndo, chi vaxi kivi ta niꞌi ni ndo ya vaꞌa, ya ki̱ndoo Tata yo Jesucristo taxi ra ndaꞌa ndo. Saa chi nuu mií ra xáa chiñu ndo.

²⁵ Ta saa ndikaꞌán ini ndo ndiꞌi naꞌa, na íkan ya väꞌa ta kuꞌva saa ndikiꞌin na yaꞌvi na, saa chi Ndioxi ta iin káchi xaa nduvaꞌa ra xiꞌin ndiꞌi naꞌa.