Colosenses 2 - Xochapa Mixteco

¹ Ta kúni i ná kundaa ini ndo ñani yo xiꞌin kuꞌva yo na ñuu Colosas, xiꞌin ndóꞌo̱ ñuu Laodicea, xiꞌin ndiꞌi ka ndóꞌo̱ täꞌan kuni xiꞌin nuu yeꞌe, kúni i ná kundaa ini ndo ya chíkaa ni i ndee xiꞌin ndo.

² Saa ná taxi ni Ndioxi ndee ndaꞌa ndo ya xaꞌa ni ndo ndee xiꞌin taꞌan ndo xaꞌa ya kúꞌvi ni ini ndo xínitaꞌan ndo. Xaꞌa ya ñaa kua ndítuꞌun ni i xiꞌin ndo, ndíkani i nuu ndo chi kúꞌvi ni ini i xíni i ndóꞌo̱. Ta vaꞌa ná taxi ra ndukuika ni ndo xiꞌin ya ndíchi ni chi̱tuni Ndioxi ndi̱xiyo sěꞌe yachi, chi ya ndi̱xiyo sěꞌe ikán ku mií Tata yo Jesucristo.

³ Saa chi ndiꞌi ya kuika xiꞌin ya ndíchi ni kúu mií Ndioxi tin ya ndee ni xínituni ta ndaꞌa mií Cristo íyo ndiꞌi ya.

⁴ Ndítuꞌun ndiꞌi i ya yóꞌó xiꞌin ndo ya ná täxi ndo sindaꞌvi ndá ka naꞌa ndóꞌo̱ xiꞌin tuꞌun vata ya sixinu na ini ndo.

⁵ Vani köo íyo mií i xiꞌin ndo vitin, sundi ya vaꞌa i ta íyo ya xiꞌin ndo. Ta vaꞌa ni kúni i xaꞌa ya xi̱ni soꞌo i xaꞌa ndo ya ndóo vívií ndo tá kuꞌva kúni mií Ndioxi, ta ndee ni ndinuꞌu ini ndo ndáa ini ndo xíni ndo Tata yo Jesucristo.

⁶ Xa ka̱ndixa ndo ra yakan kua xa ta̱xi ndo xáꞌnda chiñu ra nuu ndo, ta vaꞌa koo ndo tá kuꞌva kúni mií ra.

⁷ Tá kuꞌva kúnu ni ñúꞌu tioꞌo itun án tá kuꞌva kúnu ni kuáꞌa xaꞌa veꞌe, kuꞌva saa ndee ni tuun kandixa ndo ra, xaꞌa ni ndo ndee xiꞌin taꞌan ndo, koo ndo tá kuꞌva xa ku̱ndaa ini ndo xaꞌa ya ndaa si̱naꞌa nde ndóꞌo̱, ta saa taxi ni ndo tixaꞌvi ndaꞌa ra.

⁸ Koto ndo, kuenta ni koo ndo xiꞌin naꞌa, na kúni sindaꞌvi ndóꞌo̱, täxi ndo sindaꞌvi na ndóꞌo̱ xiꞌin ya ndíchi kána koo xi̱ní mií na. Chi ya nda̱ku xiní mií va xii sikua na kua xáa súvi na ta saa xáa súvi tu na ya kúni mií tachi nduvaꞌa va, ta köo xáa súvi na ya kúni mií Cristo.

⁹ Ta iin tá kuꞌva íyo ini mií Iva yo Ndioxi iin kuꞌva ndaa saa íyo tu ikin kuñu mií Tata yo Jesucristo va.

¹⁰ Ta saa ndóꞌo̱, köo ka ñaꞌa kúmani nuu ndo, chi tá kuꞌva íyo ñaꞌa ya ndee ni chútu ndaa, kuꞌva saa íyo mií Tata yo Jesucristo xiꞌin ndo, ta mií ra ku xi̱ní xiꞌin ndiꞌi ni kúu ñaꞌa, ya xáꞌnda chiñu ñuu ivi yóꞌó án ndá ka mií ndee ya íyo.

¹¹ Ta xaꞌa ya xa ndu̱u ndo iin xiꞌin Tata yo Jesucristo kua kúu mií ndo tuni Ndioxi, ta süvi xiꞌin ndaꞌa na ivi yóꞌó kua ndíkunuu tuni Ndioxi ndóꞌo̱, chi mií Ndioxi ku ra chi̱nuu ya ndóꞌo̱. Xaꞌa ya si̱kaku Tata yo Jesucristo ndóꞌo̱ kua ndi̱saña ndo nuu ndee ya väꞌa ku̱u mií ndo ikin kuñu ndo.

¹² Chi tá kivi chi̱chi ndo xaꞌa ya kándixa ndo Jesucristo, ta kúni kachi ya, tá íin ndo ndi̱nduxin xiꞌin ra saa íin ndo, ta ndi̱taku ndo xiꞌin ra xaꞌa ya ndáa ni ini ndo xíni ndo Ndioxi ya si̱taku ra Tata yo Jesucristo tá ndi̱xiꞌi ra.

¹³ Chi yachi tá íin ndóꞌo̱ ndíi saa ndi̱xiyo ndo xaꞌa kuachi ndo, ta ni tuni Ndioxi köo ndi̱xiyo ndóꞌo̱. Sundi vitin ta xa ta̱xi Ndioxi iin káchi táku ndo xiꞌin Tata yo Jesucristo, saa xa̱a kaꞌnu ini ra xaꞌa kuachi ndo.

¹⁴ Ta si̱ndiꞌi xaꞌa ra tutu nuu íyo ya káꞌan xaꞌa yo ya xíniñuꞌu yo kuvi yo xaꞌa kuachi yo chi köo ndi̱xaa súvi yo ley ra. Ñaa chi̱nuu ra tutu ikán nuu cruzin ta ka̱ni ra clavo sata ya nuu si̱ndiꞌi xaꞌa ndiꞌi ra ya.

¹⁵ Ta xaꞌa ya ndi̱xiꞌi Tata yo Jesucristo nuu cruzin kua ku̱chiñu ra si̱ndiꞌi xaꞌa ra ndiꞌi nuu ndee ya xáꞌnda chiñu ñuu ivi yóꞌó. Ta nuu ndiꞌi ni kúu naꞌa ki̱ndaa ra ndee ikán ndaꞌa ndiꞌi tachi nduvaꞌa. Tá ndóꞌo naꞌa tá kuaꞌan na veꞌe kàà, núꞌni na kuaꞌan na xiꞌin ya nduxa. Ta saa i̱kan ra xiꞌin ndiꞌi ndee ikán, si̱ndiꞌi xaꞌa ndiꞌi ra ya.

¹⁶ Xaꞌa ya ñaa kua káꞌan i xiꞌin ndo, küni soꞌo ndo ya káꞌan naꞌa xiꞌin ndo ndá ñaꞌa kua xíniñuꞌu ndo kuxi ndo án ndá nduta ku rá xíniñuꞌu ndo koꞌo ndo. Ta saa tu xaꞌa ya xáa kaꞌnu ndo ndá ka viko tin tá kúu ya ndíkunuu yoo xa̱á, án ya xíniñuꞌu ndo xaa súvi ndo ndiꞌi ya káꞌan xaꞌa kivi i̱í ya ndíkundee na judío.

¹⁷ Chi ndiꞌi ñaꞌa ya káꞌan saa, ta tá káa ndati ya si̱naꞌa nuu na Israel xinaꞌa saa ndi̱xiyo ya, ndi̱kaꞌan ya xaꞌa ya kuu kivi vaxi tá ná kixi Tata yo Jesucristo ra ndaa ni.

¹⁸ Ta täxi ndo sindaꞌvi naꞌa ndóꞌo̱, na káꞌan ya ndee ni vaꞌa xáa toꞌo na Ndioxi, káchi na. Saa chínuu vaꞌa ni na tuꞌun na, ta ndása ni̱nu̱ na mií na nuu naꞌa, ta xáa kaꞌnu ni na tatun Ndioxi. Saa káꞌan na ya sítuvi Ndioxi nuu na ta kúni na ná ikan ndo tá kuꞌva íkan mií na, ta ya ndáku ini mií va na kua káꞌan na saa. Sundi ndóꞌo̱, ta küni soꞌo ndo ya káꞌan na xiꞌin ndo, täxi ndo sindaꞌvi na ndóꞌo̱, chi ni süvi ya ndaa loꞌo kua káꞌan na xiꞌin ndo. Ndisaa kuiti ya kána koo xi̱ní mií na kua káꞌan na xiꞌin ndo.

¹⁹ Chi na ñaa, ta köo táxi na kaꞌnda chiñu Cristo nuu na, ra kúu xi̱ní xáꞌnda chiñu nuu ndiꞌi na veꞌe ñuꞌu, chi mií ra kú ra táxi táku ndiꞌi na, ta ikin kuñu ra ku ndiꞌi yo kándixa ñaꞌa. Tá kuꞌva íyo tuchi ya chítaꞌan ikin kuñu yo, kuꞌva saa íyo Jesucristo xiꞌin yo chíndee ra yoo ya ná kuchiñu yo ndikitaꞌan vaꞌa yo xiꞌin taꞌan yo, ta saa kuchiñu yo kuaꞌnu yo tá kuꞌva kúni mií Ndioxi.

²⁰ Ta ndóꞌo̱, tá íin ndo ndi̱xiꞌi xiꞌin Tata yo Jesucristo saa íyo ndo, xaꞌa ya ñaa kua ndi̱saña ndo ndaꞌa tachi nduvaꞌa, ta köo xáꞌnda chiñu ka ya nuu ndo vitin. ¿Ta ndachu táxi tuku ndo ichí ya kaꞌnda chiñu ya nuu ndo?

²¹ Sava ya xáꞌnda chiñu na nuu ndo, ta ichí ya ndíkani xi̱ní mií na ivi yóꞌó va ku ya, tá kúu ya káꞌan na, tïin ndo ndá ka mií ñaꞌa ya küvi tiin ndo, ta ni köto ndoso ndo ya, ni küvi kuxi ndo ndá ka ñaꞌa, káchi na xiꞌin ndo.

²² Ta ndiꞌi ñaꞌa ya káꞌan na xaꞌa xiꞌin ndo tá xíxi ndo ya án tá xíꞌi ndo ndá ka nduta ta rá ndíꞌi xaꞌa va ku rá. Yakan ya ñaa ta ya vaxi xi̱ní mií na ivi yóꞌó va kua sínaꞌa na, süvi ya xáꞌnda chiñu Ndioxi kua.

²³ Ta ya ndáku xi̱ní na ivi yóꞌó ta nda tá káa tuꞌun ya ndíchi ni saa káa ya, ta ndíkani ini na ya ndee ni xíniñuꞌu na kundikun na ichí ya uꞌvi ni, saa xíniñuꞌu na xaa nduvaꞌa ni na xiꞌin ikin kuñu na, káchi na. Sundi chiñu ikán ta köo mií ndee kua chi köo chíndee ya na kaꞌnu na mií na nuu ñaꞌa, ya väꞌa ya kútoo ni ikin kuñu na ikan ya.