Colosenses 1 - Xochapa Mixteco

Káꞌan ndioxi ra Pablo xiꞌin na kándixa Jesucristo ndóo ñuu Colosas

¹ Yeꞌe Pablo, ra ndi̱kaxin Iva yo Ndioxi xaa chiñu i nuu Tata yo Jesucristo xiꞌin ra Timoteo, ñani yo, ku nde táa tutu yóꞌó,

² xaa ya nuu ndóꞌo̱, na i̱í, na kúu ñuu Ndioxi, na ndinuꞌu ni ndíkun Tata yo Jesucristo, na ndóo ñuu Colosas. Saa ná ikan ni ra ya vaꞌa xiꞌin ndo ná taxi ni ra koo vaꞌa ni ini ndo.

Ndítuꞌun ra Pablo xiꞌin na ñuu Colosas ya káꞌan ni ra xaꞌa na xiꞌin Ndioxi

³ Ndiꞌi saa ichí tá káꞌan nde xaꞌa ndo xiꞌin Iva yo Ndioxi, ra kúu Iva Tata yo Jesucristo, ta táxi ni nde tixaꞌvi ndaꞌa ra xaꞌa ndo.

⁴ Saa chi ndeꞌe, ta ku̱ndaa ini nde xaꞌa ndo, ya ndee ni ndáa ini ndo xíni ndo Tata yo Jesucristo, ta saa kúꞌvi ni ini ndo xíni ndo na ñuu Ndioxi, na i̱í.

⁵ Íkan ndo saa ndáa ni ini ndo Ndioxi, saa kúꞌvi ni ini ndo xíni ndo ra chi ku̱ndaa teꞌe ini ndo ya niꞌi ndo ñaꞌa nuu ra, ya chi̱vaꞌa ra xaꞌa ndo nuu ndivi. Chi xa ku̱ndaa teꞌe ni ini ndo tá xi̱ni soꞌo ndo tuꞌun vaꞌa ya ndaa ni xaꞌa Tata yo Jesucristo.

⁶ Ta tuꞌun yóꞌó kua xa ndi̱xaa nuu ndo, ta xa kuaꞌa ni naꞌa kúndaa ini xaꞌa ya ndiꞌi ni kúu ñaꞌñu. Ta vaꞌa ni íkan ya xiꞌin na chi ndísama ya na, saa ndúkuaꞌa ka na kúndaa ini xaꞌa ya. Ta saa tu ndóꞌo̱ va, nda tá xi̱ni soꞌo ndo ya, saa ku̱ndaa ini ndo xaꞌa ya ndaa, ya ndee ni kúꞌvi ini Ndioxi xíni ra ndóꞌo̱.

⁷ Ta ya yóꞌó kua xi̱ni soꞌo ndo si̱naꞌa ra ñani yo, ra Epafras, ra xáa chiñu xiꞌin nde nuu Tata yo Jesucristo. Ta ndinuꞌu ni ini ra xáa chiñu ra nuu Tata yo ya chindee ra ndóꞌo̱.

⁸ Ta xa ndi̱tuꞌun ra xiꞌin nde ya ndee ni kúꞌvi ini ndo xíni taꞌan ndo, xaꞌa ya íyo Tachi I̱í Ndioxi xiꞌin ndo.

⁹ Nda tá ku̱ndaa ini nde xaꞌa ndo, ta nda saa kua xa̱á nde káꞌan ni nde xaꞌa ndo xiꞌin Ndioxi. Ndúku nde ya mani nuu ra ya ná taxi ra kundaa vaꞌa ini ndo xaꞌa ya xa chi̱tuni mií ra, ya ná taxi ra ya ndíchi ni ndaꞌa ndo kundaa ini ndo xiꞌin ya xínituni vaxi nuu mií ra.

¹⁰ Ta saa kua vaꞌa kuchiñu ndo ikan ndo tá kuꞌva kúni mií Tata yo Jesucristo, chi saa kua xaa kaꞌnu ni ndo ra xiꞌin ndiꞌi ni kúu ñaꞌa vaꞌa íkan ndo nuu ra, koo ndo tá kuꞌva íyo naꞌa, na ndíkun Tata yo Jesucristo. Ta saa kua vaꞌa kuaꞌnu ka ndo xiꞌin ya ndíchi xaꞌa mií ra.

¹¹ Ta ná taxi ni ra ndee chee ni ya kúu mií ra ndaꞌa ndo ya ná kuchiñu ndo xaꞌa ndee ni ini ndo xiꞌin ndiꞌi ya uꞌvi ni vaxi nuu ndo.

¹² Saa taxi ndo tixaꞌvi ndaꞌa Iva yo Ndioxi xiꞌin ya kúsini ni ndo, chi táxi ra ndiꞌi ñaꞌa ya xíniñuꞌu yo ndaꞌa yo ya kuchiñu yo ndikiꞌin yo ñaꞌa ya ndi̱kaꞌan ra nditaꞌvi ra xiꞌin ndiꞌi yo ñuu ra, yo i̱í, yo xíka nuu yéꞌe̱.

¹³ Ndioxi ku ra sa̱ña ndika yoo nuu ndee ya xáꞌnda chiñu nuu naá. Ta si̱yaꞌa ra yoo ndi̱kiꞌvi yo ndikundoo yo xiꞌin ra nuu xáꞌnda chiñu Seꞌe ra, ra kúꞌvi ni ini ra xíni ra.

¹⁴ Ta xaꞌa ya ndi̱xiꞌi ra xaꞌa yo kua cha̱ꞌvi ra xaꞌa kuachi yo, si̱kaku ra yoo, sa̱ña ndika ra yoo, saa xa̱a kaꞌnu ini Ndioxi xaꞌa kuachi yo.

Xaꞌa ya ndi̱xiꞌi Cristo xaꞌa kuachi yo kua ndi̱kuiso mani Ndioxi yoo nuu ra

¹⁵ Nda iin naꞌa küvi kuni xiꞌin nuu Ndioxi, sundi na xíni Cristo ku na xíni Ndioxi, chi iin ku Cristo xiꞌin Ndioxi. Nda tá yachi ka, tá täꞌan xikoo xaꞌa ñuu ivi yóꞌó, ta xa íyo va ra, chi mií ra ku ra chee ni xáꞌnda chiñu nuu ndiꞌi ni kúu ñaꞌa ya íyo.

¹⁶ Xiꞌin ndee mií ra kua ndi̱kuaꞌa ndiꞌi ni kúu ñaꞌa ya íyo nuu ndivi xiꞌin ya íyo ñuu ivi yóꞌó. Ndiꞌi ñaꞌa ya xíto yo íyo xiꞌin ya täꞌan ka kuni yo, ta mií ra ku ra si̱kuaꞌa ya. Saa si̱kuaꞌa tu ra ndiꞌi nuu tatun ya íyo nuu ndivi, xiꞌin ndiꞌi ndee naꞌnu ya xáꞌnda chiñu ndiꞌi ñaꞌñu xiꞌin ka inka nuu ndiꞌi ndee ya íyo. Ndiꞌi ya ndi̱kuaꞌa ta mií ra ku ra si̱kuaꞌa ndiꞌi ya, xaꞌa mií ra kua ndi̱kuaꞌa ndiꞌi ya.

¹⁷ Xa yachi ka tá täꞌan ka xikoo ñuu ivi yóꞌó ta xa íyo va mií ra, ta iin saa nda vitin xáa chiñu ndiꞌi ya si̱kuaꞌa ra ñuu ivi yóꞌó, chi mií ra ku ra íkan saa ya vaꞌa xáa chiñu ndiꞌi ni kúu ñaꞌa si̱kuaꞌa ra.

¹⁸ Mií Cristo ku ra ku xi̱ní xáꞌnda chiñu xiꞌin na veꞌe ñuꞌu, tá káa ikin kuñu ra saa íin na. Ta yuꞌu mií ra kua xa̱á íyo ndiꞌi ñaꞌa, ta mií ra ku ra chi̱nduꞌu xaꞌa ndiꞌi ñaꞌa, ta suvi xiꞌna mií ra ku ra núnu̱ú ndi̱taku tañu na ndíi. Xaꞌa ya ikán kua ndee ni ndee kúu mií ra nuu ndiꞌi ni kúu ñaꞌa.

¹⁹ Ta kúsini ni mií Iva yo Ndioxi ta̱xi ra ndiꞌi ni kúu ñaꞌa ya kúu mií ra ndaꞌa Tata yo Jesucristo.

²⁰ Ta tixin ya i̱kan ra nuu cruzin kua si̱kitaꞌan mani ra ndiꞌi ni kúu yo ñuu ivi yóꞌó xiꞌin mií ra tin ndiꞌi ñaꞌa ya si̱kuaꞌa ra xiꞌin ya íyo nuu ndivi tin ya íyo ñuu ivi yóꞌó. Ta tixin nií Jesucristo nduta ndi̱xita nuu cruzin tá ndi̱xiꞌi ra kua ta̱xi ra ichí ndaꞌa yo ndi̱kundoo vaꞌa yo xiꞌin Ndioxi.

²¹ Sundi tá yachi ta ndi̱xiyo xíka ni ndo nuu Ndioxi, ndi̱saa ni ini ndo xi̱ni ndo ra xaꞌa ya köo vaꞌa ndíkani ini ndo, saa i̱kan ni ndo ya väꞌa nuu ra. Sundi vitin ta xa ndi̱kitaꞌan mani ndo xiꞌin ra

²² xaꞌa ya ndi̱xiꞌi Cristo tá xi̱tikaa ndaa ikin kuñu ra ndaꞌa cruzin kua ndi̱kitaꞌan mani ndo xiꞌin Ndioxi. Saa nda̱sa i̱í Cristo ndóꞌo̱ nuu Ndioxi, ndu̱u ndo naꞌa, na vaꞌa, na köo yakua ka, na köo ka kuachi kúu mií nuu ra.

²³ Saa nduu ndo tá tu tuun ni kándixa ndo tuꞌun vaꞌa xaꞌa Tata yo Jesucristo tá tu ná sïndikoo ndo tuꞌun ra ya ndee ni teꞌe xi̱ni soꞌo ndo. Ta xa ndiꞌi ni kúu xaꞌa ñuu ivi xi̱ni soꞌo na xaꞌa tuꞌun ra, taꞌan ya ikán kua káꞌan ndoso yeꞌe Pablo.

Chiñu íkan ra Pablo xaꞌa na veꞌe ñuꞌu

²⁴ Ta yeꞌe, ta kúsini ni va i ya tíxuꞌvi i xaꞌa ndo vitin ñani yo xiꞌin kuꞌva yo na veꞌe ñuꞌu, chi xaꞌa ya tíxuꞌvi i saa kua síxinu ka i ya ti̱xuꞌvi ni Jesucristo xaꞌa ndóꞌo̱ kándixa ra, chi ikin kuñu ra ku ndo.

²⁵ Ta xaꞌa mií ndo kua ta̱xi Ndioxi chiñu ndaꞌa i ya chindee taꞌan i xiꞌin ndo nuu káꞌan ndoso i tuꞌun ra xiꞌin naꞌa ndiꞌi ni kúu ñaꞌñu.

²⁶ Ta tuꞌun ra ya ti̱ꞌvi ra yeꞌe kaꞌan ndoso i xaꞌa ra ku tuꞌun ra ya ndi̱xiyo sěꞌe xinaꞌa tá sikan xi̱koo xaꞌa ñuu ivi yóꞌó. Sundi vitin ta xa si̱naꞌa va ra ya nuu na i̱í, na ndíkun ñaꞌa.

²⁷ Ta saa kua i̱kan Iva yo Ndioxi, saa chi ku̱ni ra ya ná kundaa ini na kúu kuenta mií ra xaꞌa ñaꞌa ya ndi̱xiyo sěꞌe xinaꞌa. Ta tuꞌun ra ya ndaa, ya chee ni, ya luvi ni, ta ya kuni soꞌo ndiꞌi ni kúu naꞌa kua. Ta ya káꞌan tuꞌun Iva yo xaꞌa ya ndixiyo sěꞌe yóꞌó kua: íyo Tata yo Jesucristo nima ndóꞌo̱ köo kúu judío vitin, ta kúndaa teꞌe ini ndo ya koo ndo xiꞌin ra nuu ndivi.

²⁸ Ta ndeꞌe káꞌan ndoso nde xaꞌa ra xiꞌin ndiꞌi naꞌa, ndíkani nde nuu na, saa sínaꞌa nde na xaꞌa ndiꞌi tuꞌun ra ya ndíchi táxi Ndioxi ndaꞌa nde. Chi kúni i sinaꞌa i na yóꞌó nuu Ndioxi ya nduu na naꞌa, na ndǎku ni ini nuu ra, ta xa ku̱ndaa vaꞌa ini na xiꞌin tuꞌun ra.

²⁹ Xaꞌa ya yóꞌó kua chíkaa ni i ndee xiꞌin chiñu ya íkan i nuu Tata yo Jesucristo, chi mií ra ku ra táxi ni ndee ndaꞌa i xáa chiñu ni i nuu ra xiꞌin ndee ra ya ndee ni íyo xiꞌin i.