3 Juan 1 - Xochapa Mixteco

Tuꞌun mani ya tíꞌvi ra Juan kuaꞌan nuu ra Gayo

¹ Yeꞌe ku ra xikuaꞌa ndíso chiñu nuu na ndíkun Jesucristo, ta táa i tutu yóꞌó xaa ya ndaꞌa un ñani mani yo, ra Gayo, saa chi yeꞌe ta ndixa ni kúꞌvi ini i xíni i yóꞌo̱.

² Ñani mani, káꞌan ni i xaꞌa un xiꞌin Ndioxi ya ná kana vaꞌa ndiꞌi ya íkan un, ta ná käni kueꞌe yóꞌo̱, saa ná koo vaꞌa ni ini un tá kuꞌva xíka vaꞌa ni un xiꞌin Ndioxi.

³ Ku̱sini ni i tá ki̱xi sava na taꞌan yo, chi ndi̱tuꞌun na xiꞌin i xaꞌa un ya ndinuꞌu ni ini un xíka un ichí ya ndaa.

⁴ Köo ka ya xáa sii ni ini i, ya kúsini ni i ku ya yóꞌó, saa chi yóꞌo̱ ta tá káa seꞌe i saa káa un, ta vaꞌa ni xíka un ichí ya ndaa.

Vaꞌa ni xáa súvi ra Gayo xiꞌin na veꞌe ñuꞌu

⁵ Ñani yo, vaꞌa ni íkan un xiꞌin na taꞌan yo na xáa veꞌe un, saa chi vani inka ñuu vaxi na, ni köo xíni un na ta ndíkuiso vií un na veꞌe un.

⁶ Ta vaꞌa ni káꞌan na xaꞌa un, tá ndi̱yaꞌa na veꞌe ñuꞌu yóꞌó, káꞌan na ndá kuꞌva kúꞌvi ini un xíni ñaꞌa un. Ta vitin kúni kuꞌun tuku na, ta xaa un ya mani xiꞌin na, chindee taꞌan un xiꞌin na ná kuꞌun na xaa súvi na chiñu nuu Ndioxi, ta saa kusini ni Ndioxi xiꞌin un.

⁷ Chi na ñaa ta ka̱na koo na xíka na chiñu nuu Tata yo Jesucristo, ta nda iin ñaꞌa köo ndúku na nuu na köo xíni Ndioxi.

⁸ Yakan yoo ta xíniñuꞌu yo ndikuiso yo na koo na veꞌe yo, chindee yo na, tá íkan yo saa ta chíndee taꞌan yo xiꞌin na xíka na ndíkani ka na tuꞌun Ndioxi ya ndaa.

Köo vaꞌa íkan ra Diótrefes

⁹ Xa ta̱a i iin tutu kuaꞌan ndaꞌa na veꞌe ñuꞌu nuu íyo un, ta ra Diótrefes ku ra kútoo ni xaa kaꞌnu xiꞌin mií, chi köo xíin ra xaa súvi ra ya káꞌan nde xiꞌin ra.

¹⁰ Xaꞌa ya ñaa kua kúni i kaꞌan i xiꞌin ra tá ná xaa i ñaa, saa chi väꞌa íkan ra xíka ra xiꞌin cuento vata xaꞌa nde. Ta süvi ndisaa ya yóꞌó kua íkan ra, chi nda na taꞌan yo na xáa veꞌe ra ta köo xíin ra ndikuiso vií ra na, tá ndá na kúni ndikuiso ñaꞌa, ta köo táxi ra ndikuiso ñaꞌa na, ta saa táxin ra na kána koo na veꞌe ñuꞌu.

¹¹ Ñani yo, kündikun un ichí na íkan ya väꞌa, ichí na íkan ya vaꞌa kundikun un. Saa chi na íkan ya vaꞌa ta na ñaa ku seꞌe Ndioxi, ta na íkan ya väꞌa ta täꞌan kuni na Ndioxi.

Ínuu vaꞌa ni tuꞌun xaꞌa ra Demetrio

¹² Ta ra Demetrio ta vaꞌa ni va ínuu tuꞌun ra nuu naꞌa, ínuu vaꞌa ni tuꞌun ra saa chi tá kuꞌva káꞌan tuꞌun Ndioxi, saa íyo ra. Ta saa tu ndeꞌe va, xíni nde ya ndixa kua káꞌan na xaꞌa ra, ta ni mií un xíni un ya ndaa kua káꞌan nde xaꞌa ra.

Káꞌan ra Juan kama ni kuꞌun ra koto ra na veꞌe ñuꞌu

¹³ Iyo kuaꞌa ni ka ya kúni i kaꞌan i xiꞌin un, ta köo kúni i taa i ya nuu tutu yóꞌó xiꞌin lapi,

¹⁴ saa chi ndátun i kama ni xaa i ñaa kuni i yóꞌo̱, ta saa kaꞌan yuꞌu yo xiꞌin taꞌan yo.

¹⁵ Ta saa ná chindee Ndioxi yóꞌo̱ koo vaꞌa ni ini un. Ta ndiꞌi na taꞌan yo na ndíkun Jesucristo ndóo yóꞌó tíꞌvi ni na tuꞌun mani xaa nuu un. Ta saa ikan un ya mani kaꞌan ndioxi un xiꞌin iin iin na taꞌan yo na ndíkun Jesucristo.