2 Timoteo 4 - Xochapa Mixteco

Káꞌan ra Pablo xiꞌin ra Timoteo ya ná xïkuiin ra kaꞌan ra tuꞌun Ndioxi

¹ Ta ya káꞌan i xiꞌin un ta nuu Iva yo Ndioxi xiꞌin Tata yo Jesucristo, ra kúu rey xáꞌnda chiñu nuu yo kua káꞌan i xiꞌin un, chi mií ra ku ra xaa nani kuachi xiꞌin na táku tin na ndíi. Xaꞌa ya ñaa kua káꞌan i xiꞌin un,

² ya ná chikaa ni un ndee ya kaꞌan ndoso un tuꞌun ra xiꞌin naꞌa ndiꞌi saa kivi. Koo ndúvi un kaꞌan un xiꞌin na tá kivi vaꞌa ni kúni un án tá väꞌa kúni un. Ta teꞌe kaꞌan un xiꞌin na, sinaꞌa un na ya ná kundaa ini na xaꞌa ya väꞌa kéꞌe na, ta kaꞌan xiꞌin na ná sindoo na ya, saa xaꞌa ni un ndee xiꞌin na ya ná kundikun vaꞌa na ichí Tata yo Jesucristo. Ta toꞌo kaꞌan un xiꞌin na sinaꞌa un na, kaꞌnu koo ini un xiꞌin na.

³ Saa chi vaxi kivi, ta küaꞌa ka naꞌa kuni soꞌo na tuꞌun Ndioxi ya ndaa, ya kúu ichí ndaku nuu kutaku na. Ta saa xáa na kuni soꞌo na tuꞌun ya kúni mií na. Ta saa ndikundikun na kuaꞌa ni nda sínaꞌa ndisaa ya kútoo mií na kuni soꞌo na.

⁴ Ta kuxika na ichí Ndioxi ya vaꞌa, ya ndaa, küaꞌa ka na kuni soꞌo na ya, saa xaá na kuni soꞌo na kuento vata.

⁵ Sundi yóꞌo̱, ta kaxin teꞌe ni koo ini un, saa xaꞌa ndee ndiꞌi ini un xiꞌin ya tíxuꞌvi ni un xaꞌa Tata yo Jesucristo, ta ku ïꞌvi un kaꞌan ndoso un tuꞌun vaꞌa xaꞌa ra, saa vívií xaa súvi un chiñu ya ta̱xi Iva yo Ndioxi ndaꞌa un.

⁶ Chi yeꞌe, ta xa kuaꞌan kúyati ni va tindaa kivi ya kuvi i, ta tá íyo ya sóko naꞌa nuu Ndioxi, saa koo i kuvi i, chi xa ndi̱soko i mií i nuu ra, ya koo i tá kuꞌva íkan na xiꞌin kiti sana na, kiti sóko na nuu Iva yo Ndioxi.

⁷ Tá káa iin ra lapa, ra ndee ni vaꞌa xíka nuu kuachi, saa íyo i. Ta íyo tu i tá káa iin taa, ra ndee ni vaꞌa xínu va, chi ndee ni chi̱kaa ini i xa̱a súvi ni i chiñu nuu Tata yo Jesucristo, ta vitin xa si̱xinu ndiꞌi i chiñu i̱kan i nuu ra. Ta köo ndi̱sindoo i ichí ra, ndee ni ndáa ini i xíni i ra.

⁸ Ta xíni i vaꞌa ni ini Ndioxi ta nina ya ndaa íkan ra xiꞌin naꞌa, chi mií ra ku ra xáa nani kuachi xiꞌin na. Ta saa ikan ra xiꞌin i taxi ra ya vaꞌa ndaꞌa i, tá kuꞌva íkan na xiꞌin naꞌa, na kéꞌe taꞌan níꞌi na ñaꞌa xaꞌa ya vaꞌa íkan na. Kuꞌva saa ikan Ndioxi xiꞌin i, taxi ra ya vaꞌa ndaꞌa i chi xa xa̱a súvi ndiꞌi i chiñu ya ta̱xi ra ndaꞌa i. Ta süvi ndisaa yeꞌe niꞌi ya vaꞌa ikan ra, ndiꞌi na ndíkun ichí ra ta ndátun na ndiko koo ra, na ikán ku na niꞌi ya vaꞌa.

Chiñu ya xáꞌnda chiñu ra Pablo nuu ra Timoteo

⁹ Xaꞌa ni un ndee, kama ni kixi loꞌo un koto un yeꞌe.

¹⁰ Saa chi ra Demas, ta si̱ndoo ndaꞌa va ra yeꞌe, saa ke̱ta ra kuaꞌan ra chí ñuu Tesalónica, xaꞌa ya kútoo ni ra xíni ra ñaꞌa ñuu ivi yóꞌó kua i̱kan ra saa xiꞌin i. Inka ra Crescente, ke̱e kuaꞌan chí Galacia. Inka ra Tito, ke̱e kuaꞌan chí Dalmacia.

¹¹ Siíndaa ra Lucas ku ra ndi̱ndoo íyo xiꞌin i. Tá ná kixi un ta vaꞌa nduku un ra Marcos, ná kixi ra xiꞌin un, ya chindee taꞌan ra xiꞌin i xaꞌa chiñu ya íkan i nuu Iva yo Ndioxi.

¹² Ta ra Tíquico, ti̱ꞌvi i ra kuaꞌan ra ñuu Éfeso.

¹³ Tá tu xa vaxi un, ta vaꞌa kundiso loꞌo un toto i ya ndíxi i tá vixin, ya si̱ndoo i veꞌe ra Carpo ñuu Troas. Ta saa ná kixi tutu i nuu vaxi tuꞌun Ndioxi xiꞌin un, ta ya ndee ni ka kuñuꞌu ini un xaꞌa kuniꞌi un kixi xiꞌin un ku ñií kiti nuu íyo tuꞌun Ndioxi.

¹⁴ Ta ra Alejandro, ra xáa chiñu xiꞌin kàà, ta yáꞌa ni kini i̱kan ra xiꞌin i. Ta mií Iva yo ná chaꞌvi ra xaꞌa ya i̱kan ra saa xiꞌin i.

¹⁵ Ta kuenta ni koo un xiꞌin ra, chi nda loꞌo köo xíin ra kuni ra tuꞌun vaꞌa ya káꞌan ndoso yo xaꞌa Tata yo Jesucristo.

¹⁶ Tá kivi núnu̱ú ndi̱xaꞌan i nuu na chiñu, ta nda iin naꞌa köo ndi̱chindee taꞌan xiꞌin i, iin si̱ndoo ndaꞌa ndiꞌi nda yeꞌe. Ta siin ka mií Iva yo Ndioxi ná xaa kaꞌnu ini xaꞌa nda.

¹⁷ Ni saa va i̱kan nda xiꞌin i, sundi mií Iva yo Ndioxi ku ra ndi̱xiyo xiꞌin i, ta̱xi ra ndee ndaꞌa i vaꞌa ndi̱kaꞌan ndoso i tuꞌun vaꞌa xaꞌa ra xiꞌin ndiꞌi naꞌa, na köo kúu judío, ta xi̱ni soꞌo na ya ndi̱kaꞌan i xaꞌa ra xiꞌin na. Ta mií ra ku ra si̱kaku yeꞌe ya ndi̱kaku i nuu naꞌa, na íin tá íin kiti ndikaꞌa, kiti kueꞌe ni.

¹⁸ Ta mií Iva yo ku ra sikaku yeꞌe nuu ndiꞌi ñaꞌa väꞌa, saa kuniꞌi ra yeꞌe kuꞌun i xiꞌin ra nuu ndivi nuu xáꞌnda chiñu ra. ¡Saa ná kunuu sukun ni ya toꞌo ra, ndiꞌi saa kivi ya vaxi! Saa ná koo.

Tuꞌun ya sindiꞌi káꞌan ra Pablo xiꞌin ra Timoteo

¹⁹ Ta kaꞌan ndioxi ni un xiꞌin yá Prisca tin ra Aquila, ñani yo xiꞌin na veꞌe ra Onesíforo.

²⁰ Ta ra Erasto, ñani yo, ndi̱ndoo ra ñuu Corinto. Inka ra Trófimo, ta si̱ndoo i ra ñuu Mileto, chi ki̱ꞌin kueꞌe ra, kúꞌvi ra.

²¹ Ta xaꞌa ni un ndee kama ni kixi loꞌo un, yachi ka tá täꞌan ka tindaa yoo ya vixin ni. Saa káꞌan ndioxi ni nda ñani yo yóꞌó xiꞌin ndo, ra Eubulo, xiꞌin ra Pudente tin ra Lino, saa tu yá Claudia, tin ndiꞌi ka na ñani yo, na kándixa Tata yo Jesucristo ndóo yóꞌó.

²² Ta mií Tata yo Jesucristo ná koo xiꞌin un. Saa ná chikaa ni Iva yo Ndioxi ya vaꞌa ndiꞌi ndo.