2 Timoteo 3 - Xochapa Mixteco

Tá xa ku̱yati ndiꞌi xaꞌa ñuu ivi yóꞌó ta ikan ni naꞌa ya väꞌa

¹ Ñani yo, xíniñuꞌu un kundaa ini un xaꞌa ya yóꞌó, chi vaxi kivi tá xa kúyati ndiꞌi xaꞌa ñuu ivi yóꞌó, ta ndee ni kuaꞌa tindoꞌo ya uꞌvi ni kixi nuu na ñuu ivi yóꞌó.

² Chi kivi ikán ta sava naꞌa kundiꞌi ni ini na ndisaa xaꞌa mií na, saa kuni tu na ya koo kuaꞌa ni xuꞌun na, saa kutoo ni na ndikunuu vaꞌa ni tuꞌun xaꞌa na, ta ndee ni kutai ini na xiꞌin ñaꞌa na. Saa kaꞌan kini na xaꞌa Ndioxi tin xaꞌa naꞌa, ta küaꞌa na kañuꞌu na iva siꞌí na, ta ni küaꞌa na taxi na tixaꞌvi ndaꞌa naꞌa, ni xäa toꞌo na Ndioxi.

³ Ni küꞌvi ini na kuni na naꞌa, ta ni küaꞌa na xaa kaꞌnu ini na xaꞌa na taꞌan na, yáꞌa ni vata koo na, ta ni küaꞌa na kaꞌnu na mií na nuu ya väꞌa, yáꞌa ni iku koo na, saa kundasi nuu na kuni na ya vaꞌa.

⁴ Saa ndixiko vata na naꞌa, na ítaꞌan vaꞌa xiꞌin na, ni köo ìyo koo ini na, kutai ni ini na xaꞌa ya xíni ni na, saa kutoo ni na xaa sií na ini mií na, ta küaꞌa na kañuꞌu na Ndioxi.

⁵ Ta kaꞌan na ya káñuꞌu ni na Ndioxi, sundi kuꞌva íkan na, ta ndínaꞌa na mií na ya köo ndinuꞌu ini na ndíkun na ra. Ta yóꞌo̱, ta vaꞌa kuxika un nuu na ñaa. Kütaꞌan un xiꞌin na.

⁶ Ta taꞌan nda káꞌan yo xaꞌa yóꞌó ku nda kuakiꞌvi tá veꞌe, tá veꞌe ná ñaꞌa, ná vita ni ini ta síndaꞌvi nda ná xiꞌin tuꞌun káꞌan nda. Ta ná ikán ku ná ndee ni ndíso kuachi xaꞌa ya íkan ná nuu ndiꞌi ya väꞌa ya xáꞌnda chiñu nuu ikin kuñu ná.

⁷ Ta ndiꞌi saa kivi xíni soꞌo ni ná tuꞌun ya sínaꞌa na, ta nda loꞌo köo kúchiñu ná kundaa ini ná xaꞌa ya ndaa xíni soꞌo ná.

⁸ Ta nda vata ñaa, ta tá kuꞌva ndi̱xiyo ra Janes xiꞌin ra Jambres xinaꞌa, saa íkan nda, chi saa i̱kan nda ikán, ke̱ꞌe taꞌan nda xiꞌin ra Moisés. Ta kuꞌva saa íkan nda vata ñaa, süvi ya ndaa kua káꞌan nda nda ndu̱chiꞌña ya xínituni ku nda yakan ni köo ndáa ka ini nda xíni nda Tata yo Jesucristo.

⁹ Ta nda vata ñaa ta nda iin kivi küchiñu nda ikan nda ya ndíkani ini nda ikan nda. Saa kundaa ini ndiꞌi naꞌa ya ndee ni kíꞌvi ini nda, ta ndoꞌo nda tá ndo̱ꞌo ra Janes xiꞌin ra Jambres.

Káꞌan ka ra Pablo xiꞌin ra Timoteo xaꞌa chiñu ya xíniñuꞌu ra xaa súvi ra

¹⁰ Ta yóꞌo̱ ñani yo, ta xa xíni vaꞌa un yeꞌe, ndá kuꞌva sínaꞌa i, ta ndá kuꞌva íyo i, ta xíni un unkua ndíkani ini i xaa súvi i, saa xíni un ya ndáa ni i ini i xíni Ndioxi, ta kúꞌvi ni ini i xíni i naꞌa, saa xíni un ya kaꞌnu ni ini i.

¹¹ Ta xa kúndaa ini mií un ya ndee ni tindoꞌo ki̱xi nuu i xaꞌa Cristo, tá ndi̱xiyo i ñuu Antioquía, xiꞌin ñuu Iconio tin ñuu Listra. Ta mií Tata yo Jesucristo ku ra si̱kaku yeꞌe nuu ndiꞌi tindoꞌo ya ndo̱ꞌo i.

¹² Ta xa xíni yo, na kúni kundikun ichí Tata yo Jesucristo, ta ndee ni va kundoꞌo na ikan naꞌa, na köo xíni tuꞌun ra.

¹³ Ta naꞌa, na íkan ya väꞌa xiꞌin nda síndaꞌvi naꞌa, ta iin iin kivi ndúkuaꞌa ka ya väꞌa íkan na, saa síndaꞌvi ka na naꞌa, ta saa síndaꞌvi tu naꞌa mií va nda.

¹⁴ Sundi yóꞌo̱, ta xíniñuꞌu un xaa súvi un tuꞌun ya ndaa ya xa si̱kuaꞌa un, chi xa xíni un ya ndaa ni kua, ta saa xíni vaꞌa un na si̱naꞌa ya yóꞌó.

¹⁵ Ta nda tá loꞌo ví un xa xíni un tuꞌun Ndioxi ya ta̱a na xinaꞌa, ta ya ikán kua kuchiñu xaa ndíchi ni yóꞌo̱. Ta ya ndíchi vaxi nuu Ndioxi kua kuniꞌi yóꞌo̱ kuꞌun un ichí nuu kaku un xaꞌa ya ndáa ni ini un xíni un Tata yo Jesucristo.

¹⁶ Chi ndiꞌi tuꞌun Ndioxi ya íyo nuu tutu ra, ya i̱í, ta mií Tachi ra ku ya si̱ndikaꞌán ini naꞌa ya ta̱a na ya. Ta vaꞌa ni ya chi sínaꞌa ya yoo, saa káꞌan tu ya xiꞌin yo táxi ya kuachi xaꞌa yo tá väꞌa íkan yo, ta ndása ndǎku ya ini yo, ta sínaꞌa tu ya yoo ya ikan yo chiñu vaꞌa tá kuꞌva kúni mií Ndioxi.

¹⁷ Ta saa kua kuchiñu nduu yo naꞌa, na xa íyo ndúvi, na xa si̱kuaꞌa xaa súvi chiñu vaꞌa nuu Ndioxi.