2 Timoteo 2 - Xochapa Mixteco

Káꞌan ra Pablo xiꞌin ra Timoteo ya ná koo ra tá káa iin lapa ra vaꞌa ni xáa chiñu nuu Tata yo Jesucristo

¹ Ñani yo Timoteo, yóꞌo̱, ta nda tá íyo seꞌe mií i saa íyo un, yakan káꞌan i xiꞌin un chikaa ni un ndee chi kúꞌvi ni ini Ndioxi xíni ra yóꞌo̱ xaꞌa ya kúu un kuenta Tata yo Jesucristo.

² Taꞌan ya xi̱ni soꞌo un ndi̱kaꞌan i tá si̱naꞌa i kuaꞌa ni naꞌa, taꞌan ya ikán kua xíniñuꞌu un sinaꞌa un ñani yo nda ndinuꞌu ni ndíkun Tata yo Jesucristo ta saa ná koo ya sinaꞌa nda inka naꞌa.

³ Ta yóꞌo̱, ta nda tá kuꞌva íyo nda lapa nda köo íꞌvi tixuꞌvi xaꞌa chiñu ya íkan nda, iin kuꞌva saa xíniñuꞌu un koo ndúvi un tixuꞌvi un xaꞌa Tata yo Jesucristo.

⁴ Chi nda lapa ta köo ka inka chiñu ndíkani ini nda ikan nda, iindaa ya ndíkani ini nda xaa súvi nda ku chiñu nuu ra ndíso chiñu xiꞌin nda.

⁵ Ta saa tu íyo iin taa ra kuaꞌan ku̱nu, ra kéꞌe taꞌan xiꞌin inka ra, ta xíniñuꞌu ra ikán xaa súvi ra ndiꞌi chiñu ya táꞌnda nuu ndiꞌi naꞌa, na xínu, saa vaꞌa kuchiñu ra xinu koo ra niꞌi ra ñaꞌa ya taxi na ndaꞌa ra.

⁶ Ta saa tu iin taa ra chíꞌi ndá ka ñaꞌa, xiꞌna xíniñuꞌu ra xaa chiñu ra nuu ñuꞌú ra, saa kua vaꞌa kana ñaꞌa ndikuiso ra.

⁷ Ta ndikani vaꞌa ini un xaꞌa ya káꞌan i xiꞌin un, saa chindee mií Tata yo Jesucristo yóꞌo̱ ya kundaa vaꞌa ka ini un xaꞌa ndiꞌi ya káꞌan i xiꞌin un.

⁸ Ta nda iin ichí ndi̱ndoso ini un xaꞌa Tata yo Jesucristo, ra ndi̱xiꞌi, ta ndi̱taku ra tañu na ndíi, ra kúu seꞌe sikua ra rey David. Chi xaꞌa mií Tata yo Jesucristo kua káꞌan tuꞌun vaꞌa ya si̱naꞌa i ndiꞌi naꞌa.

⁹ Ta suvi xaꞌa tuꞌun vaꞌa ikán kua ndee ni ndóꞌo̱ i ndíkaa i veꞌe kàà yóꞌó, nda tá íyo iin ra ndee ni kaꞌnu kuachi kúu mií, saa íyo i, núꞌni i xiꞌin kàà ndíkaa i. Ta vaꞌa chi tuꞌun Ndioxi ta köo núꞌni vi ya.

¹⁰ Ta xaꞌa ya ikán kua xáꞌa ndee ndiꞌi ini i ndóꞌo̱ ni i xaꞌa naꞌa, na ndi̱kaxin Ndioxi ya ná niꞌi na ya vaꞌa kaku na tixin Tata yo Jesucristo, ta saa kuchiñu na koo na xiꞌin ra ndiꞌi saa kivi nuu luvi ni káa nuu ndee ni yéꞌe̱.

¹¹ Ta ya káꞌan i xiꞌin ndo yóꞌó, ta ya ndaa ni kua: tá tu xíꞌi yo xiꞌin ra, ta saa kutaku tu yo xiꞌin va ra.

¹² Tá tu ndee ni tindoꞌo ndóꞌo yo ñuu ivi yóꞌó, ta saa kua niꞌi yo kaꞌnda chiñu yo xiꞌin ra nuu xáꞌnda chiñu ra. Tá tu ndíkuaa yo ra, ta saa ndikuaa tu mií va ra yoo.

¹³ Tá tu köo síxinu yo ya káꞌan yo, ta síxinu va mií ra ya káꞌan ra. Chi mií ra ta köo ndíko koo ini ra xaꞌa ya káꞌan ra.

Káꞌan ra Pablo xiꞌin ra Timoteo ndá kuꞌva xíniñuꞌu ra koo ra

¹⁴ Ndiꞌi saa kivi sindikaꞌán un ini na ñani yo nuu Ndioxi ya ná käni taꞌan na, ná käꞌan kuachi na xaꞌa ndá ka ñaꞌa ya köo ndáa yaꞌvi. Chi ya íkan na saa ta síndiꞌi xaꞌa na naꞌa, na sikan xíni soꞌo tuꞌun xaꞌa Tata yo.

¹⁵ Ta xaꞌa ni un ndee ya koo un iin taa ra vaꞌa ni íyo nuu Ndioxi, ta saa köo ya kukaꞌan nuu un kuni un ra xaꞌa ya vaꞌa ni xáa chiñu un, ta ndaa ni sínaꞌa un tuꞌun ra nuu naꞌa, saa xáa súvi un ya ndaa sínaꞌa un.

¹⁶ Ta vaꞌa kuxika un nuu naꞌa, na káꞌan tuꞌun kíꞌvi ya köo ndáa yaꞌvi. Chi naꞌa, na káꞌan saa, ta iin iin kivi ndúndee ka ya väꞌa káꞌan na, saa kúxika vaꞌa ka na nuu Iva yo Ndioxi.

¹⁷ Saa chi tuꞌun ya sínaꞌa na íkan saa, ta tá káa iin kueꞌe táꞌi nuu xáa tindoo ya xiꞌin na, saa káa ya, kama ni xíta niꞌnu ndiꞌi ya kuaꞌan ya kuñu na. Ta ra Himeneo xiꞌin ra Fileto ku nda si̱naꞌa kuꞌva saa.

¹⁸ Chi nda ikán ta xa si̱ndikoo nda tuꞌun vaꞌa ya ndaa xaꞌa Tata yo Jesucristo, saa sínaꞌa nda naꞌa, káꞌan nda xiꞌin na ya xa ndi̱taku ndiꞌi na ndíi, káchi nda. Ta xaꞌa ya káꞌan nda saa, ta sáka nda ini sava na taꞌan yo, na ndáa ni ini xíni Tata yo Jesucristo.

¹⁹ Sundi mií Iva yo Ndioxi ta xa ndee ni tuun chi̱nduꞌu ra tuꞌun ra, ya ndaa, ya káa tá káa yu̱ú ya tuun ni ñúꞌu xaꞌa veꞌe, ta nuu ya ikán kua ta̱a ra, káchi ra saa: “Xíni vaꞌa va mií Tata yo Jesucristo unku na kuu seꞌe ra”, káchi ya. Ta saa káꞌan tuku ya, káchi ya saa: “Ta ndiꞌi na kándixa Tata yo Jesucristo ta xíniñuꞌu na sindikoo na ya väꞌa íkan na”.

²⁰ Ta xa xíni mií un, veꞌe iin ra kuika ya kaꞌnu ni, ta kuaꞌa ni nuu ndaꞌa chiñu íyo ini ya, íyo ya ndi̱kuaꞌa xiꞌin kàà ya oro tin ya ndi̱kuaꞌa xiꞌin kàà ya plata, saa íyo ya ndi̱kuaꞌa xiꞌin itun tin ya ndi̱kuaꞌa xiꞌin ñuꞌú kíxin. Ta ya vaꞌa ni náꞌa kua xíniñuꞌu na nuu viko, ta ya núu íin kua xíniñuꞌu na ndiꞌi saa kivi.

²¹ Tá tu ná küni soꞌo un ya sínaꞌa nda vata ikán, saa kua vaꞌa koo un tá kuꞌva íyo ndaꞌa chiñu, ya vaꞌa ni xíniñuꞌu na nuu viko ya íyo veꞌe kaꞌnu ikán. Ta kuꞌva saa ná nduvaꞌa nima yo nuu Ndioxi, ná ndu i̱í yo nuu ra tá kuꞌva kúni mií ra. Ta saa kua vaꞌa kuniñuꞌu ra yoo xaꞌa ndá ka chiñu ya kúni mií ra kuniñuꞌu ra yoo.

²² Ta ïkan un taꞌan ya kútoo ni na kuâán vali ñuu ivi yóꞌó ikan na, ndi̱xita un mií un nuu ya. Xaꞌa ni un ndee ya xaa súvi un ya vaꞌa, ya ndaa, ta saa ná kundaa ni ini un kuni un Ndioxi, saa ná kuꞌvi ni ini un kuni un naꞌa, ta xaꞌa un ndee ya koo vaꞌa ini un xiꞌin na. Ta saa ikan un xiꞌin ndiꞌi na ñani yo, na kándixa ni Iva yo Ndioxi xiꞌin ndinuꞌu ini na.

²³ Ta küni soꞌo un ndá ka tuꞌun kíꞌvi ya káꞌan kuachi naꞌa xaꞌa, ya köo ndáa yaꞌvi káni taꞌan na xaꞌa. Saa chi ya ñaa, ta ya síkani taꞌan naꞌa va kua.

²⁴ Chi ndiꞌi yo xáa chiñu nuu Iva yo Ndioxi, ta köo xíniñuꞌu yo sikaku yo kuachi. Xíniñuꞌu yo koo vaꞌa ni yo xiꞌin ndiꞌi naꞌa, saa xíniñuꞌu yo kuu yo naꞌa, na vaꞌa ni sínaꞌa, ta saa ná koo yo na kaꞌnu ni ini.

²⁵ Ta vaꞌa vií ndikani un nuu naꞌa, na köo xíin kandixa tuꞌun Ndioxi, án sana niꞌi na ya vaꞌa nuu Ndioxi ta ndisama nima na, ya ná kundaa ini na xaꞌa ya ndaa.

²⁶ Ta saa kuchiñu na kaku na, saña na ndaꞌa kiti nǎꞌa, chi xa si̱kuikun ri na, ta tá íyo na ñúꞌu veꞌe kàà saa íyo na ñúꞌu na ndaꞌa ri, xáa súvi na ya kúni ri.