2 Timoteo 1 - Xochapa Mixteco

Káꞌan ndioxi ra Pablo xiꞌin ra Timoteo

¹ Yeꞌe Pablo, ra ndi̱kaxin Ndioxi xáa chiñu nuu Tata yo Jesucristo ku i, saa chi saa chi̱tuni mií ra ta̱xi ra chiñu yóꞌó ndaꞌa i ya káꞌan ndoso i xiꞌin naꞌa xaꞌa ya ki̱ndoo ra xiꞌin na taxi ra kutaku na tixin Tata yo Jesucristo.

² Táa i tutu yóꞌó xaa ya ndaꞌa un ñani yo Timoteo, chi yóꞌo̱, ta nda tá káa seꞌe i, ra kúꞌvi ni ini i xíni i, saa káa un. Ta mií Iva yo Ndioxi xiꞌin Tata yo Jesucristo ná kundaꞌvi ni ini kuni yóꞌo̱, saa ná chikaa ni ra ya vaꞌa yóꞌo̱, ta ná taxi ra koo vaꞌa ni ini un.

Táxi ra Pablo tixaꞌvi xaꞌa ra Timoteo

³ Ndiꞌi saa ichí tá káꞌan i xiꞌin Ndioxi ta ndíkaꞌán ni ini i xaꞌa un, saa káꞌan i xaꞌa un xiꞌin ra. Nduvi niuun táxi i ndixaꞌvi ndaꞌa ra xaꞌa un. Saa xáa súvi ni i ya kúni Ndioxi, tá kuꞌva xa̱a súvi ni xii sikua i ñaꞌa nuu ra, saa íkan i ta köo táxi ya xínituni i kuachi xaꞌa i.

⁴ Tá ndíkaꞌán ini i xaꞌa un tá xa̱ku ni un xaꞌa i, ta kúni ka vi i kuni i yóꞌo̱. ¡Saa kusini ni i xiꞌin un!

⁵ Ndíkaꞌán ini i xaꞌa un ya ndee ni ndinuꞌu ini un ndáa ini un xíni un Tata yo Jesucristo. Ta xiꞌna nána chee un yá Loida ku yá ndee ni xi̱ndaa ini xíni ra, saa tu nána un yá Eunice va, ta saa tu yóꞌo̱ va.

Ná kükaꞌan nuu yo xiꞌin tuꞌun vaꞌa xaꞌa Tata yo Jesucristo

⁶ Xaꞌa ya ñaa kua káꞌan i xiꞌin un ya ná kuniñuꞌu ni un ndee vaꞌa ya ta̱xi Tachi I̱í Ndioxi ndaꞌa un tá kivi chi̱nuu ndaꞌa i xi̱ní un. Täxi un ndiꞌi xaꞌa ya.

⁷ Saa chi Tachi I̱í Ndioxi ya ta̱xi ra íyo xiꞌin yo ta köo táxi ya nduu yo naꞌa, na ìyo ni, ta̱xi ya ndee ndaꞌa yo ya ná ndundee ni ini yo ta ná küiꞌvi yo, saa ná kuꞌvi ni ini yo kuni taꞌan yo, ta ná koo káxin teꞌe ini yo.

⁸ Xaꞌa ya ñaa kua kükaꞌán nuu un ndikuiin un kaꞌan un xaꞌa Tata yo Jesucristo. Ni xaꞌa yeꞌe kükaꞌán nuu un xaꞌa ya ndíkaa i veꞌe kàà yóꞌó xaꞌa ra. Ya ndee ni ka xíniñuꞌu un ikan un kua xaꞌa ndee ni ini un ndoꞌo un xiꞌin i xaꞌa tuꞌun vaꞌa xaꞌa ra. Ta mií ra taxi ndee ndaꞌa yo ya kuchiñu yo nuu ndiꞌi tindoꞌo vaxi nuu yo.

⁹ Mií Ndioxi ku ra si̱kaku yoo, saa ka̱na ra yoo ya nduu yo na ñuu ra, na i̱í. Ta süvi xaꞌa ya vaꞌa íkan yo kua i̱kan ra saa xiꞌin yo, xaꞌa ya kúni mií va ra kua. Chi xaꞌa ya vaꞌa ni mií Tata yo Jesucristo kua i̱kan ra saa xiꞌin yo, tá täꞌan ka xa̱á ñuu ivi yóꞌó vi kua i̱kan ra saa xiꞌin yo.

¹⁰ Ta vitin si̱naꞌa Ndioxi yoo ya kúꞌvi ni ini ra xíni ra yoo xaꞌa ya ti̱ꞌvi ra Seꞌe ra Jesucristo ki̱xi ra sikaku ra yoo. Ta si̱ndiꞌi xaꞌa ra ndee ya xáꞌni naꞌa, saa ta̱va túvi ra tuꞌun vaꞌa xaꞌa mií ra ya kuchiñu yo kutaku yo vitin tin ndiꞌi saa kivi ya vaxi.

¹¹ Ta ka̱na Ndioxi yeꞌe ya kaꞌan ndoso i tuꞌun vaꞌa xaꞌa ra, saa kaka i xaa chiñu i nuu ra, ta̱xi ra chiñu ndaꞌa i ya sinaꞌa i naꞌa, na köo kúu judío.

¹² Xaꞌa ya káꞌan ndoso i tuꞌun vaꞌa xaꞌa ra kua ndóꞌo ni i vitin. Sundi köo kúkaꞌán nuu i xaꞌa ya ndóꞌo i. Chi yeꞌe, ta xa kúndaa teꞌe ini i unku ra ndáa ni ini i xíni i, ta ndee ni ndee kúu mií ra ya chindee ra yeꞌe ya xaa súvi i ndiꞌi chiñu ya ta̱xi ra ndaꞌa i xaa súvi i.

¹³ Ta yóꞌo̱, ta xíniñuꞌu un xaa súvi un tuꞌun vaꞌa ya xa si̱naꞌa i yóꞌo̱, tá íyo ya i̱kan i, saa koo ya ikan un, vií koo un, ndǎku koo un. Ta sïndoo un ya ndáa ni un xíni un Ndioxi ni sïndikoo un ya kúꞌvi ni ini un xíni un inka na taꞌan yo xaꞌa ya ndíkun na Tata yo Jesucristo.

¹⁴ Mií Tachi I̱í Ndioxi ya íyo xiꞌin yo ná chindee yóꞌo̱ ya kuchiñu un kiꞌin ni un kuenta xiꞌin tuꞌun vaꞌa ya si̱kuiso chiñu Ndioxi yóꞌo̱, ta säma un ya.

¹⁵ Xa xíni mií un ya si̱ndoo ndaꞌa ndiꞌi na taꞌan yo, na ndóo estado Asia yeꞌe, saa i̱kan ra Figelo xiꞌin ra Hermógenes xiꞌin i.

¹⁶ Saa káꞌan ni i xiꞌin Iva yo Ndioxi ya ná kundaꞌvi ni ini ra kuni ra na veꞌe ra ñani yo, ra Onesíforo. Chi ndee ni kuaꞌa ichí ndi̱xaꞌa ra ndee xiꞌin i, ta köo ndi̱kukaꞌán nuu ra kuni ra yeꞌe xaꞌa ya ndíkaa i veꞌe kàà yóꞌó.

¹⁷ Vaꞌa ni ka va i̱kan ra xiꞌin i, chi tá xa̱a ra ñuu Roma yóꞌó, ta ndee ni ndi̱xika ra ndu̱ku ra yeꞌe, ndakua ndi̱niꞌi ra yeꞌe.

¹⁸ Ta mií Tata yo Jesucristo ná kundaꞌvi ni ini kuni ra ñani yo ra Onesíforo, tá kivi ná taxi Ndioxi kuachi xaꞌa na ñuu ivi yóꞌó. Chi xa̱ xíni mií un ndee ni chi̱ndee taꞌan ra xiꞌin yo ñuu Éfeso.