2 Pedro 2 - Xochapa Mixteco

Nda vata káꞌan ndoso tuꞌun yuꞌu Ndioxi xiꞌin nda vata sínaꞌa naꞌa

¹ Tá kuiya xinaꞌa ta ndi̱xiyo nda vata, nda ndi̱kaꞌan ndoso tuꞌun yuꞌu Ndioxi tañu na ñuu Ndioxi, ta saa koo tu nda tañu ndóꞌo̱ va. Ta ni kündaa ini ndo ndá kuꞌva xáa nda nama nda tuꞌun Ndioxi ya sínaꞌa nda ndóꞌo̱, nda ndikuaa tu nda Tata yo Jesucristo va, ra ki̱xi ndi̱xiꞌi xaꞌa nda ya si̱kaku ñaꞌa ra. Xaꞌa ya íkan nda saa ta kama ni sindiꞌi nda xaꞌa mií va nda.

² Ta kuaꞌa ni naꞌa ikan taꞌan ñaꞌa väꞌa ya íkan nda ikán, ta xaꞌa ya ikán kua ndikunuu väꞌa ni tuꞌun xaꞌa ichí Ndioxi ya ndaa ni.

³ Chi nda ikán ta ya ndee ni kúni nda ku xuꞌun ndo xaꞌa ya sínaꞌa nda ndóꞌo̱ tuꞌun vata. Ta vaꞌa ná kundatun naꞌa nda chi xa ta̱xi Ndioxi kuachi xaꞌa nda, xa xinaꞌa vi íyo ya xaꞌa nda ta kama ni kuu saa xiꞌin nda, ni käku ka vi nda ndakua ndiꞌi xaꞌa nda ikan Ndioxi.

⁴ Saa chi nda na tatun Ndioxi ta köo ndi̱xaa kaꞌnu ini ra xaꞌa na tá ndi̱yaꞌa na nuu ra i̱kan na ya väꞌa ta ti̱ꞌvi ra na kuaꞌan na ndaya, ta̱an ra na ini yavi nuu naá ni, ta ikán kuñuꞌu na nda kivi ná xaa nani ra kuachi xiꞌin na ñuu ivi.

⁵ Ni na xi̱ndoo xinaꞌa vaꞌa, ta köo ndi̱xaa kaꞌnu ini ra xaꞌa na, ti̱ꞌvi ra saví íꞌná xa̱ꞌni rá na. Ta ndi̱xiyo iin taa ra vaꞌa ni xi̱nani ra Noé, saa ndi̱kaꞌan ndoso ra tuꞌun Ndioxi xiꞌin na ya ná ikan na ya ndaa, ta ndisaa ra ikán ku ra ndi̱kaku xiꞌin inka ka uxa naꞌa.

⁶ Saa xa̱a ndu̱vaꞌa tu Ndioxi xiꞌin na ñuu Sodoma tin na Gomorra va, iin xa̱ꞌmi yaa ra na, ndu̱u na tá káa yaá. Ta ya ndo̱ꞌo na ikán kua sínaꞌa yoo, saa kundoꞌo ndiꞌi naꞌa, na kánitaꞌan xiꞌin Ndioxi.

⁷ Sundi ra Lot ta ndikaku va ra i̱kan Ndioxi, iin taa ra vaꞌa ni ndi̱xiyo ra, ta ni köo ndíkundee ka ini ra xaꞌa ya väꞌa i̱kan naꞌa, na väꞌa xi̱ndoo tiempo ndi̱xiyo ra.

⁸ Iin taa ra vaꞌa ni ndi̱xiyo, ta ndee ni ku̱suchi ini ra, chi ndiꞌi saa kivi xi̱ni soꞌo ra tin xi̱to ra ya väꞌa i̱kan na xi̱ndoo ikán.

⁹ Yóꞌó ku nuu kúndaa ini yo ya síkaku Ndioxi na íkan ya vaꞌa nuu ra, tá nuu ñúꞌu na nuu tindoꞌo. Ta saa xíni vaꞌa tu ra ndá kuꞌva kua xaa nduvaꞌa ra xiꞌin naꞌa, na íkan ya väꞌa yakan kua xaa nani ra kuachi xiꞌin na ñuu ivi.

¹⁰ Ta xaa nduvaꞌa ni va Ndioxi xiꞌin ndiꞌi naꞌa, na íkan ya väꞌa, ya kúni ni mií ikin kuñu na, ta ni köo xáa súvi mií na chiñu ya xáꞌnda chiñu Ndioxi nuu na. Ta na vata ikán ta ndee ni tuun ini na, ni köo íꞌvi na kaꞌan ndivaꞌa na xaꞌa na kúu mií ndee naꞌnu ka nuu na.

¹¹ Ta ndee ni ka ndee kúu mií na tatun Ndioxi nuu na sínaꞌa ya vata, ta nda loꞌo köo káꞌan nduvaꞌa na tatun Ndioxi taxi na kuachi ndaꞌa Ndioxi xaꞌa na kúu mií ndee naꞌnu ka ikán.

¹² Ta nda vata sínaꞌa ñaa, ta ya káꞌan ndikuu nda xaꞌa ku ndiꞌi va ñaꞌa ya köo kúndaa ini nda xiꞌin. Tá íkan kiti, ri köo ya xínituni va saa íkan nda, chi kiti ikán ta ka̱ku ri ya tiin na ri kuꞌun ri kuvi va ri, tá kuꞌva ndóꞌo ri ikán, saa kundoꞌo tu nda ñaa va.

¹³ Ta ndee ni kundoꞌo nda xaꞌa ya väꞌa íkan nda chi kúsini ni nda ya íkan nda saa xiꞌin ikin kuñu nda. Ta ni köo xáꞌnu nda mií nda, nduvi teꞌe íkan nda saa nuu ndiꞌi naꞌa. Tá kivi táva ndo viko ta kána ndo nda xáa nda xíxi xíní nda xiꞌin ndo, ta xaꞌa ya kaꞌa̱n ni nuu íkan nda kua sítivi ndiꞌi nda viko ndo.

¹⁴ Ni küvi kuni nda iin ná síꞌi, chi tá xíto nda nuu ná ta tá káa nda xa kuakiꞌvi xiꞌin va ná saa káa nda, túvi nda. Nina ya kútoo ni ikin kuñu nda kua íkan nda, nduvi niuun ndíkani ini nda xaꞌa ya väꞌa, ni köo xáa ini nda xiꞌin ñaꞌa kúu mií nda. Xaꞌa ya íkan nda saa ta nda xa ndi̱tavi chiꞌña ndu̱u nda.

¹⁵ Chi si̱ndoo nda ichí vaꞌa ya ndaa, ta nda̱ñuꞌu nda kuaꞌan nda ichí taꞌan ya ndi̱xika ra profeta Balam seꞌe ra Beor, chi ra ikán ta ku̱too ni ra chaꞌvi naꞌa ra xaꞌa ya i̱kan ra ya väꞌa.

¹⁶ Ta ra ikán ke̱e ra kuaꞌan ra tavi chiꞌña ra na ñuu Israel, ta köo ndi̱kuchiñu ra ikán ra saa, chi iin burru tiatan kiti yóso ra kuaꞌan ra, kiti köo tuꞌun ku ri ndi̱ndaꞌi ni xiꞌin ra, tá kuꞌva káꞌan iin taa saa ndi̱kaꞌan ri xiꞌin ra xaꞌa ya kini ni íkan ra. Ta nda saa ku nuu ndi̱xikuiin ra ikán köo ndi̱xaꞌan ka ra xaa súvi ra chiñu väꞌa.

¹⁷ Ta saa kundoꞌo nda sínaꞌa ya vata ikán, chi tá íin poso nuu ndi̱ndichi tikuii va saa íin nda, án tá íin viko ya ndíso ndisaa tachi va saa íin nda. Sundi Ndioxi ta xa chi̱tuni ra ya kuꞌun nda nuu naá ni, nuu ndee ni kundoꞌo nda.

¹⁸ Chi nda ikán ta ndee ni chínuu vaꞌa nda tuꞌun káꞌan nda xiꞌin naꞌa ya sáka nda xi̱ní na, síxinu nda i̱ni na xiꞌin tuꞌun ya káꞌan nda xiꞌin na ndisaa xaꞌa ya kútoo ni mií ikin kuñu nda kua káꞌan nda xaꞌa. Ta na íkan nda saa xiꞌin ku naꞌa, na xa si̱ndoo ya väꞌa i̱kan na, na xa ka̱na koo tañu na väꞌa ku na íkan nda saa xiꞌin.

¹⁹ Ta káꞌan nda xiꞌin na tá ná kundikun na nda, ta taxi nda koo ndíka na, káchi nda xiꞌin na, ni mií nda ta köo íyo ndíka nda nuu ya väꞌa, xaꞌa ya íkan nda ya kúni mií nda. Ta ya ndaa ku ndixa va ya chi naꞌa, na táxi xáꞌnda chiñu ya väꞌa nuu na, ta núꞌni va na ndaꞌa ya väꞌa.

²⁰ Ta naꞌa, na ndíkani ini kundikun na nda sínaꞌa ya vata ikán ta xa ndi̱saña na nuu ya väꞌa íyo ñuu ivi yóꞌó tá ku̱ndaa ini na xaꞌa tuꞌun vaꞌa xaꞌa Tata yo Jesucristo ra síkaku yoo. Sundi tá ndi̱koyo tuku na íkan na ya väꞌa taꞌan ya xa i̱kan na yachi, ta ndee ni ka kini xáꞌnda chiñu ya väꞌa ikán nuu na vitin, süvi ka vi tá kuꞌva ndi̱xiyo na tá núnu̱ú.

²¹ Vaꞌa ni ka va kua tá tu nda iin ichí köo ndi̱kundaa ini na xaꞌa ichí ya ndaa, ndíkuu. Süvi ka vi ya ku̱ndaa ini na xaꞌa ichí ya ndaa, ya i̱í ta̱xi Ndioxi ndaꞌa na, ta ku̱xika na nuu ya.

²² Ta naꞌa, na íkan saa ta íkan na tá kuꞌva káchi na káꞌan: “Tina kiti ndúxan ta ndi̱ko koo tuku ri yáxi ri ñaꞌa ya ndu̱xan ri”, káchi na. Án tá íyo ya káꞌan na xaꞌa kiti kini, káchi na saa: “Ni vaꞌa ni ná sikuchi yo kiti kini ta kuaꞌan tuku ri chíchi ri ndaꞌi”, káchi na.