2 Corintios 9 - Xochapa Mixteco

¹ Ta köo xíniñuꞌu i kaꞌan ndaꞌvi i xiꞌin ndo ya nduku i ya mani nuu ndo ya chindee taꞌan ndo xiꞌin na ndaꞌvi taꞌan yo, na ndóo ñuu Jerusalén.

² Chi xa xíni i ini ndo ya ndee ni vaꞌa kúni ndo chindee ndo na, kuꞌva saa kua vaꞌa ni ndi̱tuꞌun i xaꞌa ndo xiꞌin ndiꞌi na veꞌe ñuꞌu, na ndóo estado Macedonia. Ndi̱kaꞌan i xiꞌin na xaꞌa ndóꞌo̱ ndóo estado Acaya, ya ndee ni vaꞌa íyo ndúvi ndo chindee ndo na taꞌan yo, na ndaꞌvi. Ta nda kuiya ya ndi̱yaꞌa xa̱á ndo íkan ndo saa, ta xaꞌa ya vaꞌa ni íkan ndo, ta saa ndiꞌi na taꞌan yo, na ndóo Macedonia yóꞌó kúni tu na yóꞌó va chindee taꞌan na xiꞌin na taꞌan yo.

³ Ta vitin xaꞌa ya vaꞌa ni káꞌan i xaꞌa ndo kua tíꞌvi i ra Tito ñani yo xiꞌin inka nda ñani yo yóꞌó xaa nda nuu ndo ya vaꞌa vívií ná ndikaya ndo xuꞌun, ya ná täxi ndo kindoo väꞌa i nuu na taꞌan yo xaꞌa chiñu yóꞌó, ta saa ná koo ndúvi ndo xiꞌin ya káꞌan i xiꞌin ndo.

⁴ Chi án sana kuꞌun sava nda ñani yo ñuu Macedonia yóꞌó xiꞌin i ta sana nditaꞌan nde ndóꞌo̱ ya köo íyo ndúvi ndo, ta ndee ni sikaꞌán ndo nuu i, ta saa kukaꞌan ni tu nuu mií va ndo, chi ndee ni vaꞌa ndi̱kaꞌan nde xaꞌa ndo xiꞌin na.

⁵ Xaꞌa ya ñaa kua ndu̱ku i ya mani nuu ra Tito ñani yo xaa ra xiꞌin nda ñani yo yóꞌó yachi ka, ya chindee taꞌan nda xiꞌin ndo ndikaya kuee ndo xuꞌun ya ki̱ndoo ndo taxi ndo. Ta saa vaꞌa koo ndúvi ya tá ná xaa nde nuu ndo, chi ya taxi ndo, ta ini mií ndo kua taxi ndo ya, süvi xiꞌin ya nduxa íkan nde xiꞌin ndo kua ikan ndo saa.

Vaꞌa ná koo ini yo ná köo xiꞌnda yo

⁶ Ta vaꞌa ndi̱kaꞌán ini ndo xiꞌin tuꞌun ya káꞌan soꞌva: naꞌa, na loꞌo ni chíꞌi, ta saa ndee ni loꞌo síkee na, ta naꞌa, na kuaꞌa ni chíꞌi, ta saa kuaꞌa ni síkee na.

⁷ Xaꞌa ya ñaa kua vaꞌa taxi ndo xuꞌun ya chindee ndo naꞌa, tá kuꞌva chi̱kaa ini mií ndo taxi ndo ndaꞌa na, ta saa koo ya taxi ndo. Ta küsuchi ini ndo tá táxi ndo ya ndaꞌa na, ta ni chïndee ndo na xiꞌin ya nduxa. Chi Ndioxi, ta kúꞌvi ni ini ra xíni ra naꞌa, na táxi ya xiꞌin ndinuꞌu nima na.

⁸ Ta ndee ni ndee kúu mií Ndioxi ya kuchiñu chindee ra ndóꞌo̱, taxi ra kuaꞌa ni ya vaꞌa ndaꞌa ndo, ya ná koo ñaꞌa xíniñuꞌu ndo nuu ndo ndiꞌi saa ichí, ta nda ndoo ndoso ka ya nuu ndo ya kuchiñu ndo ikan ni ndo ndá ka ya vaꞌa ni xiꞌin naꞌa.

⁹ Chi saa káꞌan tuꞌun Ndioxi ya íyo xinaꞌa, káchi ya saa: “Iin taa ra vaꞌa ni ini, ta chíndee taꞌan ni ra xiꞌin na ndaꞌvi. Ta ya vaꞌa ni íkan ra vaꞌa yóꞌó, ta nda iin ichí ndïꞌi xaꞌa ya”, káchi tuꞌun Ndioxi.

¹⁰ Saa chi mií Ndioxi ku ra táxi siꞌva chíꞌi naꞌa, ta suvi mií ra ku ra táxi ñaꞌa xíxi ndiꞌi na. Ta kuꞌva saa ikan Ndioxi xiꞌin ndo, taxi ra kuaꞌa ni ñaꞌa vaꞌa ndaꞌa ndo, saa kuchiñu ndo chindee taꞌan ndo xiꞌin inka na.

¹¹ Ta Ndioxi ku ra ndasa kuika ni ndóꞌo̱ xiꞌin ndiꞌi nuu ñaꞌa ya vaꞌa ni ya ná kuchiñu ndo chindee ni ndo naꞌa. Ta xuꞌun ya tíꞌvi ndo kuꞌun xiꞌin nde ndaꞌa na taꞌan yo, ta vaꞌa ni kuni na xiꞌin ya, saa taxi ni na tixaꞌvi ndaꞌa Ndioxi.

¹² Chi ya táxi ndo ndíso nde kuaꞌan ndaꞌa na, ta süvi ndisaa ya tíꞌvi ndo kuaꞌan ndaꞌa na kua ndíso nde, chi xaꞌa ya chíndee ni ndo na ta ndúkuaꞌa vaꞌa ka naꞌa, na táxi ni tixaꞌvi ndaꞌa Ndioxi.

¹³ Ndúkuaꞌa naꞌa taxi tixaꞌvi ndaꞌa Ndioxi, chi kíꞌin na kuenta ya xáa súvi ndo tuꞌun vaꞌa xaꞌa Tata yo Jesucristo ya káꞌan ndoso ndo. Ta saa ndúkuaꞌa ni naꞌa táxi tixaꞌvi ndaꞌa ra xaꞌa ya ndee ni vaꞌa chíndee ndo na taꞌan ndo, ta saa chíndee tu ndo ndiꞌi va naꞌa.

¹⁴ Ta saa kaꞌan na xaꞌa ndo xiꞌin Ndioxi, ndúku na ya vaꞌa nuu ra xaꞌa ndo xaꞌa ya ndee ni kúꞌvi ini ra xíni ra ndóꞌo̱.

¹⁵ Ta ndixaꞌvi ni Ndioxi xaꞌa ya kúꞌvi ni ini ra xíni ra yoo, ta ni köo níꞌi yo tuꞌun kaꞌan yo xiꞌin ra ya taxi yo tixaꞌvi ndaꞌa ra xaꞌa ya vaꞌa ni íkan ra xiꞌin yo.