2 Corintios 8 - Xochapa Mixteco

Xuꞌun ya ndíkaya na kuaꞌan ndaꞌa na veꞌe ñuꞌu ñuu Jerusalén

¹ Ñani yo, ndóo ñuu Corinto, kúni nde ndituꞌun nde xiꞌin ndo ya ná kundaa ini ndo xaꞌa ya vaꞌa ni ndi̱niꞌi uun na taꞌan yo nuu Iva yo Ndioxi. Xaꞌa na ñani yo na veꞌe ñuꞌu ndóo kuaꞌa ni ñuu ya ñúꞌu estado Macedonia kua káꞌan i xiꞌin ndo.

² Ta kuaꞌa ni nuu tindoꞌo ya uꞌvi ni ndi̱yaꞌa na nuu, ta saa ni kúsini ni na. Vani ndaꞌvi ni na, ta köo xíꞌnda na, ndee ni vaꞌa chi̱ndee na xiꞌin xuꞌun ya kuaꞌan ndaꞌa na ndaꞌvi, ndíkun Jesucristo ndóo ñuu Jerusalén.

³ Ta nda yeꞌe, káꞌan xaꞌa na ya i̱kan na saa yáꞌa ni víꞌi kua ta̱xi na chi kúndaꞌvi ni na, ta vaꞌa chi ini mií va na ka̱na ya i̱kan na saa.

⁴ Ndee ni ndi̱xikan na ya mani nuu nde ya ná ndikiꞌin nde xuꞌun ndaꞌa na, ya chíndee taꞌan na xiꞌin na ñuu Ndioxi.

⁵ Ni köo ndi̱xika ini nde ya ikan na saa, ta vaꞌa chi xiꞌna ndi̱taxi ndiꞌi na mií na ndaꞌa Tata yo Jesucristo, ta saa ndi̱taxi tu na mií na ndaꞌa ndeꞌe va, ya kúni na xaa súvi na ya kúni mií Ndioxi.

⁶ Ta xa xíni mií ndo ñani yo, ndo ñuu Corinto, ra Tito ñani yo ku ra xa̱á ndíkaya xuꞌun ya chindee taꞌan ndo xiꞌin na taꞌan yo, ya síniꞌi uun ndo nuu na. Ta vitin xa ndi̱xikan nde ya mani nuu ra ya ná ndïkaya ka ra ya ndaꞌa ndo, nda ná sixinu ra chiñu ya xa̱á ra xáa súvi ra.

⁷ Saa chi ndóꞌo̱, ta vaꞌa ni va íkan ndo: Ndee ni vaꞌa ndáa ini ndo xíni ndo Ndioxi, ta saa vaꞌa ni tu vií ndítuꞌun ndo tuꞌun ra xiꞌin naꞌa, ta xíni vaꞌa ndo ya ndaa xaꞌa Ndioxi. Saa íyo ndúvi ni ndo ya chindee taꞌan ndo xiꞌin na taꞌan yo xaꞌa ya kúꞌvi ini ndo xíni ndo na, chi saa si̱kuaꞌa ndo nuu nde. Yakan xíkan ni nde ya mani nuu ndo ya ná chindee taꞌan loꞌo ndo xiꞌin xuꞌun na ñani yo, na ndóo ñuu Jerusalén.

⁸ Ta ya káꞌan i xiꞌin ndo kuꞌva soꞌva, ta süvi yeꞌe xáꞌnda chiñu ku i nuu ndo, káꞌan i xiꞌin ndo saa ya kúni i ná kuni ndo ndá kuꞌva íyo ndúvi inka na taꞌan yo ya chindee taꞌan na xiꞌin na taꞌan yo, na ndaꞌvi. Ta kuꞌva saa kúni i ná ikan ndo tá kuꞌva íkan na taꞌan yo ikán. Saa kua vaꞌa sinaꞌa ndo mií ndo nuu na ya ndixa kua kúꞌvi ni ini ndo xíni ndo na.

⁹ Chi xa xíni mií ndo ya kúꞌvi ni ini mií Tata yo Jesucristo xíni ra yoo kua nda̱sa ndaꞌvi ra mií ra, vani kuika ni ndi̱xiyo ra ta saa nda̱sa ndaꞌvi ra mií ra xaꞌa ndóꞌo̱, ya ná ndukuika ndo.

¹⁰ Yakan yeꞌe, ta káꞌan i xiꞌin ndo ndá kuꞌva chindee ndo ñani yo na ndóo ñuu Jerusalén, chi kuiya ya ndi̱yaꞌa ta xiꞌna ndóꞌo̱ ku ndo xa̱á chíndee na ikán, ta ndixa ndinuꞌu ni ini ndo xa̱a ndo saa xiꞌin na.

¹¹ Ta vitin xíniñuꞌu ndo sixinu ndo chiñu yóꞌó ya xa̱á ndo xáa súvi ndo. Tá kuꞌva kúsini ni ndo tá xa̱á ndo xiꞌin ya, kuꞌva saa xíniñuꞌu ndo kusini ni ndo sixinu ndo ya xiꞌin ndinuꞌu ni ini ndo.

¹² Saa chi tá ndá yo táxi ya kúu mií yo ndaꞌa Ndioxi, tá tu ndinuꞌu ni ini yo táxi yo ya, ta ndíkiꞌin vaꞌa ra ya. Chi Ndioxi ta köo ndúku ra ñaꞌa ya köo kúu mií yo nuu yo.

¹³ Chi yeꞌe, ta köo kúni i kumani ñaꞌa xíniñuꞌu ndo nuu ndo xaꞌa ya chíndee taꞌan ndo xiꞌin inka na. Ta vaꞌa iin káchi ná koo ñaꞌa xíniñuꞌu ndóꞌo̱, ta saa tu na ikán va.

¹⁴ Chi vitin ta ndóꞌo̱ kúu mií ndo ñaꞌa ya xíniñuꞌu nuu na ikán, ta inka ichí án sana kuu mií na ikán ñaꞌa ya kúmani nuu ndóꞌo̱, saa chindee taꞌan na xiꞌin ndo, saa kua iin káchi koo ndiꞌi ndo ta nda iin ndo kümani ñaꞌa nuu.

¹⁵ Chi saa kua káꞌan tuꞌun Ndioxi, káchi ya saa: Naꞌa, na ndi̱kuiso kuaꞌa ni ñaꞌa, ta köo ndi̱ndoo ndoso ya nuu na. Ni naꞌa, na ndi̱kuiso loꞌo ya, ta köo ya ndíkumani nuu na.

Káꞌan ra Pablo xaꞌa ra Tito xiꞌin nda kuaꞌan xiꞌin ra

¹⁶ Táxi ni i tixaꞌvi ndaꞌa Ndioxi xaꞌa ra Tito, ñani yo, chi chi̱kaa Ndioxi ya vaꞌa ini ra, ya ndíkani ini ra tá kuꞌva ndíkani ini yeꞌe, ya chindee taꞌan nde xiꞌin ndo.

¹⁷ Chi tá kuꞌva íyo chiñu ta̱xi i ndaꞌa ra, saa íyo ya i̱kan ra, ta xíka ni ini ra xaꞌa ndo yakan kúsini ni ra xaa ra koto ra ndóꞌo̱, ta ini mií ra ka̱na ya xaa ra nuu ndo koto ra ndóꞌo̱.

¹⁸ Ta saa tíꞌvi nde iin ra ñani yo xaa ra xiꞌin ra, ta ra ñani yo yóꞌó ku ra ndee ni vaꞌa ínuu tuꞌun nuu ndiꞌi na veꞌe ñuꞌu xaꞌa ya ndee ni vaꞌa xáa chiñu ra xaꞌa tuꞌun Ndioxi.

¹⁹ Ta ndiꞌi mií na ñani yo, na veꞌe ñuꞌu ku na ndi̱kaꞌan xaꞌa ra ya ná kaka ra xiꞌin nde ndikaya nde xuꞌun ya chindee taꞌan yo xiꞌin na ñani yo. Ta íkan nde saa, ndíkaya nde xuꞌun yóꞌó, ya xáa kaꞌnu nde Tata yo Jesús ta saa kuni naꞌa ya ndixa kua kúni ni ndo chindee taꞌan ndo xiꞌin na ñani yo, na ndaꞌvi.

²⁰ Ta ndeꞌe, ta ndee ni kuenta íyo nde xiꞌin xuꞌun ya ndíkaya nde yóꞌó, chi köo kúni nde kaꞌan väꞌa naꞌa xaꞌa nde, yakan kuaꞌan inka ra ñani yo yóꞌó xiꞌin nde.

²¹ Ta vívií ni va xáa súvi nde chiñu yóꞌó nuu Tata yo, ta süvi ndisaa nuu mií ra íkan nde saa, chi saa vívií íkan tu nde nuu naꞌa va.

²² Ta saa tíꞌvi tu nde inka ra ñani yo xaa ra xiꞌin nda, chi ndee ni vaꞌa íyo ndúvi ra xaa súvi ra ndá ka chiñu. Chi ndee ni kúni ra chindee taꞌan ra xiꞌin na taꞌan yo, yakan xaa ra nuu ndo, xaꞌa ya ndee ni ndáa ini ra xíni ra ndóꞌo̱.

²³ Ta ndítuꞌun i xiꞌin ndo xaꞌa ra ñani yo, ra Tito, chi ra ñaa ta ra xáa chiñu xiꞌin i ku ra, ya chíndee taꞌan nde xiꞌin ndo. Ta inka nda ñani yo, ta na veꞌe ñuꞌu ku na tíꞌvi nda ñaa xaa nda, ta saa ni ndee ni káñuꞌu nda Tata yo Jesucristo.

²⁴ Saa xíkan ni i ya mani nuu ndo ya ná ndikuiso vaꞌa ni ndo nda ñani yo ñaa ya ná kundaa ini na veꞌe ñuꞌu, na ti̱ꞌvi nda xaa nda, ta saa kusini ni na xiꞌin ndo, ta saa tu ndeꞌe va kusini ni nde xiꞌin ndo.