2 Corintios 7 - Xochapa Mixteco

¹ Ta saa ñani mani yo, xa ndi̱kaꞌan Ndioxi xiꞌin yo ya ki̱ndoo ra xiꞌin yo, yakan ná kundaa ni yo mií yo, ná kuxika yo nuu ndá ka ñaꞌa väꞌa, ya xáa yakua ikin kuñu yo xiꞌin ya vaꞌa yo. Ná nditaxi ndiꞌi yo mií yo ndaꞌa Ndioxi, ya xaa toꞌo yo ra, saa kua nduu yo na i̱í nuu ra.

Kúsini ni ra Pablo chi ndi̱ko koo ini na ñuu Corinto xaꞌa ya väꞌa i̱kan na

² Xíkan ni nde ya mani nuu ndo ya ná kuna ndo nima ndo nuu nde, ya ndikiꞌin mani ndo ndeꞌe. Saa chi nda iin ya väꞌa köo ndíkan nde xiꞌin ndo, ta saa ni nda iin ndo köo ndi̱xaa ndikuu nde xiꞌin, ni nda iin tu ndo köo ndi̱sindaꞌvi va nde.

³ Ya káꞌan i soꞌva xiꞌin ndo ta köo káꞌan i saa xiꞌin ndo ya táxi i kuachi xaꞌa ndo, saa chi ndee ni kúꞌvi ini nde xíni nde ndóꞌo̱, tá íyo ya xa ndi̱kaꞌan nde xiꞌin ndo, saa íyo ya. Ta nda iin ñaꞌa täꞌvi yoo xiꞌin taꞌan yo, ni ya táku yo vitin ni ya ná kuvi yo, köo ñaꞌa taꞌvi mií yo.

⁴ Ta ndinuꞌu ni ini i ndi̱kaꞌan i xiꞌin ndo ya ndee ni kúsini i xiꞌin ndo, vaꞌa ni kúni i xiꞌin ndo, ta̱xi ni ndo ndee ndaꞌa i, vani ndee ni ti̱xuꞌvi nde.

⁵ Ta saa káꞌan i xiꞌin ndo, nda nani xa̱a nde ñuu estado Macedonia yóꞌó, ta nda loꞌo täꞌan ndikundee nde, ndiꞌi ni kúu nuu tindoꞌo ñúꞌu nde, ta íyo ni na sáa ini xíni ndeꞌe, íꞌvi ka vi nde.

⁶ Ta vaꞌa chi mií Iva yo Ndioxi ku ra síndiko ini naꞌa, na ndee ni ndíkava ini, ta si̱ndiko ra ini nde xaꞌa ya xa̱a ra ñani yo ra Tito xíto ra ndeꞌe.

⁷ Ta saa ni süvi ndisaa xaꞌa ya xa̱a ra nuu nde kua ndi̱ndiko ini nde, chi xaꞌa ya ndee ni vaꞌa ndi̱xaꞌa ndo ndee xiꞌin ra kua si̱ndiko ni ini nde. Ndi̱tuꞌun ra xiꞌin nde ya ndee ni kúni ndo kuni ndo ndeꞌe, ta saa ndi̱kaꞌan ra xiꞌin nde ya kúsuchi ni ini ndo xaꞌa kuachi ndo. Saa ndi̱tuꞌun ra xiꞌin nde ya ndee ni ndíꞌi ini ndo xaꞌa i, yakan ndee ni vaꞌa ka ku̱ni i xiꞌin tuꞌun ya xi̱ni soꞌo i xaꞌa ndo.

⁸ Vani ku̱suchi ni ini ndo i̱kan i xaꞌa tuꞌun ya ndi̱kaꞌan i xiꞌin ndo nuu tutu ya ti̱ꞌvi i xaa ndaꞌa ndo, ta köo ndíko koo ini i ta̱a i ya xaa ya nuu ndo, vani ndi̱ko koo ini i tá sikan ndi̱kaꞌan i saa xiꞌin ndo chi ku̱suchi ni ini ndo uvi ndaa kivi xaꞌa ya ndi̱kaꞌan i saa xiꞌin ndo.

⁹ Ta vitin ta kúsini ni i, ta süvi xaꞌa ya xa̱a suchi i ini ndo kua kúsini ni i, xaꞌa ya ndi̱ko koo ini ndo nuu Ndioxi kua kúsini ni i xiꞌin ndo. Ta ya ku̱suchi ni ini ndo tá kuꞌva kúni mií Ndioxi kua ku̱suchi ini ndo, ta süvi ndeꞌe ku nde ndi̱xaa nduvaꞌa xiꞌin ndo.

¹⁰ Saa chi tá táxi Ndioxi kúsuchi ini yo ta ya vaꞌa mií va yo kua, ta süvi xaꞌa ya síndikava ra ini yo kua ndóꞌo yo saa, chi xaꞌa ya ndíko koo ini yo ndínama ini yo nuu Ndioxi va kua ndóꞌo yo saa, ta saa kuchiñu yo kaku yo. Ta íyo inka ya kúsuchi ini naꞌa, na ndíkun ichí ñoo ivi yóꞌó. Ta ya suchi ini ndóꞌo na ta ya chíndaꞌa na kuꞌun na ichí nuu kuvi va na kua.

¹¹ Na taꞌan yo, koto mií ndo, ndá kuꞌva chi̱ndee ya suchi ini ta̱xi Ndioxi ndo̱ꞌo ndo: Ta vaꞌa xaa súvi ndo ya chi̱kaa ini ndo ikan ndo xiꞌin ra taꞌan ndo ñaa. Chi ndóꞌo̱ ta kúni ndo sinaꞌa ndo mií ndo ya köo kuachi ndo ta kúndasi nuu ndo xíni ndo kuachi. Saa ndíꞌi ni ini ndo xaꞌa tindoꞌo ya íyo nuu ndo. Ta vitin, kúni ndo kuni ndo yeꞌe, chi ndíꞌi ni ini ndo xaꞌa i. Ta íyo ndúvi ndo ya taxi ndo kuachi xaꞌa ra taꞌan ndo ñaa. Xaꞌa ya íkan ndo saa ta sínaꞌa ndo mií ndo ya köo íyo yuꞌu ndo xiꞌin ra, ta ya ñaa kúni kachi ya kíndoo ndika ndo xaꞌa kuachi ra taꞌan ndo ñaa.

¹² Tá ta̱a i tutu xaa ndaꞌa ndo ta köo ndi̱taa i ya xaꞌa ra i̱kan ya väꞌa ñaa, án xaꞌa ra ndi̱xuꞌvi xaꞌa ya väꞌa i̱kan ra ñaa. Ta̱a i ya xaa ya ndaꞌa ndo ya ná kuni Ndioxi ya kúꞌvi ni ini ndo xíni ndo ndeꞌe.

¹³ Xaꞌa ya ñaa kua ndi̱kiꞌin ni nde ndee. Ta süvi ndisaa xaꞌa ya ñaa kua kúsini ni nde, chi ndeꞌe ta yáꞌa ni kúsini ni nde xaꞌa ya xa̱a si̱ni ni ndiꞌi ndo ini ra Tito ñani yo.

¹⁴ Yeꞌe, ta ndi̱kaꞌan vaꞌa ni i xaꞌa ndo xiꞌin ra, ta vaꞌa chi köo ndi̱sikaꞌán ndo nuu i xiꞌin ra, tá kuꞌva íyo ya ndaa ndi̱tuꞌun nde xiꞌin ndo, ta saa íyo tu ya ndi̱kaꞌan nde xiꞌin ra Tito va: ya ndee ni kúsini nde xiꞌin ndo.

¹⁵ Ndee ni vaꞌa ndíkaꞌán ini ra xaꞌa ndo, ta kúꞌvi ni ka ini ra xíni ra ndóꞌo̱, chi vií ni ndi̱kiꞌin ndo ra, ta ndee ni vaꞌa xi̱ni soꞌo ndo ya ndi̱kaꞌan ra xiꞌin ndo.

¹⁶ Kúsini ni i chi yáꞌa ni ndáa ini i xíni i ndóꞌo̱ xaꞌa ya íkan ndo saa.