2 Corintios 6 - Xochapa Mixteco

¹ Ndóꞌo̱ xiꞌin ndeꞌe, ta iin káchi xáa chiñu yo nuu Ndioxi, yakan xíkan ni nde ya mani nuu ndo ya ná kundàà vií ni ndo ya vaꞌa ndi̱niꞌi ndo nuu Tata yo.

² Saa chi saa káꞌan tu mií va Ndioxi nuu tuꞌun ra, káchi ra saa: Tá mií tiempo ya ndee ni xíniñuꞌu ndo yeꞌe ndi̱kaꞌan ndo xiꞌin i, ta xi̱ni soꞌo i ya ndi̱kaꞌan ya ndo xiꞌin i, saa chi̱ndee i ndóꞌo̱ si̱kaku i ndóꞌo̱, káchi Ndioxi, káchi tuꞌun ra ya ta̱a na xinaꞌa. Ta vitin xa ndi̱xinu tuꞌun yóꞌó ta kuni soꞌo ndo chi vitin ku tiempo ya kúni Ndioxi kuni soꞌo ndo ya kaꞌan ra xiꞌin ndo, saa chi vitin kua ti̱ndaa kivi, ta vitin kua íyo ka tiempo ya sikaku ra ndóꞌo̱.

³ Ta ndee ni kuenta íyo nde xaꞌa ñaꞌa ya íkan nde, chi köo íkan ndikuu nde ndá ka ñaꞌa väꞌa nuu naꞌa ya ná nïꞌi na ndá ka ñaꞌa kaꞌan ndikuu na xaꞌa chiñu íkan nde.

⁴ Nda vaꞌa ka va íkan nde, chi ndiꞌi ya íkan nde nuu na ta káꞌan ya xaꞌa nde ya xáa chiñu nde nuu Ndioxi. Xáꞌa ndee ini nde xiꞌin ndiꞌi tindoꞌo ya vaxi nuu nde, saa tu tindiꞌi ini ya vaxi nuu nde, xiꞌin ya kúmani ñaꞌa xíniñuꞌu nde, saa kúndee ini nde xiꞌin ndiꞌi ya suchi ini vaxi nuu nde.

⁵ Ta sava ichí káni ni naꞌa ndeꞌe, táan na ndeꞌe veꞌe kàà xaꞌa tuꞌun ra. Sava naꞌa síkitaꞌan na naꞌa ya kani taꞌan na xiꞌin nde. Ndee ni ndee xáa chiñu nde, sava ichí ta ni köo kíxi nde, ni köo xíxi nde.

⁶ Xaꞌa ya vaꞌa ni íyo nde nuu naꞌa kua sínaꞌa nde mií nde nuu na ya kúu nde taa, nda xáa chiñu nuu Ndioxi, chi íyo ni ya xínituni nde xaꞌa ya xíni nde ya ndaa, ta xáꞌa ndee ni ini nde nuu ndiꞌi ya, ni köo ndíko koo ini nde, vaꞌa ni ini nde xiꞌin naꞌa. Íkan nde saa xaꞌa ya íyo Tachi I̱í Ndioxi xiꞌin nde, ta ndinuꞌu ni ini nde kúꞌvi ini nde xíni nde na,

⁷ ta ndítuꞌun nde tuꞌun ya ndaa xiꞌin na, saa íyo ni mií ndee Ndioxi xiꞌin nde. Ta saa ndee ni vií íyo nde, ta ya yóꞌó kua chíndee ndeꞌe, nda tá káa ndaꞌa chiñu ndíso nde saa káa ya yóꞌó, chi ndáa ni ya ñaꞌñu kuáꞌá nde xiꞌin ñaꞌñu itin nde.

⁸ Sava ichí xáa toꞌo na ndeꞌe, ta inka ichí kúndasi nuu na xíni na ndeꞌe, ta sava tu ichí káꞌan vaꞌa ni na xaꞌa nde ta sava tu ichí kánaꞌa ni va na xiꞌin nde, sava na káꞌan ndeꞌe vata ku nde, káchi na xaꞌa nde, ta süvi ya ndaa kua káꞌan na xaꞌa nde, chi ndeꞌe, ta nina ya ndaa ndítuꞌun nde.

⁹ Ta sava na vani xíni vaꞌa na ndeꞌe, ta ndása xïni na ndeꞌe, sundi mií Ndioxi ta xíni vaꞌa va ra ini nde. Sava na ndíkani ini xaꞌa nde tá íin nde xa xíꞌi saa íin nde, káchi na, ta süvi ya ndaa kua, chi ndeꞌe táku va ku nde, sava tu ichí xa̱a ndu̱vaꞌa ni na xiꞌin nde, sundi köo ndi̱xaꞌni na ndeꞌe.

¹⁰ Tá íin nde kúsuchi ni ini saa íin nde túvi na, ta süvi ya ndaa kua chi ndiꞌi saa va ichí kúsini ni nde. Tá íin ndeꞌe ndáꞌvi ni saa íin nde túvi na, ta süvi ya ndaa kua, chi ndiꞌi saa va ichí táxi nde ya kuika, ya vaꞌa vaxi nuu ndivi ndaꞌa kuaꞌa ni naꞌa. Tá íin ndeꞌe köo nda loꞌo ñaꞌa nuu, saa íin nde túvi na, ta süvi saa íyo ya chi íyo ndiꞌi va ñaꞌa táxi Ndioxi ndaꞌa nde.

¹¹ Ndiꞌi ndóꞌo̱ ñani yo ndóo ñuu Corinto, ndee ni vaꞌa téꞌe ndi̱kaꞌan nde xiꞌin ndo, saa xu̱na nde nima nde nuu ndo.

¹² Ta ndeꞌe, köo ñaꞌa sási nuu nde ya kuyati nde nuu ndo, sundi nuu mií ndo ta íyo va ya sási nuu ndo ya kuyati ndo nuu nde.

¹³ Tá kuꞌva xáku ndaꞌvi iin ra iva siꞌí nuu seꞌe ra, saa káꞌan i xiꞌin ndo. Kuna ndo nima ndo nuu nde, tá kuꞌva íkan ndeꞌe xiꞌin ndo.

Tá káa veꞌe ñuꞌu Ndioxi saa íin yo kándixa Jesucristo

¹⁴ Ndóꞌo̱, na veꞌe ñuꞌu, ta kätun ndo mií ndo xiꞌin naꞌa, na köo kándixa Ndioxi, chi tá ná ikan ndo saa, ta tá káa iin sindiki kiti táꞌvi xiꞌin inka kiti va saa ndúu ndo. Chi xa xíni mií ndo chiñu vaꞌa ta köo ítaꞌan ya xiꞌin chiñu kíꞌvi ya väꞌa, ni ñu̱ꞌu̱ yéꞌe̱ ta köo ítaꞌan ya xiꞌin ya naá.

¹⁵ Chi ni mií Jesucristo, ta köo íyo yuꞌu ra xiꞌin kiti nǎꞌa, kiti Belial ri kúu Satanás. Ni naꞌa, na kándixa Ndioxi ta küvi koo yuꞌu na xiꞌin naꞌa, na köo kándixa Ndioxi.

¹⁶ Köo íyo yuꞌu naꞌa, na kúu veꞌe ñuꞌu Ndioxi xiꞌin naꞌna ndioxi ya ndíi. Ta saa yoo, chi yo veꞌe ñuꞌu Ndioxi ra táku ku yo. Tá kuꞌva ndi̱kaꞌan mií ra, káchi ra saa: Yeꞌe, ta koo i xiꞌin na, saa kaka i xiꞌin na, Ndioxi na kúu i, saa kúu na, na ñuu mií i, káchi Ndioxi.

¹⁷ Ta káꞌan ka ra, káchi ra saa: Kana koo ndo tañu na väꞌa ñaa. Kuxika ndo nuu na. Ta tïndaa ndaꞌa ndo nuu nda iin ñaꞌa ya väꞌa nuu i. Ta saa vaꞌa ndikuiso i ndóꞌo̱.

¹⁸ Ta yeꞌe, nduu i Iva ndo, ta ndóꞌo̱, nduu ndo seꞌe taa i tin seꞌe síꞌi i, káchi Iva yo Ndioxi, ra ndee ni ndee kúu mií.