2 Corintios 5 - Xochapa Mixteco

¹ Ta xa kúndaa vaꞌa ini yo chi ikin kuñu yo ya kúu mií yo ñuu ivi yóꞌó, ta tá íyo veꞌe manta ya ndíꞌi xaꞌa va saa íyo ya. Sundi tá ná ndiꞌi xaꞌa ya yóꞌó, ta xa íyo inka veꞌe ikin kuñu yo ya xa̱á si̱kuaꞌa Ndioxi nuu ndivi. Ta ya ikán ta köo ndíꞌi xaꞌa ya, ndiꞌi saa ichí koo ya chi süvi na ñuu ivi yóꞌó ku na ndi̱sikuaꞌa ya.

² Ta kivi táku yo ñuu ivi yóꞌó ta ndee ni va táná yo xaꞌa ya ndee ni tíxuꞌvi ikin kuñu yo, ta ndakua kunǎꞌa kuꞌun yo nuu ndivi ya ná taxi kii Ndioxi ikin kuñu yo, ya xa̱á íyo nuu ndivi ndaꞌa yo, túvi yo.

³ Chi tá ná tindaa kivi ya ndundaa ikin kuñu kúu mií yo vitin, ta köo chála yo, chi ndi̱kiꞌin yo inka ikin kuñu ya xa̱á.

⁴ Chi kivi táku yo xiꞌin ikin kuñu yo ya kúu mií yo ñuu ivi yóꞌó, ta táná ni yo, saa xáku suchi ni yo, saa chi köo kúni yo ndundaa ikin kuñu kúu mií yo ndaꞌa yo. Yo kúni nduxaa ka va ku yo, ya ná ndinama ikin kuñu yo nduu ya iin ikin kuñu ya táku, ya köo ndíꞌi ka xaꞌa nda iin kivi.

⁵ Ta mií Ndioxi ku ra i̱kan saa xiꞌin yo, nda̱sa vaꞌa ra yoo ya kuchiñu ndinama ra yoo kivi vaxi, ta xiꞌna Tachi I̱í ra kua ta̱xi ra ndaꞌa yo, ya ndíkuiin ya xaꞌa tuꞌun ra ya ndi̱kaꞌan ra sixinu ra ya ki̱ndoo ra taxi ra ndaꞌa yo.

⁶ Xaꞌa ya ñaa kua ndee ni ndáa ini yo Ndioxi ndiꞌi saa kivi. Ta xa kúndaa ini yo tá kivi táku yo ini ikin kuñu yo ya kúu mií yo vitin, ta täꞌan tindaa yo koo yo xiꞌin Tata yo Jesucristo.

⁷ Ta vitin táku yo ta ndáa ni ini yo xíni yo ra, ta süvi xaꞌa ya xa xi̱ni xiꞌin nuu yo ra kua ndáa ini yo xíni yo ra.

⁸ Chi yoo ta xaꞌa ya ndáa ni ini yo xíni yo ra yakan kúni ni yo kana koo yo ini ikin kuñu yo ya kúu mií yo vitin, ta ndikiꞌin yo kuꞌun yo koo yo xiꞌin ra nuu íyo mií ra.

⁹ Ta iindaa ya ndee ni kúni yo kua xaa súvi yo ndisaa ya kúni mií ra, án táku yo ñuu ivi yóꞌó vitin án kivi ná koo yo xiꞌin ra nuu ndivi.

¹⁰ Saa chi xa kúndaa ini yo vaxi kivi ta kundita ndiꞌi yo nuu Tata yo Jesucristo, nuu índuꞌu ra xáa nani ra kuachi. Ta saa kundita yo nuu ra ya xaa nani ra kuachi xiꞌin iin iin yo nuu chaꞌvi ra yoo xaꞌa chiñu i̱kan yo, án ya vaꞌa i̱kan yo, án ya väꞌa i̱kan yo kivi xi̱taku yo ini ikin kuñu yo ñuu ivi yóꞌó.

Jesucristo ku ra si̱kitaꞌan mani yoo xiꞌin Ndioxi

¹¹ Ta xíni nde ya xíniñuꞌu ndiꞌi naꞌa xaa toꞌo na Ndioxi, xaꞌa ya ñaa kua xáꞌa ni nde ndee ya síxinu nde ini na ya ná xi̱nu ini na kundikun na ya ndaa. Chi mií Ndioxi ku ra xíni vaꞌa ndeꞌe, ta saa kúni nde ná kuni vaꞌa ndo ini nde, ndá kúꞌva ku mií ya ndaa íyo nde.

¹² Ta ya káꞌan nde saa xiꞌin ndo ta köo kúni kachi ya kúni nde chinuu vaꞌa nde tuꞌun mií nde. Káꞌan nde saa xiꞌin ndo ya ná koo vaꞌa ini ndo xiꞌin nde, ta saa kuchiñu ndo ndikuiin ndo kaꞌan ndo xaꞌa nde xiꞌin naꞌa, na ndee ni kútai ini xiꞌin mií. Saa chi íyo sava na ta ndee ni kútai ini na ya vaꞌa ni íkan na túvi na. Ndíꞌi ni ini na xaꞌa ya káꞌan vaꞌa inka naꞌa xaꞌa na, ta köo kíꞌin na kuenta xaꞌa ya ndixa íyo nima na.

¹³ Chi tá tu tá íin nde kíꞌvi saa íin nde túvi ndo, ta nuu Ndioxi kua xáa chiñu nde, án sana köo íyo tu nde tá íyo na kíꞌvi túvi ndo, tá tu saa ta nuu mií va ndo xáa chiñu nde.

¹⁴ Ya kúꞌvi ni ini Jesucristo xíni ra ndeꞌe kua chíndaꞌa ndeꞌe xaa súvi nde chiñu nuu ra, chi ndeꞌe ta kúndaa teꞌe ini nde, iindaa mií ra ku ra ndi̱xiꞌi xaꞌa kuachi ndiꞌi yo ñuu ivi, ta saa ndo̱ꞌo ndiꞌi yo tá íin na ndi̱xiꞌi saa ndu̱u ndiꞌi yo.

¹⁵ Sundi mií Jesucristo ku ra ndi̱xiꞌi xaꞌa ndiꞌi yo ya ná kuchiñu yo ikan yo tá kuꞌva kúni mií ra, ta ná ïkan yo tá kuꞌva kúni mií yo, saa chi mií ra ku ra ndi̱xiꞌi xaꞌa yo, ta ndi̱taku ra.

¹⁶ Ta vitin xiꞌin ndiꞌi saa kivi ya vaxi, ta ndeꞌe ta xa si̱ndikoo nde ya ndíkani ini nde xaꞌa inka naꞌa, köo íkan ka nde tá kuꞌva íkan na ñuu ivi yóꞌó. Ya ndixa kua saa ndi̱kani ini nde xaꞌa na yachi tá täꞌan kundikun nde Jesucristo. Nda ni mií ra ta saa ndi̱kani ini nde xaꞌa ra, ta vitin ta köo ndíkani ka ini nde xaꞌa ra kuꞌva saa.

¹⁷ Saa chi ndiꞌi yo xa ndi̱kitaꞌan xiꞌin Cristo, ta ndu̱u yo na xa̱á i̱kan Ndioxi. Ndiꞌi kuꞌva ya väꞌa, ya yata ndi̱xiyo ini yo, ta xa ki̱ndoo ndiꞌi ya chí sata.

¹⁸ Ta mií Ndioxi ku ra i̱kan saa xiꞌin yo, nda̱sa xa̱á ra yóo, chi si̱kitaꞌan vaꞌa ra yóo xiꞌin mií ra tixin Jesucristo. Ta ñaa ta̱xi ra chiñu ndaꞌa ndeꞌe ya chindee nde naꞌa, ndikitaꞌan mani na xiꞌin ra.

¹⁹ Ta ya káꞌan i xiꞌin ndo kua, kúni i ná kundaa ini ndo, chi tixin Tata yo Jesucristo kua si̱kitaꞌan mani Ndioxi yoo ñuu ivi yóꞌó xiꞌin mií ra, ta köo ndíkiꞌin ra kuenta xaꞌa kuachi nda iin naꞌa. Saa ta̱xi ra chiñu ndaꞌa ndeꞌe ya ndituꞌun nde xiꞌin na ya ná ndikitaꞌan mani na xiꞌin ra.

²⁰ Ta ndeꞌe, tá káa ra xikuaꞌa xíka nuu, saa íin nde, chi ka̱na Ndioxi ndeꞌe ya xíka nuu nde nuu ra ndítuꞌun nde xiꞌin naꞌa. Ta yuꞌu mií Jesucristo kua káꞌan nde xiꞌin ndo, tá káꞌan nde xiꞌin ndo saa, ta tá íin ndeꞌe xáku ndaꞌvi nuu ndo saa íin nde, chi kána Ndioxi ndóꞌo̱ tixin ndeꞌe ya ná ndikitaꞌan mani ndo xiꞌin ra.

²¹ Nda iin kuachi köo ndi̱kan Jesucristo, ta xaꞌa kuachi yoo kua si̱kuiso Ndioxi kuachi sata ra, ya ná kuchiñu yoo nduu yo tá íin naꞌa, na köo ka kuachi kúu mií nuu Ndioxi, xaꞌa ya ndi̱kitaꞌan yo xiꞌin Jesucristo.