2 Corintios 4 - Xochapa Mixteco

¹ Ta ndeꞌe ta köo ndíko koo ini nde xiꞌin chiñu ya ta̱xi Ndioxi ndaꞌa nde íkan nde, chi xaꞌa ya kúndaꞌvi ni ini ra xíni ra ndeꞌe va kua ta̱xi ra chiñu yóꞌó ndaꞌa nde.

² Ta xa si̱ndoo ndaꞌa va nde ndiꞌi ñaꞌa ya kaꞌa̱n ni nuu i̱kan sěꞌe nde tá yachi, ta ni köo naꞌa síndaꞌvi nde xiꞌin ya vata, ni tuꞌun Ndioxi ta köo ndínama nde ya xiꞌin ya vata. Nina xiꞌin ya ndaa kua sínaꞌa nde naꞌa, ta köo ñaꞌa ndi̱tiseꞌe nde nuu na. Mií Ndioxi ku ra ndíkuiin xaꞌa nde ya káꞌan nde nina ya ndaa. Ta xaꞌa ya yóꞌó kua vaꞌa kándixa naꞌa tuꞌun ya káꞌan nde, chi xíni na ya ndaa kua káꞌan nde.

³ Ta sava naꞌa köo kúndaa ini na xiꞌin tuꞌun Ndioxi ya káꞌan ndoso nde nuu na, chi íyo ñaꞌa ndási ini na, ta na ikán ku naꞌa, na ndíkun kuaꞌan ichí nuu ndiꞌi xaꞌa na.

⁴ Saa ndóꞌo na chi kiti nǎꞌa kúu ndioxi ñuu ivi yóꞌó ku ri ndi̱kasi ya xínituni na ya ná kändixa na tuꞌun vaꞌa xaꞌa Jesucristo ya káꞌan nde xiꞌin na, ta na ikán, tá íin na kuáa̱ saa íin na. Chi köo táxi ri kuni na ya yéꞌe̱ luvi ni kúu mií tuꞌun vaꞌa xaꞌa Jesucristo. Chi mií Jesucristo, tá káa níí mií Ndioxi saa káa ra.

⁵ Tá káꞌan ndoso nde tuꞌun vaꞌa xaꞌa Jesucristo xiꞌin naꞌa, ta süvi xaꞌa mií nde kua káꞌan nde xiꞌin na, chi xaꞌa mií Jesucristo kua káꞌan nde xiꞌin na, ya kúu ra Tata yo. Ta ndeꞌe, tá íin moso ndo, na xáa chiñu nuu ndo, saa íin nde. Ta xaꞌa Tata yo Jesucristo kua íkan nde saa.

⁶ Saa chi suvi mií Ndioxi ku ra xa̱ꞌnda chiñu ya ndi̱yeꞌe ñu̱ꞌu̱ yéꞌe̱ nuu naá. Ta suvi mií ra ku ra si̱ndiyeꞌe ya nima yo ya ku̱chiñu yo ndi̱xuna ya xínituni yo, saa kua kuni yo ya luvi ni ndi̱yeꞌe ya kúu mií Ndioxi, ya ndi̱yeꞌe ya nuu Jesucristo.

Mií Ndioxi ku ra táxi ndee ndaꞌa naꞌa na ndáa ni ini xíni Jesucristo

⁷ Tuꞌun vaꞌa xaꞌa Jesucristo ta tá káa íin ya kuika saa íin ya. Ta ndiꞌi yo kándixa tuꞌun yóꞌó tá íin kisi ñuꞌú ya ñúꞌu ya kuika ikán saa íin yo. Yakan vaꞌa xíto inka naꞌa ndee ya íyo xiꞌin yo ta nuu Ndioxi vaxi ya, süvi nuu mií yo vaxi ya.

⁸ Saa chi ni yáꞌa ni ndee tindoꞌo vaxi nuu nde, ta saa ni küchiñu ya xiꞌin nde, yaꞌa va ya nuu nde. Ni ndee ni vaxi ya síndiꞌi ini nde, ta köo ndíko koo ini nde xiꞌin ya.

⁹ Vani ndíkun na xíka na sata nde ya sítixuꞌvi na ndeꞌe, sundi köo síndikoo ndaꞌa Ndioxi ndeꞌe. Vani síkoyo na ndeꞌe nda nuu ñuꞌú ya síndiꞌi xaꞌa na ndeꞌe, sundi köo kúchiñu na sindiꞌi xaꞌa na ndeꞌe.

¹⁰ Nda mií nuu kuaꞌan nde, ta tindoꞌo ya ndóꞌo ikin kuñu nde kua káꞌan xaꞌa nde ya ndóꞌo ni nde, chi saa ndo̱ꞌo ni mií Tata yo Jesucristo ndi̱xiꞌi ra. Ta xiꞌin ya ndóꞌo nde saa kua vaꞌa xíto naꞌa ya táku ra ini nde.

¹¹ Ta ndeꞌe táku nde, ta ndiꞌi saa ichí xíka ìyo ni nde nuu ya kuvi nde xaꞌa Jesús. Íkan nde saa ya ná kuni naꞌa ya táku ra xiꞌin nde, vani ya ndíꞌi xaꞌa ku ikin kuñu nde.

¹² Kuꞌva soꞌva kua ndóꞌo̱ ndeꞌe xaꞌa chiñu ya ta̱xi Ndioxi ndaꞌa nde, nda ìyo kuvi nde, ta xaꞌa ya yóꞌó kua vaꞌa táku ndóꞌo̱ nuu Ndioxi vitin.

¹³ Tuꞌun Ndioxi ya ta̱a na xinaꞌa káchi ya saa: “Ndáa ni ini i xíni i Ndioxi yakan vaꞌa ndi̱kaꞌan i tuꞌun xaꞌa ra”, káchi ya. Ta iin kuꞌva saa ndáa ni ini nde xíni nde Ndioxi, yakan káꞌan ndoso nde tuꞌun ra.

¹⁴ Saa chi ndeꞌe, ta xíni nde ya si̱taku Ndioxi Jesús ta saa sitaku tu ra yoo va. Saa tu ndóꞌo̱ va, iin káchi sitaku ra ndiꞌi yo, ta saa kundaka ra yoo kuꞌun yo xiꞌin ra nuu íyo mií ra.

¹⁵ Ta ndiꞌi ya yóꞌó kua ndóꞌo nde ya ná nduu kuaꞌa ni naꞌa niꞌi ya vaꞌa nuu Ndioxi. Ta xaꞌa ya kuaꞌa ni na xi̱ni soꞌo tuꞌun Ndioxi ya ndi̱kaꞌan ndoso nde xiꞌin na yakan ndu̱u kuaꞌa ni na taxi tixaꞌvi ndaꞌa ra, saa xaa kaꞌnu ni na ra.

¹⁶ Xaꞌa ya ñaa kua ni köo ndíkava ini nde ya xáa chiñu nde. Ya ndaa kua ikin kuñu nde ta iin iin kivi kuaꞌan ndíꞌi xaꞌa ya chi kúyata ya. Sundi ya vaꞌa nde, ta ndúu xa̱á ya iin iin kivi, ta saa ndúu ndee ka ini nde.

¹⁷ Chi tindoꞌo ya ndee ni ndóꞌo nde vitin tíxuvi nde, ta ni süvi ya ndee ni kua, ya yáꞌa va kua, ni köo ítaꞌan ya xiꞌin ñaꞌa ya ndee ni luvi táxi Ndioxi ndaꞌa nde níꞌi nde nuu ra, ta ya táxi ra ndaꞌa nde ta köo ndíꞌi xaꞌa nda iin ichí.

¹⁸ Xaꞌa ya ñaa kua köo xíka ini nde xaꞌa ñaꞌa ya vaꞌa xíto xiꞌin nuu yo, chi ya küvi kuni yo ku ya ndáa yaꞌvi ni ka nuu nde. Saa chi ñaꞌa ya xíni xiꞌin nuu yo ta kama ni va ndíꞌi xaꞌa ya, sundi ñaꞌa ya köo xíni xiꞌin nuu yo ta ndiꞌi saa va ichí íyo ya.