2 Corintios 3 - Xochapa Mixteco

Tuꞌun xa̱á ya ki̱ndoo Tata yo Jesucristo xiꞌin yo xáa chiñu nuu ra

¹ Tá káꞌan nde saa xiꞌin ndo ta ¿án chínuu vaꞌa ni nde tuꞌun nde, túvi ndo? ¡Köo saa íyo ya! Ta ¿án xíniñuꞌu nde kundiso nde tutu sinaꞌa nde nuu ndo ya ndíkuiin ya xaꞌa nde, túvi ndo? ¿Án nduku nde tutu nuu taa ndo ya ndikuiin ya xaꞌa nde nuu kuꞌun nde, tá kuꞌva íkan sava na, túvi ndo?

² Ta vaꞌa ná kundaa ini ndo, chi mií va ndo ku ndo íin tá íin tutu ya ndi̱kaꞌi nuu, saa íyo ndo nima nde, ndíkuiin ndo xaꞌa nde. Tá íyo tutu ya káꞌvi na ta kúndaa ini na xiꞌin ya, saa íyo ndóꞌo̱.

³ Ta teꞌe ni va náꞌa ya chi ndóꞌo̱, tá íin tutu ya ta̱a Jesucristo ta̱xi ra ndaꞌa nde, saa íin ndo, ta süvi xiꞌin nduta káꞌi tutu kua ta̱a ra ya, chi xiꞌin mií Tachi I̱í Ndioxi ra táku kua ta̱a ra ya. Ta köo ndi̱taa ra ya nuu yu̱ú, chi nuu nima naꞌa va ta̱a ra ya.

⁴ Tixin mií Jesucristo kua ndáa ni ini nde xíni nde Ndioxi tá káꞌan nde saa xiꞌin ndo.

⁵ Ta köo kúni kaꞌan nde xaꞌa ya ndíchi ni kúu mií nde, yakan vaꞌa ni íkan nde saa chi süvi saa íyo ya. Ndiꞌi ya íkan nde ta nuu mií Ndioxi kua vaxi ndiꞌi ndee ndaꞌa nde ya íkan nde saa.

⁶ Iindaa mií Ndioxi ku ra ta̱xi ndee ndaꞌa nde ya kuchiñu nde xaa súvi nde tuꞌun ya xa̱á ki̱ndoo ra ikan ra xiꞌin na ñuu ra. Ta tuꞌun ya xa̱á ki̱ndoo ra xiꞌin yo, ta köo ndi̱kaꞌi ya nuu yu̱ú tá kuꞌva ndi̱xiyo ley Ndioxi ya ta̱xi ra ndaꞌa ra Moisés xinaꞌa, chi ley ikán ta ta̱xi ya kuachi xaꞌa naꞌa ndi̱xiꞌi na, sundi Tachi I̱í Ndioxi ta ya táxi kutaku yo ku ya.

⁷ Saa chi ley Ndioxi ya ta̱a ra nuu yu̱ú ikán ta̱xi ra ndaꞌa ra Moisés, ta ndi̱kaꞌan Ndioxi nuu ley ikán xaꞌa naꞌa, na köo xáa súvi ndiꞌi ya káꞌan ya ta xíniñuꞌu na kuvi na, káchi ya xaꞌa na. Yakan tá ndi̱kiꞌin ra Moisés ley ikán ta luvi ka vi ndi̱yeꞌe nuu ra ni köo ndi̱kuchiñu na Israel koto na nuu ra xaꞌa ya ndee ni ndi̱yeꞌe nuu ra. Ni saa va ta köo ndi̱kuchiñu ley ikán koo ya ndiꞌi saa tiempo.

⁸ Tá tu saa ndo̱ꞌo ley ikán, ta ndisaa ka vi luvi ni ka tuꞌun ra ya xa̱á ki̱ndoo Ndioxi xiꞌin yo vitin, yáꞌa ni ka luvi ya ta̱xi Tachi I̱í ra ndaꞌa yo ya koo ya xiꞌin yo.

⁹ Tá tu ndee ni ndi̱yeꞌe ya luvi ni ku̱u mií ley Ndioxi ndi̱kiꞌin ra Moisés, vani káꞌan ya xaꞌa naꞌa ya ndiꞌi xaꞌa na xaꞌa kuachi na, ta yáꞌa ni ka va kaꞌnu ya vaꞌa, ya luvi ni, ya xa̱á, ya káꞌan ndá kuꞌva kua ndíkuiso vaꞌa Ndioxi yo nuu ra, ndúu yo tá íin naꞌa, na köo ka kuachi kúu mií nuu ra.

¹⁰ Tá ndi̱kiꞌin ra Moisés ley ikán ta ndee ni luvi ndi̱yeꞌe nuu ra, sundi tuꞌun Ndioxi ya xa̱á, ya luvi ni ki̱ndoo ra ta̱xi ra ndaꞌa yo, ta yáꞌa ni ka va luvi ya ikán nuu ley Ndioxi ya ndi̱xiyo xinaꞌa.

¹¹ Tá luvi ni va ndi̱xiyo mií ley Ndioxi ikán, vani köo ndïkundee ya koo ya ndiꞌi saa tiempo, ta kachi ka vi ya xa̱á, ya luvi ni ka ki̱ndoo Ndioxi xiꞌin yo vitin, ta nda iin ichí ndïꞌi xaꞌa ya.

¹² Ta xa kúndaa teꞌe ini nde xaꞌa ya saa íyo ya, yakan kua ndee ni vaꞌa ndítuꞌun teꞌe nde xiꞌin ndo.

¹³ Ta ndeꞌe, ta köo íkan nde tá kuꞌva i̱kan ra Moisés, chi ra ikán ta ndi̱kasi ra nuu ra xiꞌin toto ya ná küni na Israel nuu ra ndá kuꞌva kua kuekuee kuaꞌan ndíꞌi xaꞌa ya ndee ni ndi̱yeꞌe nuu ra, vani ya ndíꞌi xaꞌa kua ndee ni ndi̱yeꞌe ku̱u mií ra.

¹⁴ Tá íin toto ya xi̱ndasi nuu ra Moisés, saa ndo̱ꞌo na Israel chi ndi̱kundasi ya xínituni na. Yakan nda vitin tá káꞌvi na ley yata íyo ndaꞌa na ta köo kúndaa ini na xiꞌin ya. Nda vitin ta ndási yaa nuu na, iindaa Jesucristo ku ra kuchiñu kindaa ya ndási nuu na.

¹⁵ Nda vitin tá káꞌvi na ley ya ta̱a ra Moisés, ta tá íin na ndási nuu xiꞌin taꞌan toto ya xi̱ndasi nuu ra Moisés, saa íin na, chi köo kúndaa ini na xiꞌin ya káꞌvi na.

¹⁶ Ta ná kandixa na Tata yo Jesucristo, ta saa kua kuchiñu kindaa ra toto ya ndási nuu na.

¹⁷ Ta ya yóꞌó kua káꞌan xaꞌa Tata yo Jesucristo ya kúu ra Tachi, ta nuu íyo Tachi ra kua sáña ndíka naꞌa, köo núꞌni ka na.

¹⁸ Yakan kua tá kúu ndiꞌi yo kándixa Tata yo Jesucristo, ta köo ndási ka nuu yo, vaꞌa xíto teꞌe yo, yakan kua tá íin yu̱ú tatan saa íin yo chi sínaꞌa teꞌe yo ya luvi ni íkan ra xiꞌin ya ndee ni luvi kúu mií ra. Ta saa kua ndúu yo tá kuꞌva káa mií Tata yo Jesucristo. Ta ya ndínama yo iin iin kivi ta mií Tata yo Jesucristo ra kúu Tachi ku ra íkan saa xiꞌin yo.