2 Corintios 13 - Xochapa Mixteco

¹ Xa yati ni tindaa kivi ya xaa i koto i ndóꞌo̱, ta ichí uni kua xaa i nuu ndo. Yakan ndikaꞌán ini ndo tá kuꞌva káꞌan tuꞌun Ndioxi: “Ná koo uvi án uni naꞌa, na ndíkuiin xaꞌa kuachi ndóꞌo ndo, ta saa kua vaꞌa kuchiñu kunani kuachi xiꞌin ndo”.

² Chi tá ndi̱xaꞌan i xi̱to i ndóꞌo̱ ichí uvi saa kua ndi̱kaꞌan i xiꞌin ndo xaꞌa naꞌa, na kuakiꞌvi ndá ka kuachi, ta saa ndi̱kaꞌan i xiꞌin ndiꞌi ndo ya koo ndaku ini ndo xiꞌin na íkan saa. Ta vitin íyo xíka ni i nuu ndo, ta saa káꞌan tuku va i xiꞌin ndo vitin: “Tá tu köo kúni ndo sindoꞌo i ndóꞌo̱ xaꞌa kuachi ndo, ta vaꞌa sindoo ndo ya väꞌa íkan ndo”.

³ Saa ikan i xiꞌin ndo xaa nani i kuachi ndo xiꞌin ndo chi kúni ndo kundaa ini ndo án ya ndixa kua ta̱xi Jesucristo ichí ndaꞌi i ya ndituꞌun i tuꞌun ra xiꞌin ndo. Chi ni mií Cristo ta köo íkan ra xiꞌin ndo tá kuꞌva íkan iin taa ra köo ndee kúu mií, yáꞌa ni va ndee kúu mií ra.

⁴ Ya ndixa kua vita ni ndi̱xiyo ini ra tá xi̱nuu ra nuu cruzin ndi̱xiꞌi ra, sundi vitin ta táku ra xiꞌin ndee Ndioxi. Ta saa ndeꞌe, tá kuꞌva vita ndi̱xiyo ini Jesucristo, saa vita íyo ini nde. Ta kutaku nde xiꞌin ra xaꞌa ndee Ndioxi, tá kuꞌva táku mií Jesucristo ya kuchiñu nde chindee nde ndóꞌo̱.

⁵ Yakan vaꞌa koto ndoso ndo mií ndo ndá kuꞌva íyo ndo, ta saa kua vaꞌa kundaa ini ndo án ndinuꞌu ini ndo kándixa ndo Jesucristo. Tá vaꞌa ka̱na ndo ya xi̱to ndoso ndo mií ndo, ta saa kua kúndaa ini ndo ya ndixa kua kándixa ndo ra, ta íyo ra xiꞌin ndo. Tá tu köo vaꞌa ndíkana ndo, ta kúni kachi ya köo kándixa ndo ra, ta köo íyo ra xiꞌin ndo.

⁶ Chi ndeꞌe, ta kúni nde ná kundaa ini ndo xaꞌa nde ya ka̱na vaꞌa nde nuu ya xi̱to ndoso nde mií nde, ta kúu nde taa nda ndixa kándixa Jesucristo, ta íyo ra xiꞌin nde.

⁷ Nina saa káꞌan ni nde xaꞌa ndo xiꞌin Ndioxi ya ná ïkan ndo ndá ka ñaꞌa väꞌa, ya káꞌan nde saa xiꞌin ndo, ta süvi xaꞌa ya kúni nde ya ná kuni naꞌa ya ndi̱yaꞌa vaꞌa nde nuu ya xi̱to ndoso nde mií nde kua. Káꞌan nde saa xiꞌin ndo ya ná ikan ndo ñaꞌa vaꞌa nuu Ndioxi, vani sava ndo ndíkani ini xaꞌa nde ya köo ndi̱yaꞌa nde nuu ya xi̱to ndoso nde mií nde, kaꞌán ndo.

⁸ Chi ndeꞌe, ta küvi ikan nde ndá ka ñaꞌa ya köo íyo yuꞌu xiꞌin ya ndaa, nina ya vaꞌa, ya íyo yuꞌu xiꞌin ya ndaa kua xíniñuꞌu nde ikan nde.

⁹ Yakan kúsini ni va nde tá vita ni ini nde, chi ndeꞌe, ta kúni nde ya ná nduu ndee ni ndóꞌo̱. Saa káꞌan ni nde xaꞌa ndo xiꞌin Ndioxi ya ná nduu xa̱á ka ndo, saa xinu ndo nduu ndo naꞌa, na vaꞌa ni.

¹⁰ Táa kuee i tutu yóꞌó xaa ya nuu ndo yachi ka tá täꞌan xaa i nuu ndo, tá íyo xíka ni i saa káꞌan i xiꞌin ndo. Chi tá ná xaa i nuu ndo ta köo xíniñuꞌu i koo ndaku ni ini i xiꞌin ndo xiꞌin ichí ya ta̱xi Tata yo ndaꞌa i kuniñuꞌu i xiꞌin ndo. Chi ichí ta̱xi ra ndaꞌa i xaꞌa ndo, ta ya chindee taꞌan i xiꞌin va ndo kua, süvi xaꞌa ya sindiꞌi xaꞌa i ndóꞌo̱ xiꞌin kua.

Káꞌan ndioxi ra Pablo xiꞌin na kándixa Jesús ndóo ñuu Corinto

¹¹ Ñani yo, ya yóꞌó ku ndiꞌi ya káꞌan nde xiꞌin ndo ta vaꞌa ná kusini ni ndo, saa chikaa ni ndo ndee ya kuaꞌnu ka ndo xiꞌin tuꞌun Ndioxi, ta ná ndu xaa ka ndo, ná nduu ndo tá kuꞌva kúni Ndioxi, ta iin yuꞌu koo ndo xiꞌin taꞌan ndo. Ta saa kua vaꞌa koo Ndioxi xiꞌin ndo, ra táxi ya vaꞌa koo ini ndo, xiꞌin ya kúꞌvi ni ini ra xíni ra ndóꞌo̱.

¹² Saa kaꞌan ndioxi ndo xiꞌin taꞌan ndo, toꞌo ni kaꞌan ndioxi ndo xiꞌin na.

¹³ Ta ndiꞌi na taꞌan yo, na veꞌe ñuꞌu, tíꞌvi ni na tuꞌun mani xaa nuu ndiꞌi ndo.

¹⁴ Ta saa ná niꞌi ni ndo ya vaꞌa nuu Tata yo Jesucristo xiꞌin ya kúꞌvi ni ini Iva yo Ndioxi xíni ra ndóꞌo̱. Saa ná koo Tachi I̱í Ndioxi xiꞌin ndiꞌi ndo ndiꞌi saa ichí. Saa ná koo.