2 Corintios 11 - Xochapa Mixteco

Ndítuꞌun ra Pablo xaꞌa nda apóstol nda vata

¹ Ndúku ni i ya mani nuu ndo ya xaꞌa ndee ini ndo xiꞌin i ya kuni soꞌo ndo ya káꞌan i xiꞌin ndo, án sana tá káa ya káꞌan iin ra sána va saa káa ya káꞌan ni i xiꞌin ndo xaꞌa i, ta xaꞌa ndee ni ini ndo xiꞌin va i.

² Chi yeꞌe, ta ndee ni ndíꞌi ini i xaꞌa ndo, tá kuꞌva ndíꞌi ini Ndioxi xíni ra ndóꞌo̱, saa ndíꞌi ni ini i xíni i ndóꞌo̱. Chi ki̱ndoo i taxi i ndóꞌo̱ ndaꞌa ra, tá kuꞌva íkan taa, táxi ra seꞌe síꞌi ra tíndaꞌa yá xiꞌin iin taa. Ta kuꞌva saa íyo yeꞌe nditaxi i ndóꞌo̱ ndaꞌa Jesucristo tindaꞌa ndo xiꞌin ra. Tá kuꞌva íin ná kuâán taki vali ná täꞌan tindaa nda iin taa, kuꞌva saa kúni i koo ndo nditaxi i ndóꞌo̱ ndaꞌa Jesucristo.

³ Chi yeꞌe, ta ndíꞌi ni va ini i xiꞌin ndo, ìyo ni ndoꞌo ndo tá kuꞌva ndo̱ꞌo yá Eva, xiꞌin ya vata si̱ndaꞌvi kiti ko̱ó yá. Xaꞌa ya ñaa kua ndíꞌi ni ini i xíni i ndóꞌo̱. Koto ka saka naꞌa, na vata xi̱ní ndo, ta sindoo ndo ya ndee ni vaꞌa ndinuꞌu ini ndo ndíkun ndo ichí vaꞌa xaꞌa Jesucristo.

⁴ Chi ndóꞌo̱ ta ya vaꞌa ndíkuiso ndo ku ndiꞌi va tuꞌun ya ndíkani inka nda taa nuu ndo, ni xa síin kua káꞌan nda xiꞌin ndo, sínaꞌa nda ndóꞌo̱. Ta saa vaꞌa ni ndíkuiso ndo inka nuu tachi, ta süvi taꞌan Tachi I̱í Ndioxi ya xa ndi̱kiꞌin ndo ku ya káꞌan nda xaꞌa xiꞌin ndo, ta saa vaꞌa ni xíni soꞌo ndo ya káꞌan nda xiꞌin ndo xaꞌa tuꞌun vaꞌa xaꞌa Jesucristo. Ta süvi taꞌan kuꞌva si̱naꞌa nde ndóꞌo̱ kua káꞌan nda xiꞌin ndo, chi xa síin va kua káꞌan nda xiꞌin ndo.

⁵ Ta saa chínuu vaꞌa ni nda tuꞌun nda ya ndee ni naꞌnu nda, káchi nda ndi̱xaa nda nuu ndo. Ta yeꞌe, ta nda loꞌo köo ni̱nu̱ kúni i nuu nda ñaa, ya káꞌan nda saa.

⁶ Án sana köo xíni i ndá kuꞌva ndituꞌun vaꞌa ni i nuu naꞌa, sundi ya xíni i ya ndaa xaꞌa Ndioxi, ta xíni vaꞌa va i, saa íyo ya xa si̱naꞌa i nuu ndo, téꞌe ni va íyo ya si̱naꞌa i ndóꞌo̱.

⁷ Ta ¿án väꞌa ndi̱kan i xaꞌa ya köo ndi̱kiꞌin i nda iin peso loꞌo ndaꞌa ndo? Chi yeꞌe, ta nda̱sa ni̱nu̱ i mií nuu ndo ya ná kuaꞌnu ka ndo xiꞌin tuꞌun ra tá ndi̱tuꞌun i tuꞌun vaꞌa xaꞌa Jesucristo xiꞌin ndo? Ta ¿án ya uun kuiti va ku tuꞌun ya ndi̱kaꞌan i xiꞌin ndo?

⁸ Chi yeꞌe, ta ya kuchiñu xaa súvi i chiñu chindee taꞌan i xiꞌin ndo, ta na ñani yo, na inka veꞌe ñuꞌu ku na chi̱ndee taꞌan xiꞌin i, ta̱xi na xuꞌun ndaꞌa i tá ndi̱xaa i nuu ndo.

⁹ Tá ndi̱xiyo i xiꞌin ndo ñuu Corinto, ni kumani va ñaꞌa ya xíniñuꞌu i nuu i, ta köo ndi̱sindiꞌi i ini nda iin ndo ya nduku i ñaꞌa nuu ndo. Tá ndi̱xaa nda ñani yo nda ndóo chí estado Macedonia nuu i, ta nda ikán ku nda chi̱ndee taꞌan xiꞌin i xaꞌa ñaꞌa ya xi̱niñuꞌu i. Ta kuꞌva saa ikan i nda vitin, sïndiꞌi i ini ndo ya chindee taꞌan ndo xiꞌin i xaꞌa ñaꞌa ya xíniñuꞌu i.

¹⁰ Ta kúndaa teꞌe ini i ya íyo ya ndaa xaꞌa Cristo xiꞌin i, saa kúndaa teꞌe ini i ya nda iin naꞌa küchiñu kindaa ya kúsini ni i, ya kïꞌin i xuꞌun ndaꞌa nda iin ndóꞌo̱ ndóo ñuu Corinto ya ndóꞌni estado Acaya ñaa.

¹¹ Xaꞌa ya káꞌan i saa xiꞌin ndo, ta süvi ya köo kúꞌvi ini i xíni ndóꞌo̱ kua, mií Ndioxi xíni ya ndee ni kúꞌvi ini i xíni i ndóꞌo̱.

¹² Ta nda vitin, ta täxi i ya chaꞌvi nda iin ndo yeꞌe xaꞌa ya ndítuꞌun i xiꞌin ndo xaꞌa Jesucristo, sïndiꞌi i ini nda iin ndo. Chi köo kúni i ya chinuu vaꞌa nda apóstol vata ikán tuꞌun nda, xaꞌa ya káꞌan nda ya iin káchi íin nda tá kuꞌva íin ndeꞌe, káchi nda, ta süvi ya ndaa kua.

¹³ Chi nda vata va ku nda apóstol ikán, ta ndása nda mií nda apóstol, ta süvi ya ndixa kua xáa chiñu nda nuu Cristo, nda síndaꞌvi naꞌa va ku nda.

¹⁴ Ta vaꞌa ná ndïkanda ini yo xaꞌa ya íkan nda saa, chi saa íkan tu mií va kiti nǎꞌa, kiti Satanás: vaꞌa ndása ri mií ri, ndúu ri tá íyo na tatun Ndioxi, na yéꞌe̱.

¹⁵ Yakan nda naꞌa, na xáa chiñu nuu ri ta ndása na mií na, ndúu na tá íin naꞌa, na ndee ni vaꞌa ini, na ndaa ni ini, ta saa vaxi kivi tá tiempo sindiꞌi, ta mií Ndioxi ku ra chaꞌvi ñaꞌa tá kuꞌva íyo chiñu i̱kan na, saa koo ya chaꞌvi ra na.

Ndítuꞌun ra Pablo ya ndee ni ti̱xuꞌvi ra

¹⁶ Saa káꞌan tuku i xiꞌin ndo ya ná ndïkani ini ndo xaꞌa i ya káꞌan i xiꞌin ndo ya tá káa iin ra kíꞌvi saa káa i, chi tá tu ndá ndóꞌo̱ ndíkani ini xaꞌa i ya kíꞌvi i, túvi ndo. Ta vaꞌa kuni soꞌo ndo ya káꞌan i xiꞌin ndo, saa kua kutai loꞌo tu ini yeꞌe va xiꞌin ndo.

¹⁷ Xaꞌa ya káꞌan vaꞌa i xaꞌa mií i ta nda tá káa iin ra kíꞌvi saa káa i, xaꞌa ya chínuu vaꞌa i tuꞌun i, chi süvi xiꞌin ichí táxi Tata yo Jesucristo ndaꞌa i kua káꞌan i, ya káꞌan i saa.

¹⁸ Chi kuaꞌa ni na ndóo ñuu ívi yóꞌó xáa kaꞌnu ni na mií na, ta saa tu yeꞌe va, ná xáa kaꞌnu loꞌo i mií i.

¹⁹ Chi ndóꞌo̱, ta ndee ni ndíchi ndo, ta saa ni vaꞌa ni kúni ndo xíni ndo na kíꞌvi ikán, yakan vitin ta tá íkan na ikán, saa íkan tu yeꞌe va ya ná kuni soꞌo ndo ya káꞌan i xiꞌin ndo.

²⁰ Chi ndóꞌo̱ ta xáꞌa ndee ni ini ndo xiꞌin naꞌa, na xáa nduxa xiꞌin ndo xáa chiñu ndo, ta táva na xuꞌun ndaꞌa ndo. Ta saa vaꞌa ni kúni ndo xíni ndo na ya xáꞌnda na chiñu nuu ndo. Vaꞌa ni kúni ndo xíni ndo naꞌa, na vaꞌa ni ka náꞌa nuu mií ndo, nda káni na xaꞌnda nuu ndo, ta köo káꞌan ndo.

²¹ Kúkaꞌán ni nuu i káꞌan i saa xiꞌin ndo, chi ndeꞌe, ta nda loꞌo köo ndíxaa nduvaꞌa nde xiꞌin ndo, tá kuꞌva íkan nda ñaa xiꞌin ndo. Xaꞌa ya ñaa kua vita ni va ndi̱xiyo ini nde xiꞌin ndo, túvi ndo. Tá ndá naꞌa kútoo kaꞌan vaꞌa xaꞌa mií, ta saa tu yeꞌe va, káꞌan vaꞌa i xaꞌa i, vani tá káa iin ra yáꞌa loꞌo ini va saa káa i, ya káꞌan i kuꞌva saa xiꞌin ndo.

²² Ta ¿án xaꞌa ya kúu nda, nda hebreo kua kútai ni ini nda? Chi saa tu yeꞌe va, ra hebreo ku tu yeꞌe va. Ta ¿án xaꞌa ya kúu nda, nda ñuu Israel kua íkan nda saa? Chi saa tu yeꞌe va, yeꞌe ñuu Israel ku tu yeꞌe va. Ta ¿án xaꞌa ya kúu nda seꞌe ñani sikua ra Abraham kua íkan nda saa? Chi saa tu yeꞌe va, seꞌe ñani sikua ra Abraham ku tu yeꞌe va.

²³ Tá tu kútai ni ini nda chi nda xáa chiñu ni nuu Cristo ku nda túvi nda, ta yeꞌe, ta ndee vaꞌa ka va xáa chiñu i nuu ra. Nda tá káa iin ra kíꞌvi va saa káa i ya káꞌan i saa. Chi yeꞌe ta ndee ni ka chíkaa i ndee nuu nda ñaa, kuaꞌa ni ichí ku̱nduvaꞌa na xiꞌin i, ta kuaꞌa ni ichí chi̱kaa na yeꞌe veꞌe kàà nuu nda ñaa, ta ndi̱xaꞌa ndee ndiꞌi ini i ndo̱ꞌo i saa, ta kuaꞌa ni ichí ku̱ni kaꞌni na yeꞌe.

²⁴ Ta uꞌun ichí ti̱in na judío yeꞌe, ka̱ni ni na yeꞌe xiꞌin cuarta. Oko xaꞌun kumi ichí ka̱ni na yeꞌe.

²⁵ Uni ichí ka̱ni ni na yeꞌe xiꞌin itun, ta iin ichí siloꞌo kaꞌni na yeꞌe xiꞌin yu̱ú, ta uni ichí ndi̱kava itun barco nuu ndíkaa i kuaꞌan i ini nduta ñûꞌu, ta iin ichí nda̱ñuꞌu i iin nduvi niuun maꞌñu nduta ñûꞌu.

²⁶ Ta saa ndá yokan kuaꞌan vaxi i ndi̱xika i ndi̱kaꞌan ndoso i tuꞌun xaꞌa Tata yo, ta sava ichí ìyo ni ndi̱yaꞌa i nuu nduta i̱ta, ta saa ìyo ni tu ndi̱xika i nuu na kuiꞌna va, ta saa ndee ni ìyo ndi̱xika tu i nuu na taꞌan i, xiꞌin naꞌa, na köo kúu ñuu i. Ta saa ndee ni ìyo ndi̱xika i ñuu naꞌnu, ni iku yuyu kua ta ìyo ni ndi̱xika i, ta ìyo ni tu ndi̱xika i nuu nduta ñûꞌu va, saa tu ìyo ni ndi̱xika i tañu naꞌa, na káꞌan kúu na ñani yo, ta süvi na ndaa ku na, na vata va ku na.

²⁷ Ndee ni ndee xa̱a chiñu i nda ku̱naa ni i, kuaꞌa ni ñǔu ndi̱xiꞌi i maꞌna, ndo̱ꞌo ni ini i, ta sava ichí kúni kuxi ni i saa ndi̱ndichi ni i tikuii, ta sava ichí ndee ni vixin xíꞌi i, ta ni köo toto kundixi i.

²⁸ Ta kuaꞌa ni ka tindoꞌo ki̱xi nuu i, ta ndiꞌi saa ichí íyo ni ya síndiꞌi ini i, chi ndee ni ndíꞌi ini i xaꞌa ndiꞌi na kándixa Jesucristo na ndóo kuaꞌa ni ñuu.

²⁹ Tá ndá naꞌa ndúvita ini ta nda yeꞌe ndúvita ini xiꞌin na, tá ndá na síndikava inka naꞌa nuu kuachi, ta ndee ni sáa ini i xíni i na íkan saa.

³⁰ Tá tu xíniñuꞌu i kutai ni ini i, ta vaꞌa kutai ni va ini i xaꞌa ñaꞌa ya xíni i vita ni ini i nuu.

³¹ Chi mií Ndioxi Iva mií Tata yo Jesucristo ku ra xíniñuꞌu ni yo xaa kaꞌnu yo ndiꞌi saa ichí, ta mií ra ku ra xíni xaꞌa ya kaꞌan i ya ndaa xiꞌin ndo.

³² Chi tá ndi̱xiyo i ñuu Damasco ta xa̱ꞌnda chiñu ra gobernador, ra xa̱a chiñu nuu ra rey Aretas, xa̱ꞌnda ra chiñu ya ná kundaa na yeꞌe nuu íyo yéꞌe ñuu na, tá ná keta i ta saa tiin na yeꞌe chikaa na yeꞌe veꞌe kàà, káchi ra xaꞌa i.

³³ Ta köo ndikuchiñu na tiin na yeꞌe, chi nda ñani yo, nda xíni taꞌan xiꞌin i, ta chi̱kaa nda yeꞌe ini iin itun tiká ta saa si̱nuu nda yeꞌe veꞌe ndana ya ndási nuu ñuu. Kuꞌva saa ndi̱kaku i ke̱ta i ñuu na, köo ndi̱xaꞌan i veꞌe kàà.