2 Corintios 10 - Xochapa Mixteco

Ndíkuiin ra Pablo xaꞌa ra nuu naꞌa ya ta̱xi Ndioxi ichí ndaꞌa ra kaꞌnda chiñu ra veꞌe ñuꞌu

¹ Ta yeꞌe Pablo, ku ra káꞌan xiꞌin ndo xáku ndaꞌvi i nuu ndo xiꞌin ya vaꞌa, ya mani ta̱xi Cristo ndaꞌa i. Saa chi sava ndo káꞌan xaꞌa i ya ndee ni vita ini i tá íyo i xiꞌin ndo, sundi tá íyo xíka i nuu ndo ta ndee ni ndaku ini i, káchi ndo xaꞌa i.

² Ta xaꞌa ya ñaa kua káꞌan i xiꞌin sava ndo vaꞌa ka ná ndinama ini ndo xaꞌa ya ndíkani ini ndo xaꞌa i saa, ta ni yeꞌe ta ndäꞌi kueꞌe i nuu ndo ya ndíkani ini ndo xaꞌa i ya xáa súvi i chiñu tá kuꞌva íkan na ñuu ivi yóꞌó, káchi ndo xaꞌa i. Chi yeꞌe ta xa íyo ndúvi va i ya kaꞌan i xiꞌin sava ndo.

³ Ta ya ndixa kua íyo nde xiꞌin ikin kuñu nde ñuu ivi yóꞌó, sundi köo íyo nde tá kuꞌva íyo na ñuu ivi yóꞌó, chi köo kánitaꞌan nde tá kuꞌva kánitaꞌan na ñuu ivi yóꞌó.

⁴ Saa chi ndeꞌe, ta köo xíniñuꞌu nde taꞌan ndaꞌa chiñu ya xíniñuꞌu na ñuu ivi yóꞌó tá kánitaꞌan na, chi ndeꞌe, ta ndee Ndioxi va ku ya xíniñuꞌu nde ya kuchiñu sindiꞌi xaꞌa nde ndiꞌi ndee ya väꞌa, ya ndíkuita kánitaꞌan xiꞌin nde.

⁵ Ta suvi xiꞌin ndee Ndioxi kua kuchiñu nde sindiꞌi xaꞌa nde ndiꞌi tuꞌun väꞌa ya kánaꞌa naꞌa xaꞌa nde. Ta kuꞌva soꞌva kua kúchiñu nde síndiꞌi xaꞌa nde ndiꞌi ñaꞌa ya ndee ni xáa tai ini naꞌa, chi köo táxi ya kundaa ini na xaꞌa Ndioxi. Ta saa sínaꞌa nde na ya ná nditaxi ndiꞌi na ya ndíchi ndíkani ini na ndaꞌa Jesucristo, saa kua kuchiñu na xaa súvi na ya kúni mií ra.

⁶ Chi ndeꞌe, tá ná kuni nde ya ndee ni vaꞌa ndíkun ndo Jesucristo, ta xa íyo ndúvi nde taxi nde ndoꞌo naꞌa, na köo xíin kándixa ra.

⁷ Ta ndóꞌo̱, ndisaa kuiti tá íin ñaꞌa ya xíto ndo íkan naꞌa, ta saa kua íyo ya íkan ndo xiꞌin na. Ta án ndá naꞌa ndíkani ini ya ndee ni vaꞌa ndíkun na Jesucristo túvi na, ta saa xíniñuꞌu na kundaa ini na, tá kuꞌva ndíkun na ra, kuꞌva saa ndíkun tu ndeꞌe va ra.

⁸ Án sana ndíkani ini ndo xaꞌa i ya yáꞌa ni ndee káꞌan i xiꞌin ndo, xaꞌa ya kúu mií i chiñu, ya ta̱xi Tata yo Jesucristo ndaꞌa i xáꞌnda chiñu i nuu ndo, kaꞌán ndo. Sundi yeꞌe, ta köo kúkáꞌán nuu i xiꞌin ya, chi mií ra ku ra ta̱xi ndee ndaꞌa nde ya kuchiñu nde chindee taꞌan nde xiꞌin ndo, ta süvi ya síndiꞌi xaꞌa nde ndóꞌo̱ kua.

⁹ Ta köo kúni i ya ndikani ini ndo kúni i síꞌvi i ndóꞌo̱ xiꞌin tutu ya táa i xaa nuu ndo.

¹⁰ Chi sava ndo káꞌan: “Tutu ya táa ra Pablo ñaa, ta ndee ni kueꞌe káꞌan ra xiꞌin ya, ndaku ni káꞌan ra, sundi mií ra ta ni köo ndee káꞌan vi ra, vita ni va ini ra, ta ni köo ndáa yaꞌvi tuꞌun káꞌan ra nuu naꞌa, káchi ndo xaꞌa i”.

¹¹ Ta vaꞌa va ná kundaa ini naꞌa, na káꞌan xaꞌa i saa, chi tá ná xaa i nuu ndo koto i ndóꞌo̱, ta saa kuni soꞌo ndo kaꞌan i xiꞌin ndo, tá kuꞌva káa ya ta̱a i nuu tutu xaa nuu ndo, saa koo ya kaꞌan i xiꞌin ndo tá ná xaa i nuu ndo.

¹² Chi ndeꞌe, ta nda loꞌo köo ndíꞌi ini nde xaꞌa naꞌa, na chínuu vaꞌa ni tuꞌun, tá kuꞌva íkan sava na, ndee ni káꞌan vaꞌa na xaꞌa mií na. Tá íkan na saa, káꞌan vaꞌa na xaꞌa mií na ta ya ikán káꞌan xaꞌa na ya ndixa kua ni köo kúndaa ini na xaꞌa ya káꞌan na.

¹³ Saa chi ndeꞌe ta küvi kutai ni ini nde xiꞌin chiñu ya íkan inka na, chi mií Ndioxi ku ra si̱naꞌa nuu nde nda mií kua xinu koo nde xaa chiñu nde nuu ra. Ta nda xaꞌa ndóꞌo̱ kua ta̱xi ra ichí ndaꞌa nde ndi̱xaa nde nuu ndo ya xaa chiñu nde xiꞌin ndo ñuu Corinto ñaa.

¹⁴ Ta ndeꞌe ku nde xiꞌna ndi̱xaa nuu ndo ndi̱tuꞌun nde tuꞌun vaꞌa xaꞌa Jesucristo xiꞌin ndo, ta xiꞌin chiñu ya xa̱a súvi nde nuu ndo, ta i̱kan nde ya tá kuꞌva kúni mií Ndioxi ta nda loꞌo köo ndi̱yaꞌa ndoso nde chiñu ya ta̱xi ra ndaꞌa nde.

¹⁵ Chi ndeꞌe, ta nda loꞌo köo xíka ini nde xaa kaꞌnu nde mií nde xiꞌin chiñu ya xáa súvi inka naꞌa. Sundi ya kúni ni ndeꞌe kua ná kuaꞌnu ni ka ndo xiꞌin tuꞌun Ndioxi ta saa ná kundàà ni ini ndo kuni ndo ra, chi tá íkan ndo saa, ta saa kua xáꞌnu ka chiñu ya íkan ndeꞌe xiꞌin ndo.

¹⁶ Saa kua vaꞌa kuꞌun ka nde inka ka ñuu ya núꞌu xíka ni nuu ndóo ndóꞌo̱ yóꞌó. Kuꞌun nde ndituꞌun nde tuꞌun vaꞌa xaꞌa Jesucristo xiꞌin naꞌa ya kaku na, ta küꞌun nde nuu xa xa̱á xá chiñu inka naꞌa ya chinuu vaꞌa ni nde mií nde xiꞌin chiñu ya xa íkan inka na.

¹⁷ Chi saa káꞌan tuꞌun Ndioxi ya ta̱a na xinaꞌa, káchi ya saa: “Tá ndá naꞌa kúni chinuu vaꞌa ni tuꞌun xaꞌa ndá ka ñaꞌa íkan na, ta vaꞌa ka ná chinuu vaꞌa ni na tuꞌun xaꞌa ya íkan Ndioxi va”, káchi ya.

¹⁸ Saa chi naꞌa, na ndee ni ndáa yaꞌvi nuu Ndioxi ku naꞌa, na chínuu vaꞌa ni mií ra tuꞌun xaꞌa. Ta köo ndáa yaꞌvi ya káꞌan vaꞌa ni na xaꞌa mií na nuu ra.