2 Corintios 1 - Xochapa Mixteco

¹ Yeꞌe Pablo, xiꞌin ra ñani yo Timoteo ku nde táa tutu yóꞌó xaa ya nuu ndo. Chi saa chi̱tuni mií Iva yo Ndioxi ka̱na ra yeꞌe ya xíka i chiñu nuu Tata yo Jesucristo. Táa nde ya xaa ya nuu ndóꞌo̱, na veꞌe ñuꞌu, ndóo ñuu Corinto xiꞌin ndiꞌi ka ndóꞌo̱, na i̱í, ndóo ndiꞌi saa mií ñuu ya ñúꞌu mií estado Acaya ñaa.

² Ta ndiꞌi saa kivi ná niꞌi ni ndo ya vaꞌa nuu Iva yo Ndioxi xiꞌin Tata yo Jesucristo, saa ná koo vaꞌa ni ini ndo.

Táxi ni ra Pablo ndixaꞌvi ndaꞌa Ndioxi

³ Saa ná kunuu vaꞌa ni ya toꞌo Ndioxi, ra kúu Iva Tata yo Jesucristo, Iva yo ra kúndaꞌvi ni ini xíni yoo ku ra ta ndiꞌi saa ichí síndiko ra ini yo.

⁴ Chi mií ra ku ra síndiko ini yo xiꞌin ndiꞌi ni kúu tindoꞌo ya ndóꞌó yo, ta saa kuchiñu yo chindee taꞌan yo xiꞌin inka naꞌa, sindiko yo ini na, tá kuꞌva síndiko mií ra ini yo.

⁵ Saa chi ndeꞌe, ta ndee ni kuandaa kuachi sata nde, tíxuꞌvi ni nde xaꞌa ya ndíkun nde Tata yo Jesucristo. Yakan tá kuꞌva kuandaa ni kuachi nde, kuꞌva saa kuandaa ni tu ya síndiko ra ini va nde.

⁶ Ta ya ndóꞌo ni ini ndeꞌe, ta xaꞌa ya vaꞌa sindiko nde ini ndo kua xiꞌin ya kaku ndo kua ndóꞌo nde saa. Ta saa tu tá síndiko Ndioxi ini nde, saa tu ndeꞌe va, vaꞌa sindiko nde ini ndo. Saa kua kuchiñu ndo xaꞌa ndee ini ndo yaꞌa ndo nuu tindoꞌo, taꞌan tindoꞌo ya ndóꞌo ndeꞌe.

⁷ Ta vaꞌa ni va ndáa ini nde xíni nde ndóꞌo̱, yakan kua tá íyo ndo tindee ini xiꞌin nde kivi ndóꞌni nde nuu tindoꞌo, ta saa tu íyo ndo xiꞌin nde tá síndiko Ndioxi ini va nde.

⁸ Ñani yo, kúni nde ná kundaa ini ndo xaꞌa tindoꞌo ya ndee ni ki̱xi nuu nde chí estado Asia. Yáꞌa ni vi ndee tindoꞌo ki̱xi nuu nde, ndi̱ndiꞌi ka vi ini nde, ni köo ndi̱chikaa ka ini nde ya kutaku nde.

⁹ Ta xa iin chi̱kaa va ini nde kuvi nde, chi siloꞌo yuꞌu kuvi nde, ndikuu. Saa ndo̱ꞌo nde ya ná sikuaꞌa nde kundaa ni ini nde kuni nde Ndioxi, ta ná kündaa ni ini nde kuni ndee mií nde, saa chi iindaa Ndioxi ku ra sítaku na ndíi, na xa ndi̱xiꞌi.

¹⁰ Siloꞌo yuꞌu kuvi nde, ta iindaa mií Ndioxi ku ra si̱kaku ndeꞌe, köo ndi̱xiꞌi nde. Chi kúndaa ini nde ya síkaku ra ndeꞌe, ta saa xíni nde ya sikaku tuku va ra ndeꞌe,

¹¹ tá káꞌan ni ndo xiꞌin Ndioxi xaꞌa nde. Tá tu kuaꞌa ni naꞌa káꞌan xaꞌa nde xiꞌin Ndioxi, ta saa kuaꞌa ni na taxi tixaꞌvi ndaꞌa ra xaꞌa ya vaꞌa níꞌi ndeꞌe nuu ra.

Káꞌan ra Pablo ndá xaꞌa kua köo ndi̱xaꞌan ka ra ñuu Corinto

¹² Ta ndeꞌe, ta ndee ni va kúsini nde chi vívií ni va ndi̱xiyo nde xiꞌin ndiꞌi ni kúu naꞌa, ta ndee ni ka vaꞌa xi̱taꞌan nde xiꞌin ndóꞌo̱. Chi köo ndi̱xiyo nde xiꞌin ndo tá kuꞌva ndíkani ini mií na ñuu ivi yóꞌó, tá kuꞌva kúni mií Ndioxi kua ndi̱xiyo nde xiꞌin ndo xaꞌa ya kúꞌvi ni ini ra xíni ra ndóꞌo̱.

¹³ Ndiꞌi ya ta̱a nde nuu tutu xaa ndaꞌa ndo ta köo uvi ndi̱xiyo yuꞌu nde xiꞌin ya, ndaa ni va íyo ya ndi̱kaꞌan nde xiꞌin ndo. Ya kuchiñu kundaa ini ndo xiꞌin va ku ya ta̱a nde xaa nuu ndo. Saa kúni nde ná kundaa ini ndo xiꞌin ndiꞌi ya káꞌan nde xiꞌin ndo,

¹⁴ ta ya ndixa kua xa ku̱ndaa loꞌo ini ndo xiꞌin ya xa ndi̱kaꞌan nde xiꞌin ndo. Saa tá ná ndiko koo Tata yo Jesucristo ta kusini ni ndo xiꞌin nde, saa tu ndeꞌe va kusini ni nde xiꞌin ndo.

¹⁵ Ta xaꞌa ya ndáa ni ini i ya kuchiñu ndo kundaa ini ndo xiꞌin ya ndi̱kaꞌan i xiꞌin ndo, yakan ndi̱kani ini i xaa i koto i ndóꞌo̱, ta vaꞌa ni kee ndo, chi uvi ichí vi xaa i nuu ndo.

¹⁶ Ta ya ndi̱kani ini i kua, tá ná kuꞌun i chí estado Macedonia, ta xiꞌna ndóꞌo̱ yaꞌa i koto i ñuu Corinto, saa yaꞌa i kuꞌun i chí ikán. Tá ná ndiko koo i ta yaꞌa tuku i nuu ndo, káꞌán i. Chi ndi̱kani ini i ya chindee taꞌan loꞌo ndo xiꞌin i ya kuchiñu ndiko koo i kuꞌun i chí estado Judea, káꞌán i, ta köo ndi̱kuvi xaa i nuu ndo.

¹⁷ Ta ¿án ndíkani ini ndo ya köo ndi̱kiꞌin vaꞌa i kuenta tá kivi ndi̱kani ini i xaa i koto i ndóꞌo̱, túvi ndo? ¿Án xíka ini ndo xaꞌa i ya uvi yuꞌu i, ta íkan i tá íkan na ñuu ivi yóꞌó, tá káꞌan na: “vaꞌa va”, káchi na, ta iin naꞌa loꞌo ta xa káꞌan tuku na “küvi vi”, káchi tuku na. Sundi yeꞌe, ta köo ndi̱kan i saa xiꞌin ndo.

¹⁸ Mií Ndioxi ku ra xíni xaꞌa ya káꞌan nde xiꞌin ndo ya ndaa ni kua káꞌan nde xiꞌin ndo, chi ndeꞌe tá káꞌan nde xiꞌin ndo ta köo iin káchi káꞌan nde: “Vaꞌa va”, án “Küvi vi”, káchi nde xiꞌin ndo.

¹⁹ Saa chi ra ñani yo ra Silvano xiꞌin ra Timoteo tin yeꞌe, ta ndi̱kaꞌan ndoso nde xiꞌin ndo xaꞌa Tata yo Jesucristo, ra kúu Seꞌe Ndioxi. Ta köo uvi yuꞌu ra, nina ya ndaa káꞌan ra ndiꞌi saa kivi, ta ndixa síxinu ra tuꞌun káꞌan ra.

²⁰ Saa chi mií ra ku ra síxinu ndiꞌi ya ndi̱kaꞌan Ndioxi taxi ra ndaꞌa yo. Xaꞌa ya ñaa kua tá xáa kaꞌnu yo Ndioxi ta káꞌan yo soꞌva: “Saa ná koo”, káchi yo, chi tixin mií Jesucristo kua káꞌan yo saa.

²¹ Ta mií Ndioxi ku ra ndíkuiin xaꞌa ndóꞌo̱ tin ndeꞌe ya si̱kitaꞌan mani ra yoo, ta ndi̱kitaꞌan vaꞌa yo xiꞌin Jesucristo ta saa nda̱sa i̱í ra yoo.

²² Saa chi̱nuu ra tuni ra mií yo ta ya yóꞌó kúu Tachi I̱í ra ya ta̱xi ra ndaꞌa yo íyo xiꞌin yo. Ya yóꞌó kua xiꞌna ta̱xi ra ndaꞌa yo chi kúni ra ná kundaa ini yo ya ndixa kua sixinu ra ya ndi̱kaꞌan ra taxi ra ndaꞌa yo.

²³ Ta mií Ndioxi ku ra ndíkuiin xaꞌa ya káꞌan i xiꞌin ndo, ndá xaꞌa kua köo ndi̱xaa i nuu ndo ñuu Corinto koto i ndóꞌo̱, chi köo ndi̱kuni i kaꞌan i xiꞌin ndo ndá ka tuꞌun uꞌvi, ya sitikueꞌe i ndóꞌo̱, ta xaꞌa ya ñaa kua köo ndi̱xaa i nuu ndo.

²⁴ Ta ya ñaa ta köo kúni kachi ya, xáꞌnda ni nde nuu ndo xaꞌa kuꞌva ya ndáa ini ndo xíni ndo Ndioxi, chi ndóꞌo̱ ta xa ndee ni va ndáa ini ndo xíni ndo ra, ta ndisaa ya kúni ndeꞌe kua, iin káchi xaa chiñu nde xiꞌin ndo nuu chindee taꞌan nde xiꞌin va ndo ya ná kusini ni ndo.