1 Timoteo 6 - Xochapa Mixteco

Soꞌva xíniñuꞌu yo ikan yo xiꞌin na kúnaꞌnu nuu yo

¹ Saa ndóꞌo̱ ñani yo xiꞌin kuꞌva yo, ndo xáa chiñu xiꞌin ya nduxa, xíniñuꞌu ndo xaa toꞌo ni ndo xitoꞌo ndo, na xáa chiñu ndo xiꞌin ya nduxa nuu ya ná käꞌan väꞌa naꞌa, na köo xíni Iva yo Ndioxi, xaꞌa ra, ni käꞌan väꞌa na xaꞌa tuꞌun ra ya sínaꞌa yo.

² Saa na xáa chiñu nuu xitoꞌo na, ra kándixa Tata yo Jesucristo, xíniñuꞌu na xaa toꞌo ni na xitoꞌo na, xaꞌa ya kúu ra ñani yo, ra kándixa Tata yo Jesucristo. Ta ndee ni ka vaꞌa xíniñuꞌu na chikaa ni na ndee ya xaa chiñu vií ni na nuu ra, chi ñani yo ra kúꞌvi ni ini yo xíni yo ku ra, ta ra ikán ku ra níꞌi ni ya vaꞌa xaꞌa chiñu ya íkan na nuu ra. Ñani yo Timoteo ya yóꞌó kua xíniñuꞌu un sinaꞌa un na veꞌe ñuꞌu, saa kaꞌan un xiꞌin na, xaꞌa un ndee xiꞌin na.

Ná koo yo tá kuꞌva kúni Ndioxi, ta ná kütoo ni yo ya kuika íyo ñuu ivi yóꞌó

³ Tá íyo sava na síin ni sínaꞌa, ta köo sínaꞌa na tá kuꞌva si̱naꞌa Tata yo Jesucristo, chi ya si̱naꞌa Tata yo, ta ya ndaa ni kua, ya káꞌan xaꞌa ya vívií ni ná koo yo nuu Ndioxi kua.

⁴ Chi nda maestro ikán ta ndee ni kútai ini nda xiꞌin mií nda. Ta nda loꞌo köo xíni nda. Xaꞌa ya nina kútoo nda kaꞌan kuachi nda xiꞌin naꞌa unkua káꞌan iin iin nuu tuꞌun xaꞌa ya ikán kua xáa nda táva nda kuachi xiꞌin na veꞌe ñuꞌu, xáa na kûní ini na xíni taꞌan na, síkani taꞌan nda na, káꞌan kini na xiꞌin taꞌan na, ndíkani väꞌa ini na xíni taꞌan na,

⁵ ndiꞌi saa ichí kánitaꞌan nda xiꞌin tuꞌun ya köo ndáa yaꞌvi. Chi köo ka vi ya xínituni nda, nda xa ndi̱yaꞌa vaꞌa ini va ku nda, köo xíni nda ya ndaa, köo íyo vaꞌa ka ini nda, xaꞌa ya ikán kua ku̱xika nda nuu ya ndaa. Saa ndíkani ini nda ya ndukuika ni nda xaꞌa ya ndíkun nda ichí Tata yo Jesucristo. Ta kütaꞌan un xiꞌin nda ñaa, vaꞌa kuxika un nuu nda.

⁶ Chi ya ndixa kua vaꞌa ni kée yo xaꞌa ya ndíkun yo Tata yo Jesucristo, tá tu íyo vaꞌa ni ini yo xiꞌin ndisaa ñaꞌa ya xa kúu mií yo, ta köo xíka ka ini yo koo ni ka ñaꞌa yo.

⁷ Chi tá kivi ka̱ku yo ñuu ivi yóꞌó, ta nda iin ñaꞌa köo ndíso yo xa̱a yo, ta saa tá ná kuvi yo, ta nda iin ñaꞌa kündiso yo kuꞌun xiꞌin yo.

⁸ Yakan kua ná kusini ni yo tá íyo ñaꞌa xíxi yo tin íyo toto ndíxi yo, ya xa vaꞌa ni kua ñaa va.

⁹ Chi naꞌa, na kúni ndukuika ni ñuu ivi yóꞌó, ta ìyo ni sindaꞌvi ya väꞌa na, saa koyo na nuu kuachi, chi kuaꞌa ni ya väꞌa ndíkani ini na xaꞌa ta ni süvi ya ndáa yáꞌvi kua, takua sítivi na mií na xiꞌin ya, ta xáa na kuaꞌan na ichí nuu ndiꞌi xaꞌa na.

¹⁰ Ta väꞌa kutoo naꞌa ndukuika ni na, chi kuaꞌa ni nuu tindoꞌo káku xiꞌin ya kuika. Xaꞌa ya kútoo ni sava na ndukuika na kua ku̱xika na ichí Tata yo Jesucristo, köo ndáa ka ini na xíni na ra saa xa̱á na ndi̱kiꞌvi na kuaꞌa ni nuu tindoꞌo.

Káꞌan ra Pablo xiꞌin ra Timoteo ya ná koo vií ra

¹¹ Sundi yóꞌo̱, ñani yo Timoteo, ta ïkan un saa, vaꞌa kuxika un nuu ya ñaa chi ra xáa chiñu nuu Ndioxi kúu un, ta xaꞌa ni un ndee ya ikan un ndisaa ya vaꞌa, ya ndaa kúni Ndioxi saa kundaa ni ini un kuni un ra, ta kuꞌvi ni ini un kuni un naꞌa, ta xaꞌa ndee ini un xiꞌin ndiꞌi ndá ka tindoꞌo ya vaxi nuu un, vií koo un xiꞌin ndiꞌi na.

¹² Xaꞌa ya ndáa ni ini un xíni un Tata yo Jesucristo, ta tá káa iin ra kéꞌe taꞌan saa káa un, chikaa ni ka un ndee ikan un tá kuꞌva íkan iin ra lapa ra ndee ni chíkaa ndee tá kuaꞌan ra nuu kuachi. Ta saa ikan un ya ná kuchiñu un niꞌi un koo un xiꞌin Ndioxi ndiꞌi saa kivi ya vaxi. Chi xaꞌa ya kutaku un xiꞌin ra kua ka̱na ra yóꞌo̱, ta nuu ndiꞌi na kua ki̱ndoo un ya xaa súvi un tuꞌun ra ya kándixa un.

¹³ Ta nuu Ndioxi ra táxi táku ndiꞌi ñaꞌa ñuu ivi yóꞌó kua xáꞌnda chiñu i nuu un, xiꞌin nuu Tata yo Jesucristo kua xáꞌnda chiñu i nuu un, chi Jesucristo ku ra ndi̱kuiin xaꞌa ya ndaa tá kivi xi̱ndichi ra nuu ra Poncio Pilato,

¹⁴ yakan káꞌan i xiꞌin un ya ná xaa súvi un ndiꞌi ñaꞌa tá íyo ya ndi̱kaꞌan i xiꞌin un, saa ikan un ya ná köo naꞌa kanaꞌa xaꞌa un. Ta kuꞌva saa ikan un nda kivi ná ndiko koo Tata yo Jesucristo.

¹⁵ Chi tá ná tindaa kivi ya kúni mií Iva yo Ndioxi, ta saa kua ndiko koo Tata yo Jesucristo kixi ra ñuu ivi yóꞌó. Ta ná kunuu sukun ni ya toꞌo Iva yo Ndioxi, ra íyo ichí ndaꞌa xaꞌa ndiꞌi ni kúu ñaꞌa. Saa xáꞌnda chiñu ra nuu ndiꞌi nda kúu rey, ta xáꞌnda chiñu tu ra nuu ndiꞌi na naꞌnu ñuu ivi yóꞌo̱ va.

¹⁶ Ta iin mituꞌun mií Ndioxi ku ra táku ndiꞌi saa kivi, köo xíꞌi ra yáꞌa ni vi yéꞌe̱ nuu íyo ra, yakan nda iin na köo kúchiñu kuyati nuu ra. Ta nda iin naꞌa täꞌan kuni xiꞌin nuu na ra, ta ni küvi kuni na ra. Ná ndikiꞌin ni ra ikán ya toꞌo, ta saa ná xaa kaꞌnu ni ndiꞌi naꞌa ra, saa chi yáꞌa ni ndee kúu mií ra, ta ndiꞌi saa kivi kuu mií ra ya! Saa ná koo.

¹⁷ Ta vaꞌa kaꞌan un xiꞌin nda ñani yo, nda kuika ni ñuu ivi yóꞌó, ya ná küu taa ni ini nda xiꞌin ya kuika kúu mií nda, ni ná chïkaa ni ini nda xiꞌin ya chi ya ndíꞌi xaꞌa va kua. Vaꞌa ka ná kandixa ni nda Ndioxi, saa chi mií ra ku ra táxi ndiꞌi ñaꞌa ya xíniñuꞌu ni yo ndaꞌa yo.

¹⁸ Vaꞌa kaꞌan un xiꞌin nda ñani yo, nda ndúkuika ni, ya xíniñuꞌu nda ikan ni nda ya vaꞌa. Ta ná küxiꞌnda nda, ná kusini ni nda nditaꞌvi nda ñaꞌa nda xiꞌin inka naꞌa.

¹⁹ Tá tu íkan nda saa, ta saa kua ndixa niꞌi nda ya koo nda kutaku nda xiꞌin Ndioxi kivi vaxi, chi ikán kua chívaꞌa nda ya kuika kúu mií nda.

Ya yóꞌó ku tuꞌun sindiꞌi ndi̱kaꞌan ra Pablo xiꞌin ra Timoteo

²⁰ Ñani yo Timoteo, chikaa ni un ndee ya xaa súvi un chiñu ya ta̱xi Ndioxi ndaꞌa un. Ta küni soꞌo un tuꞌun síki, ya köo ndáa yaꞌvi ya káꞌan naꞌa, na káꞌan ndee ni ndíchi na, xíni ni na tuꞌun Ndioxi, saa íyo ni ya xínituni na, káchi na, ta süvi ya ndaa kua ya síki va kua káꞌan na.

²¹ Chi sava na taꞌan yo xaꞌa ya xi̱ni soꞌo na ya ndi̱kaꞌan na ikán xiꞌin na, yakan ku̱xika na köo ndá ka ini na xíni na Tata yo Jesucristo. Ta mií ra ná chikaa ni ya vaꞌa yóꞌo̱. Saa ná koo.